युद्धकाण्डम्Yuddha Kāṇḍa

sa hatāśvo mahātejā bhūmau tiṣṭhanniśācaraḥ ।
indrajit paramakruddhaḥ samprajajvāla tejasā ।
6.91.1 ॥

tau dhanvinau jighāṁsantāvanyonyamiṣubhirbhṛśam ।
vijayenābhiniṣkrāntau vane gajavṛṣāviva ।
6.91.2 ॥

nibarhayantaścānyonyaṁ te rākṣasavanaukasaḥ ।
bhartāraṁ na jahuryuddhe sampatantastatastataḥ ।
6.91.3 ॥

tatastān rākṣasān sarvān harṣayan rāvaṇātmajaḥ ।
stuvāno harṣamāṇaśca idaṁ vacanamabravīt ।
6.91.4 ॥

tamasā bahulenemāḥ saṁsaktāḥ sarvato diśaḥ ।
neha vijñāyate svo vā paro vā rākṣasottamāḥ ।
6.91.5 ॥

dhṛṣṭaṁ bhavanto yudhyantu harīṇāṁ mohanāya vai ।
ahaṁ tu rathamāsthāya āgamiṣyāmi saṁyugam ।
6.91.6 ॥

tathā bhavantaḥ kurvantu yatheme kānanaukasaḥ ।
na yuddhyeyurdurātmānaḥ praviṣṭe nagaraṁ mayi ।
6.91.7 ॥

ityuktvā rāvaṇasuto vañcayitvā vanaukasaḥ ।
praviveśa purīṁ laṅkāṁ rathahetoramitrahā ।
6.91.8 ॥

sa rathaṁ bhūṣayitvā tu ruciraṁ hemabhūṣitam ।
prāsāsiśatasampūrṇaṁ yuktaṁ paramavājibhiḥ ।
6.91.9 ॥

adhiṣṭhitaṁ hayajñena sūtenāptopadeśinā ।
āruroha mahātejā rāvaṇiḥ samitiñjayaḥ ।
6.91.10 ॥

sa rākṣasagaṇairmukhyairvṛto mandodarīsutaḥ ।
niryayau nagarāttūrṇaṁ kṛtāntabalacoditaḥ ।
6.91.11 ॥

so 'bhiniṣkramya nagarādindrajit paravīrahā ।
ābhyayājjavanairaśvairlakṣmaṇaṁ savibhīṣaṇam ।
6.91.12 ॥

tato rathastamālokya saumitrī rāvaṇātmajam ।
vānarāśca mahāvīryā rākṣasaśca vibhīṣaṇaḥ ।
vismayaṁ paramaṁ jagmurlāghavāttasya dhīmataḥ ।
6.91.13 ॥

rāvaṇiścāpi saṅkruddho raṇe vānarayūthapān ।
pātayāmāsa bāṇaughaiḥ śataśo 'tha sahasraśaḥ ।
6.91.14 ॥

sa maṇḍalīkṛtadhanū rāvaṇiḥ samitiñjayaḥ ।
harīnabhyahanat kruddhaḥ paraṁ lāghavamāsthitaḥ ।
6.91.15 ॥

te vadhyamānā harayo nārācairbhīmavikramāḥ ।
saumitriṁ śaraṇaṁ prāptāḥ prajāpatimiva prajāḥ ।
6.91.16 ॥

tataḥ samarakopena jvalito raghunandanaḥ ।
ciccheda kārmukaṁ tasya darśayan pāṇilāghavam ।
6.91.17 ॥

so 'nyat kārmukamādaya sajyaṁ cakre tvaranniva ।
tadapyasya tribhirbāṇairlakṣmaṇo nirakṛntata ।
6.91.18 ॥

athainaṁ chinnadhanvānamāśīviṣaviṣopamaiḥ ।
vivyādhorasi saumitrī rāvaṇiṁ pañcabhiḥ śaraiḥ ।
6.91.19 ॥

