युद्धकाण्डम्Yuddha Kāṇḍa

makarākṣaṁ hataṁ śrutvā rāvaṇaḥ samitiñjayaḥ ।
krodhena mahatā ' 'viṣṭo dantān kaṭakaṭāpayan ।
6.80.1 ॥

kupitaśca tadā tatra kiṁ kāryamiti cintayan ।
ādideśātha saṅkruddho raṇāyendrajitaṁ sutam ।
6.80.2 ॥

jahi vīra mahāvīryau bhrātarau rāmalakṣmaṇau ।
adṛśyo dṛśyamāno vā sarvathā tvaṁ balādhikaḥ ।
6.80.3 ॥

tvamapratimakarmāṇamindraṁ jayasi saṁyuge ।
kiṁ punarmānuṣau dṛṣṭvā na vadhiṣyasi saṁyuge ।
6.80.4 ॥

tathokto rākṣasendreṇa pratigṛhya piturvacaḥ ।
yajñabhūmau sa vidhivat pāvakaṁ juhavendrajit ।
6.80.5 ॥

juhvataścāpi tatrāgniṁ raktoṣṇīṣadharāḥ striyaḥ ।
ājagmustatra sambhrāntā rākṣasyo yatra rāvaṇiḥ ।
6.80.6 ॥

śastrāṇi śarapatrāṇi samidho 'tha vibhītakāḥ ।
lohitāni ca vāsāṁsi sruvaṁ kārṣṇāyasaṁ tathā ।
6.80.7 ॥

sarvato 'gniṁ samāstīrya śarapatraiḥ satomaraiḥ ।
chāgasya kṛṣṇavarṇasya galaṁ jagrāha jīvitaḥ ।
6.80.8 ॥

sakṛdeva samiddhasya vidhūmasya mahārciṣaḥ ।
babhūvustāni liṅgāni vijayaṁ darśayanti ca ।
6.80.9 ॥

pradakṣiṇāvartaśikhastaptahāṭakasannibhaḥ ।
havistat pratijagrāha pāvakaḥ svayamutthitaḥ ।
6.80.10 ॥

hutvā 'gniṁ tarpayitvā ca devadānavarākṣasān ।
āruroha rathaśreṣṭhamantardhānagataṁ śubham ।
6.80.11 ॥

sa vājibhiścaturbhiśca bāṇaiśca niśitairyutaḥ ।
āropitamahācāpaḥ śuśubhe syandanottamaḥ ।
6.80.12 ॥

jājvalyamāno vapuṣā tapanīyaparicchadaḥ ।
mṛgaiścandrārdhacandraiśca sa rathaḥ samalaṅkṛtaḥ ।
6.80.13 ॥

jāmbūnadamahākamburdīptapāvakasannibhaḥ ।
babhūvendrajitaḥ keturvaiḍūryasamalaṅkṛtaḥ ।
6.80.14 ॥

tena cādityakalpena brahmāstreṇa ca pālitaḥ ।
sa babhūva durādharṣo rāvaṇiḥ sumahābalaḥ ।
6.80.15 ॥

so 'bhiniryāya nagarādindrajit samitiñjayaḥ ।
hutvā 'gniṁ rākṣasairmantrairantardhānagato 'bravīt ।
6.80.16 ॥

adya hatvā raṇe yau tau mithyā pravrājitau vane ।
jayaṁ pitre pradāsyāmi rāvaṇāya raṇārjitam ।
6.80.17 ॥

adya nirvānarāmurvīṁ hatvā rāmaṁ salakṣmaṇam ।
kariṣye paramaprītimityuktvā 'ntaradhīyata ।
6.80.18 ॥

āpapātātha saṅkruddho daśagrīveṇa coditaḥ ।
tīkṣṇakārmukanārācaistīkṣṇastvindraripū raṇe ।
6.80.19 ॥

sa dadarśa mahāvīryo nāgau triśirasāviva ।
sṛjantāviṣujālāni vīrau vānaramadhyagau ।
6.80.20 ॥

imau tāviti sañcintya sajyaṁ kṛtvā ca kārmukam ।
santatāneṣudhārābhiḥ parjanya iva vṛṣṭimān ।
6.80.21 ॥

sa tu vaihāyasaṁ prāpya saratho rāmalakṣmaṇau ।
acakṣurviṣaye tiṣṭhan vivyādha niśitaiḥ saऱaiḥ ।
6.80.22 ॥

