युद्धकाण्डम्Yuddha Kāṇḍa

tayostadā sāditayo raṇāgre mumoha sainyaṁ haripuṅgavānām ।
sugrīvanīlāṅgadajāmbavanto na cāpi kiñcit pratipedire te ।
6.74.1 ॥

tato viṣaṇṇaṁ samavekṣya sainyaṁ vibhīṣaṇo buddhimatāṁ variṣṭhaḥ ।
uvāca śākhāmṛgarājavīrānāśvāsayannapratimairvacobhiḥ ।
6.74.2 ॥

mā bhaiṣṭa nāstyatra viṣādakālo yadāryaputrau hyavaśau viṣaṇṇau ।
svayambhuvo vākyamathodvahantau yat sāditāvindrajidastrajālaiḥ ।
6.74.3 ॥

tasmai tu dattaṁ paramāstrametat svayambhuvā brāhmamamoghavegam ।
tanmānayantau yudhi rājaputrau nipātitau ko 'tra viṣādakālaḥ ।
6.74.4 ॥

brāhmamastraṁ tato dhīmān mānayitvā tu mārutiḥ ।
vibhīṣaṇavacaḥ śrutvā hanumāṁstamathābravīt ।
6.74.5 ॥

etasminnihate sainye vānarāṇāṁ tarasvinām ।
yo yo dhārayate prāṇāṁstantamāśvāsayāvahai ।
6.74.6 ॥

tāvubhau yugapadvīrau hanumadrākṣasottamau ।
ulkāhastau tadā rātrau raṇaśīrṣe viceratuḥ ।
6.74.7 ॥

bhinnalāṅgūlahastorupādāṅguliśirodharaiḥ ।
sravadbhiḥ kṣatajaṁ gātraiḥ prasravadbhistatastataḥ ।
6.74.8 ॥

patitaiḥ parvatākārairvānarairabhisaṅkulām ।
śastraiśca patitairdīptairdadṛśāte vasundharām ।
6.74.9 ॥

sugrīvamaṅgadaṁ nīlaṁ śarabhaṁ gandhamādanam ।
gavākṣaṁ ca suṣeṇaṁ ca vegadarśinamāhukam ।
6.74.10 ॥

maindaṁ nalaṁ jyotimukhaṁ dvividaṁ panasaṁ tathā ।
etāṁścānyāṁstato vīrau dadṛśāte hatān raṇe ।
6.74.11 ॥

saptaṣaṣṭirhatāḥ koṭyo vānarāṇāṁ tarasvinām ।
ahnaḥ pañcamaśeṣeṇaḥ vallabhena svayambhuvaḥ ।
6.74.12 ॥

sāgaraughanibhaṁ bhīmaṁ dṛṣṭvā bāṇārditaṁ balam ।
mārgate jāmbavantaṁ sa hanumān savibhīṣaṇaḥ ।
6.74.13 ॥

svabhāvajarayā yuktaṁ vṛddhaṁ śaraśataiścitam ।
prajāpatisutaṁ vīraṁ śāmyantamiva pāvakam ।
6.74.14 ॥

dṛṣṭvā tamupasaṅgamya paulastyo vākyamabravīt ।
kaccidārya śaraistīkṣṇaiḥ prāṇā na dhvaṁsitāstava ।
6.74.15 ॥

vibhīṣaṇavacaḥ śrutvā jāmbavānṛkṣapuṅgavaḥ ।
kṛcchrādabhyudgiran vākyamidaṁ vacanamabravīt ।
6.74.16 ॥

nairṛtendra mahāvīrya svareṇa tvā 'bhilakṣaye ।
pīḍyamānaḥ śitairbāṇairna tvāṁ paśyāmi cakṣuṣā ।
6.74.17 ॥

añjanā suprajā yena mātariśvā ca nair'ta ।
hanumān vānaraśreṣṭhaḥ prāṇān dhārayate kvacit ।
6.74.18 ॥

