युद्धकाण्डम्Yuddha Kāṇḍa

evaṁ vilapamānasya rāvaṇasya durātmanaḥ ।
śrutvā śokābhitaptasya triśirā vākyamabravīt ।
6.69.1 ॥

evameva mahāvīryo hato nastātamadhyamaḥ ।
na tu satpuruṣā rājan vilapanti yathā bhavān ।
6.69.2 ॥

nūnaṁ tribhuvanasyāpi paryāptastvamasi prabho ।
sa kasmāt prākṛta iva śocasyātmānamīdṛśam ।
6.69.3 ॥

brahmadattā 'sti te śaktiḥ kavacaḥ sāyako dhanuḥ ।
sahasrakharasaṁyukto ratho meghasvano mahān ।
6.69.4 ॥

tvayā 'sakṛdviśastreṇa viśastā devadānavāḥ ।
sa sarvāyudhasampanno rāghavaṁ śāstumarhasi ।
6.69.5 ॥

kāmaṁ tiṣṭha mahārāja nirgamiṣyāmyahaṁ raṇam ।
uddhariṣyāmi te śatrūn garuḍaḥ pannagāniva ।
6.69.6 ॥

śambaro devarājena narako viṣṇunā yathā ।
tathā 'dya śayitā rāmo mayā yudhi nipātitaḥ ।
6.69.7 ॥

śrutvā triśiraso vākyaṁ rāvaṇo rākṣasādhipaḥ ।
punarjātamivātmānaṁ manyate kālacoditaḥ ।
6.69.8 ॥

śrutvā triśiraso vākyaṁ devāntakanarāntakau ।
atikāyaśca tejasvī babhūvuryuddhaharṣitāḥ ।
6.69.9 ॥

tato 'hamahamityeva garjanto nairṛtarṣabhāḥ ।
rāvaṇasya sutā vīrāḥ śakratulyaparākramāḥ ।
6.69.10 ॥

antarikṣagatāḥ sarve sarve māyāviśāradāḥ ।
sarve tridaśadarpaghnāḥ sarve ca raṇadurjayāḥ ।
6.69.11 ॥

sarve subalasampannāḥ sarve vikīrṇakīrtayaḥ ।
sarve samaramāsādya na śrūyante parājitāḥ ।
devairapi sagandharvaiḥ sakinnaramahoragaiḥ ।
6.69.12 ॥

sarve ca viduṣo vīrāḥ sarve yuddhaviśāradāḥ ।
sarve pravaravijñānāḥ sarve labdhavarāstathā ।
6.69.13 ॥

sa taistadā bhāskaratulyavarcasaiḥ sutairvṛtaḥ śatrubalapramardanaiḥ ।
rarāja rājā maghavān yathā 'marairvṛto mahādānavadarpanāśanaiḥ ।
6.69.14 ॥

sa putrān sampariṣvajya bhūṣayitvā ca bhūṣaṇaiḥ ।
āśīrbhiśca praśastābhiḥ preṣayāmāsa saṁyuge ।
6.69.15 ॥

yuddhonmattaṁ ca mattaṁ ca bhrātarau cāpi rāvaṇaḥ ।
rakṣaṇārthaṁ kumārāṇāṁ preṣayāmāsa saṁyuge ।
6.69.16 ॥

te 'bhivādya mahātmānaṁ rāvaṇaṁ ripurāvaṇam ।
kṛtvā pradakṣiṇaṁ caiva mahākāyāḥ pratasthire ।
6.69.17 ॥

sarvauṣadhībhirgandhaiśca samālabhya mahābalāḥ ।
nirjagmurnairṛtaśreṣṭhāḥ ṣaḍete yuddhakāṅkṣiṇaḥ ।
6.69.18 ॥

triśirāścātikāyaśca devāntakanarāntakau ।
mahodaramahāpārśvo nirjagmuḥ kālacoditāḥ ।
6.69.19 ॥

tataḥ sudarśanaṁ nāma nīlajīmūtasannibham ।
airāvatakule jātamāruroha mahodaraḥ ।
6.69.20 ॥

