युद्धकाण्डम्Yuddha Kāṇḍa

tataḥ paulastyasacivāḥ śrutvā cendrajitaṁ hatam ।
ācacakṣurabhijñāya daśagrīvāya savyathāḥ ।
6.93.1 ॥

yuddhe hato mahārāja lakṣmaṇena tavātmajaḥ ।
vibhīṣaṇasahāyena miṣatāṁ no mahādyutiḥ ।
6.93.2 ॥

śūraḥ śūreṇa saṅgamya saṁyugeṣvaparajitaḥ ।
lakṣmaṇena hataḥ śūraḥ putrastu vibudhendrajit ।
gataḥ sa paramān lokān śaraiḥ santāpya lakṣmaṇam ।
6.93.3 ॥

sa taṁ pratibhayaṁ śrutvā vadhaṁ putrasya dāruṇam ।
ghoramindrajitaḥ saṅkhye kaśmalaṁ cāviśanmahat ।
6.93.4 ॥

upalabhya cirāt sañjñāṁ rājā rākṣasapuṅgavaḥ ।
putraśokārdito dīno vilalāpākulendriyaḥ ।
6.93.5 ॥

hā rākṣasacamūmukhya mama vatsa mahāratha ।
jitvendraṁ kathamadya tvaṁ lakṣmaṇasya vaśaṁ gataḥ ।
6.93.6 ॥

nanu tvamiṣubhiḥ kruddho bhindyāḥ kālāntakāvapi ।
mandarasyāpi śṛṅgāṇi kiṁ punarlakṣmaṇaṁ yudhi ।
6.93.7 ॥

adya vaivasvato rājā bhūyo bahumato mama ।
yenādya tvaṁ mahābāho saṁyuktaḥ kāladharmaṇā ।
6.93.8 ॥

eṣa panthāḥ suyodhānāṁ sarvāmaragaṇeṣvapi ।
6.93.9 ॥

yaḥ kṛte hanyate bhartuḥ sa pumān svargamṛcchati ।
adya devagaṇāḥ sarve lokapālāstatharṣayaḥ ।
hatamindrajitaṁ śrutvā sukhaṁ svapsyanti nirbhayāḥ ।
6.93.10 ॥

adya lokāstrayaḥ kṛtsnā pṛthivī ca sakānanā ।
ekenendrajitā hīnā śūnyeva pratibhāti me ।
6.93.11 ॥

adya nairṛtakanyānāṁ śroṣyāmyantaḥpure ravam ।
kareṇusaṅghasya yathā ninādaṁ girigahvare ।
6.93.12 ॥

yauvarājyaṁ ca laṅkāṁ ca rakṣāṁsi ca parantapa ।
mātaraṁ māṁ ca bhāryāṁ ca kva gato 'si vihāya naḥ ।
6.93.13 ॥

mama nāma tvayā vīra gatasya yamasādanam ।
pretakāryāṇi kāryāṇi viparīte hi vartase ।
6.93.14 ॥

sa tvaṁ jīvati sugrīve lakṣmaṇe ca sarāghave ।
mama śalyamanuddhṛtya kva gato 'si vihāya naḥ ।
6.93.15 ॥

evamādivilāpārtaṁ rāvaṇaṁ rākṣasādhipam ।
āviveśa mahān kopaḥ putravyasanasambhavaḥ ।
6.93.16 ॥

prakṛtyā kopanaṁ hyenaṁ putrasya punarādhayaḥ ।
dīptaṁ sandīpayāmāsurgharme 'rkamiva raśmayaḥ ।
6.93.17 ॥

lalāṭe bhrukuṭībhiśca saṅgatābhirvyārocata ।
yugānte saha nakraistu mahormibhirivodadhiḥ ।
6.93.18 ॥

kopādvijṛmbhamāṇasya vaktrād vyaktamabhijvalan ।
utpapāta sa bhūyo 'gnirvṛtrasya vadanādiva ।
6.93.19 ॥

sa putravadhasantaptaḥ śūraḥ krodhavaśaṁ gataḥ ।
samīkṣya rāvaṇo buddhyā vaidehyā rocayadvadham ।
6.93.20 ॥

tasya prakṛtyā rakte ca rakte krodhāgninā 'pi ca ।
rāvaṇasya mahāghore dīpte netre babhūvatuḥ ।
6.93.21 ॥

ghoraṁ prakṛtyā rūpaṁ tattasya krodhāgnimūrcchitam ।
babhūva rūpaṁ kruddhasya ruddhasyeva durāsadam ।
6.93.22 ॥

