युद्धकाण्डम्Yuddha Kāṇḍa

pratipraviṣṭe laṅkāṁ tu kṛtārthe rāvaṇātmaje ।
rāghavaṁ parivāryārtā rarakṣurvānararṣabhāḥ ।
6.47.1 ॥

hanumānaṅgado nīlaḥ suṣeṇaḥ kumudo nalaḥ ।
gajo gavākṣo gavayaḥ śarabho gandhamādanaḥ ।
jāmbavānṛṣabhaḥ skandho rambhaḥ śatavaliḥ pṛthuḥ ।
6.47.2 ॥

vyūḍhānīkāśca yattāśca drumānādāya sarvataḥ ।
vīkṣamāṇā diśaḥ sarvāstiryagūrdhvaṁ ca vānarāḥ ।
tṛṇeṣvapi ca ceṣṭatsu rākṣasā iti menire ।
6.47.3 ॥

rāvaṇaścāpi saṁhṛṣṭo visṛjyendrajitaṁ sutam ।
ājuhāva tataḥ sītārakṣiṇī rākṣasīstadā ।
6.47.4 ॥

rākṣasyastrijaṭā caiva śāsanāt samupasthitāḥ ।
6.47.5 ॥

tā uvāca tato hṛṣṭo rākṣasī rākṣasādhipaḥ ।
6.47.6 ॥

hatāvindrajitā ' 'khyāta vaidehyā rāmalakṣmaṇau ।
puṣpakaṁ ca samāropya darśayadhvaṁ hatau raṇe ।
6.47.7 ॥

yadāśrayādavaṣṭabdhā neyaṁ māmupatiṣṭhati ।
so 'syā bharttā saha bhrātrā nirasto raṇamūrdhani ।
6.47.8 ॥

nirviśaṅkā nirudvignā nirapekṣā ca maithilī ।
māmupasthāsyate sītā sarvābharaṇabhūṣitā ।
6.47.9 ॥

adya kālavaśaṁ prāptaṁ raṇe rāmaṁ salakṣmaṇam ।
avekṣya vinivṛttāśā cānyāṁ gatimapaśyatī ।
nirapekṣā viśālākṣī māmupasthāsyate svayam ।
6.47.10 ॥

tasya tadvacanaṁ ca śrutvā rāvaṇasya durātmanaḥ ।
rākṣasyastāstathetyuktvā jagmurvai yatra puṣpakam ।
6.47.11 ॥

tataḥ puṣpakamādāya rākṣasyo rāvaṇājñayā ।
aśokavanikāsthāṁ tāṁ maithilīṁ samupānayan ।
6.47.12 ॥

tāmādāya tu rākṣasyo bhartṛśokaparājitām ।
sītāmāropayāmāsurvimānaṁ puṣpakaṁ tadā ।
6.47.13 ॥

tataḥ puṣpakamāropya sītāṁ trijaṭayā saha ।
jagmurdarśayituṁ tasyai rākṣasyo rāmalakṣmaṇau ।
6.47.14 ॥

rāvaṇo 'kārayallaṅkāṁ patākādhvajamālinīm ।
prāghoṣayata hṛṣṭaśca laṅkāyāṁ rākṣaseśvaraḥ ।
rāghavo lakṣmaṇaścaiva hatāvindrajitā raṇe ।
6.47.15 ॥

vimānenāpi sītā tu gatvā trijaṭayā saha ।
dadarśa vānarāṇāṁ tu sarvaṁ sainyaṁ nipātitam ।
6.47.16 ॥

prahṛṣṭamanasaścāpi dadarśa piśitāśanān ।
vānarāṁścāpi duḥkhārtān rāmalakṣmaṇapārśvataḥ ।
6.47.17 ॥

tataḥ sītā dadarśobhau śayānau śaratalpayoḥ ।
lakṣmaṇaṁ cāpi rāmaṁ ca visañjñau śarapīḍitau ।
6.47.18 ॥

vidhvastakavacau vīrau vipraviddhaśarāsanau ।
sāyakaiśchinnasarvāṅgau śarastambamayau kṣitau ।
6.47.19 ॥

tau dṛṣṭvā bhrātarau tatra vīrau sā puruṣarṣabhau ।
śayānau puṇḍarīkākṣau kumārāviva pāvakī ।
6.47.20 ॥

śaratalpagatau vīrau tathābhūtau nararṣabhau ।
duḥkhārtā subhṛśaṁ sītā suciraṁ vilalāpa ha ।
6.47.21 ॥

bhartāramanavadyāṅgī lakṣmaṇaṁ cāsitekṣaṇā ।
prekṣya pāṁsuṣu veṣṭantau ruroda janakātmajā ।
6.47.22 ॥

sā bāṣpaśokābhihatā samīkṣya tau bhrātarau devasamaprabhāvau ।
vitarkayantī nidhanaṁ tayoḥ sā duḥkhānvitā vākyamidaṁ jagāda ।
6.47.23 ॥