युद्धकाण्डम्Yuddha Kāṇḍa

tāni tāni sahasrāṇi sārohāṇāṁ ca vājinām ।
rathānāṁ tvagnivarṇānāṁ sadhvajānāṁ sahasraśaḥ ।
6.95.1 ॥

rākṣasānāṁ sahasrāṇi gadāparighayodhinām ।
kāñcanadhvajacitrāṇāṁ śūrāṇāṁ kāmarūpiṇām ।
6.95.2 ॥

nihatāni śaraistīkṣṇaistaptakāñcanabhūṣaṇaiḥ ।
rāvaṇena prayuktāni rāmeṇākliṣṭakarmaṇā ।
6.95.3 ॥

dṛṣṭvā śrutvā ca sambhrāntā hataśeṣā niśācarāḥ ।
rākṣasīśca samāgamya dīnāścintāpariplutāḥ ।
6.95.4 ॥

vidhavā hataputrāśca krośantyo hatabāndhavāḥ ।
rākṣasyaḥ saha saṅgamya duḥkhārtāḥ paryadevayan ।
6.95.5 ॥

kathaṁ śūrpaṇakhā vṛddhā karālā nirṇatodarī ।
āsasāda vane rāmaṁ kandarpamiva rūpiṇam ।
sukumāraṁ mahāsattvaṁ sarvabhūtahite ratam ।
6.95.6 ॥

taṁ dṛṣṭvā lokanindyā sā hīnarūpā prakāmitā ।
6.95.7 ।
ndarpamiva rūpiṇam ।
kathaṁ sarvaguṇairhīnā guṇavantaṁ mahaujasam ।
sumukhaṁ durmukhī rāmaṁ kāmayāmāsa rākṣasī ।
6.95.8 ॥

janasyāsyālpabhāgyatvādvalinī śvetamūrdhajā ।
akāryamapahāsyaṁ ca sarvalokavigarhitam ।
6.95.9 ॥

rākṣasānāṁ vināśāya dūṣaṇasya kharasya ca ।
cakārāpratirūpā sā rāghavasya pradharṣaṇam ।
6.95.10 ॥

tannimittamidaṁ vairaṁ rāvaṇena kṛtaṁ mahat ।
vadhāya sītā sā ' 'nītā daśagrīveṇa rakṣasā ।
6.95.11 ॥

na ca sītāṁ daśagrīvaḥ prāpnoti janakātmajām ।
baddhaṁ balavatā vairamakṣayaṁ rāghaveṇa ca ।
6.95.12 ॥

vaidehīṁ prārthayānaṁ taṁ virādhaṁ prekṣya rākṣasam ।
hatamekena rāmeṇa paryāptaṁ tannidarśanam ।
6.95.13 ॥

caturdaśa sahasrāṇi rakṣasāṁ bhīmakarmaṇām ।
nihatāni janasthāne śarairagniśikhopamaiḥ ।
6.95.14 ॥

kharaśca nihataḥ saṅkhye dūṣaṇastriśirāstathā ।
śarairādityasaṅkāśaiḥ paryāptaṁ tannidarśanam ।
6.95.15 ॥

hato yojanabāhuśca kabandho rudhirāśanaḥ ।
krodhānnādaṁ nadan so 'tha paryāptaṁ tannidarśanam ।
6.95.16 ॥

jaghāna balinaṁ rāmaḥ sahasranayanātmajam ।
vālinaṁ merusaṅkāśaṁ paryāptaṁ tannidarśanam ।
6.95.17 ॥

ṛṣyamūke vasan śaile dīno bhagnamanorathaḥ ।
sugrīvaḥ sthāpito rājye paryāptaṁ tannidarśanam ।
6.95.18 ॥

dharmārthasahitaṁ vākyaṁ sarveṣāṁ rakṣasāṁ hitam ।
yuktaṁ vibhīṣaṇenoktaṁ mohāttasya na rocate ।
6.95.19 ॥

vibhīṣaṇavacaḥ kuryādyadi sma dhanadānujaḥ ।
śmaśānabhūtā duḥkhārtā neyaṁ laṅkā purī bhavet ।
6.95.20 ॥