te tasya kāyaṁ nirbhidya mahākārmukanissṛtāḥ ।
nipeturdharaṇīṁ bāṇā raktā iva mahoragāḥ ।
6.91.20 ॥

sa bhinnavarmā rudhiraṁ vaman vaktreṇa rāvaṇiḥ ।
jagrāha kārmukaśreṣṭhaṁ dṛḍhajyaṁ balavattaram ।
6.91.21 ॥

sa lakṣmaṇaṁ samuddiśya paraṁ lāghavamāsthitaḥ ।
vavarṣa śaravarṣāṇi varṣāṇīva purandaraḥ ।
6.91.22 ॥

muktamindrajitā tattu śaravarṣamarindamaḥ ।
avārayadasambhrānto lakṣmaṇaḥ sudurāsadam ।
6.91.23 ॥

darśayāmāsa ca tadā rāvaṇiṁ raghunandanaḥ ।
asambhrānto mahātejāstadadbhutamivābhavat ।
6.91.24 ॥

tatastān rākṣasān sarvāṁstribhirekaikamāhave ।
6.91.25 ॥

avidhyat paramakruddhaḥ śīghrāstraṁ sampradarśayan ।
rākṣasendrasutaṁ cāpi bāṇaughaiḥ samatāḍayat ।
6.91.26 ॥

so 'tividdho balavatā śatruṇā śatrughātinā ।
asaktaṁ preṣayāmāsa lakṣmaṇāya bahūn śarān ।
6.91.27 ॥

tānaprāptān śitairbāṇaiściccheda raghunandanaḥ ।
sāratherasya ca raṇe rathino rathasattamaḥ ।
śiro jahāra dharmātmā bhallenānataparvaṇā ।
6.91.28 ॥

asūtāste hayāstatra rathamūhuraviklavāḥ ।
maṇḍalānyabhidhāvantastadadbhutamivābhavat ।
6.91.29 ॥

amarṣavaśamāpannaḥ saumitrirddaḍhavikramaḥ ।
pratyaviddhyaddhayāṁstasya śarairvitrāsayan raṇe ।
6.91.30 ॥

amṛṣyamāṇastatkarma rāvaṇasya suto balī ।
vivyādha daśabhirbāṇaiḥ saumitriṁ tamamarṣaṇam ।
6.91.31 ॥

te tasya vajrapratimāḥ śarāḥ sarpaviṣopamāḥ ।
vilayaṁ jagmurāhatya kavacaṁ kāñcanaprabham ।
6.91.32 ॥

abhedyakavacaṁ matvā lakṣmaṇaṁ rāvaṇātmajaḥ ।
lalāṭe lakṣmaṇaṁ bāṇaiḥ supuṅkhaistribhirindrajit ।
avidhyat paramakruddhaḥ śīghrāstraṁ ca pradarśayan ।
6.91.33 ॥

taiḥ pṛṣatkairlalāṭasthaiḥ śuśubhe raghunandanaḥ ।
raṇāgre samaraślāghī triśṛṅga iva parvataḥ ।
6.91.34 ॥

sa tathā hyardito bāṇai rākṣasena mahāmṛdhe ।
tamāśu prativivyādha lakṣmaṇaḥ pañcabhiḥ śaraiḥ ।
vikṛṣyendrajito yuddhe vadane śubhakuṇḍale ।
6.91.35 ॥

lakṣmaṇendrajitau vīrau mahābalaśarāsanau ।
anyonyaṁ jaghnaturbāṇairviśikhairbhīmavikramau ।
6.91.36 ॥

tataḥ śoṇitadigdhāṅgau lakṣmaṇendrajitāvubhau ।
raṇe tau rejaturvīrau puṣpitāviva kiṁśukau ।
6.91.37 ॥

tau parasparamabhyetya sarvagātreṣu dhanvinau ।
ghorairvivyadhaturbāṇaiḥ kṛtabhāvāvubhau jaye ।
6.91.38 ॥

tataḥ samarakopena saṁyukto rāvaṇātmajaḥ ।
vibhīṣaṇaṁ tribhirbāṇairvivyādha vadane śubhe ।
6.91.39 ॥

