युद्धकाण्डम्Yuddha Kāṇḍa

yudhyamānau tu tau dṛṣṭvā prasaktau narākṣasau ।
prabhinnāviva mātaṅgau parasparavadhaiṣiṇau ।
6.90.1 ॥

tau draṣṭukāmaḥ saṅgrāme parasparagatau balī ।
śūraḥ sa rāvaṇabhrātā tasthau saṅgrāmamūrdhani ।
6.90.2 ॥

tato visphārayāmāsa mahaddhanuravasthitaḥ ।
utsasarja ca tīkṣṇāgrān rākṣaseṣu mahāśarān ।
6.90.3 ॥

te śarāḥ śikhisaṅkāśā nipatantaḥ samāhitāḥ ।
rākṣasān dārayāmāsurvajrāṇīva mahāgirīn ।
6.90.4 ॥

vibhīṣaṇasyānucarāste 'pi śūlāsipaṭṭiśaiḥ ।
cicchiduḥ samare vīrān rākṣasān rākṣasottamāḥ ।
6.90.5 ॥

rākṣasaistaiḥ parivṛtaḥ sa tadā tu vibhīṣaṇaḥ ।
babhau madhye prahṛṣṭānāṁ kalabhānāmiva dvipaḥ ।
6.90.6 ॥

tataḥ sañcodayāno vai harīn rakṣo raṇapriyān ।
uvāca vacanaṁ kāle kālajño rakṣasāṁ varaḥ ।
6.90.7 ॥

eko 'yaṁ rākṣasendrasya parāyaṇamiva sthitaḥ ।
etaccheṣaṁ balaṁ tasya kiṁ tiṣṭhata harīśvarāḥ ।
6.90.8 ॥

asmin vinihate pāpe rākṣase raṇamūrdhani ।
rāvaṇaṁ varjayitvā tu śeṣamasya hataṁ balam ।
6.90.9 ॥

prahasto nihato vīro nikumbhaśca mahābalaḥ ।
kumbhakarṇaśca kumbhaśca dhūmrākṣaśca niśācaraḥ ।
6.90.10 ॥

jambumālī mahāmālī tīkṣṇavego 'śaniprabhaḥ ।
suptaghno yajñakopaśca vajradaṁṣṭraśca rākṣasaḥ ।
6.90.11 ॥

saṁhrādī vikaṭo nighnastapano dama eva ca ।
praghāsaḥ praghasaścaiva prajaṅgho jaṅgha eva ca ।
6.90.12 ॥

agniketuśca durdharṣo raśmiketuśca vīryavān ।
vidyujjihvo dvijihvaśca sūryaśatruśca rākṣasaḥ ।
6.90.13 ॥

akampanaḥ supārśvaśca cakramālī ca rākṣasaḥ ।
kampanaḥ sattvavantau tau devāntakanarāntakau ।
6.90.14 ॥

etānnihatyātibalān bahūn rākṣasasattamān ।
bāhubhyāṁ sāgaraṁ tīrtvā laṅghyatāṁ goṣpadaṁ laghu ।
6.90.15 ॥

etāvadeva śeṣaṁ vo jetavyamiha vānarāḥ ।
hatāḥ sarve samāgamya rākṣasā baladarpitāḥ ।
6.90.16 ॥

ayuktaṁ nidhanaṁ kartuṁ putrasya janiturmama ।
ghṛṇāmapāsya rāmārthe nihanyāṁ bhrāturātmajam ।
6.90.17 ॥

hantukāmasya me bāṣpaṁ cakṣuścaiva niruddhyati ।
tamevaiṣa mahābāhurlakṣmaṇaḥ śamayiṣyati ।
vānarā ghnata sambhūya bhṛtyānasya samīpagān ।
6.90.18 ॥

iti tenātiyaśasā rākṣasenābhicoditāḥ ।
vānarendrā jahṛṣire lāṅgūlāni ca vivyadhuḥ ।
6.90.19 ॥

tataste kapiśārdūlāḥ kṣvelantaśca muhurmuhuḥ ।
mumucurvividhānnādān meghān dṛṣṭveva barhiṇaḥ ।
6.90.20 ॥

jāmbavānapi taiḥ sarvaiḥ svayūthairapi saṁvṛtaḥ ।
aśmabhistāḍayāmāsa nakhairdantaiśca rākṣasān ।
6.90.21 ॥

nighnantamṛkṣādhipatiṁ rākṣasāste mahābalāḥ ।
parivavrubhayaṁ tyaktvā tamanekavidhāyudhāḥ ।
6.90.22 ॥

śaraiḥ paraśubhistīkṣṇaiḥ paṭṭiśairyaṣṭitomaraiḥ ।
jāmbavantaṁ mṛdhe jaghnurnighnantaṁ rākṣasīṁ camūm ।
6.90.23 ॥

sa samprahārastumulaḥ sañjajñe kapirakṣasām ।
devāsurāṇāṁ kruddhānāṁ yathā bhīmo mahāsvanaḥ ।
6.90.24 ॥

hanumānapi saṅkruddhaḥ sālamutpāṭya vīryavān ।
rakṣasāṁ kadanaṁ cakre samāsādya sahasraśaḥ ।
6.90.25 ॥

sa dattvā tumulaṁ yuddhaṁ pitṛvyasyendrajidyudhi ।
lakṣmaṇaṁ paravīraghnaṁ punarevābhyadhāvata ।
6.90.26 ॥

