युद्धकाण्डम्Yuddha Kāṇḍa

mahodaramahāpārśo hatau dṛṣṭvā tu rākṣasau ।
tasmiṁśca nihate vīre virūpākṣe mahābale ।
āviveśa mahān krodho rāvaṇaṁ taṁ mahāmṛdhe ।
6.100.1 ॥

sūtaṁ sañcodayāmāsa vākyaṁ cedamuvāca ha ।
6.100.2 ॥

nihatānāmamātyānāṁ ruddhasya nagarasya ca ।
duḥkhameṣo 'paneṣyāmi hatvā tau rāmalakṣmaṇau ।
6.100.3 ॥

rāmavṛkṣaṁ raṇe hanmi sītāpuṣpaphalapradam ।
praśākhā yasya sugrīvo jāmbavān kumudo nalaḥ ।
6.100.4 ॥

maindaśca dvividaścaiva hyaṅgado gandhamādanaḥ ।
hamūmāṁśca suṣeṇaśca sarve ca hariyūthapāḥ ।
6.100.5 ॥

sa diśo daśa dhoṣeṇa rathasyātiratho mahān ।
nādayan prayayau tūrṇaṁ rāghavaṁ cābhyavartata ।
6.100.6 ॥

pūritā tena śabdena sanadīgirikānanā ।
sañcacāla mahī sarvā savarāhamṛgadvipā ।
6.100.7 ॥

tāmasaṁ sa mahāghoraṁ cakārāstraṁ sudāruṇam ।
nirdadāha kapīn sarvāṁste prapetuḥ samantataḥ ।
6.100.8 ॥

utpapāta rajo ghoraṁ tairbhagnaiḥ sampradhāvitaiḥ ।
na hi tatsahituṁ śekurbrahmaṇā nirmitaṁ svayam ।
6.100.9 ॥

tānyanīkānyanekāni rāvaṇasya śarottamaiḥ ।
dṛṣṭvā bhagnāni śataśo rāghavaḥ paryavasthitaḥ ।
6.100.10 ॥

tato rākṣasaśārdūlo vidrāvya harivāhinīm ।
sa dadarśa tato rāmaṁ tiṣṭhantamapārajitam ।
6.100.11 ॥

lakṣmaṇena saha bhrātrā viṣṇunā vāsavaṁ yathā ।
ālikhantamivākāśamavaṣṭabhya mahaddhanuḥ ।
padmapatraviśālākṣaṁ dīrghabāhumarindamam ।
6.100.12 ॥

tato rāmo mahātejāḥ saumitrisahito balī ।
vānarāṁśca raṇe bhagnānāpatantaṁ ca rāvaṇam ।
6.100.13 ॥

samīkṣya rāghavo hṛṣṭo madhye jagrāha kārmukam ।
6.100.14 ॥

visphārayitumārebhe tataḥ sa dhanuruttamam ।
mahāvegaṁ mahānādaṁ nirbhindanniva medinīm ।
6.100.15 ॥

rāvaṇasya ca bāṇaughairāmavisphāritena ca ।
śabdena rākṣasāste ca petuśca śataśastadā ।
6.100.16 ॥

tayoḥ śarapathaṁ prāpto rāvaṇo rājaputrayoḥ ।
sa babhau ca yathā rāhuḥ samīpe śaśisūryayoḥ ।
6.100.17 ॥

tamicchan prathamaṁ yoddhuṁ lakṣmaṇo niśitaiḥ śaraiḥ ।
mumoca dhanurāyamya śarānagniśikhopamān ।
6.100.18 ॥

tānmuktamātrānākāśe lakṣmaṇena dhanuṣmatā ।
bāṇān bāṇairmahātejā rāvaṇaḥ pratyavārayat ।
6.100.19 ॥

ekamekena bāṇena tribhistrīn daśabhirdaśa ।
lakṣmaṇasya praciccheda darśayan pāṇilāghavam ।
6.100.20 ॥

abhyatikramya saumitriṁ rāvaṇaḥ samitiñjayaḥ ।
āsasāda tato rāmaṁ sthitaṁ śailamivācalam ।
6.100.21 ॥

sa saṅkhye rāmamāsādya krodhasaṁraktalocanaḥ ।
vyasṛjaccharavarṣāṇi rāvaṇo rāghavopari ।
6.100.22 ॥

śaradhārāstato rāmo rāvaṇasya dhanuścyutāḥ ।
dṛṣṭvaivāpatataḥ śīghraṁ bhallān jagrāha satvaram ।
6.100.23 ॥

tān śaraughāṁstato bhallaistīkṣṇaiściccheda rāghavaḥ ।
dīpyamānān mahāghorān kruddhānāśīviṣāniva ।
6.100.24 ॥

rāghavo rāvaṇaṁ tūrṇaṁ rāvaṇo rāghavaṁ tadā ।
anyonyaṁ vividhaistīkṣṇaiḥ śarairabhivavarṣatuḥ ।
6.100.25 ॥

ceratuśca ciraṁ citraṁ maṇḍalaṁ savyadakṣiṇam ।
bāṇavegān samutkṣiptāvanyonyamapārajitau ।
6.100.26 ॥

