युद्धकाण्डम्Yuddha Kāṇḍa

pravṛtte saṅkule tasmin ghore vīrajanakṣaye ।
aṅgadaḥ kampanaṁ vīramāsasāda raṇotsukaḥ ।
6.76.1 ॥

āhūya so 'ṅgadaṁ kopāt tāḍayāmāsa vegitaḥ ।
gadayā kampanaḥ pūrvaṁ sa cacāla bhṛśāhataḥ ।
6.76.2 ॥

sa sañjñāṁ prāpya tejasvī cikṣepa śikharaṁ gireḥ ।
arditaśca prahāreṇa kampanaḥ patito bhuvi ।
6.76.3 ॥

tatastu kampanaṁ dṛṣṭvā śoṇitākṣo hataṁ raṇe ।
rathenābhyapatat kṣipraṁ tatrāṅgadamabhītavat ।
6.76.4 ॥

so 'ṅgadaṁ niśitairbāṇaistadā vivyādha vegitaḥ ।
śarīradāraṇaistīkṣṇaiḥ kālāgnisamavigrahaiḥ ।
6.76.5 ॥

kṣurakṣuraprairnārācairvatsadantaiḥ śilīmukhaiḥ ।
karṇiśalyavipāṭhaiśca bahubhirniśitaiḥ śaraiḥ ।
6.76.6 ॥

aṅgadaḥ pratividdhāṅgo vāliputraḥ pratāpavān ।
dhanuragryaṁ rathaṁ bāṇān mamarda tarasā balī ।
6.76.7 ॥

śoṇitākṣastataḥ kṣipramasicarma samādade ।
utpapāta divaṁ kruddho vegavānavicārayan ।
6.76.8 ॥

taṁ kṣiprataramāplutya parāmṛśyāṅgado balī ।
kareṇa tasya taṁ khaḍgaṁ samācchidya nanāda ca ।
6.76.9 ॥

tasyāṁsaphalake khaḍgaṁ nijaghāna tato 'ṅgadaḥ ।
yajñopavītavaccainaṁ ciccheda kapikuñjaraḥ ।
6.76.10 ॥

taṁ pragṛhya mahākhaḍgaṁ vinadya ca punaḥpunaḥ ।
vāliputro 'bhidudrāva raṇaśīrṣe parānarīn ।
6.76.11 ॥

āyasīṁ tu gadāṁ vīraḥ pragṛhya kanakāṅgadaḥ ।
śoṇitākṣaḥ samāvidhya tamevānupapāta ha ।
6.76.12 ॥

prajaṅghasahito vīro yūpākṣastu tato balī ।
rathenābhiyayau kruddho vāliputraṁ mahābalam ।
6.76.13 ॥

tayormadhye kapiśreṣṭhaḥ śoṇitākṣaprajaṅghayoḥ ।
viśākhayormadhyagataḥ pūrṇacandra ivābhavat ।
6.76.14 ॥

aṅgadaṁ parirakṣāntau maindo dvivida eva ca ।
tasya tasthāturabhyāśe parasparadidṛkṣayā ।
6.76.15 ॥

abhipeturmahākāyāḥ pratiyattā mahābalāḥ ।
rākṣasā vānarān roṣādasicarmagadādharāḥ ।
6.76.16 ॥

trayāṇāṁ vānarendrāṇāṁ tribhī rākṣasapuṅgavaiḥ ।
saṁsaktānāṁ mahadyuddhamabhavadromaharṣaṇam ।
6.76.17 ॥

te tu vṛkṣān samādāya sampracikṣipurāhave ।
khaḍgena praticiccheda tān prajaṅgho mahābalaḥ ।
6.76.18 ॥

rathānaśvān drumaiḥ śailaiste pracikṣipurāhave ।
śaraudhaiḥ praticiccheda tān yūpākṣo niśācaraḥ ।
6.76.19 ॥

sṛṣṭān dvividamaindābhyāṁ drumānutpāṭya vīryavān ।
babhañja gadayā madhye śoṇitākṣaḥ pratāpavān ।
6.76.20 ॥

udyamya vipulaṁ khaḍgaṁ paramarmanikṛntanam ।
prajaṅgho vāliputrāya abhidudrāva vegitaḥ ।
6.76.21 ॥

tamabhyāśagataṁ dṛṣṭvā vānarendro mahābalaḥ ।
ājaghānāśvakarṇena drumeṇātibalastadā ।
6.76.22 ॥

bāhuṁ cāsya sanistriṁśamājaghāna sa muṣṭinā ।
vāliputrasya ghātena sa papāta kṣitāvasiḥ ।
6.76.23 ॥