śrutvā jāmbavato vākyamuvācedaṁ vibhīṣaṇaḥ ।
āryaputrāvatikramya kasmāt pṛcchasi mārutim ।
6.74.19 ॥

naiva rājani sugrīve nāṅgade nāpi rāghave ।
ārya sandarśitaḥ sneho yathā vāyusute paraḥ ।
6.74.20 ॥

vibhīṣaṇavacaḥ śrutvā jāmbavān vākyamabravīt ।
śṛṇu nairṛtaśārdūla yasmāt pṛcchāmi mārutim ।
6.74.21 ॥

tasmin jīvati vīre tu hatamapyahataṁ balam ।
hanumatyujjhitaprāṇe jīvanto 'pi vayaṁ hatāḥ ।
6.74.22 ॥

dharate mārutistāta mārutapratimo yadi ।
vaiśvānarasamo vīrye jīvitāśā tato bhavet ।
6.74.23 ॥

tato vṛddhamupāgamya niyamenābhyavādayat ।
gṛhya jāmbavataḥ pādau hanumān mārutātmajaḥ ।
6.74.24 ॥

śrutvā hanumato vākyaṁ tathāpi vyathitendriyaḥ ।
punarjātamivātmānaṁ manyate smarkṣapuṅgavaḥ ।
6.74.25 ॥

tato 'bravīnmahātejā hanumantaṁ sa jāmbavān ।
6.74.26 ॥

āgaccha hariśārdūla vānarāṁstrātumarhasi ।
nānyo vikramaparyāptastvameṣāṁ paramaḥ sakhā ।
6.74.27 ॥

tvatparākramakālo 'yaṁ nānyaṁ paśyāmi kañcana ।
ṛkṣavānaravīrāṇāmanīkāni praharṣaya ।
viśalyau kuru cāpyetau sāditau rāmalakṣmaṇau ।
6.74.28 ॥

gatvā paramamadhvānamuparyupari sāgaram ।
himavantaṁ nagaśreṣṭhaṁ hanuman gantumarhasi ।
6.74.29 ॥

tataḥ kāñcanamatyuccamṛṣabhaṁ parvatottamam ।
kailāsaśikharaṁ cāpi drakṣyasyariniṣūdana ।
6.74.30 ॥

tayoḥ śikharayormadhye pradīptamatulaprabham ।
sarvauṣadhiyutaṁ vīra drakṣyasyoṣadhiparvatam ।
6.74.31 ॥

tasya vānaraśārdūla catasro mūrdhnisambhavāḥ ।
drakṣyasyoṣadhayo dīptā dīpayantyo diśo daśa ।
6.74.32 ॥

mṛtasañjīvanīṁ caiva viśalyakaraṇīmapi ।
sāvarṇyakaraṇīṁ caiva sandhānakaraṇīṁ tathā ।
6.74.33 ॥

tāḥ sarvā hanuman gṛhya kṣipramāgantumarhasi ।
āśvāsaya harīn prāṇairyojya gandhavahātmaja ।
6.74.34 ॥

śrutvā jāmbavato vākyaṁ hanumān haripuṅgavaḥ ।
āpūryata baloddharṣaistoyavegairivārṇavaḥ ।
6.74.35 ॥

sa parvatataṭāgrasthaḥ pīḍayan parvatottamam ।
hanumān dṛśyate vīro dvitīya iva parvataḥ ।
6.74.36 ॥

haripādavinirbhagno niṣasāda sa parvataḥ ।
na śaśāka tadā ' 'tmānaṁ soḍhuṁ bhṛśanipīḍitaḥ ।
6.74.37 ॥

tasya peturnagā bhūmau harivegācca jajvaluḥ ।
śṛṅgāṇi ca vyaśīryanta pīḍitasya hanūmatā ।
6.74.38 ॥

tasmin sampīḍyamāne tu bhagnadrumāśilātale ।
na śekurvānarāḥ sthātuṁ ghūrṇamāne nagottame ।
6.74.39 ॥

sā ghūrṇitamahādvārā prabhagnagṛhagopurā ।
laṅkā trāsākulā rātrau pravṛttevābhavattadā ।
6.74.40 ॥

pṛthivīdharasaṅkāśo vipīḍya dharaṇīdharam ।
pṛthivīṁ kṣobhayāmāsa sārṇavāṁ mārutatmajaḥ ।
6.74.41 ॥