sarvāyudhasamāyuktaṁ tūṇībhiśca svalaṅkṛtam ।
rarāja gajamāsthāya savitevāstamūrdhani ।
6.69.21 ॥

hayottamasamāyuktaṁ sarvāyudhasamākulam ।
āruroha rathaśreṣṭhaṁ triśirā rāvaṇātmajaḥ ।
6.69.22 ॥

triśirā rathamāsthāya virarāja dhanurdharaḥ ।
savidyudulkaḥ śailāgre sendracāpa ivāmbudaḥ ।
6.69.23 ॥

tribhiḥ kirīṭaiḥ śuśubhe triśirāḥ sa rathottame ।
himavāniva śailendrastribhiḥ kāñcanaparvataiḥ ।
6.69.24 ॥

atikāyo 'pi tejasvī rākṣasendrasutastadā ।
āruroha rathaśreṣṭhaṁ śreṣṭhaḥ sarvadhanuṣmatām ।
6.69.25 ॥

sucakrākṣaṁ susaṁyuktaṁ svanukarṣaṁ sukūbaram ।
tūṇībāṇāsanairdīptaṁ prāsāsiparighākulam ।
6.69.26 ॥

sa kāñcanavicitreṇa mukuṭena virājatā ।
bhūṣaṇaiśca babhau meruḥ kiraṇairiva bhāsayan ।
6.69.27 ॥

sa rarāja rathe tasmin rājasūnurmahābalaḥ ।
vṛto nairṛtaśārdūlairvajrapāṇirivāmaraiḥ ।
6.69.28 ॥

hayamuccaiśśravaprakhyaṁ śvetaṁ kanakabhūṣaṇam ।
manojavaṁ mahākāyamāruroha narāntakaḥ ।
6.69.29 ॥

gṛhītvā prāsamulkābhaṁ virarāja narāntakaḥ ।
śaktimādāya tejasvī guhaḥ śikhigato yathā ।
6.69.30 ॥

devāntakaḥ samādāya parighaṁ vajrabhūṣaṇam ।
parigṛhya girīṁ dorbhyāṁ vapurviṣṇorviḍambayan ।
6.69.31 ॥

mahāpārśvo mahākāyo gadāmādāya vīryavān ।
virarāja gadāpāṇiḥ kubera iva saṁyuge ।
6.69.32 ॥

pratasthire mahātmāno balairapratimairvṛtāḥ ।
surā ivāmarāvatyā balairapratimairvṛtāḥ ।
6.69.33 ॥

tān gajaiśca turaṅgaiśca rathaiścāmbudanisvanaiḥ ।
anujagmurmahātmāno rākṣasāḥ pravarāyudhāḥ ।
6.69.34 ॥

te virejurmahātmānaḥ kumārāḥ sūryavarcasaḥ ।
kirīṭinaḥ śriyā juṣṭā grahā dīptā ivāmbare ।
6.69.35 ॥

pragṛhītā babhau teṣāṁ śastrāṇāmāvaliḥ sitā ।
śāradābhrapratīkāśā haṁsāvalirivāmbare ।
6.69.36 ॥

maraṇaṁ vāpi niścitya śatrūṇāṁ vā parājayam ।
6.69.37 ॥

iti kṛtvā matiṁ vīrā nirjagmuḥ saṁyugārthinaḥ ।
6.69.38 ॥

jagarjuśca praṇeduśca cikṣipuścāpi sāyakān ।
jagṛhuścāpi te vīrā niryānto yuddhadurmadāḥ ।
6.69.39 ॥

kṣvelitāsphoṭaninadaiścacāla ca vasundharā ।
rakṣasāṁ siṁhanādaiśca pusphoṭeva tadā 'mbaram ।
6.69.40 ॥

te 'bhiniṣkramya muditā rākṣasendrā mahābalāḥ ।
dadṛśurvānarānīkaṁ samudyataśilānagam ।
6.69.41 ॥

harayo 'pi mahātmāno dadṛśurnairṛtaṁ balam ।
hastyaśvarathasambādhaṁ kiṅkiṇīśatanāditam ।
6.69.42 ॥

