युद्धकाण्डम्Yuddha Kāṇḍa

nikumbho bhrātaraṁ dṛṣṭvā sugrīveṇa nipātitam ।
pradahanniva kopena vānarendramavaikṣata ।
6.77.1 ॥

tataḥ sragdāmasannaddhaṁ dattapañcāṅgulaṁ śubham ।
ādade parighaṁ vīro nagendraśikharopamam ।
6.77.2 ॥

hemapaṭṭaparikṣiptaṁ vajravidrumabhūṣitam ।
yamadaṇḍopamaṁ bhīmaṁ rakṣasāṁ bhayanāśanam ।
6.77.3 ॥

tamāvidhya mahātejāḥ śakradhvajasamaṁ tadā ।
vinanāda vivṛttāsyo nikumbho bhīma vikramaḥ ।
6.77.4 ॥

urogatena niṣkeṇa bhujasthairaṅgadairapi ।
kuṇḍalābhyāṁ ca citrābhyāṁ mālayā ca vicitrayā ।
6.77.5 ॥

nikumbho bhūṣaṇairbhāti tena sma parigheṇa ca ।
yathendradhanuṣā meghaḥ savidyut stanayitnumān ।
6.77.6 ॥

parighāgreṇa pusphoṭa vātagranthirmahātmanaḥ ।
prajajvāla saghoṣaśca vidhūma iva pāvakaḥ ।
6.77.7 ॥

nagaryā viṭapāvatyā gandharvabhavanottamaiḥ ।
saha caivāmarāvatyā sarvaiśca bhavanaiḥ saha ।
6.77.8 ॥

satāragrahanakṣatraṁ sacandraṁ samahāgraham ।
nikumbhaparighāghūrṇaṁ bhramatīva nabhassthalam ।
6.77.9 ॥

durāsadaśca sañjajñe parighābharaṇaprabhaḥ ।
kapīnāṁ sa nikumbhāgniryugāntāgnirivotthitaḥ ।
6.77.10 ॥

rākṣasā vānarāścāpi na śekuḥ spandituṁ bhayāt ।
hanumāṁstu vivṛtyorastasthau pramukhato balī ।
6.77.11 ॥

parighopamabāhustu parighaṁ bhāskaraprabham ।
balī balavatastasya pātayāmāsa vakṣasi ।
6.77.12 ॥

sthire tasyorasi vyūḍhe parighaḥ śatadhā kṛtaḥ ।
viśīryamāṇaḥ sahasā ulkāśatamivāmbare ।
6.77.13 ॥

sa tu tena prahāreṇa vicacāla mahākapiḥ ।
parigheṇa samādhūto yathābhūmicale 'calaḥ ।
6.77.14 ॥

sa tadā 'bhihatastena hanumān plavagottamaḥ ।
muṣṭiṁ saṁvartayāmāsa balenātimahābalaḥ ।
6.77.15 ॥

tamudyamya mahātejā nikumbhorasi vīryavān ।
abhicikṣepa vegena vegavān vāyuvikramaḥ ।
6.77.16 ॥

tataḥ pusphoṭa carmāsya prasusrāva ca śoṇitam ।
muṣṭinā tena sañjajñe jvālā vidyudivotthitā ।
6.77.17 ॥

sa tu tena prahāreṇa nikumbho vicacāla ha ।
svasthaścāpi nijagrāha hanumantaṁ mahābalam ।
6.77.18 ॥

vicukruśustadā saṅkhye bhīmaṁ laṅkānivāsinaḥ ।
nikumbhenodyataṁ dṛṣṭvā hanumantaṁ mahābalam ।
6.77.19 ॥

sa tadā hriyamāṇo 'pi kumbhakarṇātmajena ha ।
ājaghānānilasuto vajrakalpena muṣṭinā ।
6.77.20 ॥

ātmānaṁ mocayitvā 'tha kṣitāvabhyavapadyata ।
hanumānunmamāthāśu nikumbhaṁ mārutātmajaḥ ।
6.77.21 ॥

nikṣipya paramāyatto nikumbhaṁ niṣpipeṣa ha ।
utpatya cāsya vegena papātorasi vīryavān ।
6.77.22 ॥

parigṛhya ca bāhubhyāṁ parivṛtya śirodharām ।
utpāṭayāmāsa śiro bhairavaṁ nadato mahat ।
6.77.23 ॥

atha vinadati sādite nikumbhe pavanasutena raṇe babhūva yuddham ।
daśarathasutarākṣasendrasūnvorbhṛśataramāgataroṣayoḥ subhīmam ।
6.77.24 ॥

vyapete tu jīve nikumbhasya hṛṣṭā vineduḥ plavaṅgā diśaḥ sasvanuśca ।
cacāleva corvī paphāleva ca dyaurbhayaṁ rākṣasānāṁ balaṁ cāviveśa ।
6.77.25 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe saptasaptatitamaḥ sargaḥ ।
77 ॥