tasya kruddhasya netrābhyāṁ prāptatannasrabindavaḥ ।
dīptābhyāmiva dīpābhyāṁ sārciṣaḥ snehabindavaḥ ।
6.93.23 ॥

dantān vidaśatastasya śrūyate daśanasvanaḥ ।
yantrasyāveṣṭyamānasya mahato dānavairiva ।
6.93.24 ॥

kālāgniriva saṅkruddho yāṁ yāṁ diśamavaikṣata ।
tasyāṁ tasyāṁ bhayatrastā rākṣasāḥ saṁvililyire ।
6.93.25 ॥

tamantakamiva kruddhaṁ carācaracikhādiṣum ।
vīkṣamāṇaṁ diśaḥ sarvā rākṣasā nopacakramuḥ ।
6.93.26 ॥

tataḥ paramasaṅkruddho rāvaṇo rākṣasādhipaḥ ।
abravīdrakṣasāṁ madhye saṁstambhayiṣurāhave ।
6.93.27 ॥

mayā varṣasahasrāṇi caritvā duścaraṁ tapaḥ ।
teṣu teṣvavakāśeṣu svayambhūḥ paritoṣitaḥ ।
6.93.28 ॥

tasyaiva tapaso vyuṣṭyā prasādācca svayambhuvaḥ ।
nāsurebhyo na devebhyo bhayaṁ mama kadācana ।
6.93.29 ॥

kavacaṁ brahmadattaṁ me yadādityasamaprabham ।
devāsuravimardeṣu na bhinnaṁ vajraśaktibhiḥ ।
6.93.30 ॥

tena māmadya saṁyuktaṁ rathasthamiha saṁyuge ।
pratīyāt ko 'dya māmājau sākṣādapi purandaraḥ ।
6.93.31 ॥

yattadā 'bhiprasannena saśaraṁ kārmukaṁ mahat ।
devāsuravimardeṣu mama dattaṁ svayambhuvā ।
6.93.32 ॥

adya tūryaśatairbhīmaṁ dhanurutthāpyatāṁ mama ।
rāmalakṣmaṇayoreva vadhāya paramāhave ।
6.93.33 ॥

sa putravadhasantaptaḥ śūraḥ krodhavaśaṁ gataḥ ।
samīkṣya rāvaṇo buddhyā sītāṁ hantuṁ vyavasyata ।
6.93.34 ॥

pratyavekṣya tu tāmrākṣaḥ sughoro ghoradarśanaḥ ।
dīno dīnasvarān sarvāṁstānuvāca niśācarān ।
6.93.35 ॥

māyayā mama vatsena vañcanārthaṁ vanaukasām ।
kiñcideva hataṁ tatra sīteyamiti darśitam ।
6.93.36 ॥

tadidaṁ tathyamevāhaṁ kariṣye priyamātmanaḥ ।
vaidehīṁ nāśayiṣyāmi kṣatrabandhumanuvratām ।
6.93.37 ॥

ityevamuktvā sacivān khaḍgamāśu parāmṛśat ।
6.93.38 ॥

uddhṛtya guṇasampannaṁ vimalāmbaravarcasam ।
niṣpapāta sa vegena sabhāryaḥ sacivairvṛtaḥ ।
6.93.39 ॥

rāvaṇaḥ putraśokena bhṛśamākulacetanaḥ ।
saṅkruddhaḥ khaḍgamādāya sahasā yatra maithilī ।
6.93.40 ॥

vrajantaṁ rākṣasaṁ prekṣya siṁhanādaṁ pracukruśuḥ ।
ūcuścānyonyamāśliṣya saṅkruddhaṁ prekṣya rākṣasāḥ ।
6.93.41 ॥

adyainaṁ tāvubhau dṛṣṭvā bhrātarau pravyathiṣyataḥ ।
lokapālā hi catvāraḥ kruddhenānena nirjitāḥ ।
6.93.42 ॥

bahavaḥ śatravaścāpi saṁyugeṣu nipātitāḥ ।
triṣu lokeṣu ratnāni bhuṅkte cāhṛtya rāvaṇaḥ ।
6.93.43 ॥

vikrame ca bale caiva nāstyasya sadṛśo bhuvi ।
6.93.44 ॥

teṣāṁ sañjalpamānānāmaśokavanikāṁ gatām ।
abhidudrāva vaidehīṁ rāvaṇaḥ krodhamūrcchitaḥ ।
6.93.45 ॥

vāryamāṇaḥ susaṅkruddhaḥ suhṛdbhirhitabuddhibhiḥ ।
abhyadhāvata saṅkruddhaḥ khe graho rohiṇīmiva ।
6.93.46 ॥