tau prayuddhau tadā vīrau mṛdhe lakṣmaṇarākṣasau ।
śaraughānabhivarṣantau jaghnatustau parasparam ।
6.90.27 ॥

abhīkṣṇamantardadhatuḥ śarajālairmahābalau ।
candrādityāvivoṣṇānte yathā meghaistarasvinau ।
6.90.28 ॥

na hyādānaṁ na sandhānaṁ dhanuṣo vā parigrahaḥ ।
na vipramokṣo bāṇānāṁ na vikarṣo na vigrahaḥ ।
6.90.29 ॥

na muṣṭipratisandhānaṁ na lakṣyapratipādanam ।
adṛśyata tayostatra yudhyatoḥ pāṇilāghavāt ।
6.90.30 ॥

cāpavegavinirmuktabāṇajālaiḥ samantataḥ ।
antarikṣe hi sañchanne na rūpāṇi cakāśire ।
6.90.31 ॥

lakṣmaṇo rāvaṇiṁ prāpya rāvaṇiścāpi lakṣmaṇam ।
avyavasthā bhavatyugrā tābhyāmanyonyavigrahe ।
6.90.32 ॥

tābhyāmubhābhyāṁ tarasā visṛṣṭairviśikhaiḥ śitaiḥ ।
nirantaramivākāśaṁ babhūva tamasāvṛtam ।
6.90.33 ॥

taiḥ patadbhiśca bahubhistayoḥ śaraśataiḥ śitaiḥ ।
diśaśca pradiśaścaiva babhūvuḥ śarasaṅkulāḥ ।
6.90.34 ॥

tamasā saṁvṛtaṁ sarvamāsīdbhīmataraṁ mahat ।
astaṁ gate sahasrāṁśau saṁvṛtaṁ tamaseva hi ।
6.90.35 ॥

rudhiraughamahānadyaḥ prāvartanta sahasraśaḥ ।
kravyādā dāruṇā vāgbhiścikṣipurbhīmanisvanam ।
6.90.36 ॥

na tadānīṁ vavau vāyurna ca jajvāla pāvakaḥ ।
svastyastu lokebhya iti jajalpuśca maharṣayaḥ ।
6.90.37 ॥

sampetuścātra samprāptā gandharvāḥ saha cāraṇaiḥ ।
6.90.38 ॥

atha rākṣasasiṁhasya kṛṣṇān kanakabhūṣaṇān ।
śaraiścaturbhiḥ saumitrirvivyādha caturo hayān ।
6.90.39 ॥

tato 'pareṇa bhallena śitena niśitena ca ।
sampūrṇāyatamuktena supatreṇa suvarcasā ।
6.90.40 ॥

mahendrāśanikalpena sutasya vicariṣyataḥ ।
sa tena bāṇāśaninā talaśabdānunādinā ।
6.90.41 ॥

lāghavādrāghavaḥ śrīmān śiraḥ kāyādapāharat ।
6.90.42 ॥

sa yantari mahātejā hate mandodarīsutaḥ ।
6.90.43 ॥

svayaṁ sārathyamakarot punaśca dhanuraspṛśat ।
tadadbhutamabhūttatra sāmarthyaṁ paśyatāṁ yudhi ।
6.90.44 ॥

hayeṣu vyagrahastaṁ taṁ vivyādha niśitaiḥ śaraiḥ ।
dhanuṣyatha punarvyagre hayeṣu mumuce śarān ।
6.90.45 ॥

chidreṣu teṣu bāṇeṣu saumitriḥ śīghravikramaḥ ।
ardayāmāsa bāṇaughairvicarantamabhītavat ।
6.90.46 ॥

nihataṁ sārathiṁ dṛṣṭvā samare rāvaṇātmajaḥ ।
prajahau samaroddharṣaṁ viṣaṇṇaḥ sa babhūva ha ।
6.90.47 ॥

viṣaṇṇavadanaṁ dṛṣṭvā rākṣasaṁ hariyūthapāḥ ।
tataḥ paramasaṁhṛṣṭā lakṣmaṇaṁ cābhyapūjayan ।
6.90.48 ॥

tataḥ pramāthī śarabho rabhaso gandhamādanaḥ ।
amṛṣyamāṇāścatvāraścakrurvegaṁ harīśvarāḥ ।
6.90.49 ॥

te cāsya hayamukhyeṣu tūrṇamutplutya vānarāḥ ।
caturṣu samahāvīryā nipeturbhīmavikramāḥ ।
6.90.50 ॥

teṣāmadhiṣṭhitānāṁ tairvānaraiḥ parvatopamaiḥ ।
mukhebhyo rudhiraṁ raktaṁ hayānāṁ samavartata ।
6.90.51 ॥

te hayā mathitā bhagnā vyasavo dharaṇīṁ gatāḥ ।
te nihatya hayāṁstasya pramathya ca mahāratham ।
6.90.52 ॥

punarutpatya vegena tasthurlakṣmaṇapārśvataḥ ।
sa hatāśvādavaplutya rathānmathitasāratheḥ ।
śaravarṣeṇa saumitrimabhyadhāvata rāvaṇiḥ ।
6.90.53 ॥

tato mahendrapratimaḥ sa lakṣmaṇaḥ padātinaṁ taṁ niśitaiḥ śarottamaiḥ ।
sṛjantamājau niśitān śarottamān bhṛśaṁ tadā bāṇagaṇairnyavārayat ।
6.90.54 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe navatitamaḥ sargaḥ ।
90 ॥