ayomukhaistrirbhirviddhvā rākṣasendraṁ vibhīṣaṇam ।
ekaikenābhivivyādha tān sarvān hariyūthapān ।
6.91.40 ॥

tasmai dṛḍhataraṁ kruddho jaghāna gadayā hayān ।
vibhīṣaṇo mahātejā rāvaṇeḥ sa durātmanaḥ ।
6.91.41 ॥

sa hatāśvādavaplutya rathānnihatasāratheḥ ।
rathaśaktiṁ mahātejāḥ pitṛvyāya mumoca ha ।
6.91.42 ॥

tāmāpatantīṁ samprekṣya sumitrānandavardhanaḥ ।
ciccheda niśitairbāṇairdaśadhā sā 'patadbhuvi ।
6.91.43 ॥

tasmai dṛḍhadhanuḥ kruddho hatāśvāya vibhīṣaṇaḥ ।
vajrasparśasamān pañca sasarjorasi mārgaṇān ।
6.91.44 ॥

te tasya kāyaṁ nirbhidya rukmapuṅkhā nimittagāḥ ।
babhūvurlohitādigdhā raktā iva mahoragāḥ ।
6.91.45 ॥

sa pitṛvyāya saṅkruddha indrajiccharamādade ।
uttamaṁ rakṣasāṁ madhye yamadattaṁ mahābalaḥ ।
6.91.46 ॥

taṁ samīkṣya mahātejā maheṣuṁ tena saṁhitam ।
lakṣmaṇo 'pyādade bāṇamanyaṁ bhīmaparākramaḥ ।
6.91.47 ॥

kubereṇa svayaṁ svapne svasmai dattaṁ mahātmanā ।
durjayaṁ durviṣahyaṁ ca sendrairapi surāsuraiḥ ।
6.91.48 ॥

tayoste dhanuṣī śreṣṭhe bāhubhiḥ parighopamaiḥ ।
vikṛṣyamāṇe balavat krauñcāviva cukūjatuḥ ।
6.91.49 ॥

tābhyāṁ tau dhanuṣi śreṣṭhe saṁhitau sāyakottamau ।
vikṛṣyamāṇau vīrābhyāṁ bhṛśaṁ jajvalatuḥ śriyā ।
6.91.50 ॥

tau bhāsayantāvākāśaṁ dhanurbhyāṁ viśikhau cyutau ।
mukhena mukhamāhatya sannipetaturojasā ।
6.91.51 ॥

sannipātastayorāsīccharayorghorarūpayoḥ ।
sadhūmavisphuliṅgaśca tajjo 'gnirdāruṇo 'bhavat ।
6.91.52 ॥

tau mahāgrahasaṅkāśāvanyonyaṁ sannipatya ca ।
saṅgrāme śatadhā yāntau medinyāṁ vinipetatuḥ ।
6.91.53 ॥

śarau pratihatau dṛṣṭvā tāvubhau raṇamūrdhani ।
vrīḍitau jātaroṣau ca lakṣmaṇendrajitau tadā ।
6.91.54 ॥

susaṁrabdhastu saumitrirastraṁ vāruṇamādade ।
6.91.55 ॥

raudraṁ mahendrajidyuddhe vyasṛjadyudhi niṣṭhitaḥ ।
tena tadvihataṁ tvastraṁ vāruṇaṁ paramādbhutam ।
6.91.56 ॥

tataḥ kruddho mahātejā indrajit samitiñjayaḥ ।
āgneyaṁ sandadhe dīptaṁ sa lokaṁ saṅkṣipanniva ।
6.91.57 ॥

saureṇāstreṇa tadvīro lakṣmaṇaḥ pratyavārayat ।
6.91.58 ॥

astraṁ nivāritaṁ dṛṣṭvā rāvaṇiḥ krodhamūrcchitaḥ ।
āsuraṁ śatrunāśāya ghoramastraṁ samādade ।
6.91.59 ॥

