युद्धकाण्डम्Yuddha Kāṇḍa

tasmin pratihate 'stre tu rāvaṇo rākṣasādhipaḥ ।
krodhaṁ ca dviguṇaṁ cakre krodhāccāstramanantaram ।
6.101.1 ॥

mayena vihitaṁ raudramanyadastraṁ mahādyutiḥ ।
utsraṣṭuṁ rāvaṇo ghoraṁ rāghavāya pracakrame ।
6.101.2 ॥

tataḥ śūlāni niścerurgadāśca musalāni ca ।
kārmukāddīpyamānāni vajrasārāṇi sarvaśaḥ ।
6.101.3 ॥

mudgarāḥ kūṭapāśāśca dīptāścāśanayastathā ।
niṣpeturvividhāstīkṣṇā vātā iva yugakṣaye ।
6.101.4 ॥

tadastraṁ rāghavaḥ śrīmānuttamāstravidāṁ varaḥ ।
jaghāna paramāstreṇa gāndharveṇa mahādyutiḥ ।
6.101.5 ॥

tasmin pratihate 'stre tu rāghaveṇa mahātmanā ।
rāvaṇaḥ krodhatāmrākṣaḥ sauramastramudairayat ।
6.101.6 ॥

tataścakrāṇi niṣpeturbhāsvarāṇi mahānti ca ।
kārmukādbhīmavegasya daśagrīvasya dhīmataḥ ।
6.101.7 ॥

tairāsīdgaganaṁ dīptaṁ sampatadbhiritastataḥ ।
patadbhiśca diśo dīptāścandrasūryagrahairiva ।
6.101.8 ॥

tāni ciccheda bāṇaughaiścakrāṇi sa tu rāghavaḥ ।
āyudhāni ca citrāṇi rāvaṇasya camūmukhe ।
6.101.9 ॥

tadastraṁ tu hataṁ dṛṣṭvā rāvaṇo rākṣasādhipaḥ ।
vivyādha daśabhirbāṇai rāmaṁ sarveṣu marmasu ।
6.101.10 ॥

sa viddho daśabhirbāṇairmahākārmukanissṛtaiḥ ।
rāvaṇena mahātejā na prākampata rāghavaḥ ।
6.101.11 ॥

tato vivyādha gātreṣu sarveṣu samitiñjayaḥ ।
rāghavastu susaṅkruddho rāvaṇaṁ bahubhiḥ śaraiḥ ।
6.101.12 ॥

etasminnantare kruddho rāghavasyānujo balī ।
lakṣmaṇaḥ sāyakān sapta jagrāha paravīrahā ।
6.101.13 ॥

taiḥ sāyakairmahāvegai rāvaṇasya mahādyutiḥ ।
dhvajaṁ manuṣyaśīrṣaṁ tu tasya ciccheda naikadhā ।
6.101.14 ॥

sāratheścāpi bāṇena śiro jvalitakuṇḍalam ।
jahāra lakṣmaṇaḥ śrīmān nairṛtasya mahābalaḥ ।
6.101.15 ॥

tasya bāṇaiśca ciccheda dhanurgajakaropamam ।
lakṣmaṇo rākṣasendrasya pañcabhirniśitaiḥ śaraiḥ ।
6.101.16 ॥

nīlameghanibhāṁścāsya sadaśvān parvatopamān ।
jaghānāplutya gadayā rāvaṇasya vibhīṣaṇaḥ ।
6.101.17 ॥

hatāśvādvegavān vegādavaplutya mahārathāt ।
krodhamāhārayattīvraṁ bhrātaraṁ prati rāvaṇaḥ ।
6.101.18 ॥

tataḥ śaktiṁ mahāśaktirdīptāṁ dīṁptāśanīmiva ।
vibhīṣaṇāya cikṣepa rākṣasendraḥ pratāpavān ।
6.101.19 ॥

aprāptāmeva tāṁ bāṇaistribhiściccheda lakṣmaṇaḥ ।
athodatiṣṭhat sannādo vānarāṇāṁ tadā raṇe ।
6.101.20 ॥

sā papāta tridhā cchinnā śaktiḥ kāñcanamālinī ।
savisphuliṅgā jvalitā maholkeva divaścyutā ।
6.101.21 ॥

