युद्धकाण्डम्Yuddha Kāṇḍa

rāghavaścāpi vipulaṁ taṁ rākṣasavanaukasām ।
śrutvā saṅgrāmanirghoṣaṁ jāmbavantamuvāca ha ।
6.83.1 ॥

saumya nūnaṁ hanumatā kriyate karma duṣkaram ।
śrūyate hi yathā bhīmaḥ sumahānāyudhasvanaḥ ।
6.83.2 ॥

tadgaccha kuru sāhāyyaṁ svabalenābhisaṁvṛtaḥ ।
kṣipramṛkṣapate tasya kapiśreṣṭhasya yudhyataḥ ।
6.83.3 ॥

ṛkṣārājastathoktastu svenānīkena saṁvṛtaḥ ।
āgacchat paścimaṁ dvāraṁ hanumān yatra vānaraḥ ।
6.83.4 ॥

athāyāntaṁ hanūmantaṁ dadarśarkṣapatiḥ pathi ।
vānaraiḥ kṛtasaṅgrāmaiḥ śvasadbhirabhisaṁvṛtam ।
6.83.5 ॥

dṛṣṭvā pathi hanūmāṁśca tadṛkṣabalamudyatam ।
nīlameghanibhaṁ bhīmaṁ sannivārya nyavartata ।
6.83.6 ॥

sa tena harisainyena sannikarṣaṁ mahāyaśāḥ ।
śīghramāgamya rāmāya duḥkhito vākyamabravīt ।
6.83.7 ॥

samare yuddhyamānānāmasmākaṁ prekṣatāṁ puraḥ ।
jaghāna rudatīṁ sītāmindrijidrāvaṇātmajaḥ ।
6.83.8 ॥

udbhrāntacittastāṁ dṛṣṭvā viṣaṇṇo 'hamarindama ।
tadahaṁ bhavato vṛttaṁ vijñāpayitumāgataḥ ।
6.83.9 ॥

tasya tadvacanaṁ śrutvā rāghavaḥ śokamūrcchitaḥ ।
nipapāta tadā bhūmau chinnamūla iva drumaḥ ।
6.83.10 ॥

taṁ bhūmau devasaṅkāśaṁ patitaṁ prekṣya rāghavam ।
abhipetuḥ samutpatya sarvataḥ kapisattamāḥ ।
6.83.11 ॥

asiñcan salilaiścainaṁ padmotpalasugandhibhiḥ ।
pradahantamanāsādyaṁ sahasā 'gnimivocchikham ।
6.83.12 ॥

taṁ lakṣmaṇo 'tha bāhubhyāṁ pariṣvajya suduḥkhitaḥ ।
uvāca rāmamasvasthaṁ vākyaṁ hetvarthasaṁyutam ।
6.83.13 ॥

śubhe vartmani tiṣṭhantaṁ tvāmārya vijitendriyam ।
anarthebhyo na śaknoti trātuṁ dharmo nirarthakaḥ ।
6.83.14 ॥

bhūtānāṁ sthāvarāṇāṁ ca jaṅgamānāṁ ca darśanam ।
yathā 'sti na tathā dharmastena nāstīti me matiḥ ।
6.83.15 ॥

yathaiva sthāvaraṁ vyaktaṁ jaṅgamaṁ ca tathāvidham ।
nāyamarthastathā yuktastvadvidho na vipadyate ।
6.83.16 ॥

yadyadharmo bhavedbhūto rāvaṇo narakaṁ vrajet ।
bhavāṁśca dharmayukto vai naivaṁ vyasanamāpnuyāt ।
6.83.17 ॥

tasya ca vyasanābhāvād vyasanaṁ ca gate tvayi ।
dharmo bhavatyadharmaśca parasparavirodhinau ।
6.83.18 ॥

dharmeṇopalabheddharmamadharmaṁ cāpyadharmataḥ ।
yadyadharmeṇa yujyeyuryeṣvadharmaḥ pratiṣṭhitaḥ ।
6.83.19 ॥

yadi dharmeṇa yujyerannādharmarucayo janāḥ ।
dharmeṇa caratāṁ dharmastathā caiṣāṁ phalaṁ bhavet ।
6.83.20 ॥

yasmādarthā vivardhante yeṣvadharmaḥ patiṣṭhitaḥ ।
kliśyante dharmaśīlāśca tasmādetau nirarthakau ।
6.83.21 ॥

vadhyante pāpakarmāṇo yadyadharmeṇa rāghava ।
vadhakarma hato 'dharmaḥ sa hataḥ kaṁ vadhiṣyati ।
6.83.22 ॥

