युद्धकाण्डम्Yuddha Kāṇḍa

svabalaṁ vyathitaṁ dṛṣṭvā tumulaṁ romaharṣaṇam ।
bhrāta'ṁśca nihatān dṛṣṭvā śakratulyaparākramān ।
6.71.1 ॥

pitṛvyau cāpi sandṛśya samare sanniṣūditau ।
yuddhonmattaṁ ca mattaṁ ca bhrātarau rākṣasarṣabhau ।
6.71.2 ॥

cukopa ca mahātejā brahmadattavaro yudhi ।
atikāyo 'drisaṅkāśo devadānavadarpahā ।
6.71.3 ॥

sa bhāskarasahasrasya saṅghātamiva bhāsvaram ।
rathamāsthāya śakrārirabhidudrāva vānarān ।
6.71.4 ॥

sa visphārya mahaccāpaṁ kirīṭī mṛṣṭakuṇḍalaḥ ।
nāma viśrāvayāmāsa nanāda ca mahāsvanam ।
6.71.5 ॥

tena siṁhapraṇādena nāmaviśrāvaṇena ca ।
jyāśabdena ca bhīmena trāsayāmāsa vānarān ।
6.71.6 ॥

te dṛṣṭvā dehamāhātmyaṁ kumbhakarṇo 'yamutthitaḥ ।
bhayārtā vānarāḥ sarve saṁśrayante parasparam ।
6.71.7 ॥

te tasya rūpamālokya yathā viṣṇostrivikrame ।
bhayādvānarayūthāste vidravanti tatastataḥ ।
6.71.8 ॥

te 'tikāyaṁ samāsādya vānarā mūḍhacetasaḥ ।
śaraṇyaṁ śaraṇaṁ jagmurlakṣmaṇāgrajamāhave ।
6.71.9 ॥

tato 'tikāyaṁ kākutstho rathasthaṁ parvatopamam ।
dadarśa dhanvinaṁ dūrādgarjantaṁ kālameghavat ।
6.71.10 ॥

sa taṁ dṛṣṭvā mahātmānaṁ rāghavastu visiṣmiye ।
vānarān sāntvayitvā 'tha vibhīṣaṇamuvāca ha ।
6.71.11 ॥

ko 'sau parvatasaṅkāśo dhanuṣmān harilocanaḥ ।
yukte hayasahasreṇa viśāle syandane sthitaḥ ।
6.71.12 ॥

ya eṣa niśitaiḥ śūlaiḥ sutīkṣṇaiḥ prāsatomaraiḥ ।
arciṣmadbhirvṛto bhāti bhūtairiva maheśvaraḥ ।
6.71.13 ॥

kālajihvāprakāśābhirya eṣo 'tivirājate ।
āvṛto rathaśaktībhirvidyudbhiriva toyadaḥ ।
6.71.14 ॥

dhanūṁṣi cāsya sajyāni hemapṛṣṭhāni sarvaśaḥ ।
śobhayanti rathaśreṣṭhaṁ śakracāpa ivāmbaram ।
6.71.15 ॥

ka eṣa rakṣaśśārdūlo raṇabhūmiṁ virājayan ।
abhyeti rathināṁ śreṣṭho rathenādityatejasā ।
6.71.16 ॥

dhvajaśṛṅgapratiṣṭhena rāhuṇā 'bhivirājate ।
sūryaraśminibhairbāṇairdiśo daśa virājayan ।
6.71.17 ॥

triṇataṁ meghanirhrādaṁ hemapṛṣṭhamalaṅkṛtam ।
śatakratudhanuḥprakhyaṁ dhanuścāsya virājate ।
6.71.18 ॥

sadhvajaḥ sapatākaśca sānukarṣo mahārathaḥ ।
catussādisamāyukto meghastanitanisvanaḥ ।
6.71.19 ॥

viṁśatirdaśa cāṣṭau ca tūṇyo 'sya rathamāsthitāḥ ।
kārmukāni ca bhīmāni jyāśca kāñcanapiṅgalāḥ ।
6.71.20 ॥

dvau ca khaḍgau rathagatau pārśvasthau pārśvaśobhitau ।
caturhastatsaruyutau vyaktahastadaśāyatau ।
6.71.21 ॥

