युद्धकाण्डम्Yuddha Kāṇḍa

tato 'bravīnmahātejāḥ sugrīvo vānarādhipaḥ ।
arthyaṁ vijñāpayaṁścāpi hanumantamidaṁ vacaḥ ।
6.75.1 ॥

yato hataḥ kumbhakarṇaḥ kumārāśca niṣūditāḥ ।
nedānīmupanirhāraṁ rāvaṇo dātumarhati ।
6.75.2 ॥

ye ye mahābalāḥ santi laghavaśca plavaṅgamāḥ ।
laṅkāmabhyutpatantvāśu gṛhyolkāḥ plavagarṣabhāḥ ।
6.75.3 ॥

tato 'staṁ gata āditye raudre tasminniśāmukhe ।
laṅkāmabhimukhāḥ solkā jagmuste plavagarṣabhāḥ ।
6.75.4 ॥

ulkāhastairharigaṇaiḥ sarvataḥ samabhidrutāḥ ।
ārakṣasthā virūpākṣāḥ sahasā vipradudruvuḥ ।
6.75.5 ॥

gopurāṭṭapratolīṣu caryāsu vividhāsu ca ।
prāsādeṣu ca saṁhṛṣṭāḥ sasṛjuste hutāśanam ।
teṣāṁ gṛhasasrāṇi dadāha hutabhuk tadā ।
6.75.6 ॥

prāsādāḥ parvatākārāḥ patanti dharaṇītale ।
agarurdahyate tatra vara ca haricandanam ।
6.75.7 ॥

mauktikā maṇayaḥ snigdhā vajraṁ cāpi pravālakam ।
kṣaumaṁ ca dahyate tatra kauśeyaṁ cāpi śobhanam ।
6.75.8 ॥

āvikaṁ vividhaṁ caurṇaṁ kāñcanaṁ bhāṇḍamāyudham ।
nānāvikṛtasaṁsthānaṁ vājibhāṇḍaparicchadau ।
6.75.9 ॥

gajagraiveyakakṣyāśca rathabhāṇḍāśca saṁskṛtāḥ ।
tanutrāṇi ca yodhānāṁ hastyaśvānāṁ ca varma ca ।
6.75.10 ॥

khaḍgā dhanūṁṣi jyābāṇāstomarāṅkuśaśaktayaḥ ।
romajaṁ vālajaṁ carma vyāghrajaṁ cāṇḍajaṁ bahu ।
6.75.11 ॥

muktāmaṇivicitrāṁśca prāsādāṁśca samantataḥ ।
vividhānastrasaṁyogānagnirdahati tatra vai ।
6.75.12 ॥

nānāvidhān gṛhacchandān dadāha hutabhūk tadā ।
āvāsān rākṣasānāṁ ca sarveṣāṁ gṛhagardhinām ।
6.75.13 ॥

hemacitratanutrāṇāṁ sragdāmāmbaradhāriṇām ।
śīdhupānacalākṣāṇāṁ madavihvalagāminām ।
6.75.14 ॥

kāntālambitavastrāṇāṁ śatrusañjātamanyunām ।
gadāśūlāsihastānāṁ khādatāṁ pibatāmapi ।
6.75.15 ॥

śayaneṣu mahārheṣu prasuptānāṁ priyaiḥ saha ।
trastānāṁ gacchatāṁ tūrṇaṁ putrānādāya sarvataḥ ।
6.75.16 ॥

teṣāṁ śatasahasrāṇi tadā laṅkānivāsinām ।
adahat pāvakastatra jajvāla ca punaḥpunaḥ ।
6.75.17 ॥

sāravanti mahārhāṇi gambhīraguṇavanti ca ।
hemacandrārdhacandrāṇi candraśālonnatāni ca ।
6.75.18 ॥

ratnacitragavākṣāṇi sādhiṣṭhānāni sarvaśaḥ ।
maṇividrumacitrāṇi spṛśantīva divākaram ।
6.75.19 ॥

krauñcabarhiṇavīṇānāṁ bhūṣaṇānāṁ ca nisvanaiḥ ।
nāditānyacalā bhāni veśmānyagnirdadāha saḥ ।
6.75.20 ॥

jvalanena parītāni toraṇāni cakāśire ।
vidyudbhiriva naddhāni meghajālāni dharmage ।
6.75.21 ॥

jvalanena parītāni nipeturbhavanānyatha ।
vajrivajrahatānīva śikharāṇi mahāgireḥ ।
6.75.22 ॥

vimāneṣu prasuptāśca dahyamānā varāṅganāḥ ।
tyaktābharaṇasarvāṅgā hā hetyuccairvicukruśuḥ ।
6.75.23 ॥

