युद्धकाण्डम्Yuddha Kāṇḍa

atikāyaṁ hataṁ śrutvā lakṣmaṇena mahaujasā ।
udvegamagamadrājā vacanaṁ cedamabravīt ।
6.72.1 ॥

dhūbhrākṣaḥ paramāmarṣī dhanvī śastrabhṛtāṁ varaḥ ।
akampanaḥ prahastaśca kumbhakarṇastathaiva ca ।
6.72.2 ॥

ete mahābalā vīrā rākṣasā yuddhakāṅkṣiṇaḥ ।
jetāraḥ parasainyānāṁ parairnityāparājitāḥ ।
6.72.3 ॥

nihatāste mahāvīryā rāmeṇākliṣṭakarmaṇā ।
rākṣasāḥ sumahākāyā nānāśastraviśāradāḥ ।
anye ca bahavaḥ śūrā mahātmāno nipātitāḥ ।
6.72.4 ॥

prakhyātabalavīryeṇa putreṇendrajitā mama ।
yau hi tau bhrātarau vīrau baddhau dattavaraiḥ śaraiḥ ।
6.72.5 ॥

yanna śakyaṁ suraiḥ sarvairasurairvā mahābalaiḥ ।
moktuṁ tadbandhanaṁ ghoraṁ yakṣagandharvakinnaraiḥ ।
6.72.6 ॥

tanna jāne prabhāvairvā māyayā mohanena vā ।
śarabandhādvimuktau tau bhrātarau rāmalakṣmaṇau ।
6.72.7 ॥

ye yodhā nirgatāḥ śūrā rākṣasā mama śāsanāt ।
te sarve nihatā yuddhe vānaraiḥ sumahābalaiḥ ।
6.72.8 ॥

taṁ na paśyāmyahaṁ yuddhe yo 'dya rāmaṁ salakṣmaṇam ।
śāsayet sabalaṁ vīraṁ sasugrīvavibhīṣaṇam ।
6.72.9 ॥

aho nu balavān rāmo mahadastrabalaṁ ca vai ।
yasya vikramamāsādya rākṣasā nidhanaṁ gatāḥ ।
6.72.10 ॥

taṁ manye rāghavaṁ vīraṁ nārāyaṇamanāmayam ।
tadbhayāddhi purī laṅkā pihitadvāratoraṇā ।
6.72.11 ॥

apramattaiśca sarvatra guptai rakṣyā purī tviyam ।
6.72.12 ॥

aśokavanikāyāṁ ca yatra sītā 'bhirakṣyate ।
niṣkrāmo vā praveśo vā jñātavyaḥ sarvathaiva naḥ ।
6.72.13 ॥

yatra yatra bhaved gulmastatratatra punaḥpunaḥ ।
sarvataścāpi tiṣṭhadhvaṁ svaiḥsvaiḥ parivṛtā balaiḥ ।
6.72.14 ॥

draṣṭavyaṁ ca padaṁ teṣāṁ vānarāṇāṁ niśācarāḥ ।
pradoṣe vā 'rdharātre vā pratyūṣe vāpi sarvataḥ ।
6.72.15 ॥

nāvajñā tatra kartavyā vānareṣu kadācana ।
dviṣatāṁ balamudyuktamāpatat kiṁ sthitaṁ sadā ।
6.72.16 ॥

tataste rākṣasāḥ sarve śrutvā laṅkādhipasya tat ।
vacanaṁ sarvamātiṣṭhan yathāvattu mahābalāḥ ।
6.72.17 ॥

sa tān sarvān samādiśya rāvaṇo rākṣasādhipaḥ ।
manyuśalyaṁ vahan dīnaḥ praviveśa svamālayam ।
6.72.18 ॥

tataḥ sa sandīpitakopavahnirniśācarāṇāmadhipo mahābalaḥ ।
tadeva putravyasanaṁ vicintayan muhurmuhuścaiva tadā vyaniśvasat ।
6.72.19 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe dvisaptatitamaḥ sargaḥ ।
72 ॥