taṁ dṛṣṭvā patitaṁ bhūmau khaḍgamutpalasannibham ।
muṣṭiṁ saṁvartayāmāsa vajrakalpaṁ mahābalaḥ ।
6.76.24 ॥

lalāṭe sa mahāvīryamaṅgadaṁ vānararṣabham ।
ājaghāna mahātejāḥ sa muhūrtaṁ cacāla ha ।
6.76.25 ॥

sa sañjñāṁ prāpya tejasvī vāliputraḥ pratāpavān ।
prajaṅghasya śiraḥ kāyāt khaḍgenāpātayat kṣitau ।
6.76.26 ॥

sa yūpākṣo 'śrupūrṇākṣaḥ pitṛvye nihate raṇe ।
avaruhya rathāt kṣipraṁ kṣīṇeṣuḥ khaḍgamādade ।
6.76.27 ॥

tamāpatantaṁ samprekṣya yūpākṣaṁ dvividastvaran ।
ājaghānorasi kruddho jāgrāha ca balādbalī ।
6.76.28 ॥

gṛhītaṁ bhrātaraṁ dṛṣṭvā śoṇitākṣo mahābalaḥ ।
ājaghāna gadāgreṇa vakṣasi dvividaṁ tataḥ ।
6.76.29 ॥

sa gadābhihatastena cacāla ca mahābalaḥ ।
udyatāṁ ca punastasya jahāra dvivido gadām ।
6.76.30 ॥

etasminnantare vīro maindo vānarayūthapaḥ ।
yūpākṣaṁ tāḍayāmāsa talenorasi vīryavān ।
6.76.31 ॥

tau śoṇitākṣayūpākṣau plavaṅgābhyāṁ tarasvinau ।
cakrutuḥ samare tīvramākarṣotpāṭanaṁ bhṛśam ।
6.76.32 ॥

dvividaḥ śoṇitākṣaṁ tu vidadāra nakhairmukhe ।
niṣpipeṣa ca vagena kṣitāvāvidhya vīryavān ।
6.76.33 ॥

yūpākṣamapi saṅkruddho maindo vānarayūthapaḥ ।
pīḍayāmāsa bāhubhyāṁ sa papāta hataḥ kṣitau ।
6.76.34 ॥

hatapravīrā vyathitā rākṣasendracamūstadā ।
jagāmābhimukhī sā tu kumbhakarṇasuto yataḥ ।
6.76.35 ॥

āpatantīṁ ca vegena kumbhastāṁ sāntvayaccamūm ।
6.76.36 ॥

athotkṛṣṭaṁ mahāvīryairlabdhalakṣaiḥ plavaṅgamaiḥ ।
nipātitamahāvīrāṁ dṛṣṭvā rakṣaścamūṁ tataḥ ।
kumbhaḥ pracakre tejasvī raṇe karma suduṣkaram ।
6.76.37 ॥

sa dhanurdhanvināṁ śreṣṭhaḥ pragṛhya susamāhitaḥ ।
mumocāśīviṣaprakhyān śarān dehavidāraṇān ।
6.76.38 ॥

tasya tacchuśubhe bhūyaḥ saśaraṁ dhanuruttamam ।
vidyudairāvatārciṣmāddvitīyendradhanuryathā ।
6.76.39 ॥

ākarṇākṛṣṭamuktena jaghāna dvividaṁ tadā ।
tena hāṭakapuṅkhena patriṇā patravāsasā ।
6.76.40 ॥

sahasā 'bhihatastena vipramuktapadaḥ sphuran ।
nipapātādrikūṭābho vihvalaḥ plavagottamaḥ ।
6.76.41 ॥

maindastu bhrātaraṁ dṛṣṭvā bhagnaṁ tatra mahāhave ।
abhidudrāva vegena pragṛhya mahatīṁ śilām ।
6.76.42 ॥

tāṁ śilāṁ tu pracikṣepa rākṣasāya mahābalaḥ ।
bibheda tāṁ śilāṁ kumbhaḥ prasannaiḥ pañcabhiḥ śaraiḥ ।
6.76.43 ॥

sandhāya cānyaṁ sumukhaṁ śaramāsīviṣopamam ।
ājaghāna mahātejā vakṣasi dvividāgrajam ।
6.76.44 ॥

sa tu tena prahāreṇa maindo vānarayūthapaḥ ।
marmaṇyabhihatastena papāta bhuvi mūrcchitaḥ ।
6.76.45 ॥

aṅgado mātulau dṛṣṭvā patitau tu mahābalau ।
abhidudrāva vegena kumbhamadyutakārmukam ।
6.76.46 ॥

tamāpatantaṁ vivyādha kumbhaḥ pañcabhirāyasaiḥ ।
tribhiścānyaiḥ śitairbāṇairmātaṅgamiva tomaraiḥ ।
6.76.47 ॥

