युद्धकाण्डम्Yuddha Kāṇḍa

narāntakaṁ hataṁ dṛṣṭvā cukruśurnairṛtarṣabhāḥ ।
devāntakastrimūrdhā ca paulastyaśca mahodaraḥ ।
6.70.1 ॥

ārūḍho meghasaṅkāśaṁ vāraṇendraṁ mahodaraḥ ।
vāliputraṁ mahāvīryamabhidudrāva vīryavān ।
6.70.2 ॥

bhrātṛvyasanasantaptastathā devāntako balī ।
ādāya parighaṁ dīptamaṅgadaṁ samabhidravat ।
6.70.3 ॥

rathamādityasaṅkāśaṁ yuktaṁ paramavājibhiḥ ।
āsthāya triśirā vīro vāliputramathābhyayāt ।
6.70.4 ॥

sa tribhirdevadarpaghnairnairṛtendrairabhidrutaḥ ।
vṛkṣamutpāṭayāmāsa mahāviṭapamaṅgadaḥ ।
6.70.5 ॥

devāntakāya taṁ vīraścikṣepa sahasā 'ṅgadaḥ ।
mahāvṛkṣaṁ mahāśākhaṁ śakro dīptamivāśanim ।
6.70.6 ॥

triśirāstaṁ praciccheda śarairāśīviṣopamaiḥ ।
sa vṛkṣaṁ kṛttamālokya utpapāta tadā 'ṅgadaḥ ।
6.70.7 ॥

sa vavarṣa tato vṛkṣān śailāṁśca kapikuñjaraḥ ।
tān praciccheda saṅkruddhastriśirā niśitaiḥ śaraiḥ ।
6.70.8 ॥

parighāgreṇa tān vṛkṣān babhañja ca surāntakaḥ ।
triśirāścāṅgadaṁ vīramabidudrāva sāyakaiḥ ।
6.70.9 ॥

gajena samabhidrutya vāliputraṁ mahodaraḥ ।
jaghānorasi saṅkruddhastomarairvajrasannibhaiḥ ।
6.70.10 ॥

devāntakaśca saṅkruddhaḥ parigheṇa tadā 'ṅgadam ।
upagamyābhihatyāśu vyapacakrāma vegavān ।
6.70.11 ॥

sa tribhirnairṛtaśreṣṭhairyugapat samabhidrutaḥ ।
na vivyathe mahātejā vāliputraḥ pratāpavān ।
6.70.12 ॥

sa vegavān mahāvegaṁ kṛtvā paramadurjayaḥ ।
talena bhṛśamutpatya jaghānāsya mahāgajam ।
6.70.13 ॥

tasya tena prahāreṇa nāgarājasya saṁyuge ।
petaturlocane tasya vinanāda sa vāraṇaḥ ।
6.70.14 ॥

viṣāṇaṁ cāsya niṣkṛṣya vāliputro mahābalaḥ ।
devāntakamabhiplutya tāḍayāmāsa saṁyuge ।
6.70.15 ॥

sa vihvalitasarvāṅgo vātoddhūta iva drumaḥ ।
lākṣārasasavarṇaṁ ca susrāva rudhiraṁ mukhāt ।
6.70.16 ॥

athāśvāsya mahātejāḥ kṛcchrāddevāntako balī ।
āvidhya parighaṁ ghoramājaghāna tadā 'ṅgadam ।
6.70.17 ॥

parighābhihataścāpi vānarendrātmajastadā ।
jānubhyāṁ patito bhūmau punarevotpapāta ha ।
6.70.18 ॥

tamutpatantaṁ triśirāstribhirbāṇairajihmagaiḥ ।
ghorairharipateḥ putraṁ lalāṭe 'bhijaghāna ha ।
6.70.19 ॥

tato 'ṅgadaṁ parikṣiptaṁ tribhirnairṛtapuṅgavaiḥ ।
hanumānapi vijñāya nīlaścāpi pratasthatuḥ ।
6.70.20 ॥

tataścikṣepa śelāgraṁ nīlastriśirase tadā ।
tadrāvaṇasuto dhīmān bibheda niśitaiḥ śaraiḥ ।
6.70.21 ॥

tadbāṇaśatanirbhinnaṁ vidāritaśilātalam ।
savisphuliṅgaṁ sajvālaṁ nipapāta giraḥ śiraḥ ।
6.70.22 ॥

tato jṛmbhitamālokya harṣāddevāntakastadā ।
parigheṇābhidudrāva mārutātmajamāhave ।
6.70.23 ॥

tamāpatantamutplutya hanumān mārutātmajaḥ ।
ājaghāna tadā mūrdhni vajrakalpena muṣṭinā ।
6.70.24 ॥

