युद्धकाण्डम्Yuddha Kāṇḍa

ārtānāṁ rākṣasīnāṁ tu laṅkāyāṁ vai kule kule ।
rāvaṇaḥ karuṇaṁ śabdaṁ śuśrāva paridevitam ।
6.96.1 ॥

sa tu dīrghaṁ viniśvasya muhūrtaṁ dhyānamāsthitaḥ ।
babhūva paramakruddho rāvaṇo bhīmadarśanaḥ ।
6.96.2 ॥

sandaśya daśanairoṣṭhaṁ krodhasaṁraktalocanaḥ ।
rākṣasairapi durdarśaḥ kālāgniriva mūrcchitaḥ ।
6.96.3 ॥

uvāca ca samīpasthān rākṣasān rākṣaseśvaraḥ ।
bhayāvyaktakathastatra nirdahanniva cakṣuṣā ।
6.96.4 ॥

mahodaramāhapārśvau virūpākṣaṁ ca rākṣasam ।
śīghraṁ vadata sainyāni niryāteti mamājñayā ।
6.96.5 ॥

tasya tadvacanaṁ śrutvā rākṣasāste bhayārditāḥ ।
codayāmāsuravyagrān rākṣasāṁstān nṛpājñayā ।
6.96.6 ॥

te tu sarve tathetyuktvā rākṣasā ghoradarśanāḥ ।
kṛtasvastyayanāḥ sarve raṇāyābhimukhā yayuḥ ।
6.96.7 ॥

pratipūjya yathānyāyaṁ rāvaṇaṁ te niśācarāḥ ।
tasthuḥ prāñjalayaḥ sarve bharturvijayakāṅkṣiṇaḥ ।
6.96.8 ॥

athovāca prahasyaitān rāvaṇaḥ krodhamūrcchitaḥ ।
mahodaramahāpārśvau virūpākṣaṁ ca rākṣasam ।
6.96.9 ॥

adya bāṇairdhanurmuktairyugāntādityasannibhaiḥ ।
rāghavaṁ lakṣmaṇaṁ caiva neṣyāmi yamasādanam ।
6.96.10 ॥

kharasya kumbhakarṇasya prahastendrajitostathā ।
kariṣyāmi pratīkāramadya śatruvadhādaham ।
6.96.11 ॥

naivāntarikṣaṁ na diśo na nadyo nāpi sāgarāḥ ।
prakāśatvaṁ gamiṣyanti madbāṇajaladāvṛtāḥ ।
6.96.12 ॥

adya vānaramukhyānāṁ tāni yūthāni bhāgaśaḥ ।
dhanuṣā śarajālena vidhamiṣyāmi patriṇā ।
6.96.13 ॥

adya vānarasainyāni rathena pavanaujasā ।
dhanuḥsamudrādudbhūtairmathiṣyāmi śarormibhiḥ ।
6.96.14 ॥

ākośapadmavaktrāṇi padmakesaravarcasām ।
adya yūthataṭākāni gajavat pramathāmyaham ।
6.96.15 ॥

saśarairadya vadanaiḥ saṅkhye vānarayūthapāḥ ।
maṇḍayiṣyanti vasudhāṁ sanālairiva paṅkajaiḥ ।
6.96.16 ॥

adya yuddhapracaṇḍānāṁ harīṇāṁ drumayodhinām ।
muktenaikeṣuṇā yuddhe bhetsyāmi ca śataṁ śatam ।
6.96.17 ॥

hato bhartā hato bhrātā yāsāṁ ca tanayā hatāḥ ।
vadhenādya ripostāsāṁ karomyasrapramārjanam ।
6.96.18 ॥

adya madbāṇanirbhinnaiḥ prakīrṇairgatacetanaiḥ ।
karomi vānarairyuddhe yatnāvekṣyatalāṁ mahīm ।
6.96.19 ॥

adya gomāyavo gṛdhrā ye ca māṁsāśino 'pare ।
sarvāṁstāṁstarpayiṣyāmi śatrumāṁsaiḥ śarārpitaiḥ ।
6.96.20 ॥

kalpyatāṁ me rathaḥ śīghraṁ kṣipramānīyatāṁ dhanuḥ ।
anuprayāntu māṁ sarve ye 'vaśiṣṭā niśācarāḥ ।
6.96.21 ॥

tasya tadvacanaṁ śrutvā mahāpārśvo 'bravīdvacaḥ ।
balādhyakṣān sthitāṁstatra balaṁ santvaryatāmiti ।
6.96.22 ॥

