युद्धकाण्डम्Yuddha Kāṇḍa

mahodare tu nihate mahāpārśvo mahābalaḥ ।
sugrīveṇa samīkṣyātha krodhāt saṁraktalocanaḥ ।
aṅgadasya camūṁ bhīmāṁ kṣobhayāmāsa sāyakaiḥ ।
6.99.1 ॥

sa vānarāṇāṁ mukhyānāmuttamāṅgāni sarvaśaḥ ।
pātayāmāsa kāyebhyaḥ phalaṁ vṛntādivānilaḥ ।
6.99.2 ॥

keṣāñcidiṣubhirbāhūn skandhāṁściccheda rākṣasaḥ ।
vānarāṇāṁ susaṅkruddhaḥ pārśvaṁ keṣāṁ vyadārayat ।
6.99.3 ॥

te 'rditā bāṇavarṣeṇa mahāpārśvena vānarāḥ ।
viṣādavimukhāḥ sarve babhūvurgatacetasaḥ ।
6.99.4 ॥

nirīkṣya balamudvignamaṅgado rākṣasārditam ।
vegaṁ cakre mahābāhuḥ samudra iva parvaṇi ।
6.99.5 ॥

āyasaṁ parighaṁ gṛhya sūryaraśmisamaprabham ।
samare vānaraśreṣṭho mahāpārśve nyapātayat ।
6.99.6 ॥

sa tu tena prahāreṇa mahāpārśvo vicetanaḥ ।
sasūtaḥ syandanāttasmādvisañjñaḥ prāpatadbhuvi ।
6.99.7 ॥

sarkṣarājastu tejasvī nīlāñjanacayopamaḥ ।
niṣpatya sumahāvīryaḥ svādvyūhānmeghasannibhāt ।
6.99.8 ॥

pragṛhya giriśṛṅgābhāṁ kruddhaḥ suvipulāṁ śilām ।
aśvān jaghāna tarasā syandanaṁ ca babhañja tam ।
6.99.9 ॥

muhūrtāllabdhasañjñastu mahāpārśvo mahābalaḥ ।
aṅgadaṁ bahubhirbāṇairbhūyastaṁ pratyavidhyata ।
6.99.10 ॥

jāmbavantaṁ tribhirbāṇairājaghāna stanāntare ।
ṛkṣarājaṁ gavākṣaṁ ca jaghāna bahubhiḥ śaraiḥ ।
6.99.11 ॥

jāmbavantaṁ gavākṣaṁ ca sa dṛṣṭvā śarapīḍitau ।
jagrāha parighaṁ ghoramaṅgadaḥ krodhamūrcchitaḥ ।
6.99.12 ॥

tasyāṅgadaḥ prakupito rākṣasasya tamāyasam ।
dūrasthitasya parighaṁ raviraśmisamaprabham ।
6.99.13 ॥

dvābhyāṁ bhujābhyāṁ saṅgṛhya bhrāmayitvā ca vegavān ।
mahāpārśvasya cikṣepa vadhārthaṁ vālinaḥ sutaḥ ।
6.99.14 ॥

sa tu kṣipto balavatā parighastasya rakṣasaḥ ।
dhanuśca saśaraṁ hastācchirastraṁ cāpyapātayat ।
6.99.15 ॥

taṁ samāsādya vegena vāliputraḥ pratāpavān ।
talenābhyahanat kruddhaḥ karṇamūle sakuṇḍale ।
6.99.16 ॥

sa tu kruddho mahāvego mahāpārśvo mahādyutiḥ ।
kareṇaikena jagrāha sumahāntaṁ paraśvadham ।
6.99.17 ॥

taṁ tailadhautaṁ vimalaṁ śailasāramayaṁ dṛḍham ।
rākṣasaḥ paramakruddho vāliputre nyapātayat ।
6.99.18 ॥

tena vāmāṁsaphalake bhṛśaṁ pratyavapāditam ।
aṅgado mokṣayāmāsa saroṣaḥ sa paraśvadham ।
6.99.19 ॥

sa vīro vajrasaṅkāśamaṅgado muṣṭimātmanaḥ ।
saṁvartayat susaṅkruddhaḥ pitustulyaparākramaḥ ।
6.99.20 ॥

rākṣasasya stanābhyāśe marmajño hṛdayaṁ prati ।
indrāśanisamasparśaṁ sa muṣṭiṁ vinyapātayat ।
6.99.21 ॥

tena tasya nipātena rākṣasasya mahāmṛdhe ।
paphāla hṛdayaṁ cāśu sa papāta hato bhuvi ।
6.99.22 ॥

tasminnipatite bhūmau tat sainyaṁ sampracukṣubhe ।
abhavacca mahān krodhaḥ samare rāvaṇasya tu ।
6.99.23 ॥

vānarāṇāṁ ca hṛṣṭānāṁ siṁhanādaśca puṣkalaḥ ।
sphoṭayanniva śabdena laṅkāṁ sāṭṭālagopurām ।
6.99.24 ॥

mahendreṇeva devānāṁ nādaḥ samabhavanmahān ।
6.99.25 ॥

athendraśatrustridivālayānāṁ vanaukasāṁ caiva mahāpraṇādam ।
śrutvā saroṣaṁ yudhi rākṣasendraḥ punaśca yuddhābhimukho 'vatasthe ।
6.99.26 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe ekonaśatatamaḥ sargaḥ ।
99 ॥