tau tasya śaravegena parītau rāmalakṣmaṇau ।
dhanuṣī saśare kṛtvā divyamastraṁ pracakratuḥ ।
6.80.23 ॥

pracchādayantau gaganaṁ śarajālairmahābalau ।
tamastraiḥ sūryasaṅkāśairnaiva paspṛśatuḥ śaraiḥ ।
6.80.24 ॥

sa hi dhūmāndhakāraṁ ca cakre pracchādayannabhaḥ ।
diśaścāntardadhe śrīmānnīhāratamasāvṛtāḥ ।
6.80.25 ॥

naiva jyātalanirghoṣo na ca nemikhurasvanaḥ ।
śaśruve caratastasya na ca rūpaṁ prakāśate ।
6.80.26 ॥

ghanāndhakāre timire śaravarṣamivādbhutam ।
sa vavarṣa mahābāhurnārācaśaravṛṣṭibhiḥ ।
6.80.27 ॥

sa rāmaṁ sūryasaṅkāśaiḥ śarairdattavaro bhṛśam ।
vivyādha samare kruddhaḥ sarvagātreṣu rāvaṇiḥ ।
6.80.28 ॥

tau hanyamānau nārācairdhārābhiriva parvatau ।
hemapuṅkhānnaravyāghrau tigmān mumucatuḥ śarān ।
6.80.29 ॥

antarikṣe samāsādya rāvaṇiṁ kaṅkapatriṇaḥ ।
nikṛtya patagā bhūmau petuste śoṇitokṣitāḥ ।
6.80.30 ॥

atimātraṁ śaraugheṇa pīḍyamānau narottamau ।
tāniṣūn patato bhalleranekairnicakṛntatuḥ ।
6.80.31 ॥

yato hi dadṛśāte tau śarānnipatataḥ śitān ।
tatastu tau dāśarathī sasṛjāte 'stramuttamam ।
6.80.32 ॥

rāvaṇistu diśaḥ sarvā rathenātirathaḥ patan ।
vivyādha tau dāśarathī ladhvastro niśitaiḥ śaraiḥ ।
6.80.33 ॥

tenātividdhau tau vīrau rukmapuṅkhaiḥ susaṁhitaiḥ ।
babhūvaturdāśarathī puṣpitāviva kiṁśukau ।
6.80.34 ॥

nāsya veda gatiṁ kaścinna ca rūpaṁ dhanuḥ śarān ।
na cānyadviditaṁ kiñcit sūryasyevābhrasamplave ।
6.80.35 ॥

tena viddhāśca harayo nihatāśca gatāsavaḥ ।
babhūvuḥ śataśastatra patitā dharaṇītale ।
6.80.36 ॥

lakṣmaṇastu susaṅkruddho bhrātaraṁ vākyamabravīt ।
brāhmamastraṁ prayokṣyāmi vadhārthaṁ sarvarakṣasām ।
6.80.37 ॥

tamuvāca tato rāmo lakṣmaṇaṁ śubhalakṣaṇam ।
6.80.38 ॥

naikasya heto rakṣāṁsi pṛthivyāṁ hantu marhasi ।
ayudhyamānaṁ pracchannaṁ prāñjaliṁ śaraṇāgatam ।
palāyantaṁ pramattaṁ vā na tvaṁ hantumihārhasi ।
6.80.39 ॥

asyaiva tu vadhe yatnaṁ kariṣyāvo mahābala ।
ādekṣyāvo mahāvegānastrānāśīviṣopamān ।
6.80.40 ॥

tamenaṁ māyinaṁ kṣudramantarhitarathaṁ balāt ।
rākṣasaṁ nihaniṣyanti dṛṣṭvā vānarayūthapāḥ ।
6.80.41 ॥

yadyeṣa bhūmiṁ viśate divaṁ vā rasātalaṁ vāpi nabhassthalaṁ vā ।
evaṁ nigūḍho 'pi mamāstradagdhaḥ patiṣyate bhūmitale gatāsuḥ ।
6.80.42 ॥

ityevamuktvā vacanaṁ mahātmā raghupravīraḥ plavagarṣabhairvṛtaḥ ।
vadhāya raudrasya nṛśaṁsakarmaṇastadā mahātmā tvaritaṁ nirīkṣate ।
6.80.43 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe aśītitamaḥ sargaḥ ।
80 ॥