athavā vihitenāyaṁ hanyate hanti vā param ।
vidhirālipyate tena na sa pāpena karmaṇā ।
6.83.23 ॥

adṛṣṭapratikāreṇa tvavyaktenāsatā satā ।
kathaṁ śakyaṁ paraṁ prāptuṁ dharmeṇārivikarśana ।
6.83.24 ॥

yadi sat syāt satāṁ mukhya nāsat syāttava kiñcana ।
tvayā yadīdṛśaṁ prāptaṁ tasmāt sannopapadyate ।
6.83.25 ॥

athavā durbalaḥ klībo balaṁ dharmo 'nuvartate ।
durbalo hṛtamaryādo na sevya iti me matiḥ ।
6.83.26 ॥

balasya yadi ceddharmo guṇabhūtaḥ parākrame ।
dharmamutsṛjya vartasva yathā dharme tathā bale ।
6.83.27 ॥

atha cet satyavacanaṁ dharmaḥ kila parantapa ।
anṛtastvayyakaruṇaḥ kiṁ na baddhastvayā pitā ।
6.83.28 ॥

yadi dharmo bhavedbhūto adharmo vā parantapa ।
na sma hatvā muniṁ vajrī kuryādijyāṁ śatakratuḥ ।
6.83.29 ॥

adharmasaṁśrito dharmo vināśayati rāghava ।
sarvametadyathākāmaṁ kākutstha kurute naraḥ ।
6.83.30 ॥

mama cedaṁ mataṁ tāta dharmo 'yamiti rāghava ।
dharmamūlaṁ tvayā chinnaṁ rājyamutsṛjatā tadā ।
6.83.31 ॥

arthebhyo hi vivṛddhebhyaḥ saṁvṛttebhyastatastataḥ ।
kriyāḥ sarvāḥ pravartante parvatebhya ivāpagāḥ ।
6.83.32 ॥

arthena hi viyuktasya puruṣasyālpatejasaḥ ।
vyucchidyante kriyāḥ sarvā grīṣme kusarito yathā ।
6.83.33 ॥

so 'yamarthaṁ parityajya sukhakāmaḥ sukhaidhitaḥ ।
pāpamārabhate kartuṁ tato doṣaḥ pravartate ।
6.83.34 ॥

yasyārthāstasya mitrāṇi yasyārthāstasya bāndhavāḥ ।
yasyārthāḥ sa pumān loke yasyārthāḥ sa ca paṇḍitaḥ ।
6.83.35 ॥

yasyārthāḥ sa ca vikrānto yasyārthāḥ sa ca buddhimān ।
yasyārthāḥ sa mahābhāgo yasyārthāḥ sa mahāguṇaḥ ।
6.83.36 ॥

arthasyaite parityāge doṣāḥ pravyāhṛtā mayā ।
rājyamutsṛjatā vīra yena buddhistvayā kṛtā ।
6.83.37 ॥

yasyārthā dharmakāmārthāstasya sarvaṁ pradakṣiṇam ।
adhanenārthakāmena nārthaḥ śakyo vicinvatā ।
6.83.38 ॥

harṣaḥ kāmaśca darpaśca dharmaḥ krodhaḥ śamo damaḥ ।
arthādetāni sarvāṇi pravartante narādhipa ।
6.83.39 ॥

yeṣāṁ naśyatyayaṁ lokaścaratāṁ dharmacāriṇām ।
te 'rthāstvayi na dṛśyante durdineṣu yathā grahāḥ ।
6.83.40 ॥

tvayi pravrajite vīra gurośca vacane sthite ।
rakṣasā 'pahṛtā bhāryā prāṇaiḥ priyatarā tava ।
6.83.41 ॥

tadadya vipulaṁ vīra duḥkhamindrajitā kṛtam ।
karmaṇā vyapaneṣyāmi tasmāduttiṣṭha rāghava ।
6.83.42 ॥

uttiṣṭha naraśārdūla dīrghavāho dṛḍhavrata ।
kimātmānaṁ mahātmānamātmānaṁ nāvabudhyase ।
6.83.43 ॥

ayamanagha tavoditaḥ priyārthaṁ janakasutānidhanaṁ nirīkṣya ruṣṭaḥ ।
sahayagajarathāṁ sarākṣasendrāṁ bhṛśamiṣubhirvinipātayāmi laṅkām ।
6.83.44 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe tryaśītitamaḥ sargaḥ ।
83 ॥