युद्धकाण्डम्Yuddha Kāṇḍa

sa praviśya sabhāṁ rājā dīnaḥ paramaduḥkhitaḥ ।
niṣasādāsane siṁhaḥ kruddha iva śvasan ।
6.94.1 ॥

abravīcca sa tān sarvān balamukhyān mahābalaḥ ।
rāvaṇaḥ prāñjalirvākyaṁ putravyasanakarśitaḥ ।
6.94.2 ॥

sarve bhavantaḥ sarveṇa hastyaśvena samāvṛtāḥ ।
niryāntu rathasaṅghaiśca pādātaiścopaśobhitāḥ ।
6.94.3 ॥

ekaṁ rāmaṁ parikṣipya samare hantumarhatha ।
varṣantaḥ śaravarṣeṇa prāvṛṭkāla ivāmbudāḥ ।
6.94.4 ॥

athavā 'haṁ śaraistīkṣṇairbhinnagātraṁ mahāraṇe ।
bhavadbhiḥ śvo nihantāsmi rāmaṁ lokasya paśyataḥ ।
6.94.5 ॥

ityetadrākṣasendrasya vākyamādāya rākṣasāḥ ।
niryayuste rathaiḥ śīghrairnānānīkaiḥ susaṁvṛtāḥ ।
6.94.6 ॥

parighān paṭṭiśāṁścaiva śarakhaḍgaparaśvadhān ।
śarīrāntakarān sarve cikṣipurvānarān prati ।
6.94.7 ॥

vānarāśca drumān śailān rākṣasān prati cikṣipuḥ ।
6.94.8 ॥

sa saṅgrāmo mahān bhīmaḥ sūryasyodayanaṁ prati ।
rakṣasāṁ vānarāṇāṁ ca tumulaḥ samapadyata ।
6.94.9 ॥

te gadābhirvicitrābhiḥ prāśaiḥ khaḍgaiḥ paraśvadhaiḥ ।
anyonyaṁ samare jaghnustadā vānararākṣasāḥ ।
6.94.10 ॥

evaṁ pravṛtte saṅgrāme hyudbhūtaṁ sumahadrajaḥ ।
rakṣasāṁ vānarāṇāṁ ca śāntaṁ śoṇitavisravaiḥ ।
6.94.11 ॥

mātaṅgarathakūlāśca vājimatsyā dhvajadrumāḥ ।
śarīrasaṅghāṭavahāḥ prasasruḥ śoṇitāpagāḥ ।
6.94.12 ॥

tataste vānarāḥ sarve śoṇitaughapariplutāḥ ।
dhvajavarmarathānaśvānnānāpraharaṇāni ca ।
āplutyāplutya samare rākṣasānāṁ babhañjire ।
6.94.13 ॥

keśān karṇalalāṭāṁśca nāsikāśca plavaṅgamāḥ ।
rakṣasāṁ daśanaistīkṣṇairnakhaiścāpi nyakartayan ।
6.94.14 ॥

ekaikaṁ rākṣasaṁ saṅkhye śataṁ vānarapuṅgavāḥ ।
abhyadhāvanta phalinaṁ vṛkṣaṁ śakunayo yathā ।
6.94.15 ॥

tathā gadābhirgurvībhiḥ prāsaiḥ khaḍgaiḥ paraśvadhaiḥ ।
nijaghnurvānarān ghorān rākṣasāḥ parvatopamāḥ ।
6.94.16 ॥

rākṣasairyuddhyāmānānāṁ vānarāṇāṁ mahācamūḥ ।
śaraṇyaṁ śaraṇaṁ yātā rāmaṁ daśarathātmajam ।
6.94.17 ॥

tato rāmo mahātejā dhanurādāya vīryavān ।
praviśya rākṣasaṁ sainyaṁ śaravarṣaṁ vavarṣa ha ।
6.94.18 ॥

praviṣṭaṁ tu tadā rāmaṁ meghāḥ sūryamivāmbare ।
nābhijagmurmahāghoraṁ nirdahantaṁ śarāgninā ।
6.94.19 ॥