tasmāccāpādviniṣpeturbhāsvarāḥ kūṭamudgarāḥ ।
śūlāni ca bhuśuṇḍyaśca gadāḥ khaḍgāḥ paraśvadhāḥ ।
6.91.60 ॥

taddṛṣṭvā lakṣmaṇaḥ saṅkhye ghoramastramathāsuram ।
avāryaṁ sarvabhūtānāṁ sarvaśatruvināśanam ।
māheśvareṇa dyutimāṁstadastraṁ pratyavārayat ।
6.91.61 ॥

tayoḥ sutumulaṁ yuddhaṁ sambabhūvādbhutopamam ।
gaganasthāni bhūtāni lakṣmaṇaṁ paryavārayan ।
6.91.62 ॥

bhairavābhirute bhīme yuddhe vānararakṣasām ।
bhūtairbahubhirākāśaṁ vismitairāvṛtaṁ babhau ।
6.91.63 ॥

ṛṣayaḥ pitaro devā gandharvā garuḍoragāḥ ।
śatakratuṁ puraskṛtya rarakṣurlakṣmaṇaṁ raṇe ।
6.91.64 ॥

athānyaṁ mārgaṇaśreṣṭhaṁ sandadhe rāghavānujaḥ ।
hutāśanasamasparśaṁ rāvaṇātmajadāraṇam ।
6.91.65 ॥

supatramanuvṛttāṅgaṁ suparvāṇaṁ susaṁsthitam ।
suvarṇavikṛtaṁ vīraḥ śarīrāntakaraṁ śaram ।
6.91.66 ॥

durāvāraṁ durviṣahyaṁ rākṣasānāṁ bhayāvaham ।
āśīviṣaviṣaprakhyaṁ devasaṅghaiḥ samarcitam ।
6.91.67 ॥

yena śakro mahātejā dānavānajayat prabhuḥ ।
purā daivāsure yuddhe vīryavān harivāhanaḥ ।
6.91.68 ॥

tadaindramastraṁ saumitriḥ saṁyugeṣvaparājitam ।
śaraśreṣṭhaṁ dhanuḥ śreṣṭhe naraśreṣṭho 'bhisandadhe ।
6.91.69 ॥

sandhāyāmitradalanaṁ vicakarṣa śarāsanam ।
sajyamāyamya durdharṣaṁ kālo lokakṣaye yathā ।
6.91.70 ॥

sandhāya dhanuṣi śreṣṭhe vikarṣannidamabravīt ।
lakṣmīvām̐llakṣmaṇo vākyamarthasādhakamātmanaḥ ।
6.91.71 ॥

dharmātmā satyasandhaśca rāmo dāśarathiryadi ।
pauruṣe cāpratidvandvaḥ śarainaṁ jahi rāvaṇim ।
6.91.72 ॥

ityuktvā bāṇamākarṇaṁ vikṛṣya tamajihmagam ।
lakṣmaṇaḥ samare vīraḥ sasarjendrajitaṁ prati ।
aindrāstreṇa samāyojya lakṣmaṇaḥ paravīrahā ।
6.91.73 ॥

sa śiraḥ saśirastrāṇaṁ śrīmajjvalitakuṇḍalam ।
pramathyendrajitaḥ kāyāt pātayāmāsa bhūtale ।
6.91.74 ॥

tadrākṣasatanūjasya chinnaskandhaṁ śiro mahat ।
tapanīyanibhaṁ bhūmau dadṛśe rudhirokṣitam ।
6.91.75 ॥

hatastu nipapātāśu dharaṇyāṁ rāvaṇātmajaḥ ।
kavacī saśirastrāṇo vidhvastaḥ saśarāsanaḥ ।
6.91.76 ॥

cukruśuste tataḥ sarve vānarāḥ savibhīṣaṇāḥ ।
hṛṣyanto nihate tasmin devā vṛtravadhe yathā ।
6.91.77 ॥

athāntarikṣe devānāmṛṣīṇāṁ ca mahātmanām ।
abhijajñe ca sannādo gandharvāpsarasāmapi ।
6.91.78 ॥