tataḥ sambhāvitatarāṁ kālenāpi durāsadām ।
jagrāha vipulāṁ śaktiṁ dīpyamānāṁ svatejasā ।
6.101.22 ॥

sā vegitā balavatā rāvaṇena durāsadā ।
jajvāla sumahāghorā śakrāśanisamaprabhā ।
6.101.23 ॥

etasminnantare vīro lakṣmaṇastaṁ vibhīṣaṇam ।
prāṇasaṁśayamāpannaṁ tūrṇamabhyavapadyata ।
6.101.24 ॥

taṁ vimokṣayituṁ vīraścāpamāyamya lakṣmaṇaḥ ।
rāvaṇaṁ śaktihastaṁ vai śaravarṣairavākirat ।
6.101.25 ॥

kīryamāṇaḥ śaraugheṇa visṛṣṭena mahātmanā ।
sa prahartuṁ manaścakre vimukhīkṛtavikramaḥ ।
6.101.26 ॥

mokṣitaṁ bhrātaraṁ dṛṣṭvā lakṣmaṇena sa rāvaṇaḥ ।
lakṣmaṇābhimukhastiṣṭhannidaṁ vacanamabravīt ।
6.101.27 ॥

mokṣitaste balaślāghin yasmādevaṁ vibhīṣaṇaḥ ।
vimucya rākṣasaṁ śaktistvayīyaṁ vinipātyate ।
6.101.28 ॥

eṣā te hṛdayaṁ bhittvā śaktirlohitalakṣaṇā ।
madbāhuparighotsṛṣṭā prāṇānādāya yāsyati ।
6.101.29 ॥

ityevamuktvā tāṁ śaktimaṣṭaghaṇṭāṁ mahāsvanām ।
mayena māyāvihitāmamoghāṁ śatrughātinīm ।
6.101.30 ॥

lakṣmaṇāya samuddiśya jvalantīmiva tejasā ।
rāvaṇaḥ paramakruddhaścikṣepa ca nanāda ca ।
6.101.31 ॥

sā kṣiptā bhīmavegena śakrāśanisamasvanā ।
śaktirabhyapatadvegāllakṣmaṇaṁ raṇamūrdhani ।
6.101.32 ॥

tāmanuvyāharacchaktimāpatantīṁ sa rāghavaḥ ।
svastyastu lakṣmaṇāyeti moghā bhava hatodyamā ।
6.101.33 ॥

rāvaṇena raṇe śaktiḥ kruddhenāśīviṣopamā ।
muktā ' 'śūrasyabhītasya lakṣmaṇasya mamajja sā ।
6.101.34 ॥

nyapatat sā mahāvegā lakṣmaṇasya mahorasi ।
jihvevoragarājasya dīpyamānā mahādyutiḥ ।
6.101.35 ॥

tato rāvaṇavegena sudūramavagāḍhayā ।
śaktyā nirbhinnahṛdayaḥ papāta bhuvi lakṣmaṇaḥ ।
6.101.36 ॥

tadavasthaṁ samīpastho lakṣmaṇaṁ prekṣya rāghavaḥ ।
bhrātṛsnehānmahātejā viṣaṇṇahṛdayo 'bhavat ।
6.101.37 ॥

sa muhūrtamanudhyāya bāṣpavyākulalocanaḥ ।
babhūva saṁrabdhataro yugānta iva pāvakaḥ ।
6.101.38 ॥

na viṣādasya kālo 'yamiti sañcintya rāghavaḥ ।
cakre sutumulaṁ yuddhaṁ rāvaṇasya vadhe dhṛtaḥ ।
sarvayatnena mahatā lakṣmaṇaṁ sannirīkṣya ca ।
6.101.39 ॥

sa dadarśa tato rāmaḥ śaktyā bhinnaṁ mahāhave ।
lakṣmaṇaṁ rudhirādigdhaṁ sapannagamivācalam ।
6.101.40 ॥

tāmapi prahitāṁ śaktiṁ rāvaṇena balīyasā ।
yatnataste hariśreṣṭhā na śekuravamarditum ।
6.101.41 ॥

arditāścaiva bāṇaughaiḥ kṣiprahastena rakṣasā ।
6.101.42 ॥

saumitriṁ sā vinirbhidya praviṣṭā dharaṇītalam ।
6.101.43 ॥

tāṁ karābhyāṁ parāmṛśya rāmaḥ śaktiṁ bhayāvahām ।
babhañja samare kruddho balavān vicakarṣa ca ।
6.101.44 ॥

