युद्धकाण्डम्Yuddha Kāṇḍa

nirgataṁ makārākṣaṁ te dṛṣṭvā vānarayūthapāḥ ।
āplutya sahasā sarve yoddhukāmā vyavasthitāḥ ।
6.79.1 ॥

tataḥ pravṛttaṁ sumahat tadyuddhaṁ romaharṣaṇam ।
niśācaraiḥ plavaṅgānāṁ devānāṁ dānavairiva ।
6.79.2 ॥

vṛkṣaśūlanipātaiśca śilāparighapātanaiḥ ।
anyonyaṁ mardayanti sma tadā kapiniśācarāḥ ।
6.79.3 ॥

śaktikhaḍgagadākuntaistomaraiśca niśācarāḥ ।
paṭṭiśairbhindipālaiśca nirghātaiśca samantataḥ ।
6.79.4 ॥

pāśamudgaradaṇḍaiśca nikhātaiścāpare tadā ।
kadanaṁ kapivīrāṇāṁ cakruste rajanīcarāḥ ।
6.79.5 ॥

bāṇaughairarditāścāpi kharaputreṇa vānarāḥ ।
sambhrāntamanasaḥ sarve dudruvurbhayapīḍitāḥ ।
6.79.6 ॥

tān dṛṣṭvā rākṣasāḥ sarve dravamāṇān valīmukhān ।
neduste siṁhavaddhṛṣṭā rākṣasā jitakāśinaḥ ।
6.79.7 ॥

vidravatsu tadā teṣu vānareṣu samantataḥ ।
rāmastān vārayāmāsa śaravarṣeṇa rākṣasān ।
6.79.8 ॥

vāritān rākṣasān dṛṣṭvā makarākṣo niśācaraḥ ।
krodhānalasamāviṣṭo vacanaṁ cedamabravīt ।
6.79.9 ॥

tiṣṭha rāma mayā sārdhaṁ dvandvayuddhaṁ dadāmi te ।
tyājayiṣyāmi te prāṇān dhanurmuktaiḥ śitaiḥ śaraiḥ ।
6.79.10 ॥

yattadā daṇḍakāraṇye pitaraṁ hatavān mama ।
madagrataḥ svakarmasthaṁ dṛṣṭvā roṣo 'bhivardhate ।
6.79.11 ॥

dahyante bhṛśamaṅgāni durātman mama rāghava ।
yanmayā 'si na dṛṣṭastvaṁ tasmin kāle mahāvane ।
6.79.12 ॥

diṣṭyā 'si darśanaṁ rāma mama tvaṁ prāptavāniha ।
kāṅkṣito 'si kṣudhārtasya siṁhasyevetaro mṛgaḥ ।
6.79.13 ॥

adya madbāṇavegena pretarāṅviṣayaṁ gataḥ ।
ye tvayā nihatā vīrāḥ saha taiśca sameṣyasi ।
6.79.14 ॥

bahunā 'tra kimuktena śṛṇu rāma vaco mama ।
paśyantu sakalā lokāstvāṁ māṁ caiva raṇājire ।
6.79.15 ॥

astrairvā gadayā vāpi bāhubhyāṁ vā mahāhave ।
abhyastaṁ yena vā rāma tenaiva yudhi vartatām ।
6.79.16 ॥

makarākṣavacaḥ kṣutvā rāmo daśarathātmajaḥ ।
abravīt prahasan vākyamuttarottaravādinam ।
6.79.17 ॥

katthase kiṁ vṛthā rakṣo bahūnyasadṛśāni tu ।
na raṇe śakyate jetuṁ vinā yuddhena vāgbalāt ।
6.79.18 ॥

caturdaśasahasrāṇi rakṣasāṁ tvatpitā ca yaḥ ।
triśirā dūṣaṇaścaiva daṇḍake nihatā mayā ।
6.79.19 ॥

svāśitāstava māṁsena gṛdhragomāyuvāyasāḥ ।
bhaviṣyantyadya vai pāpa tīkṣṇatuṇḍanakhāṅkurāḥ ।
6.79.20 ॥

