युद्धकाण्डम्Yuddha Kāṇḍa

tato dyāṁ pṛthivīṁ caiva vīkṣamāṇā vanaukasaḥ ।
dadṛśuḥ santatau bāṇairbhrātarau rāmalakṣmaṇau ।
6.46.1 ॥

vṛṣṭvevoparate deve kṛtakarmaṇi rākṣase ।
ājagāmātha taṁ deśaṁ sasugrīvo vibhīṣaṇaḥ ।
6.46.2 ॥

nīladvividamaindāśca suṣeṇakumudāṅgadāḥ ।
tūrṇaṁ hanumatā sārdhamanvaśocanta rāghavau ।
6.46.3 ॥

aceṣṭau mandaniśvāsau śoṇitaughapariplutau ।
śarajālācitau stabdhau śayānau śaratalpayoḥ ।
6.46.4 ॥

niśvasantau yathā sarpau niśceṣṭau mandavikramau ।
rudhirasrāvadigdhāṅgau tāpanīyāviva dhvajau ।
6.46.5 ॥

tau vīraśayane vīrau śayanau mandaceṣṭitau ।
yūthapaistaiḥ parivṛtau bāṣpavyākulalocanaiḥ ।
6.46.6 ॥

rāghavau patitau dṛṣṭvā śarajālasamāvṛtau ।
babhūvurvyathitāḥ sarve vānarāḥ savibhīṣaṇāḥ ।
6.46.7 ॥

antarikṣaṁ nirīkṣanto diśaḥ sarvāśca vānarāḥ ।
na cainaṁ māyayā cchannaṁ dadṛśū rāvaṇiṁ raṇe ।
6.46.8 ॥

ta tu māyāpraticchannaṁ māyayaiva vibhīṣaṇaḥ ।
vīkṣamāṇo dadarśātha bhrātuḥ putramavasthitam ।
6.46.9 ॥

tamapratimakarmāṇamapratidvandvamāhave ।
dadarśāntarhitaṁ vīraṁ varadānādvibhīṣaṇaḥ ।
6.46.10 ॥

tejasā yaśasā caiva vikrameṇa ca saṁyutam ।
6.46.11 ॥

indrajittvātmanaḥ karma tau śayānau samīkṣya ca ।
uvāca paramaprīto harṣayan sarvanairṛtān ।
6.46.12 ॥

dūṣaṇasya ca hantārau kharasya ca mahābalau ।
sāditau māmakairbāṇairbhrātarau rāmalakṣṇau ।
6.46.13 ॥

nemau mokṣayituṁ śakyāvetasmādiṣubandhanāt ।
sarvairapi samāgamya sarṣisaṅghaiḥ surāsuraiḥ ।
6.46.14 ॥

yatkṛte cintayānasya śokārtasya piturmama ।
aspṛṣṭvā śayanaṁ gātraistriyāmā yāti śarvarī ।
6.46.15 ॥

kṛtsneyaṁ yatkṛte laṅkā nadī varṣāsvivākulā ।
so 'yaṁ mūlaharo 'narthaḥ sarveṣāṁ nihato mayā ।
6.46.16 ॥

rāmasya lakṣmaṇasyāpi sarveṣāṁ ca vanaukasām ।
vikramā niṣphalāḥ sarve yathā śaradi toyadāḥ ।
6.46.17 ॥

evamuktvā tu tān sarvān rākṣasān paripārśvataḥ ।
yūthapānapi tān sarvāṁstāḍayāmāsa rāvaṇiḥ ।
6.46.18 ॥

nīlaṁ navabhirāhatya maindaṁ ca dvividaṁ tathā ।
tribhistribhiramitraghnastatāpa pravareṣubhiḥ ।
6.46.19 ॥

jāmbavantaṁ maheṣvāso viddhvā bāṇena vakṣasi ।
hanūmato vegavato visasarja śarān daśa ।
6.46.20 ॥

gavākṣaṁ śarabhaṁ caiva dvāvapyamitatejasau ।
dvābhyāṁ dvābhyāṁ mahāvego vivyādha yudhi rāvaṇiḥ ।
6.46.21 ॥

golāṅgūleśvaraṁ caiva vāliputramathāṅgadam ।
vivyādha bahubhirbāṇaistvaramāṇo 'tha rāvaṇiḥ ।
6.46.22 ॥

tān vānaravarān bhittvā śarairagniśikhopamaiḥ ।
nanāda balavāṁstatra mahāsattvaḥ sa rāvaṇiḥ ।
6.46.23 ॥

tānardayitvā bāṇaughaistrāsayitvā ca vānarān ।
prajahāsa mahābāhurvacanaṁ cedamabravīt ।
6.46.24 ॥

