युद्धकाण्डम्Yuddha Kāṇḍa

śrutvā tu bhīmanirhrādaṁ śakrāśanisamasvanam ।
vīkṣamāṇā diśaḥ sarvā dudruvurvānararṣabhāḥ ।
6.82.1 ॥

tānuvāca tataḥsarvān hanumān mārutātmajaḥ ।
viṣaṇṇavadanān dīnāṁstrastān vidravataḥ pṛthak ।
6.82.2 ॥

kasmādviṣaṇṇavadanā vidravadhve plavaṅgamāḥ ।
tyaktayuddhasamutsāhāḥ śūratvaṁ kvanu vo gatam ।
6.82.3 ॥

pṛṣṭhato 'nuvrajadhvaṁ māmagrato yāntamāhave ।
śūrairabhijanopetairayuktaṁ hi nivartitum ।
6.82.4 ॥

evamuktāḥ susaṁhṛṣṭā vāyuputreṇa vānarāḥ ।
śailaśṛṅgāṇyagāṁścaiva jagṛhurhṛṣṭamānasāḥ ।
6.82.5 ॥

abhipetuśca garjanto rākṣasān vānararṣabhāḥ ।
parivārya hanūmantamanvayuśca mahāhave ।
6.82.6 ॥

sa tairvānaramukhyaiśca hanumān sarvato vṛtaḥ ।
hutāśana ivārciṣmānadahacchatruvāhinīm ।
6.82.7 ॥

sa rākṣasānāṁ kadanaṁ cakāra sumahākapiḥ ।
vṛto vānarasainyena kālāntakayamopamaḥ ।
6.82.8 ॥

sa tu kopena cāviṣṭaḥ śokena ca mahākapiḥ ।
hanumān rāvaṇirathe 'pātayanmahatīṁ śilām ।
6.82.9 ॥

tāmāpatantīṁ dṛṣṭvaiva rathaḥ sārathinā tadā ।
vidheyāśvasamāyuktaḥ sudūramapavāhitaḥ ।
6.82.10 ॥

tamindrajitamaprāpya rathasthaṁ sahasārathim ।
viveśadharaṇīṁ bhittvā sā śilā vyarthamudyatā ।
6.82.11 ॥

pātitāyāṁ śilāyāṁ tu rakṣasāṁ vyathitā camūḥ ।
nipatantyā ca śilayā rākṣasā mathitā bhṛśam ।
6.82.12 ॥

tamabhyadhāvañchataśo nadantaḥ kānanaukasaḥ ।
6.82.13 ॥

te drumāṁśca mahāvīryā giriśṛṅgāṇi codyatāḥ ।
kṣipantīndrajitaḥ saṅkhye vānarā bhīmavikramāḥ ।
6.82.14 ॥

vṛkṣaśailamahāvarṣaṁ visṛjantaḥ plavaṅgamāḥ ।
śatrūṇāṁ kadanaṁ cakrurneduśca vividhaiḥ svaraiḥ ।
6.82.15 ॥

vānaraistairmahāvīryairghorarūpā niśācarāḥ ।
vīryādabhihatā vṛkṣairvyaveṣṭanta raṇājire ।
6.82.16 ॥

svasainyamabhivīkṣyātha vānarārditamindrajit ।
pragṛhītāyudhaḥ kruddhaḥ parānabhimukho yayau ।
6.82.17 ॥

sa śaraughānavasṛjan svasainyenābhisaṁvṛtaḥ ।
jaghāna kapiśārdūlān sa bahūn dṛṣṭavikramaḥ ।
6.82.18 ॥

śūlairaśanibhiḥ khaḍgaiḥ paṭṭiśaiḥ kūṭamudgaraiḥ ।
te cāpyanucarāstasya vānarān jaghnurojasā ।
6.82.19 ॥

saskandhaviṭapaiḥ sālaiḥ śilābhiśca mahābalaḥ ।
hanumān kadanaṁ cakre rakṣasāṁ bhīmakarmaṇām ।
6.82.20 ॥

sa nivārya parānīkamabravīttān vanaukasaḥ ।
hanumān sannivartadhvaṁ na naḥ sādhyamidaṁ balam ।
6.82.21 ॥

tyaktvā prāṇān viveṣṭanto rāmipriyacikīrṣavaḥ ।
yannimittaṁ hi yuddhyāmo hatā sā janakātmajā ।
6.82.22 ॥

imamarthaṁ hi vijñāpya rāmaṁ sugrīvameva ca ।
tau yat pratividhāsyete tat kariṣyāmahe vayam ।
6.82.23 ॥

ityuktvā vānaraśreṣṭho vārayan sarvavānarān ।
śanaiḥ śanairasaṁtrastaḥ sabalaḥ sannyavartata ।
6.82.24 ॥

tataḥ prekṣya hanūmantaṁ vrajantaṁ yatra rāghavaḥ ।
sa hotukāmo duṣṭātmā gataścaityanikumbhilām ।
6.82.25 ॥

nikumbhilāmadhiṣṭhāya pāvakaṁ juhavendrajit ।
6.82.26 ॥

yajñabhūmyāṁ tu vidhivat pāvakastena rakṣasā ।
hūyamānaḥ prajajvāla māṁsaśoṇitabhuk tadā ।
6.82.27 ॥

so 'rciḥpinaddho dadṛśe homaśoṇitatarpitaḥ ।
sandhyāgata ivādityaḥ sutīvro 'gniḥ samutthitaḥ ।
6.82.28 ॥

athendrajidrākṣasabhūtaye tu juhāva havyaṁ vidhinā vidhānavit ।
dṛṣṭvā vyatiṣṭhanta ca rākṣasāste mahāsamūheṣu nayānayajñāḥ ।
6.82.29 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe dvyaśītatamaḥ sargaḥ ।
82 ॥