so 'ṅgadaṁ vividhairbāṇaiḥ kumbho vivyādha vīryavān ।
akuṇṭhadhārairniśitaistīkṣṇaiḥ kanakabhūṣaṇaiḥ ।
6.76.48 ॥

aṅgadaḥ pratividdhāṅgo vāliputro na kampate ।
śilāpādapavarṣāṇi tasya mūrdhni vavarṣa ha ।
6.76.49 ॥

sa praciccheda tān sarvān bibheda ca punaḥ śilāḥ ।
kumbhakarṇātmajaḥ śrīmān vāliputrasamīritān ।
6.76.50 ॥

āpatantaṁ ca samprekṣya kumbho vānarayūthapam ।
bhruvorvivyādha bāṇābhyāmulkābhyāmiva kuñjaram ।
tasya susrāva rudhiraṁ pihite cāsya locane ।
6.76.51 ॥

aṅgadaḥ pāṇinā netre pidhāya rudhirokṣite ।
sālamāsannamekena parijagrāha pāṇinā ।
6.76.52 ।
।
sampīḍya corasi skandhaṁ kareṇābhiniveśya ca ।
kiñcidabhyavanamyainamunmamātha yathā gajaḥ ।
6.76.53 ॥

tamindraketupratimaṁ vṛkṣaṁ mandarasannibham ।
samutsṛjantaṁ vegena paśyatāṁ sarvarakṣasām ।
6.76.54 ॥

sa bibheda śitairbāṇaiḥ saptabhiḥ kāyabhedanaiḥ ।
6.76.55 ॥

aṅgado vivyathe 'bhīkṣṇaṁ sasāda ca mumoha ca ।
6.76.56 ॥

aṅgadaṁ vyathitaṁ dṛṣṭvā sīdantamiva sāgare ।
durāsadaṁ hariśreṣṭhaṁ rāmāyanye nyavedayan ।
6.76.57 ॥

rāmastu vyathitaṁ śrutvā vāliputraṁ raṇājire ।
vyādideśa hariśreṣṭhān jāmbavatpramukhāṁstataḥ ।
6.76.58 ॥

te tu vānaraśārdūlāḥ śrutvā rāmasya śāsanam ।
abhipetuḥ susaṅkruddhāḥ kumbhamudyatakārmukam ।
6.76.59 ॥

tato drumaśilāhastāḥ kopasaṁraktalocanāḥ ।
rirakṣiṣanto 'bhyapatannaṅgadaṁ vānararṣabhāḥ ।
6.76.60 ॥

jāmbavāṁśca suṣeṇaśca vegadarśī ca vānaraḥ ।
kumbhakarṇātmajaṁ vīraṁ kruddhāḥ samabhidudruvuḥ ।
6.76.61 ॥

samīkṣyāpatatastāṁstu vānarendrān mahābalān ।
āvavāra śaraugheṇa nageneva jalāśayam ।
6.76.62 ॥

tasya bāṇapathaṁ prāpya na śokurativartitum ।
vānarendrā mahātmāno velāmiva mahodadhiḥ ।
6.76.63 ॥

tāṁstu dṛṣṭvā harigaṇān śaravṛṣṭibirarditān ।
aṅgadaṁ pṛṣṭhataḥ kṛtvā bhrātṛjaṁ plavageśvaraḥ ।
6.76.64 ॥

abidudrāva vegena sugrīvaḥ kumbhamāhave ।
śailasānucaraṁ nāgaṁ vegavāniva kesarī ।
6.76.65 ॥

utpāṭya ca mahāśailānaśvakarṇān dhavān bahūn ।
anyāṁśca vividhān vṛkṣāṁścikṣepa ca mahābalaḥ ।
6.76.66 ॥

tāṁ chādayantīmākāśaṁ vṛkṣavṛṣṭiṁ durāsadām ।
kumbhakarṇātmajaḥ śīghraṁ ciccheda niśitaiḥ śaraiḥ ।
6.76.67 ॥

abhilakṣeṇa tīvreṇa kumbhena niśitaiḥ śaraiḥ ।
ācitāste drumā rejuryathā ghorāḥ śataghnayaḥ ।
6.76.68 ॥

drumavarṣaṁ tu tacchinnaṁ dṛṣṭvā kumbhena vīryavān ।
vānarādhipatiḥ śrīmān mahāsattvo na vivyathe ।
6.76.69 ॥

nirbhidyamānaḥ sahasā sahamānaśca tān śarān ।
kumbhasya dhanurākṣipya babhañjendradhanuṣprabham ।
6.76.70 ॥