tasya niṣkarṣataḥ śaktiṁ rāvaṇena balīyasā ।
śarāḥ sarveṣu gātreṣu pātitā marmabhedinaḥ ।
6.101.45 ॥

acintayitvā tān bāṇān samāśliṣya ca lakṣṇamam ।
abravīccha hanūmantaṁ sugrīvaṁ caiva rāghavaḥ ।
6.101.46 ॥

lakṣmaṇaṁ parivāryeha tiṣṭhadhvaṁ vānarottamāḥ ।
6.101.47 ॥

parākramasya kālo 'yaṁ samprāpto me cirepsitaḥ ।
pāpātmā 'yaṁ daśagrīvo vadhyatāṁ pāpaniścayaḥ ।
kāṅkṣataḥ stokakasyeva gharmānte meghadarśanam ।
6.101.48 ॥

asmin muhūrte na cirāt satyaṁ pratiśṛṇomi vaḥ ।
arāvaṇamarāmaṁ vā jagaddrakṣyatha vānarāḥ ।
6.101.49 ॥

rājyanāśaṁ vane vāsaṁ daṇḍake paridhāvanam ।
vaidehyāśca parāmarśaṁ rakṣobhiśca samāgamam ।
6.101.50 ॥

prāptaṁ duḥkhaṁ mahadghoraṁ kleśaṁ ca nirayopamam ।
adya sarvamahaṁ tyakṣye nihatvā rāvaṇaṁ raṇe ।
6.101.51 ॥

yadarthaṁ vānaraṁ sainyaṁ samānītamidaṁ mayā ।
sugrīvaśca kṛto rājye nihatvā vālinaṁ raṇe ।
6.101.52 ॥

yadarthaṁ sāgaraḥ krāntaḥ seturbaddhaśca sāgare ।
so 'yamadya raṇe pāpaścakṣurviṣayamāgataḥ ।
6.101.53 ॥

cakṣurviṣayamāgamya nāyaṁ jīvitumarhati ।
dṛṣṭiṁ dṛṣṭiviṣasyeva sarpasya mama rāvaṇaḥ ।
6.101.54 ॥

svasthāḥ paśyata durdharṣā yuddhaṁ vānarapuṅgavāḥ ।
āsīnāḥ parvatāgreṣu mamedaṁ rāvaṇasya ca ।
6.101.55 ॥

adya rāmasya rāmatvaṁ paśyantu mama saṁyuge ।
trayo lokāḥ sagandharvāḥ sadevāḥ sarṣicāraṇāḥ ।
6.101.56 ॥

adya karma kariṣyāmi yallokāḥ sacarācarāḥ ।
sadevāḥ kathayiṣyanti yāvadbhūmirdhariṣyati ।
samāgamya sadā loke yathā yuddhaṁ pravartitam ।
6.101.57 ॥

evamuktvā śitairbāṇaistaptakāñcanabhūṣaṇaiḥ ।
ājaghāna daśagrīvaṁ raṇe rāmaḥ samāhitaḥ ।
6.101.58 ॥

atha pradīptairnārācairmusalaiścāpi rāvaṇaḥ ।
abhyavarṣattadā rāmaṁ dhārābhiriva toyadaḥ ।
6.101.59 ॥

rāmarāvaṇamuktānāmanyonyamabhinighnatām ।
śarāṇāṁ ca śarāṇāṁ ca babhūva tumulaḥ svanaḥ ।
6.101.60 ॥

te bhinnāśca vikīrṇāśca rāmarāvaṇayoḥ śarāḥ ।
antarikṣāt pradīptāgrā nipeturdharaṇītale ।
6.101.61 ॥

tayorjyātalanirghoṣo rāmarāvaṇayormahān ।
trāsanaḥ sarvabhūtānāṁ sambabhūvādbhutopamaḥ ।
6.101.62 ॥

sa kīryamāṇaḥ śarajālavṛṣṭibhirmahātmanā dīptadhanuṣmatā 'rditaḥ ।
bhayāt pradudrāva sametya rāvaṇo yathā 'nilenābhihato balāhakaḥ ।
6.101.63 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe ekottaraśatatamaḥ sargaḥ ।
101 ॥