tāni nirdahyamānāni dūrataḥ pracakāśire ।
himavacchikharāṇīva dīptauṣadhivanāni ca ।
6.75.24 ॥

harmyāgrairdahyamānaiśca jvālāprajvalitairapi ।
rātrau sā dṛśyate laṅkā puṣpitairiva kiṁśukaiḥ ।
6.75.25 ॥

hastyadhyakṣairgajairmuktairmuktaiśca turagairapi ।
babhūva laṅkā lokānte bhrāntagrāha ivārṇavaḥ ।
6.75.26 ॥

aśvaṁ muktaṁ gajo dṛṣṭvā kvacidbhīto 'pasarpati ।
bhīto bhītaṁ gajaṁ dṛṣṭvā kvacidaśvo nivartate ।
6.75.27 ॥

laṅkāyāṁ dahyamānāyāṁ śuśubhe sa mahārṇavaḥ ।
chāyāsaṁsaktasalilo lohitoda ivārṇavaḥ ।
6.75.28 ॥

sā babhūva muhūrtena haribhirdīpitā purī ।
lokasyāsya kṣaye ghore pradīpteva vasundharā ।
6.75.29 ॥

nārījanasya dhūmena vyāptasyoccairvineduṣaḥ ।
svano jvalanataptasya śuśruve daśayojanam ।
6.75.30 ॥

pradagdhakāyānaparān rākṣasānnirgatān bahiḥ ।
sahasā 'bhyutpatanti sma harayo 'tha yuyutsavaḥ ।
6.75.31 ॥

udghuṣṭaṁ vānarāṇāṁ ca rākṣasānāṁ ca nisvanaḥ ।
diśo daśa samudraṁ ca pṛthivīṁ cānvanādayat ।
6.75.32 ॥

viśalyau tu mahātmānau tāvubhau rāmalakṣmaṇau ।
asambhrāntau jagṛhatustadobhe dhanuṣī vare ।
6.75.33 ॥

tato viṣphārayānasya rāmasya dhanuruttamam ।
babhūva tumulaḥ śabdo rākṣasānāṁ bhayāvahaḥ ।
6.75.34 ॥

aśobhata tadā rāmo dhanurviṣphārayan mahat ।
bhagavāniva saṅkruddho bhavo vedamayaṁ dhanuḥ ।
6.75.35 ॥

udghuṣṭaṁ vānarāṇāṁ ca rākṣasānāṁ ca nisvanam ।
jyāśabdastāvubhau śabdāvati rāmasya śuśruve ।
6.75.36 ॥

vānarodghuṣṭaghoṣaśca rākṣasānāṁ ca nisvanaḥ ।
jyāśabdaścāpi rāmasya trayaṁ vyāpa diśo daśa ।
6.75.37 ॥

tasya kārmukamuktaiśca śaraistatpuragopuram ।
kailāsaśṛṅgapratimaṁ vikīrṇamapatadbhuvi ।
6.75.38 ॥

tato rāmaśarān dṛṣṭvā vimāneṣu gṛheṣu ca ।
sannāho rākṣasendrāṇāṁ tumulaḥ samapadyata ।
6.75.39 ॥

teṣāṁ sannahyamānānāṁ siṁhanādaṁ ca kurvatām ।
śarvarī rākṣasendrāṇāṁ raudrīva samapadyata ।
6.75.40 ॥

ādiṣṭā vānarendrāstu sugrīveṇa mahātmanā ।
āsannadvāramāsādya yudhyadhvaṁ plavagarṣabhāḥ ।
6.75.41 ॥

yaśca vo vitathaṁ kuryāttatra tatra hyupasthitaḥ ।
sa hantavyo hi samplutya rājaśāsanadūṣakaḥ ।
6.75.42 ॥

teṣu vānaramukhyeṣu dīptolkojjvalapāṇiṣu ।
sthiteṣu dvāramāsādya rāvaṇaṁ manyurāviśat ।
6.75.43 ॥

tasya jṛmbhitavikṣepādvyāmiśrā vai diśo daśa ।
rūpavāniva rudrasya manyurgātreṣvadṛśyata ।
6.75.44 ॥

sa nikumbhaṁ ca kumbhaṁ ca kumbhakarṇātmajāvubhau ।
preṣayāmāsa saṅkruddho rākṣasairbahubhiḥ saha ।
6.75.45 ॥

yūpākṣaḥ śoṇitākṣaśca prajaṅghaḥ kampanastathā ।
niryayuḥ kaumbhakarṇibhyāṁ saha rāvaṇaśāsanāt ।
6.75.46 ॥

