युद्धकाण्डम्Yuddha Kāṇḍa

vijñāya tu manastasya rāghavasya mahātmanaḥ ।
sannivṛtyāhavāttasmāt saṁviveśa puraṁ tataḥ ।
6.81.1 ॥

so 'nusmṛtya vadhaṁ teṣāṁ rākṣasānāṁ tarasvinām ।
krodhatāmrekṣaṇaḥ śūro nirjagāma mahādyutiḥ ।
6.81.2 ॥

sa paścimena dvāreṇa niryayau rākṣasairvṛtaḥ ।
indrajittu mahāvīryaḥ paulastyo devakaṇṭakaḥ ।
6.81.3 ॥

indrajittu tato dṛṣṭvā bhrātarau rāmalakṣmaṇau ।
raṇāyābhyudyatau vīrau māyāṁ prāduṣkarottadā ।
6.81.4 ॥

indrajittu rathe sthāpya sītāṁ māyāmayīṁ tataḥ ।
balena mahatā ' 'vṛtya tasyā vadhamarocayat ।
6.81.5 ॥

mohanārthaṁ tu sarveṣāṁ buddhiṁ kṛtvā sudurmatiḥ ।
hantuṁ sītāṁ vyavasito vānarābhimukho yayau ।
6.81.6 ॥

taṁ dṛṣṭvā tvabhiniryāntaṁ nagaryāḥ kānanaukasaḥ ।
utpeturabhisaṅkruddhāḥ śilāhastā yuyutsavaḥ ।
6.81.7 ॥

hanumān puratasteṣāṁ jagāma kapikuñjaraḥ ।
pragṛhya sumahacchṛṅgaṁ parvatasya durāsadam ।
6.81.8 ॥

sa dadarśa hatānandāṁ sītāmindrajito rathe ।
ekaveṇīdharāṁ dīnāmupavāsakṛśānanām ।
6.81.9 ॥

parikliṣṭaikavasanāmamṛjāṁ rāghavapriyām ।
rajomalābhyāmāliptaiḥ sarvagātrairvarastriyam ।
6.81.10 ॥

tāṁ nirīkṣya muhūrtaṁ tu maithilītyadhyavasya tu ।
babhūvāciradṛṣṭā hi tena sā janakātmajā ।
6.81.11 ॥

tāṁ dīnāṁ maladigdhāṅgīṁ rathasthāṁ dṛśya maithilīm ।
bāṣpaparyākulamukho hanumān vyathito 'bhavat ।
6.81.12 ॥

abravīttāṁ tu śokārtāṁ nirānandāṁ tapasvinīm ।
sītāṁ rathasthitāṁ dṛṣṭvā rākṣasendrasutāśritām ।
kiṁ samarthitamasyeti cintayan sa mahākapiḥ ।
6.81.13 ॥

saha tairvānaraśreṣṭhairabhyadhāvata rāvaṇim ।
6.81.14 ॥

tadvānarabalaṁ dṛṣṭvā rāvaṇiḥ krodhamūrcchitaḥ ।
kṛtvā vikośaṁ nistriṁśaṁ mūrdhni sītāṁ parāmṛśat ।
6.81.15 ॥

tāṁ striyaṁ paśyatāṁ teṣāṁ tāḍayāmāsa rāvaṇiḥ ।
krośantīṁ rāma rāmeti māyayā yojitāṁ rathe ।
6.81.16 ॥

gṛhītamūrdhajāṁ dṛṣṭvā hanumān dainyamāgataḥ ।
śokajaṁ vāri naitrābhyāmasṛjanmārutātmajaḥ ।
6.81.17 ॥

tāṁ dṛṣṭvā cārusarvāṅgīṁ rāmasya mahiṣīṁ priyām ।
abravīt paruṣaṁ vākyaṁ krodhādrakṣodhipātmajam ।
6.81.18 ॥

durātmannātmanāśāya keśapakṣe parāmṛśaḥ ।
brahmarṣīṇāṁ kule jāto rākṣasīṁ yonimāśritaḥ ।
6.81.19 ॥

dhik tvāṁ pāpasamācāraṁ yasya te matirīdṛśī ।
6.81.20 ॥

nṛśaṁsānārya durvṛtta kṣudra pāpaparākrama ।
anāryasyedṛśaṁ karma ghṛṇā te nāsti nirghṛṇa ।
6.81.21 ॥

cyutā gṛhācca rājyācca rāmahastācca maithilī ।
kiṁ tavaiṣā 'parāddhā hi yadenāṁ hantumicchasi ।
6.81.22 ॥

sītāṁ ca hatvā na ciraṁ jīviṣyasi kathañcana ।
vadhārha karmaṇā 'nena mama hastagato hyasi ।
6.81.23 ॥

ye ca strīghātināṁ lokā lokavadhyeṣu kutsitāḥ ।
iha jivitamutsṛjya pretya tān pratipatsyase ।
6.81.24 ॥

iti bruvāṇo hanumān sāyudhairharibhirvṛtaḥ ।
abhyadhāvata saṅkruddho rākṣasendrasutaṁ prati ।
6.81.25 ॥

āpatantaṁ mahāvīryaṁ tadanīkaṁ vanaukasām ।
rakṣasāṁ bhīmavegānāmanīkaṁ tu nyavārayat ।
6.81.26 ॥

sa tāṁ bāṇasahasreṇa vikṣobhya harivāhinīm ।
hariśreṣṭhaṁ hanūmantamindrajit pratyuvāca ha ।
6.81.27 ॥

sugrīvastvaṁ ca rāmaśca yannimittamihāgatāḥ ।
tāṁ haniṣyāmi vaidehīmadyaiva tava paśyataḥ ।
6.81.28 ॥

imāṁ hatvā tato rāmaṁ lakṣmaṇaṁ tvāṁ ca vānara ।
sugrīvaṁ ca vadhiṣyāmi taṁ cānāryaṁ vibhīṣaṇam ।
6.81.29 ॥

na hantavyāḥ striyaśceti yadbravīṣi plavaṅgama ।
pīḍākaramamitrāṇāṁ yat syāt kartavyameva tat ।
6.81.30 ॥

tamevamuktvā rudatīṁ sītāṁ māyāmayīṁ tadā ।
śitadhāreṇa khaḍgena nijaghānendrajit svayam ।
6.81.31 ॥

yajñopavītamārgeṇa bhinnā tena tapasvinī ।
sā pṛthivyāṁ pṛthuśroṇī papāta priyadarśanā ।
tāmindrajitsvayaṁ hatvā hanumantamuvāca ha ।
6.81.32 ॥

mayā rāmasya paśyemāṁ kopena ca niṣūditām ।
eṣā viśastā vaidehī viphalo vaḥ pariśramaḥ ।
6.81.33 ॥

tataḥ khaḍgena mahatā hatvā tāmindrijit svayam ।
hṛṣṭaḥ sa rathamāsthāya vinanāda mahāsvanam ।
6.81.34 ॥

vānarāḥ śuśruvuḥ śabdamadūre pratyavasthitāḥ ।
vyāditāsyasya nadatastahurgaṁ saṁśritasya ca ।
6.81.35 ॥

tathā tu sītāṁ vinihatya durmatiḥ prahṛṣṭacetāḥ sa babhūva rāvaṇiḥ ।
taṁ hṛṣṭarūpaṁ samudīkṣya vānarā viṣaṇṇarūpāḥ sahasā pradudruvuḥ ।
6.81.36 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe ekāśītitamaḥ sargaḥ ।
81 ॥