rāghaveṇaivamuktastu kharaputro niśācaraḥ ।
bāṇaughānamucattasmai rāghavāya raṇājire ।
6.79.21 ॥

tān śarān śaravarṣeṇa rāmaściccheda naikadhā ।
nipeturbhuvi te cchinnā rukmapuṅkhāḥ sahasraśaḥ ।
6.79.22 ॥

tadyuddhamabhavattatra sametyānyonyamojasā ।
rakṣasaḥ kharaputrasya sūnordaśarathasya ca ।
6.79.23 ॥

jīmūtayorivākāśe śabdo jyātalayostadā ।
dhanurmuktaḥ svanotkṛṣṭaḥ śrūyate ca raṇājire ।
6.79.24 ॥

devadānavagandharvāḥ kinnarāśca mahoragāḥ ।
antarikṣagatāḥ sarve draṣṭukāmāstadadbhutam ।
6.79.25 ॥

viddhamanyonyagātreṣu dviguṇaṁ vardhate param ।
kṛtapratikṛtānyonyaṁ kurutāṁ tau raṇājire ।
6.79.26 ॥

rāmamuktāṁstu bāṇaughān rākṣasastvacchinadraṇe ।
rakṣomuktāṁstu rāmo vai naikadhā prācchinaccharaiḥ ।
6.79.27 ॥

bāṇaughairvitatāḥ sarvā diśaśca pradiśastathā ।
sañchannā vasudhā caiva samantānna prakāśate ।
6.79.28 ॥

tataḥ kruddho mahābāhurdhanuściccheda rakṣasaḥ ।
aṣṭābhiratha nārācaiḥ sūtaṁ vivyādha rāghavaḥ ।
6.79.29 ॥

bhittvā śarai rathaṁ rāmo rathāśvān samapātayat ।
viratho vasudhāṁ tiṣṭhan makarākṣo niśācaraḥ ।
6.79.30 ॥

tattiṣṭhadvasudhāṁ rakṣaḥ śūlaṁ jagrāha pāṇinā ।
trāsanaṁ sarvabhūtānāṁ yugāntāgnisamaprabham ।
6.79.31 ॥

vibhrāmya tu mahacchūlaṁ prajvalattanniśācaraḥ ।
sa krodhāt prāhiṇottasmai rāghavāya mahāhave ।
6.79.32 ॥

tamāpatantaṁ jvalitaṁ kharaputrakarāccyutam ।
bāṇaistu tribhirākāśe śūlaṁ ciccheda rāghavaḥ ।
6.79.33 ॥

sa cchinno naikādhā śūlo divyahāṭakamaṇḍitaḥ ।
vyaśīryata maholkeva rāmabāṇārdito bhuvi ।
6.79.34 ॥

tacchūlaṁ nihataṁ dṛṣṭvā rāmeṇākliṣṭakarmaṇā ।
sādhu sādhviti bhūtāni vyāharanti nabhogatā ।
6.79.35 ॥

taṁ dṛṣṭvā nihataṁ śūlaṁ makārākṣo niśācaraḥ ।
muṣṭimudyamya kākutsthaṁ tiṣṭha tiṣṭheti cābravīt ।
6.79.36 ॥

sa taṁ dṛṣṭvā patantaṁ vai prahasya raghunandanaḥ ।
pāvakāstraṁ tato rāmaḥ sandadhe tu śarāsane ।
6.79.37 ॥

tenāstreṇa hataṁ rakṣaḥ kākutsthena tadā raṇe ।
sañchinnahṛdayaṁ tatra papāta ca mamāra ca ।
6.79.38 ॥

dṛṣṭvā te rākṣasāḥ sarve makarākṣasya pātanam ।
laṅkāmevābhyadhāvanta rāmabāṇārditāstadā ।
6.79.39 ॥

daśarathanṛpaputrabāṇavegai rajanicaraṁ nihataṁ kharātmajaṁ tam ।
dadṛśuratha surā bhṛśaṁ prahṛṣṭā girimiva vajrahataṁ yathā vikīrṇam ।
6.79.40 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe ekonāśītitamaḥ sargaḥ ।
79 ॥