युद्धकाण्डम्Yuddha Kāṇḍa

tato hatān rākṣasapuṅgavāṁstān devāntakāditriśirotikāyān ।
rakṣogaṇāstatra hatāvaśiṣṭāste rāvaṇāya tvaritaṁ śaśaṁsuḥ ।
6.73.1 ॥

tato hatāṁstān sahasā niśamya rājā mumohāśrupariplutākṣaḥ ।
putrakṣayaṁ bhrātṛvadhaṁ ca ghoraṁ vicintya rājā vipulaṁ pradadhyau ।
6.73.2 ॥

tatastu rājānamudīkṣya dīnaṁ śokārṇave samparipupluvānam ।
ratharṣabho rākṣasarājasūnustamindrajidvākyamidaṁ babhāṣe ।
6.73.3 ॥

na tāta mohaṁ pratigantumarhasi yatrendrajijjīvati rākṣasendra ।
nendrāribāṇābhihato hi kaścit prāṇān samarthaḥ samare 'bhipātum ।
6.73.4 ॥

paśyādya rāmaṁ saha lakṣmaṇena madbāṇanirbhinnavikīrṇadeham ।
gatāyuṣaṁ bhūmitale śayānaṁ śitaiḥ śarairācitasarvagātram ।
6.73.5 ॥

imāṁ pratijñāṁ śṛṇu śakraśatroḥ suniścitāṁ pauruṣadaivayuktām ।
adyaiva rāmaṁ saha lakṣmaṇena santarpayiṣyāmi śarairamoghaiḥ ।
6.73.6 ॥

adyendravaivasvataviṣṇumitrasādhyāśvivaiśvānaracandrasūryāḥ ।
drakṣyantu me vikramamaprameyaṁ viṣṇorivograṁ baliyajñavāṭe ।
6.73.7 ॥

sa evamuktvā tridaśendraśatrurāpṛcchya rājānamadīnasattvaḥ ।
samārurohānilatulyavegaṁ rathaṁ kharaśreṣṭhasamādhiyuktam ।
6.73.8 ॥

tamāsthāya mahātejā rathaṁ harirathopamam ।
jagāma sahasā tatra yatra yuddhamarindamaḥ ।
6.73.9 ॥

taṁ prasthitaṁ mahātmānamanujagmurmahābalāḥ ।
saṁharṣamāṇā bahavo dhanuḥpravarapāṇayaḥ ।
6.73.10 ॥

gajaskandhagatāḥ kecit kecit pravaravājibhiḥ ।
prāsamudgaranistriṁśaparaśvadhagadādharāḥ ।
6.73.11 ॥

sa śaṅkhaninadaiḥ pūrṇairbherīṇāṁ cāpi nisvanaiḥ ।
jagāma tridaśendrāriḥ stūyamāno niśācaraiḥ ।
6.73.12 ॥

sa śaṅkhaśaśivarṇena chatreṇa ripusūdanaḥ ।
rarāja pratipūrṇena nabhaścāndramasā yathā ।
6.73.13 ॥

avījyata tato vīro haimairhemavibhūṣitaiḥ ।
cārucāmaramukhyaiśca mukhyaḥ sarvadhanuṣmatām ।
6.73.14 ॥

tatastvindrajitā laṅkā sūryapratimatejasā ।
rarājā prativīreṇa dyaurivārkeṇa bhāsvatā ।
6.73.15 ॥

sa samprāpya mahātejā yuddhabhūmimarindamaḥ ।
sthāpayāmāsa rakṣāṁsi rathaṁ prati samantataḥ ।
6.73.16 ॥

tatastu hutabhoktāraṁ hutabhuksadṛśaprabhaḥ ।
juhāva rākṣasaśreṣṭho mantravadvidhivattadā ।
6.73.17 ॥

sa havirlājasaṁskārairmālyagandhapuraskṛtaiḥ ।
juhuve pāvakaṁ tatra rākṣasendraḥ pratāpavān ।
6.73.18 ॥

śastrāṇi śarapatrāṇi samidho 'tha vibhītakāḥ ।
lohitāni ca vāsāṁsi sruvaṁ kārṣṇāyasaṁ tathā ।
6.73.19 ॥

sa tatrāgniṁ samāstīrya śarapatraiḥ satomaraiḥ ।
chāgasya kṛṣṇavarṇasya galaṁ jagrāha jīvataḥ ।
6.73.20 ॥

sakṛdeva samiddhasya vidhūmasya mahārciṣaḥ ।
babhūvustāni liṅgāni vijayaṁ yānyadarśayan ।
6.73.21 ॥

pradakṣiṇāvartaśikhastaptakāñcanabhūṣaṇaḥ ।
havistat pratijagrāha pāvakaḥ svayamāsthitaḥ ।
6.73.22 ॥

so 'stramāhārayāmāsa brāhmamindraripustadā ।
dhanuścātmarathaṁ caiva sarvaṁ tatrābhyamantrayat ।
6.73.23 ॥