balādhyakṣāstu saṁrabdhā rākṣasāṁstān gṛhādgṛhāt ।
codayantaḥ pariyayurlaṅkāyāṁ tu mahābalāḥ ।
6.96.23 ॥

tato muhūrtānniṣpetū rākṣasā bhīmadarśanāḥ ।
nardanto bhīmavadanā nānāpraharaṇairbhujaiḥ ।
6.96.24 ॥

asibhiḥ paṭṭiśaiḥ śūlairgadābhirmusalairhulaiḥ ।
śaktibhistīkṣṇadhārābhirmahadbhiḥ kūṭamudgaraiḥ ।
6.96.25 ॥

yaṣṭibhirvimalaiścakrairniśitaiśca paraśvadhaiḥ ।
bhiṇḍipālaiḥ śataghnībhiranyaiścāpi varāyudhaiḥ ।
6.96.26 ॥

athānayadbalādhyakṣaḥ satvaro rāvaṇājñayā ।
drutaṁ sūtasamāyuktaṁ yuktāṣṭaturagaṁ ratham ।
6.96.27 ॥

āruroha rathaṁ bhīmo dīpyamānaṁ svatejasā ।
6.96.28 ॥

tataḥ prayātaḥ sahasā rākṣasairbahubhirvṛtaḥ ।
rāvaṇaḥ sattvagāmbhīryāddārayanniva medinīm ।
6.96.29 ॥

rāvaṇenābhyanujñātau mahāpārśvamahodarau ।
virūpākṣaśca durdharṣo rathānāruruhustadā ।
6.96.30 ॥

te tu hṛṣṭā vinardanto bhindanta iva medinīm ।
nādaṁ ghoraṁ vimuñjanto niryayurjayakāṁkṣiṇaḥ ।
6.96.31 ॥

tato yuddhāya tejasvī rakṣogaṇabalairvṛtaḥ ।
niryayāvudyatadhanuḥ kālāntakayamopamaḥ ।
6.96.32 ॥

tataḥ prajavanāśvena rathena sa mahārathaḥ ।
dvāreṇa niryayau tena yatra tau rāmalakṣmaṇau ।
6.96.33 ॥

tato naṣṭaprabhaḥ sūryo diśaśca timirāvṛtāḥ ।
6.96.34 ॥

dvijāśca nedurghorāśca sañcacāleva medinī ।
vavarṣa rudhiraṁ devaścaskhalusturagāḥ pathi ।
6.96.35 ॥

dhvajāgre nyapatadgṛdhro vineduścāśivaṁ śivāḥ ।
nayanaṁ cāsphuradvāmaṁ savyo bāhurakampata ।
6.96.36 ॥

vivarṇaṁ vadanaṁ cāsīt kiñcidabhraśyata svaraḥ ।
6.96.37 ॥

tato niṣpatato yuddhe daśagrīvasya rakṣasaḥ ।
raṇe nidhanaśaṁsīni rūpāṇyetāni jajñire ।
6.96.38 ॥

antarikṣāt papātolkā nirghātasamanisvanā ।
vineduraśivā gṛdhrā vāyasairanunāditāḥ ।
6.96.39 ॥

etānacintayan ghorānutpātān samupasthitān ।
niryayau rāvaṇo mohādvadhārthī kālacoditaḥ ।
6.96.40 ॥

teṣāṁ tu rathaghoṣeṇa rākṣasānāṁ mahātmanām ।
vānarāṇāmapi camūryuddhāyaivābhyavartata ।
6.96.41 ॥

teṣāṁ tu tumulaṁ yuddhaṁ babhūva kapirakṣasām ।
anyonyamāhvayānānāṁ kruddhānāṁ jayamicchatām ।
6.96.42 ॥

tataḥ kruddho daśagrīvaḥ śaraiḥ kāñcanabhūṣaṇaiḥ ।
vānarāṇāmanīkeṣu cakāra kadanaṁ mahat ।
6.96.43 ॥

nikṛttaśirasaḥ kecidrāvaṇena valīmukhāḥ ।
kecidvicchinna hṛdayāḥ kecicchrotravivarjitāḥ ।
nirucchvāsā hatāḥ kecit kecit pārśveṣu dāritāḥ ।
6.96.44 ॥

kecidvibhinnaśirasaḥ keciccakṣurvivarjitāḥ ।
6.96.45 ॥

daśānanaḥ krodhavivṛttanetro yato yato 'bhyeti rathena saṅkhye ।
tatastatastasya śarapravegaṁ soḍhuṁ na śekurharipuṅgavāste ।
6.96.46 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe ṣaṇṇavatitamaḥ sargaḥ ।
96 ॥