śirasi praharan vīrastadā vāyusuto balī ।
nādenākampayaccaiva rākṣasān sa mahākapiḥ ।
6.70.25 ॥

sa muṣṭiniṣpiṣṭavikīrṇamūrdhā nirvāntadantākṣivilambijihvaḥ ।
devāntako rākṣasarājasūnurgatāsururvyāṁ sahasā papāta ।
6.70.26 ॥

tasmin hate rākṣasayodhamukhye mahābale saṁyati devaśatrau ।
kruddhastrimūrdhā niśitāgramugraṁ vavarṣa nīlorasi bāṇavarṣam ।
6.70.27 ॥

mahodarastu saṅkruddhaḥ kuñjaraṁ parvatopamam ।
bhūyaḥ samadhiruhyāśu mandaraṁ raśmimāniva ।
6.70.28 ॥

tato bāṇamayaṁ varṣaṁ nīlasyorasyapātayat ।
girau varṣaṁ taḍiccakracāpavāniva toyadaḥ ।
6.70.29 ॥

tataḥ śaraughairabhivarṣyamāṇo vibhinnagātraḥ kapisainyapālaḥ ।
nīlo babhūvātha nisṛṣṭagātro viṣṭambhitastena mahābalena ।
6.70.30 ॥

tatastu nīlaḥ pratilabhya sañjñāṁ śailaṁ samutpāṭya savṛkṣaṣaṇḍam ।
tataḥ samutpatya bhṛśogravego mahodaraṁ tena jaghāna mūrdhni ।
6.70.31 ॥

tataḥ sa śailendranipātabhagno mahodarastena mahādvipena ।
vipothito bhūmitale gatāsuḥ papāta vajrābhihato yathā 'driḥ ।
6.70.32 ॥

pitṛvyaṁ nihataṁ dṛṣṭvā triśirāścāpamādade ।
hanumantaṁ ca saṅkruddho vivyādha niśitaiḥ śaraiḥ ।
6.70.33 ॥

sa vāyusūnuḥ kupitaścikṣepa śikharaṁ gireḥ ।
triśirāstaccharaistīkṣṇairbibheda bahudhā balī ।
6.70.34 ॥

tadvyarthaṁ śikharaṁ dṛṣṭvā drumavarṣaṁ mahākapiḥ ।
visasarja raṇe tasmin rāvaṇasya sutaṁ prati ।
6.70.35 ॥

tamāpantamākāśe drumavarṣaṁ pratāpavān ।
triśirā nisitairbāṇaiściccheda ca nanāda ca ।
6.70.36 ॥

tato hanūmānutplutya hayāṁtriśirasastadā ।
vidadāra nakhaiḥ kruddho gajendraṁ mṛgarāḍiva ।
6.70.37 ॥

atha śaktiṁ samādāya kālarātrimivāntakaḥ ।
cikṣepānilaputrāya triśirā rāvaṇātmajaḥ ।
6.70.38 ॥

divaḥ kṣiptāmivolkāṁ tāṁ śaktiṁ kṣiptāmasaṅgatām ।
gṛhītvā hariśārdūlo babhañja ca nanāda ca ।
6.70.39 ॥

tāṁ dṛṣṭvā ghorasaṅkāśāṁ śaktiṁ bhagnāṁ hanūmatā ।
prahṛṣṭā vānaragaṇā vinedurjaladā iva ।
6.70.40 ॥

tataḥ khaḍgaṁ samudyamya triśirā rākṣasottamaḥ ।
nijaghāna tadā vyūḍhe vāyuputrasya vakṣasi ।
6.70.41 ॥

khaḍgaprahārābhihato hanūmān mārutātmajaḥ ।
ājaghāna triśirasaṁ talenorasi vīryavān ।
6.70.42 ॥

