युद्धकाण्डम्Yuddha Kāṇḍa

tataḥ śaraṁ dāśarathiḥ sandhāyāmitrakarśanaḥ ।
sasarja rākṣasendrāya kruddhaḥ sarpa iva śvasan ।
6.89.1 ॥

tasya jyātalanirghoṣaṁ sa śrutvā rāvaṇātmajaḥ ।
vivarṇavadano bhūtvā lakṣmaṇaṁ samudaikṣata ।
6.89.2 ॥

taṁ vivarṇamukhaṁ dṛṣṭvā rākṣasaṁ rāvaṇātmajam ।
saumitriṁ yuddhasaṁyuktaṁ pratyuvāca vibhīṣaṇaḥ ।
6.89.3 ॥

nimittānyanupaśyāmi yānyasmin rāvaṇātmaje ।
tvara tena mahāboho bhagna eṣa na saṁśayaḥ ।
6.89.4 ॥

tataḥ sandhāya saumitrirbāṇānagniśikhopamān ।
mumoca niśitāṁstasmin sarpāniva mahāviṣān ।
6.89.5 ॥

śakrāśanisamasparśairlakṣmaṇenāhataḥ śaraiḥ ।
muhūrtamabhavanmūḍhaḥ sarvasaṅkṣubhitendriyaḥ ।
6.89.6 ॥

upalabhya muhūrtena sañjñāṁ pratyāgatendriyaḥ ।
dadarśāvasthitaṁ vīraṁ vīro daśarathātmajam ।
6.89.7 ॥

so 'bhicakrāma saumitriṁ roṣāt saṁraktalocanaḥ ।
abravīccainamāsādya punaḥ sa paruṣaṁ vacaḥ ।
6.89.8 ॥

kiṁ na smarasi tadyuddhe prathame matparākramam ।
nibaddhastvaṁ saha bhrātrā yadā bhuvi viveṣṭase ।
6.89.9 ॥

yuvāṁ khalu mahāyuddhe śakrāśanisamaiḥ śaraiḥ ।
śāyitau prathamaṁ bhūmau visañjñau sapurassarau ।
6.89.10 ॥

smṛtirvā nāsti te manye vyaktaṁ vā yamasādanam ।
gantumicchasi yasmāttvaṁ māṁ dharṣayitumicchasi ।
6.89.11 ॥

yadi te prathame yuddhe na dṛṣṭo matparākramaḥ ।
adya te darśayiṣyāmi tiṣṭhedānīṁ vyavasthitaḥ ।
6.89.12 ॥

ityuktvā saptabhibāṇairabhivivyādha lakṣmaṇam ।
daśabhistu hanūmantaṁ tīkṣṇadhāraiḥ śarottamaiḥ ।
6.89.13 ॥

tataḥ śaraśatenaiva suprayuktena vīryavān ।
krodhāddviguṇasaṁrabdho nirbibheda vibhīṣaṇam ।
6.89.14 ॥

taddṛṣṭvendrajitā karma kṛtaṁ rāmānujastadā ।
acintayitvā prahasan naitat kiñciditi bruvan ।
mumoca sa śarān ghorān saṅgṛhya narapuṅgavaḥ ।
6.89.15 ॥

abhītavadanaḥ kruddho rāvaṇiṁ lakṣmaṇau yudhi ।
naivaṁ raṇagatāḥ śūrāḥ praharante niśācara ।
6.89.16 ।
n ।
laghavaścālpavīryāśca sukhā hīme śarāstava ।
naivaṁ śūrāstu yudhyante samare jayakāṅkṣiṇaḥ ।
6.89.17 ॥

ityevaṁ taṁ bruvāṇastu śaravarṣairavākirat ।
6.89.18 ॥

tasya bāṇaiḥ suvidhvastaṁ kavacaṁ hemabhūṣitam ।
vyaśīryata rathopasthe tārājālamivāmbarāt ।
6.89.19 ॥

vidhūtavarmā nārācairbabhūva sa kṛtavraṇaḥ ।
indrajit samare vīraḥ prarūḍha iva sānumān ।
6.89.20 ॥

tataḥ śarasahasreṇa saṅkruddho rāvaṇātmajaḥ ।
bibheda samare vīraṁ lakṣmaṇaṁ bhīmavikramaḥ ।
6.89.21 ॥