nīlajīmūtasaṅkāśaṁ samudyatamahāyudham ।
dīptānalapaviprakhyaiḥ sarvato nairṛtairvṛtam ।
6.69.43 ॥

tad dṛṣṭvā balamāyāntaṁ labdhalakṣāḥ plavaṅgamāḥ ।
samudyatamahāśailāḥ sampraṇedurmahābalāḥ ।
amṛṣyamāṇā rakṣāṁsi pratinardanti vānarāḥ ।
6.69.44 ॥

tataḥ samudghuṣṭaravaṁ niśamya rakṣogaṇā vānarayūthapānām ।
amṛṣyamāṇāḥ paraharṣamugraṁ mahābalā bhīmataraṁ vineduḥ ।
6.69.45 ॥

te rākṣasabalaṁ ghoraṁ praviśya hariyūthapāḥ ।
vicerurudyataiḥ śailairnagāḥ śikhariṇo yathā ।
6.69.46 ॥

kecidākāśamāviśya kecidurvyāṁ plavaṅgamāḥ ।
rakṣassainyeṣu saṅkruddhāścerurdrumaśilāyudhāḥ ।
6.69.47 ॥

drumāṁśca vipulaskandhān gṛhya vānarapuṅgavāḥ ।
tadyuddhamabhavad ghoraṁ rakṣovānarasaṅkulam ।
6.69.48 ॥

te pādapaśilāśailaiścakrurvṛṣṭimanūpamām ।
bāṇaughairvāyamāṇāśca harayo bhīmavikramāḥ ।
6.69.49 ॥

siṁhanādān vineduśca raṇe vānararākṣasāḥ ।
śilābhiścūrṇayāmāsuryātudhānān plavaṅgamāḥ ।
6.69.50 ॥

nijaghnuḥ saṁyuge kruddhāḥ kavacābharaṇāvṛtān ।
kecidrathagatān vīrān gajavājigatānapi ।
6.69.51 ॥

nijaghnuḥ sahasā ' 'plutya yātudhānān plavaṅgamāḥ ।
śailaśṛṅgācitāṅgāśca muṣṭibhirvāntalocanāḥ ।
6.69.52 ॥

ceruḥ petuśca neduśca tatra rākṣasapuṅgavāḥ ।
rākṣasāśca śaraistīkṣṇairbibhiduḥ kapikuñjarān ।
6.69.53 ॥

śūlamudgarakhaḍgaiśca jaghnuḥ prāsaiśca śaktibhiḥ ।
anyonyaṁ pātayāmāsuḥ parasparajayaiṣiṇaḥ ।
6.69.54 ॥

ripuśoṇitadigdhāṅgāstatra vānararākṣasāḥ ।
tataḥ śailaiśca khaḍgaiśca visṛṣṭairharirākṣasaiḥ ।
6.69.55 ॥

muhūrtenāvṛtā bhūmirabhavacchoṇitāplutā ।
vikīrṇaparvatākārai rakṣobhirarimardanaiḥ ।
āsīdvasumatī pūrṇā tadā yuddhamadānvitaiḥ ।
6.69.56 ॥

ākṣiptāḥ kṣipyamāṇāśca bhagnaśūlāśca vānaraiḥ ।
punaraṅgaistathā cakrurāsannā yuddhamadbhutam ।
6.69.57 ॥

vānarān vānaraireva jaghnuste rajanīcarāḥ ।
rākṣasān rākṣasaireva jaghnuste vānarā api ।
6.69.58 ॥

ākṣipya ca śilāsteṣāṁ nijaghnū rākṣasā harīn ।
teṣāṁ cācchidya śastrāṇi jaghnū rakṣāṁsi vānarāḥ ।
6.69.59 ॥

nijaghnuḥ śailaśūlāstrairbibhiduśca parasparam ।
siṁhanādān vineduśca raṇe vānararākṣasāḥ ।
6.69.60 ॥

chinnavarmatanutrāṇā rākṣasā vānarairhatāḥ ।
rudhiraṁ prasrutāstatra rasasāramiva drumāḥ ।
6.69.61 ॥