āruroha tadā tasmāddharirmalayaparvatam ।
merumandarasaṅkāśaṁ nānāprasravaṇākulam ।
6.74.42 ॥

nānādrumalatākīrṇaṁ vikāsikamalotpalam ।
sevitaṁ devagandharvaiḥ ṣaṣṭiyojanamucchritam ।
6.74.43 ॥

vidyādharairmunigaṇairapsarobhirniṣevitam ।
nānāmṛgagaṇākīrṇaṁ bahukandaraśobhitam ।
6.74.44 ॥

sarvānākulayaṁstatra yakṣagandharvakinnarān ।
hanumān meghasaṅkāśo vavṛdhe mārutātmajaḥ ।
6.74.45 ॥

padbhyāṁ tu śailamāpīḍya vaḍavāmukhavanmukham ।
vivṛtyograṁ nanādoccaistrāsayanniva rākṣasān ।
6.74.46 ॥

tasya nānadyamānasya śrutvā ninadamadbhutam ।
laṅkāsthā rākṣasāḥ sarve na śekuḥ spandituṁ bhayāt ।
6.74.47 ॥

namaskṛtvā 'tha rāmāya mārutirbhīmavikramaḥ ।
rāghavārthe paraṁ karma samīhataparantapaḥ ।
6.74.48 ॥

sa pucchamudyamya bhujaṅgakalpaṁ vinamya pṛṣṭhaṁ śravaṇe nikuñjya ।
vivṛtya vaktraṁ vaḍavāmukhābhamāpupluve vyomani caṇḍavegaḥ ।
6.74.49 ॥

sa vṛkṣaṣaṇḍāṁstarasā jahāra śailān śilāḥ prākṛtavānarāṁśca ।
bāhūruvegoddhatasampraṇunnāste kṣīṇavegāḥ salile nipetuḥ ।
6.74.50 ॥

sa ॥

tau prasāryoragabhogakalpau bhūjau bhujaṅgārinikāśavīryaḥ ।
jagāma meruṁ nagarājamagryaṁ diśaḥ prakarṣanniva vāyusūnuḥ ।
6.74.51 ॥

sa sāgaraṁ ghūrṇitavīcimālaṁ tadā bhṛśaṁ bhrāmitasarvasattvam ।
samīkṣamāṇaḥ sahasā jagāma cakraṁ yathā viṣṇukarāgramuktam ।
6.74.52 ॥

sa parvatān vṛkṣagaṇān sarāṁsi nadīstaṭākāni purottamāni ।
sphītān janāntānapi sampravīkṣya jagāma vegāt pitṛtulyavegaḥ ।
6.74.53 ॥

ādityapathamāśritya jagāma sa gataklamaḥ ।
hanumāṁstvarito vīraḥ pitṛtulyaparākramaḥ ।
6.74.54 ॥

javena mahatā yukto mārutirmāruto yathā ।
jagāma hariśārdūlo diśaḥ śabdena pūrayan ।
6.74.55 ॥

smaran jāmbavato vākyaṁ mārutirvātaraṁhasā ।
dadarśa sahasā cāpi himavantaṁ mahākapiḥ ।
6.74.56 ॥

nānāprasravaṇopetaṁ bahukandaranirjharam ।
śvetābhracayasaṅkāśaiḥ śikharaiścārudarśanaiḥ ।
śobhitaṁ vividhairvṛkṣairagamat parvatottamam ।
6.74.57 ॥

sa taṁ samāsādya mahānagendramatipravṛddhottamaghoraśṛṅgam ।
dadarśa puṇyāni mahāśramāṇi surarṣisaṅghottamasevitāni ।
6.74.58 ॥

sa brahmakośaṁ rajatālayaṁ ca śakrālayaṁ rudraśarapramokṣam ।
hayānanaṁ brahmaśiraśca dīptaṁ dadarśa vaivasvatakiṅkarāṁśca ।
6.74.59 ॥

vajrālayaṁ vaiśravaṇālayaṁ ca sūryaprabhaṁ sūryanibandhanaṁ ca ।
brahmāsanaṁ śaṅkarakārmukaṁ ca dadarśa nābhiṁ ca vasundharāyāḥ ।
6.74.60 ॥