maithilī rakṣyamāṇā tu rākṣasībhiraninditā ।
dadarśa rākṣasaṁ kruddhaṁ nistriṁśavaradhāriṇam ।
6.93.47 ॥

taṁ niśāmya sanistriṁśaṁ vyathitā janakātmajā ।
nivāryamāṇaṁ bahuśaḥ suhṛdbhiranuvartinam ।
sītā duḥkhasamāviṣṭā vilapantīdamabravīt ।
6.93.48 ॥

yathā 'yaṁ māmabhikruddhaḥ samabhidravati svayam ।
vadhiṣyati sanāthāṁ māmanāthāmiva durmatiḥ ।
6.93.49 ॥

bahuśaścodayāmāsa bhartāraṁ māmanuvratām ।
bhāryā bhava ramasveti pratyākhyāto dhruvaṁ mayā ।
6.93.50 ॥

so 'yaṁ mamānupasthāne vyaktaṁ nairāśyamāgataḥ ।
krodhamohasamāviṣṭo nihantuṁ māṁ samudyataḥ ।
6.93.51 ॥

athavā tau naravyāghrau bhrātarau rāmalakṣmaṇau ।
mannimittamanāryeṇa samare 'dya nipātitau ।
aho dhiṅmannimitto 'yaṁ vināśo rājaputrayoḥ ।
6.93.52 ॥

athavā putraśokena ahatvā rāmalakṣmaṇau ।
vidhamiṣyati māṁ raudro rākṣasaḥ pāpaniścayaḥ ।
6.93.53 ॥

hanūmato 'pi yadvākyaṁ na kṛtaṁ kṣudrayā mayā ।
6.93.54 ॥

yadyahaṁ tasya pṛṣṭhena tadā yāyāmaninditā ।
nādyaivamanuśoceyaṁ bharturaṅkagatā satī ।
6.93.55 ॥

manye tu hṛdayaṁ tasyāḥ kausalyāyāḥ phaliṣyati ।
ekaputrā yadā putraṁ vinaṣṭaṁ śroṣyate yudhi ।
6.93.56 ॥

sā hi janma ca bālyaṁ ca yauvanaṁ ca mahātmanaḥ ।
dharmakāryānurūpaṁ ca rudantī saṁsmariṣyati ।
6.93.57 ॥

nirāśā nihate putre dattvā śrāddhamacetanā ।
agnimārokṣyate nūnamapo vā 'pi pravekṣyati ।
6.93.58 ॥

dhigastu kubjāmasatīṁ mantharāṁ pāpaniścayām ।
yannimittamidaṁ duḥkhaṁ kausalyā pratipatsyate ।
6.93.59 ॥

ityevaṁ maithilīṁ dṛṣṭvā vilapantīṁ tapasvinīm ।
rohiṇīmiva candreṇa vinā grahavaśaṁ gatām ।
6.93.60 ॥

etasminnantare tasya amātyo buddhimān śuciḥ ।
supārśvo nāma medhāvī rākṣaso rākṣaseśvaram ।
nivāryamāṇaṁ sacivairidaṁ vacanamabravīt ।
6.93.61 ॥

kathaṁ nāma daśagrīva sākṣādvaiśravaṇānuja ।
hantumicchasi vaidehīṁ krodhāddharmamapāsya hi ।
6.93.62 ॥

vedavidyāvratasnātaḥ svakarmanirataḥ sadā ।
striyāḥ kasmādvadhaṁ vīra manyase rākṣaseśvara ।
6.93.63 ॥

maithilīṁ rūpasampannāṁ pratyavekṣasva pārthiva ।
tvameva tu sahāsmābhī rāghave krodhamutsṛja ।
6.93.64 ॥

abhyutthānaṁ tvamadyaiva kṛṣṇapakṣacaturdaśīm ।
kṛtvā niryāhyamāvāsyāṁ vijayāya balairvṛtaḥ ।
6.93.65 ॥

śūro dhīmān rathī khaḍgī rathapravaramāsthitaḥ ।
hatvā daśarathiṁ rāmaṁ bhavān prāpsyati maithilīm ।
6.93.66 ॥

sa taddurātmā suhṛdā niveditaṁ vacaḥ sudharmyaṁ pratigṛhya rāvaṇaḥ ।
gṛhaṁ jagāmātha tataśca vīryavān punaḥ sabhāṁ ca prayayau suhṛdvṛtaḥ ।
6.93.67 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe trinavatitamaḥ sargaḥ ।
93 ॥