युद्धकाण्डम्Yuddha Kāṇḍa

nikumbhaṁ ca hataṁ śrutvā kumbhaṁ ca vinipātitam ।
rāvaṇaḥ paramāmarṣī prajajvālānalo yathā ।
6.78.1 ॥

nairṛtaḥ krodhaśokābhyāṁ dvābhyāṁ tu parimūrcchitaḥ ।
kharaputraṁ viśālākṣaṁ makarākṣamacodayat ।
6.78.2 ॥

gaccha putra mayā ' 'jñapto balenābhisamanvitaḥ ।
rāghavaṁ lakṣmaṇaṁ caiva jahi tāṁśca vanaukasaḥ ।
6.78.3 ॥

rāvaṇasya vacaḥ śrutvā śūramānī kharātmajaḥ ।
bāḍhamityabravīddhṛṣṭo makārākṣo niśācaraḥ ।
6.78.4 ॥

so 'bivādya daśagrīvaṁ kṛtvā cāpi pradakṣiṇam ।
nirjagāma gṛhācchubhrādrāvaṇasyājñayā balī ।
6.78.5 ॥

samīpasthaṁ balādhyakṣaṁ kharaputro 'bravīdidam ।
rathaścānīyatāṁ śīghraṁ sainyaṁ cāhūyatāṁ tvarāt ।
6.78.6 ॥

tasya tadvacanaṁ śrutvā balādhyakṣo niśācaraḥ ।
syandanaṁ ca balaṁ caiva samīpaṁ pratyapādayat ।
6.78.7 ॥

pradakṣiṇaṁ rathaṁ kṛtvā āruroha niśācaraḥ ।
sūtaṁ sañcodayāmāsa śīghraṁ me rathamāvaha ।
6.78.8 ॥

atha tān rākṣasān sarvān makarākṣo 'bravīdidam ।
yūyaṁ sarve prayuddhyadhvaṁ purastānmama rākṣasāḥ ।
6.78.9 ॥

ahaṁ rākṣasarājena rāvaṇena mahātmanā ।
ājñaptaḥ samare hantuṁ tāvubhau rāmalakṣmaṇau ।
6.78.10 ॥

adya rāmaṁ vadhiṣyāmi lakṣmaṇaṁ ca niśācarāḥ ।
śākhāmṛgaṁ ca sugrīvaṁ vānarāṁśca śarottamaiḥ ।
6.78.11 ॥

adya śūlanipātaiśca vānarāṇāṁ mahācamūm ।
pradahiṣyāmi samprāptaḥ śuṣkendhanamivānalaḥ ।
6.78.12 ॥

makarākṣasya tacchrutvā vacanaṁ te niśācarāḥ ।
sarve nānāyudhopetā balavantaḥ samāgatāḥ ।
6.78.13 ॥

te kāmarūpiṇaḥ sarve daṁṣṭriṇaḥ piṅgalekṣaṇāḥ ।
mātaṅgā iva nardanto dhvastakeśā bhayānakāḥ ।
6.78.14 ॥

parivārya mahākāyā mahākāyaṁ kharātmajam ।
abhijagmustato hṛṣṭāścālayanto vasundharām ।
6.78.15 ॥

śaṅkhabherīsahasrāṇāmāhatānāṁ samantataḥ ।
kṣvelitāsphoṭitānāṁ ca tataḥ śabdo mahānabhūt ।
6.78.16 ॥

prabhraṣṭo 'tha karāttasya pratodaḥ sārathestadā ।
papāta sahasā caiva dhvajastasya ca rakṣasaḥ ।
6.78.17 ॥

tasya te rathayuktāśca hayā vikramavarjitāḥ ।
caraṇairākulairgatvā dīnāḥ sāsramukhā yayuḥ ।
6.78.18 ॥

pravāti pavanastasmin sapāṁsuḥ kharadāruṇaḥ ।
niryāṇe tasya raudrasya makarākṣasya durmateḥ ।
6.78.19 ॥

tāni dṛṣṭvā nimittāni rākṣasā vīryavattamāḥ ।
acintya nirgatāḥ sarve yatra tau rāmalakṣmaṇau ।
6.78.20 ॥

ghanagajamahiṣāṅgatulyavarṇāḥ samaramukheṣvasakṛdgadāsibhinnāḥ ।
ahamahamiti yuddhakauśalāste rajanicarāḥ paritaḥ samunnadantaḥ ।
6.78.21 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe aṣṭasaptatitamaḥ sargaḥ ।
78 ॥