युद्धकाण्डम्Yuddha Kāṇḍa

tathā taiḥ kṛttagātraistu daśagrīveṇa mārgaṇaiḥ ।
babhūva vasudhā tatra prakīrṇā haribhistadā ।
6.97.1 ॥

rāvaṇasyāprasahyaṁ taṁ śarasampātamekataḥ ।
na śekuḥ sahituṁ dīptaṁ pataṅgā jvalanaṁ yathā ।
6.97.2 ॥

te 'rditā niśitairbāṇaiḥ krośanto vipradudruvuḥ ।
pāvakārcissamāviṣṭā dahyamānā yathā gajāḥ ।
6.97.3 ॥

plavaṅgānāmanīkāni mahābhrāṇīva mārutaḥ ।
sa yayau samare tasmin vidhaman rāvaṇaḥ śaraiḥ ।
6.97.4 ॥

kadanaṁ tarasā kṛtvā rākṣasendro vanaukasām ।
āsasāda tato yuddhe rāghavaṁ tvaritastadā ।
6.97.5 ॥

sugrīvastān kapīn dṛṣṭvā bhagnān vidravato raṇe ।
gulme suṣeṇaṁ nikṣipya cakre yuddhe 'dbhutaṁ manaḥ ।
6.97.6 ॥

ātmanaḥ sadṛśaṁ vīraḥ sa taṁ nikṣipya vānaram ।
sugrīvo 'bhimukhaḥ śatruṁ pratasthe pādapāyudhaḥ ।
6.97.7 ॥

pārśvataḥ pṛṣṭataścāsya sarve yūthapādhipāḥ svayam ।
anujahrurmahāśailān vividhāṁśca mahādrumān ।
6.97.8 ॥

sa nardan yudhi sugrīvaḥ svareṇa mahatā mahān ।
pātayan vividhāṁścānyān jagāmottamarākṣasān ।
6.97.9 ॥

mamantha ca mahākāyo rākṣasān vānareśvaraḥ ।
yugāntasamaye vāyuḥ pravṛddhānagamāniva ।
6.97.10 ॥

rākṣasānāmanīkeṣu śailavarṣaṁ vavarṣa ha ।
aśmavarṣaṁ yathā meghaḥ pakṣisaṅgheṣu kānane ।
6.97.11 ॥

kapirājavimuktaistaiḥ śailavarṣaistu rākṣasāḥ ।
vikīrṇaśirasaḥ peturnikṛttā iva parvatāḥ ।
6.97.12 ॥

atha saṅkṣīyamāṇeṣu rākṣaseṣu samantataḥ ।
sugrīveṇa prabhagneṣu patatsu ninadatsu ca ।
6.97.13 ॥

virūpākṣaḥ svakaṁ nāma dhanvī viśrāvya rākṣasaḥ ।
rathādāplutya durdharṣo gajaskandhamupāruhat ।
6.97.14 ॥

sa taṁ dviradamāruhya virūpākṣo mahārathaḥ ।
vinadan bhīmanirhrādaṁ vānarānabhyadhāvata ।
6.97.15 ॥

sugrīve sa śarān ghorān visasarja camūmukhe ।
sthāpayāmāsa codvignān rākṣasān sampraharṣayan ।
6.97.16 ॥

sa tu viddhaḥ śitairbāṇaiḥ kapīndrastena rakṣasā ।
cakrodha sa mahākrodho vadhe cāsya mano dadhe ।
6.97.17 ॥

tataḥ pādapamuddhṛtya śūraḥ sampradhano hariḥ ।
abhipatya jaghānāsya pramukhe tu mahāgajam ।
6.97.18 ॥

sa tu prahārābhihataḥ sugrīveṇa mahāgajaḥ ।
apāsarpaddhanurmātraṁ niṣasāda nanāda ca ।
6.97.19 ॥

gajāttu mathitāttūrṇamapakramya sa vīryavān ।
rākṣaso 'bhimukhaḥ śatruṁ pratyudgamya tataḥ kapim ।
6.97.20 ॥

ārṣabhaṁ carma khaḍgaṁ ca pragṛhya laghuvikramaḥ ।
bhartsayanniva sugrīvamāsasāda vyavasthitam ।
6.97.21 ॥

sa hi tasyābhisaṅkruddhaḥ pragṛhya vipulāṁ śilām ।
virūpākṣāya cikṣepa sugrīvo jaladopamām ।
6.97.22 ॥

sa tāṁ śilāmāpatantīṁ dṛṣṭvā rākṣasapuṅgavaḥ ।
apakramya suvikrāntaḥ khaḍgena prāharattadā ।
6.97.23 ॥

tena khaḍgaprahāreṇa rakṣasā balinā hataḥ ।
muhūrtamabhavadvīro visañjña iva vānaraḥ ।
6.97.24 ॥

sa tadā sahasotpatya rākṣasasya mahāhave ।
muṣṭiṁ saṁvartya vegena pātayāmāsa vakṣasi ।
6.97.25 ॥

muṣṭiprahārābhihato virūpākṣo niśācaraḥ ।
tena khaḍgena saṅkruddhaḥ sugrīvasya camūmukhe ।
kavacaṁ pātayāmāsa padbhyāmabhihato 'patat ।
6.97.26 ॥

sa samutthāya patitaḥ kapistasya vyasarjayat ।
talaprahāramaśaneḥ samānaṁ bhīmanisvanam ।
6.97.27 ॥

talaprahāraṁ tadrakṣaḥ sugrīveṇa samudyatam ।
naipuṇyānmocayitvainaṁ muṣṭinorasyatāḍayat ।
6.97.28 ॥

tatastu saṅkruddhataraḥ sugrīvo vānareśvaraḥ ।
mokṣitaṁ cātmano dṛṣṭvā prahāraṁ tena rakṣasā ।
sa dadarśāntaraṁ tasya virūpākṣasya vānaraḥ ।
6.97.29 ॥

tato nyapātayat krodhācchaṅkhadeśe mahattalam ।
6.97.30 ।
dīptaṁ pataṅgā jvalanaṁ yathā ।
6.97.2 ॥

mahendrāśanikalpena talenābhihataḥ kṣitau ।
6.97.31 ।
dīptaṁ pataṅgā jvalanaṁ yathā ।
6.97.2 ॥

papāta rudhiraklinnaḥ śoṇitaṁ ca samudvaman ।
srotobhyastu virūpākṣo jalaṁ prasravaṇādiva ।
6.97.32 ॥

vivṛttanayanaṁ krodhāt saphenaṁ rudhirāplutam ।
dadṛśuste virūpākṣaṁ virūpākṣataraṁ kṛtam ।
6.97.33 ॥

sphurantaṁ parivartantaṁ pārśvena rudhirokṣitam ।
karuṇaṁ ca vinardantaṁ dadṛśuḥ kapayo ripum ।
6.97.34 ॥

tathā tu tau saṁyati samprayuktau tarasvinau vānararākṣasānām ।
balārṇavau sasvanatuḥ subhīmaṁ mahārṇavau dvāviva bhinnavelau ।
6.97.35 ॥

vināśitaṁ prekṣya virūpanetraṁ mahābalaṁ taṁ haripārthivena ।
balaṁ samastaṁ kapirākṣasānāmunmattagaṅgāpratimaṁ babhūva ।
6.97.36 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe saptanavatitamaḥ sargaḥ ।
97 ॥