avaplutya tataḥ śīghraṁ kṛtvā karma suduṣkaram ।
abravīt kupitaḥ kumbhaṁ bhagnaśṛṅgamiva dvipam ।
6.76.71 ॥

nikumbhāgraja vīryaṁ te bāṇavegavadadbhutam ।
sannatiśca prabhāvaśca tava vā rāvaṇasya vā ।
6.76.72 ॥

prahlādabalivṛtraghnakubevaruṇopama ।
ekastvamanujāto 'si pitaraṁ balavṛttataḥ ।
6.76.73 ॥

tvāmevaikaṁ mahābāhuṁ cāpahasta marindamam ।
tridaśā nātivartante jitendriyamivādhayaḥ ।
6.76.74 ॥

vikramasva mahābuddhe karmāṇi mama paśyataḥ ।
6.76.75 ॥

varadānāt pitṛvyaste sahate devadānavān ।
kumbhakarṇastu vīryeṇa sahate ca surāsurān ।
6.76.76 ॥

dhanuṣīndrajitastulyaḥ pratāpe rāvaṇasya ca ।
tvamadya rakṣasāṁ loke śreṣṭho 'si balavīryataḥ ।
6.76.77 ॥

mahāvimardaṁ samare mayā saha tavādbhutam ।
adya bhūtāni paśyantu śakraśambarayoriva ।
6.76.78 ॥

kṛtamapratimaṁ karma darśitaṁ cāstrakauśalam ।
pātitā harivīrāśca tvayā vai bhīmavikramāḥ ।
6.76.79 ॥

upālambhabhayāccāpi nāsi vīra mayā hataḥ ।
kṛtakarmā pariśrānto viśrāntaḥ paśya me balam ।
6.76.80 ॥

tena sugrīvavākyena sāvamānena mānitaḥ ।
agnerājyāhutasyeva tejastasyābhyavardhata ।
tataḥ kumbhastu sugrīvaṁ bāhubhyāṁ jagṛhe tadā ।
6.76.81 ॥

gajāvivāhitamadau niśvasantau muhurmuhuḥ ।
anyonyagātragrathitau karṣantāvitaretaram ।
sadhūmāṁ mukhato jvālāṁ visṛjantau pariśramāt ।
6.76.82 ॥

tayoḥ pādābhighātācca nimagnā cābhavanmahī ।
vyāghūrṇitataraṅgaśca cukṣubhe varuṇālayaḥ ।
6.76.83 ॥

tataḥ kumbhaṁ samutkṣipya sugrīvo lavaṇāmbhasi ।
pātayāmāsa vegena darśayannudadhestalam ।
6.76.84 ॥

tataḥ kumbhanipātena jalarāśiḥ samutthitaḥ ।
vindhyamandarasaṅkāśo visasarpa samantataḥ ।
6.76.85 ॥

tataḥ kumbhaḥ samutpatya sugrīvamabhipatya ca ।
ājaghānorasi kruddho vajravegena muṣṭinā ।
6.76.86 ॥

tasya carma ca pusphoṭa bahu susrāva śoṇitam ।
sa ca muṣṭirmahāvegaḥ pratijaghne 'sthimaṇḍale ।
6.76.87 ॥

tadā vegena tatrāsīttejaḥ prajvalitaṁ muhuḥ ।
vajraniṣpeṣasañjātā jvālā merau yathā girau ।
6.76.88 ॥

sa tatrābhihatastena sugrīvo vānararṣabhaḥ ।
muṣṭiṁ saṁvartayāmāsa vajrakalpaṁ mahābalaḥ ।
6.76.89 ॥

arcissahasravikacaṁ ravimaṇḍalasaprabham ।
sa muṣṭiṁ pātayāmāsa kumbhasyorasi vīryavān ।
6.76.90 ॥

sa tu tena prahāreṇa vihvalo bhṛśatāḍitaḥ ।
nipapāta tadā kumbho gatārciriva pāvakaḥ ।
6.76.91 ॥

muṣṭinā 'bhihatastena nipapātāśu rākṣasaḥ ।
lohitāṅga ivākāśāddīptaraśmiryadṛcchayā ।
6.76.92 ॥

kumbhasya patato rūpaṁ bhagnasyorasi muṣṭinā ।
babhau rudrābhipannasya yathā rūpaṁ gavāṁ pateḥ ।
6.76.93 ॥

tasmin hate bhīmaparākrameṇa plavaṅgamānāmṛṣabheṇa yuddhe ।
mahī saśailā savanā cacāla bhayaṁ ca rakṣāṁsyadhikaṁ viveśa ।
6.76.94 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe ṣaṭsaptatitamaḥ sargaḥ ।
76 ॥