raktakaṇṭhaguṇo dhīro mahāparvatasannibhaḥ ।
kālaḥ kālamahāvaktro meghastha iva bhāskaraḥ ।
6.71.22 ॥

kāñcanāṅgadanaddhābhyāṁ bhujābhyāmeṣa śobhate ।
śṛṅgābhyāmiva tuṅgābhyāṁ himavān parvatottamaḥ ।
6.71.23 ॥

kuṇḍalābhyāṁ tu yasyaitadbhāti vaktraṁ śubhekṣaṇam ।
punarvasvantaragataṁ pūrṇaṁ bimbamivaindavam ।
6.71.24 ॥

ācakṣva me mahābāho tvamenaṁ rākṣasottamam ।
yaṁ dṛṣṭvā vānarāḥ sarve bhayārtā vidrutā diśaḥ ।
6.71.25 ॥

sa pṛṣṭo rājaputreṇa rāmeṇāmitatejasā ।
ācacakṣe mahātejā rāghavāya vibhīṣaṇaḥ ।
6.71.26 ॥

daśagrīvo mahātejā rājā vaiśravaṇānujaḥ ।
bhīmakarmā mahotsāho rāvaṇo rākṣasādhipaḥ ।
6.71.27 ॥

tasyāsīdvīryavān putro rāvaṇapratimo raṇe ।
vṛddhasevī śrutidharaḥ sarvāstraviduṣāṁ varaḥ ।
6.71.28 ॥

aśvapṛṣṭhe rathe nāge khaḍge dhanuṣi karṣaṇe ।
bhede sāntve ca dāne ca naye mantre ca sammataḥ ।
6.71.29 ॥

yasya bāhū samāśritya laṅkā vasati nirbhayā ।
tanayaṁ dhānyamālinyā atikāyamimaṁ viduḥ ।
6.71.30 ॥

etenārādhito brahmā tapasā bhāvitātmanā ।
astrāṇi cāpyavāptāni ripavaśca parājitāḥ ।
6.71.31 ॥

surāsurairavadhyatvaṁ dattamasmai svayambhuvā ।
etacca kavacaṁ divyaṁ rathaścaiṣo 'rkabhāsvaraḥ ।
6.71.32 ॥

etena śataśo devā dānavāśca parājitāḥ ।
rakṣitāni ca rakṣāṁsi yakṣāścāpi niṣūditāḥ ।
6.71.33 ॥

vajraṁ viṣṭambhitaṁ yena bāṇairindrasya dhīmataḥ ।
pāśaḥ salilarājasya raṇe pratihatastathā ।
6.71.34 ॥

eṣo 'tikāyo balavān rākṣasānāmatharṣabhaḥ ।
rāvaṇasya suto dhīmān devadānavadarpahā ।
6.71.35 ॥

tadasmin kriyatāṁ yatnaḥ kṣipraṁ puruṣapuṅgava ।
purā vānarasainyāni kṣayaṁ nayati sāyakaiḥ ।
6.71.36 ॥

tato 'tikāyo balavān praviśya harivāhinīm ।
visphārayāmāsa dhanurnanāda ca punaḥpunaḥ ।
6.71.37 ॥

taṁ bhīmavapuṣaṁ dṛṣṭvā rathasthaṁ rathināṁ varam ।
abhipeturmahātmāno ye pradhānā vanaukasaḥ ।
6.71.38 ॥

kumudo dvivido maindo nīlaḥ śarabha eva ca ।
pādapairgiriśṛṅgaiśca yugapat samabhidravan ।
6.71.39 ॥

teṣāṁ vṛkṣāṁśca śailāṁśca śaraiḥ kāñcanabhūṣaṇaiḥ ।
atikāyo mahātejāścicchedāstravidāṁ varaḥ ।
6.71.40 ॥

tāṁścaiva sarvān sa harīn śaraiḥ sarvāyasairbalī ।
vivyādhābhimukhaḥ saṅkhye bhīmakāyo niśācaraḥ ।
6.71.41 ॥

te 'rditā bāṇavarṣeṇa bhagnagātrāḥ plavaṅgamāḥ ।
na śekuratikāyasya pratikartuṁ mahāraṇe ।
6.71.42 ॥