kailāsamagryaṁ himavacchilāṁ ca tatharṣabhaṁ kāñcanaśailamagryam ।
sandīptasarvauṣadhisampradīptaṁ dadarśa sarvauṣadhiparvatendram ।
6.74.61 ॥

sa taṁ samīkṣyānalaraśmidīptaṁ visiṣmiye vāsavadūtasūnuḥ ।
āvṛtya taṁ cauṣadhiparvatendraṁ tatrauṣadhīnāṁ vicayañcakāra ।
6.74.62 ॥

sa yojanasahasrāṇi samatītya mahākapiḥ ।
divyauṣadhidharaṁ śailaṁ vyacaranmārutātmajaḥ ।
6.74.63 ॥

mahauṣadhyastataḥ sarvāstasmin parvatasattame ।
vijñāyārthinamāyāntaṁ tato jagmuradarśanam ।
6.74.64 ॥

sa tā mahātmā hanumānapaśyan cukopa kopācca bhṛśaṁ nanāda ।
amṛṣyamāṇo 'gninikāśacakṣurmahīdharendraṁ tamuvāca vākyam ।
6.74.65 ॥

kimetadevaṁ suviniścitaṁ te yadrāghave nāsi kṛtānukampaḥ ।
paśyādya madbāhubalābhibhūto vikīrṇamātmānamatho nagendra ।
6.74.66 ॥

sa tasya śṛṅgaṁ sanagaṁ sanāgaṁ sakāñcanaṁ dhātusahasrajuṣṭam ।
vikīrṇakūṭajvalitāgrasānuṁ pragṛhya vegāt sahasonmamātha ।
6.74.67 ॥

sa taṁ samutpāṭya khamutpapāta vitrāsya lokān sasurāsurendrān ।
saṁstūyamānaḥ khacarairanekairjagāma vaigād garuḍogravegaḥ ।
6.74.68 ॥

sa bhāskarādhvānamanuprapannastaṁ bhāskarābhaṁ śikharaṁ pragṛhya ।
babhau tadā bhāskarasannikāśo raveḥ samīpe pratibhāskarābhaḥ ।
6.74.69 ॥

sa tena śailena bhṛśaṁ rarāja śailopamo gandhavahātmajastu ।
sahasradhāreṇa sapāvakena cakreṇa khe viṣṇurivārpitena ।
6.74.70 ॥

taṁ vānarāḥ prekṣya vineduruccaiḥ sa tānapi prekṣya mudā nanāda ।
teṣāṁ samudghuṣṭaravaṁ niśamya laṅkālayā bhīmataraṁ vineduḥ ।
6.74.71 ॥

tato mahātmā nipapāta tasmin śailottame vānarasainyamadhye ।
haryuttamebhyaḥ śirasā 'bhivādya vibhīṣaṇaṁ tatra sa sasvaje ca ।
6.74.72 ॥

tāvapyubhau mānuṣarājaputrau taṁ gandhamāghrāya mahauṣadhīnām ।
babhūvatustatra tadā viśalyāvuttasthuranye ca haripravīrāḥ ।
6.74.73 ॥

sarve viśalyā virujaḥ kṣaṇena haripravīrā nihatāśca ye syuḥ ।
gandhena tāsāṁ pravarauṣadhīnāṁ suptā niśānteṣviva samprabuddhāḥ ।
6.74.74 ॥

yadāprabhṛti laṅkāyāṁ yuddhyante kapirākṣasāḥ ।
tadāprabhṛti mānārthamājñayā rāvaṇasya ca ।
6.74.75 ॥

ye hanyante raṇe tatra rākṣasāḥ kapikuñjaraiḥ ।
hatā hatāstu kṣipyante sarva eva tu sāgare ।
6.74.76 ॥

tato harirgandhavahātmajastu tamoṣadhīśailamudagravīryaḥ ।
nināya vegāddhimavantameva punaśca rāmeṇa samājagāma ।
6.74.77 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe catussaptatitamaḥ sargaḥ ।
74 ॥