युद्धकाण्डम्Yuddha Kāṇḍa

sa tasya gatimanvicchan rājaputraḥ pratāpavān ।
dideśātibalo rāmo daśa vānarayūthapān ।
6.45.1 ॥

dvau suṣeṇasya dāyādau nīlaṁ ca plavagarṣabham ।
aṅgadaṁ vāliputraṁ ca śarabhaṁ ca tarasvinam ।
6.45.2 ॥

vinataṁ jāmbavantaṁ ca sānuprasthaṁ mahābalam ।
ṛṣabhaṁ carṣabhaskandhamādideśa parantapaḥ ।
6.45.3 ॥

te samprahṛṣṭā harayo bhīmānudyamya pādapān ।
ākāśaṁ viviśuḥ sarve mārgamāṇā diśo daśa ।
6.45.4 ॥

teṣāṁ vegavatāṁ vegamiṣubhirvegavattaraiḥ ।
astravit paramāstraistu vārayāmāsa rāvaṇiḥ ।
6.45.5 ॥

taṁ bhīmavegā harayo nārācaiḥ kṣatavigrahāḥ ।
andhakāre na dadṛśurmeghaiḥ sūryamivāvṛtam ।
6.45.6 ॥

rāmalakṣmaṇayoreva sarvadehabhidaḥ śarān ।
bhṛśamāveśayāmāsa rāvaṇiḥ samitiñjayaḥ ।
6.45.7 ॥

nirantaraśarīrau tau bhrātarau rāmalakṣṇau ।
kruddhenendrajitā vīrau pannagaiḥ śaratāṁ gataiḥ ।
6.45.8 ॥

tayoḥ kṣatajamārgeṇa susrāva rudhiraṁ bahu ।
tāvubhau ca prakāśete puṣpitāviva kiṁśukau ।
6.45.9 ॥

tataḥ paryantaraktākṣo bhinnāñjanacayopamaḥ ।
rāvaṇirbhrātarau vākyamantardhānagato 'bravīt ।
6.45.10 ॥

yuddhyamānamanālakṣyaṁ śakro 'pi tridaśeśvaraḥ ।
draṣṭumāsādituṁ vāpi na śaktaḥ kiṁ punaryuvām ।
6.45.11 ॥

prāvṛtāviṣujālena rāghavau kaṅkapatriṇā ।
eṣa roṣaparītātmā nayāmi yamasādanam ।
6.45.12 ॥

evamuktvā tu dharmajñau bhrātarau rāmalakṣmaṇau ।
nirbibheda śitairbāṇaiḥ prajaharṣa nanāda ca ।
6.45.13 ॥

bhinnāñjanacayaśyāmo visphārya vipulaṁ dhanuḥ ।
bhūyo bhūyaḥ śarān ghorān visasarja mahāmṛdhe ।
6.45.14 ॥

tato marmasu marmajño majjayanniśitān śarān ।
rāmalakṣmaṇayorvīro nanāda ca muhurmuhuḥ ।
6.45.15 ॥

baddhau tu śarabandhena tāvubhau raṇamūrdhani ।
nimeṣāntaramātreṇa na śekaturudīkṣitum ।
6.45.16 ॥

tato vibhinnasarvāṅgau śaraśalyācitāvubhau ।
dhvajāviva mahendrasya rajjumuktau prakampitau ।
6.45.17 ॥

tau sampracalitau vīrau marmabhedena karśitau ।
nipetaturmaheṣvāsau jagatyāṁ jagatīpatī ।
6.45.18 ॥

tau vīraśayane vīrau śayānau rudhirokṣitau ।
śaraveṣṭitasarvāṅgāvārtau paramapīḍitau ।
6.45.19 ॥

na hyaviddhaṁ tayorgātre babhūvāṅgulamantaram ।
nānirbhinnaṁ na cāstabdhamākarāgrādajihmagaiḥ ।
6.45.20 ॥

tau tu krūreṇa nihatau rakṣasā kāmarūpiṇā ।
asṛk susruvatustīvraṁ jalaṁ prasravaṇāviva ।
6.45.21 ॥

papāta prathamaṁ rāmo viddho marmasu mārgaṇaiḥ ।
krodhādindrajitā yena purā śakro vinirjitaḥ ।
6.45.22 ॥

rukmapuṅkhaiḥ prasannāgrairadhogatibhirāśugaiḥ ।
nārācairardhanārācairbhallairañjalikairapi ।
vivyādha vatsadantaiśca siṁhadaṁṣṭraiḥ kṣuraistathā ।
6.45.23 ॥

sa vīraśayane śiśye vijyamādāya kārmukam ।
bhinnamuṣṭiparīṇāhaṁ trinataṁ ratnabhūṣitam ।
6.45.24 ॥

bāṇapātāntare rāmaṁ patitaṁ puruṣarṣabham ।
sa tatra lakṣmaṇo dṛṣṭvā nirāśo jīvite 'bhavat ।
6.45.25 ॥

rāmaṁ kamalapatrākṣaṁ śarabandhaparikṣatam ।
śuśoca bhrātaraṁ dṛṣṭvā patitaṁ gharaṇītale ।
6.45.26 ॥

harayaścāpi taṁ dṛṣṭvā santāpaṁ paramaṁ gatāḥ ।
6.45.27 ॥

baddhau tu vīrau patitau śayānau tau vānarāḥ samparivārya tasthuḥ ।
samāgatā vāyusutapramukhyā viṣādamārtāḥ paramaṁ ca jagmuḥ ।
6.45.28 ॥