tasminnāhūyamāne 'stre hūyamāne ca pāvake ।
sārdhaṁ grahendunakṣatrairvitatrāsa nabhaḥsthalam ।
6.73.24 ॥

sa pāvakaṁ pāvakadīptatejā hutvā mahendrapratimaprabhāvaḥ ।
sacāpabāṇāsirathāśvasūtaḥ khe 'ntardadhetmānamacintyarūpaḥ ।
6.73.25 ॥

tato hayarathākīrṇaṁ patākādhvajaśobhitam ।
niryayau rākṣasabalaṁ nardamānaṁ yuyutsayā ।
6.73.26 ॥

te śarairbahubhiścitraistīkṣṇavegairalaṅkṛtaiḥ ।
tomarairaṅkuśaiścāpi vānarān jaghnurāhave ।
6.73.27 ॥

rāvaṇistu tataḥ kruddhastānnirīkṣya niśācarān ।
hṛṣṭā bhavanto yuddhyantu vānarāṇāṁ jighāṁsayā ।
6.73.28 ॥

tataste rākṣasāḥ sarve nardanto jayakāṅkṣiṇaḥ ।
abhyavarṣaṁstato ghorān vānarān śaravṛṣṭibhiḥ ।
6.73.29 ॥

sa tu nālīkanārācairgadābhirmusalairapi ।
rakṣobhiḥ saṁvṛtaḥ saṅkhye vānarān vicakarta ha ।
6.73.30 ॥

te vadhyamānāḥ samare vānarāḥ pādapāyudhāḥ ।
abhyadravanta sahitā rāvaṇiṁ raṇakarkaśam ।
6.73.31 ॥

indrajittu tataḥ kruddho mahātejā mahābalaḥ ।
vānarāṇāṁ śarīrāṇi vyadhamadrāvaṇātmajaḥ ।
6.73.32 ॥

śareṇaikena ca harīn nava pañca ca sapta ca ।
ciccheda samare kruddho rākṣasān sampraharṣayan ।
6.73.33 ॥

sa śaraiḥ sūryasaṅkāśaiḥ śātakumbhavibhūṣitaiḥ ।
vānarān samare vīraḥ pramamātha sudurjayaḥ ।
6.73.34 ॥

te bhinnagātrāḥ samare vānarāḥ śapapīḍitāḥ ।
peturmathitasaṅkalpāḥ surairiva mahāsurāḥ ।
6.73.35 ॥

taṁ tapantamivādityaṁ ghorairbāṇagabhastibhiḥ ।
abhyadhāvanta saṅkruddhāḥ saṁyuge vānararṣabhāḥ ।
6.73.36 ॥

tatastu vānarāḥ sarve bhinnadehā vicetasaḥ ।
vyathitā vidravanti sma rudhireṇa samukṣitāḥ ।
6.73.37 ॥

rāmasyārthe parākramya vānarāstyaktajīvitāḥ ।
nardantaste 'bhivṛttāstu samare saśilāyudhāḥ ।
6.73.38 ॥

te drumaiḥ parvatāgraiśca śilābhiśca plavaṅgamāḥ ।
abhyavarṣanta samare rāvaṇiṁ paryavasthitāḥ ।
6.73.39 ॥

taddrumāṇāṁ śilānāṁ ca varṣaṁ prāṇaharaṁ mahat ।
vyapohata mahātejā rāvaṇiḥ samitiñjayaḥ ।
6.73.40 ॥

tataḥ pāvakasaṅkāśaiḥ śarairāśīviṣopamaiḥ ।
vānarāṇāmanīkāni bibheda samare prabhuḥ ।
6.73.41 ॥

aṣṭādaśaśaraistīkṣṇaiḥ sa viddhvā gandhamādanam ।
vivyādha navabhiścaiva nalaṁ dūrādavasthitam ।
6.73.42 ॥

saptabhistu mahā vīryo maindaṁ marmavidāraṇaiḥ ।
pañcabhirviśikhaiścaiva gajaṁ vivyādha saṁyuge ।
6.73.43 ॥

jāmbavantaṁ tu daśabhirnīlaṁ triṁśadbhireva ca ।
sugrīvamṛṣabhaṁ caiva so 'ṅgadaṁ dvividaṁ tathā ।
ghorairdattavaraistīkṣṇairniṣprāṇānakarottadā ।
6.73.44 ॥

anyānapi tadā mukhyān vānarān bahubhiḥ śaraiḥ ।
ardayāmāsa saṅkruddhaḥ kālāgniriva mūrcchitaḥ ।
6.73.45 ॥

sa śaraiḥ sūryasaṅkāśaiḥ sumuktaiḥ śīghragāmibhiḥ ।
vānarāṇāmanīkāni nirmamantha mahāraṇe ।
6.73.46 ॥