sa talābhihatastena srastahastāyudho bhuvi ।
nipapāta mahātejāstriśirāstyaktacetanaḥ ।
6.70.43 ॥

sa tasya patataḥ khaḍgaṁ samācchidya mahākapiḥ ।
nanāda girisaṅkāśastrāsayan sarvanairṛtān ।
6.70.44 ॥

amṛṣyamāṇastaṁ ghoṣamutpapāta niśācaraḥ ।
utpatya ca hamūmantaṁ tāḍayāmāsa muṣṭinā ।
6.70.45 ॥

tena muṣṭiprahāreṇa sañcukopa mahākapiḥ ।
kupitaśca nijagrāha kirīṭe rākṣasarṣabham ।
6.70.46 ॥

sa tasya śīrṣāṇyasinā śitena kirīṭajuṣṭāni sakuṇḍalāni ।
kruddhaḥ praciccheda suto 'nilasya tvaṣṭuḥ sutasyeva śirāṁsi śakraḥ ।
6.70.47 ॥

tānyāyatākṣāṇyagasannibhāni pradīptavaiśvānaralocanāni ।
petuḥ śirāṁsīndraripordharaṇyāṁ jyotīṁṣi muktāni yathā 'rkamārgāt ।
6.70.48 ॥

tasmin hate devaripau triśīrṣe hanūmatā śakraparākrameṇa ।
neduḥ plavaṅgāḥ pracacāla bhūmī rakṣāṁsyatho dudruvire samantāt ।
6.70.49 ॥

hataṁ triśirasaṁ dṛṣṭvā tathaiva ca mahodaram ।
hatau prekṣya durādharṣau devāntakanarāntakau ।
6.70.50 ॥

cukopa paramāmarṣī matto rākṣasapuṅgavaḥ ।
jagrāhārciṣmatīṁ ghorāṁ gadāṁ sarvāyasīṁ śubhām ।
6.70.51 ॥

hemapaṭṭaparikṣiptāṁ māṁsaśoṇitaphenilām ।
virājamānāṁ vapuṣā śatruśoṇitarañjitām ।
6.70.52 ॥

tejasā sampradīptāgrāṁ raktamālyāvibhūṣitām ।
airāvatamahāpadmasārvabhaumabhayāvahām ।
6.70.53 ॥

gadāmādāya saṅkruddho matto rākṣasapuṅgavaḥ ।
harīn samabhidudrāva yugāntāgniriva jvalan ।
6.70.54 ॥

atharṣabhaḥ samutpatya vānaro rāvaṇānujam ।
mattānīkamupāgamya tasthau tasyāgrato balī ।
6.70.55 ॥

taṁ purastāt sthitaṁ dṛṣṭvā vānaraṁ parvatopamam ।
ājaghānorasi kruddho gadayā vajrakalpayā ।
6.70.56 ॥

sa tayā 'bhihatastena gadayā vānararṣabhaḥ ।
bhinnavakṣāḥ samādhūtaḥ sustrāva rudhiraṁ bahu ।
6.70.57 ॥

sa samprāpya cirāt sañjñāmṛṣabho vānararṣabhaḥ ।
abidudrāva vegena gadāṁ tasya mahātmanaḥ ।
6.70.58 ॥

gṛhītvā tāṁ gadāṁ bhīmāmāvidhya ca punaḥpunaḥ ।
mattānīkaṁ mahātmānaṁ jaghāna raṇamūrdhani ।
6.70.59 ॥

sa svayā gadayā bhagno viśīrṇadaśanekṣaṇaḥ ।
nipapāta tato matto vajrāhata ivācalaḥ ।
6.70.60 ॥

viśīrṇanayane bhūmau gatasattve gatāyuṣi ।
patite rākṣase tasmin vidrutaṁ rākṣasaṁ balam ।
6.70.61 ॥

tasmin hate bhrātari rāvaṇasya tannairṛtānāṁ balamarṇavābham ।
tyaktāyudhaṁ kevalajīvitārthaṁ dudrāva bhinnārṇavasannikāśam ।
6.70.62 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe saptatitamaḥ sargaḥ ।
70 ॥