śarabandhena ghoreṇa mayā baddhau camūmukhe ।
sahitau bhrātarāvetau niśāmayata rākṣasāḥ ।
6.46.25 ॥

evamuktāstu te sarve rākṣasāḥ kūṭayodhinaḥ ।
paraṁ vismayamājagmuḥ karmaṇā tena harṣitāḥ ।
6.46.26 ॥

vineduśca mahānādān sarvato jaladopamāḥ ।
hato rāma iti jñātvā rāvaṇiṁ samapūjayan ।
6.46.27 ॥

niṣpandau tu tadā dṛṣṭvā tāvubhau rāmalakṣmaṇau ।
vasudhāyāṁ nirucchvāsau hatāvityanvamanyata ।
6.46.28 ॥

harṣeṇa tu samāviṣṭa indrajit samitiñjayaḥ ।
praviveśa purīṁ laṅkāṁ harṣayan sarvarākṣasān ।
6.46.29 ॥

rāmalakṣmaṇayorddaṣṭvā śarīre sāyakaiścite ।
sarvāṇi cāṅgopāṅgāni sugrīvaṁ bhayamāviśat ।
6.46.30 ॥

tamuvāca paritrastaṁ vānarendraṁ vibhīṣaṇaḥ ।
sabāṣpavadanaṁ dīnaṁ śokavyākulalocanam ।
6.46.31 ॥

alaṁ trāsena sugrīva bāṣpavego nigṛhyatām ।
evaṁ prāyāṇi yuddhāni vijayo nāsti naiṣṭhikaḥ ।
6.46.32 ॥

saśeṣabhāgyatā 'smākaṁ yadi vīra bhaviṣyati ।
mohametau prahāsyete mahātmānau mahābalau ।
6.46.33 ॥

paryavasthāpayātmānamanāthaṁ māṁ ca vānara ।
satyadharmābhiraktānāṁ nāsti mṛtyukṛtaṁ bhayam ।
6.46.34 ॥

evamuktvā tatastasya jalaklinnena pāṇinā ।
sugrīvasya śubhe netre pramamārja vibhiṣaṇaḥ ।
6.46.35 ॥

tataḥ salilamādāya vidyayā parijapya ca ।
sugrīvanetre dharmātmā sa mamārja vibhīṣaṇaḥ ।
6.46.36 ॥

pramṛjya vadanaṁ tasya kapirājasya dhīmataḥ ।
abravīt kālasamprāptamasambhramamidaṁ vacaḥ ।
6.46.37 ॥

na kālaḥ kapirājendra vaiklavyamanuvartitum ।
atisneho 'pyakāle 'smin maraṇāyopakalpate ।
6.46.38 ॥

tasmādutsṛjya vaiklavyaṁ sarvakāryavināśanam ।
hitaṁ rāmapurogāṇāṁ sainyānāmanucintyatām ।
6.46.39 ॥

athavā rakṣyatāṁ rāmo yāvat sañjñāviparyayaḥ ।
labdhasañjñau hi kākutsthau bhayaṁ no vyapaneṣyataḥ ।
6.46.40 ॥

naitat kiñcana rāmasya na ca rāmo mumūrṣati ।
na hyenaṁ hāsyate lakṣmīrdurlabhā yā gatāyuṣām ।
6.46.41 ॥

tasmādāśvāsayātmānaṁ balaṁ cāśvāsaya svakam ।
yāvat kāryāṇi sarvāṇi punaḥ saṁsthāpayāmyaham ।
6.46.42 ॥

ete hi phullanayanāstrāsādāgatasādhvasāḥ ।
karṇe karṇe prakathitā harayo harisattama ।
6.46.43 ॥

māṁ tu dṛṣṭvā pradhāvantamanīkaṁ sampraharṣitum ।
tyajantu harayastrāsaṁ bhuktapūrvāmiva srajam ।
6.46.44 ॥

samāśvāsya tu sugrīvaṁ rākṣasendro vibhīṣaṇaḥ ।
vidrutaṁ vānarānīkaṁ tatsamāśvāsayat punaḥ ।
6.46.45 ॥

indrajittu mahāmāyaḥ sarvasainyasamāvṛtaḥ ।
viveśa nagarīṁ laṅkāṁ pitaraṁ cābhyupāgamat ।
6.46.46 ॥

tatra rāvaṇamāsīnamabhivādya kṛtāñjaliḥ ।
ācacakṣe priyaṁ pitre nihatau rāmalakṣmaṇau ।
6.46.47 ॥

utpapāta tato hṛṣṭaḥ putraṁ ca pariṣasvaje ।
rāvaṇo rakṣasāṁ madhye śrutvā śatrū nipātitau ।
upāghrāya sa mūrdhnyenaṁ papraccha prītamānasaḥ ।
6.46.48 ॥

pṛcchate ca yathāvṛttaṁ pitre sarvaṁ nyavedayat ।
yathā tau śarabandhena niśceṣṭau niṣprabhau kṛtau ।
6.46.49 ॥

sa harṣavegānugatāntarātmā śrutvā vacastasya mahārathasya ।
jahau jvaraṁ dāśaratheḥ samutthitaṁ prahṛṣya vācā 'bhinananda putram ।
6.46.50 ॥