ākulāṁ vānarīṁ senāṁ śarajālena mohitām ।
hṛṣṭaḥ sa parayā prītyā dadarśa kṣatajokṣitām ।
6.73.47 ॥

punareva mahātejā rākṣasendrātmajo balī ।
saṁsṛjya bāṇavarṣaṁ ca śastravarṣaṁ ca dāruṇam ।
mamarda vānarānīkamindrajittvarito balī ।
6.73.48 ॥

svasainyamutsṛjya sametya tūrṇaṁ mahāraṇe vānaravāhinīṣu ।
adṛśyamānaḥ śarajālamugraṁ vavarṣa nīlāmbudharo yathā 'mbu ।
6.73.49 ॥

te śakrajidbāṇaviśīrṇadehā māyāhatā visvaramunnadantaḥ ।
raṇe nipeturharayo 'drikalpā yathendravajrābhihatā nagendrāḥ ।
6.73.50 ॥

te kevalaṁ sandadṛśuḥ śitāgrān bāṇān raṇe vānaravāhinīṣu ।
māyānigūḍhaṁ tu surendraśatruṁ na cāvṛtaṁ rākṣasamabhyapaśyan ।
6.73.51 ॥

tataḥ sa rakṣodhipatirmahātmā sarve diśo bāṇagaṇaiḥ śitāgraiḥ ।
pracchādayāmāsa raviprakāśairviṣādayāmāsa ca vānarendrān ।
6.73.52 ॥

sa śūlanistriṁśaparaśvadhāni vyāvidhya dīptānalasannibhāni ।
savisphuliṅgojjvalapāvakāni vavarṣa tīrvraṁ plavagendrasainye ।
6.73.53 ॥

tato jvalanasaṅkāśaiḥ śarairvānarayūthapāḥ ।
tāḍitāḥ śakrajidbāṇaiḥ praphullā iva kiṁśukāḥ ।
6.73.54 ॥

te 'nyonyamabhisarpanto ninadantaśca visvaram ।
rākṣasendrāstranirbhinnā nipeturvānararṣabhāḥ ।
6.73.55 ॥

udīkṣamāṇā gaganaṁ kecinnetreṣu tāḍitāḥ ।
śarairviviśuranyonyaṁ petuśca jagatītale ।
6.73.56 ॥

hanumantaṁ ca sugrīvamaṅgadaṁ gandhamādanam ।
jāmbavantaṁ suṣeṇaṁ ca vegadarśinameva ca ।
6.73.57 ॥

maindaṁ ca dvividaṁ nīlaṁ gavākṣaṁ gajagomukhau ।
kesariṁ harilomānaṁ vidyudṛṁṣṭraṁ ca vānaram ।
6.73.58 ॥

sūryānanaṁ jyotimukhaṁ tathā dadhimukhaṁ harim ।
pāvakākṣaṁ nalaṁ caiva kumudaṁ caiva vānaram ।
6.73.59 ॥

prāsaiḥ śūlaiḥ śitairbāṇairindrajinmantrasaṁhitaiḥ ।
vivyādha hariśārdūlān sarvāṁstān rākṣasottamaḥ ।
6.73.60 ॥

sa vai gadābhirhariyūthamukhyān nirbhidya bāṇaistapanīyapuṅkhaiḥ ।
vavarṣa rāmaṁ śaravṛṣṭijālaiḥ salakṣmaṇaṁ bhāskararaśmikalpaiḥ ।
6.73.61 ॥

sa bāṇavarṣairabhivarṣyamāṇo dhārānipātāniva tānacintya ।
samīkṣamāṇaḥ paramādbhutaśrī rāmastadā lakṣmaṇamityuvāca ।
6.73.62 ॥

asau punarlakṣmaṇa rākṣasendro brahmāstramāśritya surendraśatruḥ ।
nipātayitvā harisainyamugramasmān śarairardayati prasaktaḥ ।
6.73.63 ॥

svayambhuvā dattavaro mahātmā khamāsthito 'ntarhitabhīmakāyaḥ ।
kathaṁ nu śakyo yudhi naṣṭadeho nihantumadyendrajidudyatāstraḥ ।
6.73.64 ॥

manye svayambhūrbhagavānacintyo yasyaitadastraṁ prabhavaśca yo 'sya ।
bāṇāvapātāṁstvamihādya dhīman mayā sahāvyagramanāḥ sahasva ।
6.73.65 ॥

pracchādayatyeṣa hi rākṣasendraḥ sarvā diśaḥ sāyakavṛṣṭijālaiḥ ।
etacca sarvaṁ patitāgryaśūraṁ na bhrājate vānararājasainyam ।
6.73.66 ॥

āvāṁ tu dṛṣṭvā patitau visañjñau nivṛttayuddhau gataroṣaharṣo ।
dhruvaṁ pravekṣyatyamarārivāsamasau samādāya raṇāgralakṣmīm ।
6.73.67 ॥

tatastu tāvindrajidastrajālairbabhūvatustatra tathā viśastau ।
sa cāpi tau tatra vidarśayitvā nanāda harṣādyudhi rākṣasendraḥ ।
6.73.68 ॥

sa tattadā vānarasainyamevaṁ rāmaṁ ca saṅkhye saha lakṣmaṇena ।
viṣādayitvā sahasā viveśa purīṁ daśagrīvabhujābhiguptām ।
6.73.69 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe trisaptatitamaḥ sargaḥ ।
73 ॥