rathena ca rathaṁ cāpi vāraṇenaiva vāraṇam ।
6.69.62 ॥

hayena ca hayaṁ kecinnijaghnurvānarā raṇe ।
prahṛṣṭamanasaḥ sarve pragṛhītamanaḥśilāḥ ।
6.69.63 ॥

harayo rākṣasān jaghnurdrumaiśca bahuśākhibhiḥ ।
tadyuddhamabhavad ghoraṁ rakṣovānarasaṅkulam ।
6.69.64 ॥

kṣuraprairardhacandraiśca bhallaiśca niśitaiḥ śaraiḥ ।
rākṣasā vānarendrāṇāṁ cicchiduḥ pādapān śilāḥ ।
6.69.65 ॥

vikīrṇaiḥ parvatāgraiśca drumaiśchinnaiśca saṁyuge ।
hataiśca kapirakṣobirdurgamā vasudhā 'bhavat ।
6.69.66 ॥

te vānarā garvitahṛṣṭaceṣṭāḥ saṅgrāmamāsādya bhayaṁ vimucya ।
yuddhaṁ tu sarve saha rākṣasaistairnānāyudhāścakruradīnasattvāḥ ।
6.69.67 ॥

tasmin pravṛtte tumule vimarde prahṛṣyamāṇeṣu valīmukheṣu ।
nipātyamāneṣu ca rākṣaseṣu maharṣayo devagaṇāśca neduḥ ।
6.69.68 ॥

tato hayaṁ mārutatulyavegamāruhya śaktiṁ niśitāṁ pragṛhya ।
narāntako vānararājasainyaṁ mahārṇavaṁ mīna ivāviveśa ।
6.69.69 ॥

sa vānarān sapta śatāni vīraḥ prāsena dīptena vinirbibheda ।
ekakṣaṇenendraripurmahātmā jaghāna sainyaṁ haripuṅgavānām ।
6.69.70 ॥

dadṛśuśca mahātmānaṁ hayapṛṣṭhe pratiṣṭhitam ।
carantaṁ harisainyeṣu vidyādharamaharṣayaḥ ।
6.69.71 ॥

sa tasya dadṛśo mārgo māṁsaśoṇitakardamaḥ ।
patitaiḥ parvatākārairvānarairabhisaṁvṛtaḥ ।
6.69.72 ॥

yāvadvikramituṁ buddhiṁ cakruḥ plavagapuṅgavāḥ ।
tāvadetānatikramya nirbibheda narāntakaḥ ।
6.69.73 ॥

jvalantaṁ prāsamudyamya saṅgrāmāgre narāntakaḥ ।
dadāha harisainyāni vanānīva vibhāvasuḥ ।
6.69.74 ॥

yāvadutpāṭayāmāsurvṛkṣān śailān vanaukasaḥ ।
tāvat prāsahatāḥ peturvajrakṛttā ivācalāḥ ।
6.69.75 ॥

dikṣu sarvāsu balavān vicacāra narāntakaḥ ।
pramṛdnan sarvato yuddhe prāvṛṭkāle yathā 'nilaḥ ।
6.69.76 ॥

na śekurdhāvituṁ vīrā na sthātuṁ spandituṁ bhayāt ।
utpatantaṁ sthitaṁ yāntaṁ sarvān vivyādha vīryavān ।
6.69.77 ॥

ekenāntakakalpena prāsenādityatejasā ।
bhinnāni harisainyāni nipeturdharaṇītale ।
6.69.78 ॥

vajraniṣpeṣasadṛśaṁ prāsasyābhinipātanam ।
na śekurvānarāḥ soḍhuṁ te vinedurmahāsvanam ।
6.69.79 ॥

patatāṁ harivīrāṇāṁ rūpāṇi pracakāśire ।
vajrabhinnāgrakūṭānāṁ śailānāṁ patatāmiva ।
6.69.80 ॥

ye tu pūrvaṁ mahātmānaḥ kumbhakarṇena pātitāḥ ।
te svasthā vānaraśreṣṭhāḥ sugrīvamupatasthire ।
6.69.81 ॥

viprekṣamāṇaḥ sugrīvo dadarśa harivāhinīm ।
narāntakabhayatrastāṁ vidravantīmitastataḥ ।
6.69.82 ॥