kumbhakarṇaṁ hataṁ śrutvā rāghaveṇa mahābalam ।
atikāyaṁ ca durdharṣaṁ lakṣmaṇena hataṁ punaḥ ।
priyaṁ cendrajitaṁ putraṁ rāvaṇo nāvabudhyate ।
6.95.21 ॥

mama putro mama bhrātā mama bhartā raṇe hataḥ ।
ityevaṁ śrūyate śabdo rākṣasānāṁ kule kule ।
6.95.22 ॥

rathāścāśvāśca nāgāśca hatāḥ śatasahasraśaḥ ।
raṇe rāmeṇa śūreṇa rākṣasāśca padātayaḥ ।
6.95.23 ॥

rudro vā yadi vā viṣṇurmahendro vā śatakratuḥ ।
hanti no rāmarūpeṇa yadi vā svayamantakaḥ ।
6.95.24 ॥

hatapravīrā rāmeṇa nirāśā jīvite vayam ।
apaśyanto bhayasyāntamanāthā vilapāmahe ।
6.95.25 ॥

rāmahastāddaśagrīvaḥ śūro dattamahāvaraḥ ।
idaṁ bhayaṁ mahāghoramutpannaṁ nāvabudhyate ।
6.95.26 ॥

na devā na ca gandharvā na piśācā na rākṣasāḥ ।
upasṛṣṭaṁ paritrātuṁ śaktā rāmeṇa saṁyuge ।
6.95.27 ॥

utpātāścāpi dṛśyante rāvaṇasya raṇe raṇe ।
kathayiṣyanti rāmeṇa rāvaṇasya nibarhaṇam ।
6.95.28 ॥

pitāmahena prītena devadānavarākṣasaiḥ ।
rāvaṇasyābhayaṁ dattaṁ mānuṣebhyo na yācitam ।
6.95.29 ॥

tadidaṁ mānuṣaṁ manye prāptaṁ nissaṁśayaṁ bhayam ।
jīvitāntakaraṁ ghoraṁ rakṣasāṁ rāvaṇasya ca ।
6.95.30 ॥

pīḍyamānāstu balinā varadānena rakṣasā ।
dīptaistapobhirvibudhāḥ pitāmahamapūjayan ।
6.95.31 ॥

devatānāṁ hitārthāya mahātmā vai pitāmahaḥ ।
uvāca devatāḥ sarvā idaṁ tuṣṭo mahadvacaḥ ।
6.95.32 ॥

adyaprabhṛti lokāṁstrīn sarve dānavarākṣasāḥ ।
bhayena prāvṛtā nityaṁ vicariṣyanti śāśvatam ।
6.95.33 ॥

daivataistu samāgamya sarvaiścendrapurogamaiḥ ।
vṛṣadhvajastripurahā mahādevaḥ prasāditaḥ ।
6.95.34 ॥

prasannastu mahādevo devānetadvaco 'bravīt ।
utpatsyati hitārthaṁ vo nārī rakṣaḥkṣayāvahā ।
6.95.35 ॥

eṣā devaiḥ prayuktā tu kṣudyathā dānavān purā ।
bhakṣayiṣyati naḥ sītā rākṣasaghnī sarāvaṇān ।
6.95.36 ॥

rāvaṇasyāpanītena durvinītasya durmateḥ ।
ayaṁ niṣṭhānako ghoraḥ śokena samabhiplutaḥ ।
6.95.37 ॥

taṁ na paśyāmahe loke yo naḥ śaraṇado bhavet ।
rāghaveṇopasṛṣṭānāṁ kāleneva yugakṣaye ।
6.95.38 ॥

nāsti naḥ śaraṇaṁ kaścidbhaye mahati tiṣṭhatām ।
davāgniveṣṭitānāṁ hi kareṇūnāṁ yathā vane ।
6.95.39 ॥

prāptakālaṁ kṛtaṁ tena paulastyena mahātmanā ।
yata eva bhayaṁ dṛṣṭaṁ tameva śaraṇaṁ gataḥ ।
6.95.40 ॥

itīva sarvā rajanīcarastriyaḥ parasparaṁ samparirabhya bāhubhiḥ ।
viṣedurārtā bhayabhārapīḍitā vineduruccaiśca tadā sudāruṇam ।
6.95.41 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe pañcanavatitamaḥ sargaḥ ।
95 ॥