vyaśīryata mahādivyaṁ kavacaṁ lakṣmaṇasya ca ।
kṛtapratikṛtānyonyaṁ babhūvaturabhidrutau ।
6.89.22 ॥

abhīkṣṇaṁ niśvasantau tau yuddhyetāṁ tumulaṁ yudhi ।
śarasaṅkṛttasarvāṅgau sarvato rudhirokṣitau ।
6.89.23 ॥

sudīrghakālaṁ tau vīrāvanyonyaṁ niśitaiḥ śaraiḥ ।
tatakṣaturmahātmānau raṇakarmaviśāradau ।
6.89.24 ॥

babhūvatuścātmajaye yattau bhīmaparākramau ।
tau śaraughaistadā kīrṇau nikṛttakavacadhvajau ।
sravantau rudhiraṁ coṣṇaṁ jalaṁ prasravaṇāviva ।
6.89.25 ॥

śaravarṣaṁ tato ghoraṁ muñcatorbhīmanisvanam ।
sāsārayorivākāśe nīlayoḥ kālameghayoḥ ।
6.89.26 ॥

tayoratha mahān kālo vyatyayādyudhyamānayoḥ ।
na ca tau yuddhavaimukhyaṁ śramaṁ vāpyupajagmatuḥ ।
6.89.27 ॥

astrāṇyastravidāṁ śreṣṭhau darśayantau punaḥpunaḥ ।
śarānuccāvacākārānantarikṣe babandhatuḥ ।
6.89.28 ॥

vyapetadoṣamasyantau laghu citraṁ ca suṣṭhu ca ।
ubhau tau tumulaṁ ghoraṁ cakraturnararākṣasau ।
6.89.29 ॥

tayoḥ pṛthakpṛthagbhīmaḥ śuśruve talanisvanaḥ ।
prakampayan janaṁ ghoro nirghāta iva dāruṇaḥ ।
6.89.30 ॥

sa tayorbhrājate śabdastadā samarasaktayoḥ ।
sughorayorniṣṭanatorgagane megayoryathā ।
6.89.31 ॥

suvarṇapuṅkhairnārācairbalavantau kṛtavraṇau ।
prasusruvāte rudhiraṁ kīrtimantau jaye dhṛtau ।
6.89.32 ॥

te gātrayornipatitā rukmapuṅkhāḥ śarā yudhi ।
asṛṅnaddhā viniṣpatya viviśurdharaṇītalam ।
6.89.33 ॥

anye suniśitaiḥ śastrairākāśe sañjaghaṭṭire ।
babhañjuścicchiduścānye tayorbāṇāḥ sahasraśaḥ ।
6.89.34 ॥

sa babhūva raṇo ghorastayorbāṇamayaścayaḥ ।
agnibhyāmiva dīptābhyāṁ satre kuśamayaścayaḥ ।
6.89.35 ॥

tayoḥ kṛtavraṇau dehau śuśubhāte mahātmanoḥ ।
sapuṣpāviva niṣpatrau vane śālmalikiṁśukau ।
6.89.36 ॥

cakrutustumulaṁ ghoraṁ sannipātaṁ muhurmuhuḥ ।
indrajillakṣmaṇaścaiva parasparavadhaiṣiṇau ।
6.89.37 ॥

lakṣmaṇo rāvaṇiṁ yuddhe rāvaṇiścāpi lakṣmaṇam ।
anyonyaṁ tāvabhighnantau na śramaṁ pratyapadyatām ।
6.89.38 ॥

bāṇajālaiḥ śarīrasthairavagāḍhaistarasvinau ।
śuśubhāte mahāvīryo prarūḍhāviva parvatau ।
6.89.39 ॥

tayo rudhirasiktāni saṁvṛtāni śarairbhṛśam ।
babhrājuḥ sarvagātrāṇi jvalanta iva pāvakāḥ ।
6.89.40 ॥

tayoratha mahān kālo vyatyayādyudhyamānayoḥ ।
na ca tau yuddhavaimukhyaṁ śramaṁ vāpyupajagmatuḥ ।
6.89.41 ॥

atha samarapariśramaṁ nihantuṁ samaramukheṣvajitasya lakṣmaṇasya ।
priyahitamupapādayan mahaujāḥ samaramupetya vibhīṣaṇo 'vatasthe ।
6.89.42 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe ekonanavatitamaḥ sargaḥ ।
89 ॥