tayorbhūtāni vitresuryugapat samprayudhyatoḥ ।
raudrayoḥ sāyakamucoryamāntakanikāśayoḥ ।
6.100.27 ॥

santataṁ vividhairbāṇairbabhūva gaganaṁ tadā ।
ghanairivātapāpāye vidyunmālāsamākulaiḥ ।
6.100.28 ॥

gavākṣitamivākāśaṁ babhūva śaravṛṣṭibhiḥ ।
6.100.29 ॥

mahāvegaiḥ sutīkṣṇāgrairgṛdhrapatraiḥ suvājitaiḥ ।
śarāndhakāraṁ tau bhīmaṁ cakrutuḥ samaraṁ tadā ।
gate 'staṁ tapane cāpi mahāmeghāvivotthitau ।
6.100.30 ॥

babhūva tumulaṁ yuddhamanyonyavadhakāṅkṣiṇoḥ ।
anāsādyamacintyaṁ ca vṛtravāsavayoriva ।
6.100.31 ॥

ubhau hi parameṣvāsāvubhau śastraviśāradau ।
ubhāvastravidāṁ mukhyāvubhau yuddhe viceratuḥ ।
6.100.32 ॥

ubhau hi yena vrajatastena tena śarormayaḥ ।
ūrmayo vāyunā viddhā jagmuḥ sāgarayoriva ।
6.100.33 ॥

tataḥ saṁsaktahastastu rāvaṇo lokarāvaṇaḥ ।
nārācamālāṁ rāmasya lalāṭe pratyamuñcata ।
6.100.34 ॥

raudracāpaprayuktāṁ tāṁ nīlotpaladalaprabhām ।
śirasā dhārayan rāmo na vyathāṁ pratyapadyata ।
6.100.35 ॥

atha mantrānabhijapan raudramastramudīrayan ।
śarān bhūyaḥ samādāya rāmaḥ krodhasamanvitaḥ ।
mumoca ca mahātejāścāpamāyamya vīryavān ।
6.100.36 ॥

te mahāmeghasaṅkāśe kavace patitāḥ śarāḥ ।
avadhye rākṣasendrasya na vyathāṁ janayaṁstadā ।
6.100.37 ॥

punarevātha taṁ rāmo rathasthaṁ rākṣasādhipam ।
lalāṭe paramāstreṇa sarvāstrakuśalo raṇe ।
6.100.38 ॥

te bhittvā bāṇarūpāṇi pañcaśīrṣā ivoragāḥ ।
śvasanto viviśurbhūmiṁ rāvaṇapratikūlitāḥ ।
6.100.39 ॥

nihatya rāghavasyāstraṁ rāvaṇaḥ krodhamūrcchitaḥ ।
āsuraṁ sumahāghoramastraṁ prāduścakāra ha ।
6.100.40 ॥

siṁhavyāghramukhāścānyān kaṅkakākamukhānapi ।
gṛdhraśyenamukhāṁścāpi śṛgālavadanāṁstathā ।
6.100.41 ॥

īhāmṛgamukhāṁścānyān vyāditāsyān bhayānakān ।
pañcāsyān lelihānāṁśca sasarja niśitān śarān ।
6.100.42 ॥

śarān kharamukhāṁścānyān varāhamukhasaṁsthitān ।
śvānakukkuṭavaktrāṁśca makarāśīviṣānanān ।
6.100.43 ॥

etānanyāṁśca māyāvī sasarja niśitān śarān ।
rāmaṁ prati mahātejāḥ kruddhaḥ sarpa iva śvasan ।
6.100.44 ॥

āsureṇa samāviṣṭaḥ so 'streṇa raghunandanaḥ ।
sasarjāstraṁ mahotsāhaḥ pāvakaṁ pāvakopamaḥ ।
6.100.45 ॥

agnidīptamukhān bāṇān tathā sūryamukhānapi ।
candrārdhacandravaktrāṁśca dhūmaketumukhānapi ।
6.100.46 ॥

grahanakṣatravaktrāṁśca maholkāmukhasaṁsthitān ।
vidyujjihvopamāṁścānyān sasarja niśitān śarān ।
6.100.47 ॥

te rāvaṇaśarā ghorā rāghavāstrasamāhatāḥ ।
6.100.48 ॥

vilayaṁ jagmurākāśe jagmuścaiva sahasraśaḥ ।
6.100.49 ॥

tadastraṁ nihataṁ dṛṣṭvā rāmeṇākliṣṭakarmaṇā ।
hṛṣṭā nedustataḥ sarve kapayaḥ kāmarūpiṇaḥ ।
sugrīvapramukhā vīrāḥ parivārya tu rāghavam ।
6.100.50 ॥

tatastadastraṁ vinihatya rāghavaḥ prasahya tadrāvaṇabāhunissṛtam ।
mudā 'nvito dāśarathirmahāhave vineduruccairmuditāḥ kapīśvarāḥ ।
6.100.51 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe śatatamaḥ sargaḥ ।
100 ॥