vidrutāṁ vāhinīṁ dṛṣṭvā sa dadarśa narāntakam ।
gṛhītaprāsamāyāntaṁ hayapṛṣṭhe pratiṣṭhitam ।
6.69.83 ॥

athovāca mahātejāḥ sugrīvo vānarādhipaḥ ।
kumāramaṅgadaṁ vīraṁ śakratulyaparākramam ।
6.69.84 ॥

gaccha tvaṁ rākṣasaṁ vīro yo 'sau turagamāsthitaḥ ।
kṣobhayantaṁ haribalaṁ kṣipraṁ prāṇairviyojaya ।
6.69.85 ॥

sa bharturvacanaṁ śrutvā niṣpapātāṅgadastataḥ ।
anīkānmeghasaṅkāśānmeghānīkādivāṁśumān ।
6.69.86 ॥

śailasaṅghātasaṅkāśo harīṇāmuttamo 'ṅgadaḥ ।
rarājāṅgadasannaddhaḥ sadhāturiva parvataḥ ।
6.69.87 ॥

nirāyudho mahātejāḥ kevalaṁ nakhadaṁṣṭravān ।
narāntakamabhikramya vāliputro 'bravīdvacaḥ ।
6.69.88 ॥

tiṣṭha kiṁ prākṛtairebhirharibhistvaṁ kariṣyasi ।
asmin vajrasamasparśaṁ prāsaṅkṣipa mamorasi ।
6.69.89 ॥

aṅgadasya vacaḥ śrutvā pracukrodha narāntakaḥ ।
sandaśya daśanairoṣṭhaṁ viniśvasya bhujaṅgavat ।
6.69.90 ॥

abhigamyāṅgadaṁ kruddho vāliputraṁ narāntakaḥ ।
6.69.91 ॥

prāsaṁ samāvidhya tadā 'ṅgadāya samujjvalantaṁ sahasotsasarja ।
sa vāliputrorasi vajrakalpe babhūva bhagno nyapatacca bhūmau ।
6.69.92 ॥

taṁ prāsamālokya tadā vibhagnaṁ suparṇakṛttoragabhogakalpam ।
talaṁ samudyamya sa vāliputrasturaṅgamaṁ tasya jaghāna mūrdhni ।
6.69.93 ॥

nimagnatāluḥ sphuṭitākṣitāro niṣkrāntajihvo 'calasannikāśaḥ ।
sa tasya vājī nipapāta bhūmau talaprahāreṇa viśīrṇamūrdhā ।
6.69.94 ॥

narāntakaḥ krodhavaśaṁ jagāma hataṁ turaṅgaṁ patitaṁ nirīkṣya ।
sa muṣṭimudyamya mahāprabhāvo jaghāna śīrṣe yudhi vāliputram ।
6.69.95 ॥

athāṅgado muṣṭivibhinnamūrdhā susrāva tīvraṁ rudhiraṁ bhṛśoṣṇam ।
muhurvijajvāla mumoha cāpi sañjñāṁ samāsādya visiṣmiye ca ।
6.69.96 ॥

athāṅgado vajrasamānavegaṁ saṁvartya muṣṭiṁ giriśṛṅgakalpam ।
nipātayāmāsa tadā mahātmā narāntakasyorasi vāliputraḥ ।
6.69.97 ॥

sa muṣṭiniṣpaṣṭavibhinnavakṣā jvālāvamacchoṇitadigdhagātraḥ ।
narāntako bhūmitale papāta yathā 'calo vajranipātabhagnaḥ ।
6.69.98 ॥

athāntarikṣe tridaśottamānāṁ vanaukasāṁ caiva mahāpraṇādaḥ ।
babhūva tasminnihate 'gryavīre narāntake vālisutena saṅkhye ।
6.69.99 ॥

athāṅgado rāmamanaḥpraharṣaṇaṁ suduṣkaraṁ tat kṛtavān hi vikramam ।
visiṣmiye so 'pyativīryavikramaḥ punaśca yuddhe sa babhūva harṣitaḥ ।
6.69.100 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe ekonasaptatitamaḥ sargaḥ ।
69 ॥