tatsainyaṁ harivīrāṇāṁ trāsayāmāsa rākṣasaḥ ।
mṛgayūthamiva kruddho hariryauvanadarpitaḥ ।
6.71.43 ॥

sa rākṣasendro harisainyamadhye nāyudhyamānaṁ nijaghāna kañcit ।
upetya rāmaṁ sadhanuḥ kalāpī sagarvitaṁ vākyamidaṁ babhāṣe ।
6.71.44 ॥

rathe sthito 'haṁ śaracāpapāṇirna prākṛtaṁ kañcana yodhayāmi ।
yaścāsti kaścidvyavasāyayukto dadātu me kṣipramihādya yuddham ।
6.71.45 ॥

tattasya vākyaṁ bruvato niśamya cukopa saumitriramitrahantā ।
amṛṣyamāṇaśca samutpapāta jagrāha cāpaṁ ca tataḥ smayitvā ।
6.71.46 ॥

kruddhaḥ saumitrirutpatya tūṇādākṣipya sāyakam ।
purastādatikāyasya vicakarṣa mahaddhanuḥ ।
6.71.47 ॥

pūrayan sa mahīṁ śailānākāśaṁ sāgaraṁ diśaḥ ।
jyāśabdo lakṣmaṇasyograstrāsayan rajanīcarān ।
6.71.48 ॥

saumitreścāpanirghoṣaṁ śrutvā pratibhayaṁ tadā ।
visiṣmiye mahātejā rākṣasendrātmajo balī ।
6.71.49 ॥

athātikāyaḥ kupito dṛṣṭvā lakṣmaṇamutthitam ।
ādāya niśitaṁ bāṇamidaṁ vacanamabravīt ।
6.71.50 ॥

bālastvamasi saumitre vikrameṣvavicakṣaṇaḥ ।
gaccha kiṁ kālasadṛśaṁ māṁ yodhayitumicchasi ।
6.71.51 ॥

nahi madbāhusṛṣṭānāmastrāṇāṁ himavānapi ।
soḍhumutsahate vegamantarikṣamatho mahī ।
6.71.52 ॥

sukhaprasuptaṁ kālāgniṁ nibodhayitumicchasi ।
nyasyacāpaṁ nivartasva mā prāṇān jahi madgataḥ ।
6.71.53 ॥

athavā tvaṁ pratiṣṭabdho na nivartitumicchasi ।
tiṣṭha prāṇān parityajya gamiṣyasi yamakṣayam ।
6.71.54 ॥

paśya me niśitān bāṇānaridarpaniṣūdanān ।
īśvarāyudhasaṅkāśāṁstaptakāñcanabhūṣaṇān ।
6.71.55 ॥

eṣa te sarpasaṅkāśo bāṇaḥ pāsyati śoṇitam ।
mṛgarāja iva kruddho nāgarājasya śoṇitam ।
ityevamuktvā saṅkruddhaḥ śaraṁ dhanuṣi sandadhe ।
6.71.56 ॥

śrutvā 'tikāyasya vacaḥ saroṣaṁ sagarvitaṁ saṁyati rājaputraḥ ।
sa sañcukopātibalo bṛhacchrīruvāca vākyaṁ ca tato mahārtham ।
6.71.57 ॥

na vākyamātreṇa bhavān pradhāno na katthanāt satpuruṣā bhavanti ।
mayi sthite dhanvini bāṇapāṇau nidarśaya svātmabalaṁ durātman ।
6.71.58 ॥

karmaṇā sūcayātmānaṁ na vikatthitumarhasi ।
pauruṣeṇa tu yo yuktaḥ sa tu śūra iti smṛtaḥ ।
6.71.59 ॥

sarvāyudhasamāyukto dhanvī tvaṁ rathamāsthitaḥ ।
śarairvā yadi vāpyastrairdarśayasva parākramam ।
6.71.60 ॥

tataḥ śiraste niśitaiḥ pātayiṣyāmyahaṁ śaraiḥ ।
mārutaḥ kālasampakvaṁ vṛntāttālaphalaṁ yathā ।
6.71.61 ॥

adya te māmakā bāṇāstaptakāñcanabhūṣaṇāḥ ।
pāsyanti rudhiraṁ gātrādbāṇaśalyāntarotthitam ।
6.71.62 ॥