patitaṁ tamabhijñāya rākṣasī sā mahācamūḥ ।
vadhyamānā diśo bheje haribhirjitakāśibhiḥ ।
6.91.79 ॥

vānarairvadhyamānāste śastrāṇyutsṛjya rākṣasāḥ ।
laṅkāmabhimukhāḥ sastrurnaṣṭasañjñāḥ pradhāvitāḥ ।
6.91.80 ॥

dudruvurbahudhā bhītā rākṣasāḥ śataśo diśaḥ ।
tyaktvā praharaṇān sarve paṭṭiśāsiparaśvadhān ।
6.91.81 ॥

kecillaṅkāṁ paritrastāḥ praviṣṭā vānarārditāḥ ।
samudre patitāḥ kecit kecit parvatamāśritāḥ ।
6.91.82 ॥

hatamindrajitaṁ dṛṣṭvā śayānaṁ samarakṣitau ।
rākṣasānāṁ sahasreṣu na kaścit pratyadṛśyata ।
6.91.83 ॥

yathā 'staṁ gata āditye nāvatiṣṭhanti raśmayaḥ ।
tathā tasminnipatite rākṣasāste gatā diśaḥ ।
6.91.84 ॥

śāntaraśmirivādityo nirvāṇa iva pāvakaḥ ।
sa babhūva mahātejā vyapāstagatajīvitaḥ ।
6.91.85 ॥

praśāntapīḍābahulo naṣṭāriṣṭaḥ pratāpavān ।
babhūva lokaḥ patite rākṣasendrasute tadā ।
6.91.86 ॥

harṣaṁ ca śakro bhagavān saha sarvaiḥ surarṣabhaiḥ ।
jagāma nihate tasmin rākṣase pāpakarmaṇi ।
6.91.87 ॥

ākāśe cāpi devānāṁ śuśruve dundubhisvanaḥ ।
6.91.88 ॥

nṛtyadbhirapsarobhiśca gandharvaiśca mahātmabhiḥ ।
6.91.89 ॥

vavṛṣuḥ puṣpavarṣāṇi tadadbhutamabhūttadā ।
praśaśaṁsurhate tasmin rākṣase krūrakarmaṇi ।
6.91.90 ॥

śuddhā āpo diśaścaiva jahṛṣurdaityadānavāḥ ।
6.91.91 ॥

ājagmuḥ patite tasmin sarvalokabhayāvahe ।
ūcuśca sahitāḥ sarve devagandharvadānavāḥ ।
vijvarāḥ śāntakaluṣā brāhmaṇā vicarantviti ।
6.91.92 ॥

tato 'bhyanandan saṁhṛṣṭāḥ samare hariyūthapāḥ ।
tamapratibalaṁ dṛṣṭvā hataṁ nairṛtapuṅgavam ।
6.91.93 ॥

vibhīṣaṇo hanūmāṁśca jāmbavāṁścarkṣayūthapaḥ ।
vijayenābhinandantastuṣṭuvuścāpi lakṣmaṇam ।
6.91.94 ॥

kṣvelantaśca nadantaśca garjantaśca plavaṅgamāḥ ।
labdhalakṣā raghusutaṁ parivāryopatasthire ।
6.91.95 ॥

lāṅgūlāni pravidhyantaḥ sphoṭayantaśca vānarāḥ ।
lakṣmaṇo jayatītyevaṁ vākyaṁ viśrāvayaṁstadā ।
6.91.96 ॥

anyonyaṁ ca samāśliṣya kapayo hṛṣṭamānasāḥ ।
cakruruccāvacaguṇā rāghavāśrayajāḥ kathāḥ ।
6.91.97 ॥

tadasukaramathābhivīkṣya hṛṣṭāḥ priyasuhṛdo yudhi lakṣmaṇasya karma ।
paramamupalabhan manaḥ praharṣaṁ vinihatamindraripuṁ niśamya devāḥ ।
6.91.98 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe ekanavatitamaḥ sargaḥ ।
91 ॥