śaśāsa caiva tān sarvān rākṣasān sumahābalān ।
nādayan gacchatātraiva jayadhvaṁ śīghrameva ca ।
6.75.47 ॥

tatastu coditāstena rākṣasā jvalitāyudhāḥ ।
laṅkāyā niryayurvīrāḥ praṇadantaḥ punaḥpunaḥ ।
6.75.48 ॥

rakṣasāṁ bhūṣaṇasthābhirbhābhiḥ svābhiśca sarvaśaḥ ।
cakruste saprabhaṁ vyoma harayaścāgnibhiḥ saha ।
6.75.49 ॥

tatra tārādhipasyābhā tārāṇāṁ ca tathaiva ca ।
tayorābharaṇasthā ca balayordyāmabhāsayan ।
6.75.50 ॥

candrābhā bhūṣaṇābhā ca gṛhāṇāṁ jvalatāṁ ca bhā ।
harirākṣasasainyāni bhrājayāmāsa sarvataḥ ।
6.75.51 ॥

tatra cordhvaṁ pradīptānāṁ gṛhāṇāṁ sāgaraḥ punaḥ ।
bhābhiḥ saṁsaktapātālaścalormiḥ śuśube 'dhikam ।
6.75.52 ॥

patākādhvajasaṁsaktamuttamāsiparaśvadham ।
bhīmāśvarathamātaṅgaṁ nānāpattisamākulam ।
6.75.53 ॥

dīptaśūlagadākhaḍgaprāsatomarakārmukam ।
tadrākṣasabalaṁ ghoraṁ bhīmavikramapauruṣam ।
6.75.54 ॥

dadṛśo jvalitaprāsaṁ kiṅkiṇīśatanāditam ।
hemajālācitabhujaṁ vyāmiśritaparaśvadham ।
6.75.55 ॥

vyāghūrṇitamahāśastraṁ bāṇasaṁsaktakārmukam ।
gandhamālyamadhūtsekasammoditamahānilam ।
6.75.56 ॥

ghoraṁ śūrajanākīrṇaṁ mahāmbudharanisvanam ।
6.75.57 ॥

taddṛṣṭvā balamāyāntaṁ rākṣasānāṁ sudāruṇam ।
sañcacāla plavaṅgānāṁ balamuccairnanāda ca ।
6.75.58 ॥

javenāplutya ca punastadbalaṁ rakṣasāṁ mahat ।
abhyayāt pratyaribalaṁ pataṅgā iva pāvakam ।
6.75.59 ॥

teṣāṁ bhujaparāmarśavyāmṛṣṭaparighāśani ।
rākṣasānāṁ balaṁ śreṣṭhaṁ bhūyastaramaśobhata ।
6.75.60 ॥

tatronmattā ivotpeturharayo 'tha yuyutsavaḥ ।
taruśailairabhighnanto muṣṭibhiśca niśācarān ।
6.75.61 ॥

tathaivāpatatāṁ teṣāṁ kapīnāmasibhiḥ śitaiḥ ।
śirāṁsi sahasā jahnū rākṣasā bhīmadarśanāḥ ।
6.75.62 ॥

daśanairhṛtakarṇāśca muṣṭiniṣkīrṇamastakāḥ ।
śilāprahārabhagnāṅgā vicerustatra rākṣasāḥ ।
6.75.63 ॥

tathaivāpyapare teṣāṁ kapīnāmabhilakṣitāḥ ।
pravīrānabhito jaghnū rākṣasānāṁ tarasvinām ।
6.75.64 ॥

tathaivāpyapare teṣāṁ kapīnāmasibhiḥ śitaiḥ ।
harivīrānnijaghnuśca ghorarūpā niśācarāḥ ।
6.75.65 ॥

ghnantamanyaṁ jaghānānyaḥ pātayantamapātayat ।
garhamāṇaṁ jagarhe 'nyo daśantamaparo 'daśat ।
6.75.66 ॥

dehītyanyo dadātyanyo dadāmītyaparaḥ punaḥ ।
kiṁ kleśayasi tiṣṭheti tatrānyonyaṁ babhāṣire ।
6.75.67 ॥

vipralambitavastraṁ ca vimuktakavacāyudham ।
samudyatamahāprāsaṁ yaṣṭiśūlāsisaṅkulam ।
prāvartata mahāraudraṁ yuddhaṁ vānararakṣasām ।
6.75.68 ॥

vānarān daśa sapteti rākṣasā jaghnurāhave ।
rākṣasān daśa sapteti vānarāścābhyapātayan ।
6.75.69 ॥

visrastakeśavasanaṁ vidhvastakavacadhvajam ।
balaṁ rākṣasamālambya vānarāḥ paryavārayan ।
6.75.70 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe pañcasaptatitamaḥ sargaḥ ।
75 ॥