kṛtānyeva sughorāṇi rāmeṇa rajanīcarāḥ ।
raṇe rāmasya dadṛśuḥ karmāṇyasukarāṇi ca ।
6.94.20 ॥

cālayantaṁ mahānīkaṁ vidhamantaṁ mahārathān ।
dadṛśuste na vai rāmaṁ vātaṁ vanagataṁ yathā ।
6.94.21 ॥

chinnaṁ bhinnaṁ śarairdagdhaṁ prabhagnaṁ śastrapīḍitam ।
balaṁ rāmeṇa dadṛśurna rāmaṁ śīghrakāriṇam ।
6.94.22 ॥

praharantaṁ śarīreṣu na te paśyanti rāghavam ।
indriyārtheṣu tiṣṭhantaṁ bhūtātmānamiva prajāḥ ।
6.94.23 ॥

eṣa hanti gajānīkameṣa hanti mahārathān ।
eṣa hanti śaraistīkṣṇaiḥ padātīn vājibhiḥ saha ।
6.94.24 ॥

iti te rākṣasāḥ sarve rāmasya sadṛśān raṇe ।
anyonyaṁ kupitā jaghnuḥ sādṛśyādrāghavasya te ।
6.94.25 ॥

na te dadṛśire rāmaṁ dahantamarivāhinīm ।
mohitāḥ paramāstreṇa gāndharveṇa mahātmanā ।
6.94.26 ॥

te tu rāmasahasrāṇi raṇe paśyanti rākṣasāḥ ।
punaḥ paśyanti kākutsthamekameva mahāhave ।
6.94.27 ॥

bhramantīṁ kāñcanīṁ koṭiṁ kārmukasya mahātmanaḥ ।
alātacakrapratimāṁ dadṛśuste na rāghavam ।
6.94.28 ॥

śarīranābhisattvārciḥ śarīraṁ nemikārmukam ।
jyāghoṣatalanirghoṣaṁ tejobuddhiguṇaprabham ।
6.94.29 ॥

divyāstraguṇaparyantaṁ nighnantaṁ yudhi rākṣasān ।
dadṛśū rāmacakraṁ tat kālacakramiva prajāḥ ।
6.94.30 ॥

anīkaṁ daśasāhasraṁ rathānāṁ vātaraṁhasām ।
aṣṭādaśa sahasrāṇi kuñjarāṇāṁ tarasvinām ।
6.94.31 ॥

caturdaśa sahasrāṇi sārohāṇāṁ ca vājinām ।
pūrṇe śatasahasre dve rākṣasānāṁ padātinām ।
6.94.32 ॥

divasasyāṣṭame bhāge śarairagniśikhopamaiḥ ।
hatānyekena rāmeṇa rakṣasāṁ kāmarūpiṇām ।
6.94.33 ॥

te hatāśvā hatarathāḥ śāntā vimathitadhvajāḥ ।
abhipetuḥ purīṁ laṅkāṁ hataśeṣā niśācarāḥ ।
6.94.34 ॥

hatairgajapadātyaśvaistadbabhūva raṇājiram ।
ākrīḍamiva rudrasya kruddhasya sumahātmanaḥ ।
6.94.35 ॥

tato devāḥ sagandharvāḥ siddhāśca paramarṣayaḥ ।
sādhu sādhviti rāmasya tat karma samapūjayan ।
6.94.36 ॥

abravīcca tadā rāmaḥ sugrīvaṁ pratyanantaram ।
vibhīṣaṇaṁ ca dharmātmā hanūmantaṁ ca vānaram ।
6.94.37 ॥

jāmbavantaṁ hariśreṣṭhaṁ maindaṁ dvividameva ca ।
etadastrabalaṁ divyaṁ mama vā tryambakasya vā ।
6.94.38 ॥

nihatya tāṁ rākṣasavāhinīṁ tu rāmastadā śakrasamo mahātmā ।
astreṣu śastreṣu jitaklamaśca saṁstūyate devagaṇaiḥ prahṛṣṭaiḥ ।
6.94.39 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe caturnavatitamaḥ sargaḥ ।
94 ॥