युद्धकाण्डम्Yuddha Kāṇḍa

vibhīṣaṇavacaḥ śrutvā rāvaṇiḥ krodhamūrcchitaḥ ।
abravīt paruṣaṁ vākyaṁ vegenābhyutpapāta ha ।
6.88.1 ॥

udyatāyudhanistriṁśo rathe susamalaṅkṛte ।
kālāśvayukte mahati sthitaḥ kālāntakopamaḥ ।
6.88.2 ॥

mahāpramāṇamudyamya vipulaṁ vegavaddṛḍham ।
dhanurbhīmaṁ parāmṛśya śarāṁścāmitraśātanān ।
6.88.3 ॥

taṁ dadarśa maheṣvāso rathe susamalaṅkṛtaḥ ।
alaṅkṛtamamitraghnaṁ rāghavasyānujaṁ balī ।
hanumatpṛṣṭhamāsīnamudayastharaviprabham ।
6.88.4 ॥

uvācainaṁ samārabdhaḥ saumitriṁ savibhīṣaṇam ।
tāṁśca vānaraśārdūlān paśyadhvaṁ me parākramam ।
6.88.5 ॥

adya matkārmukotsṛṣṭaṁ śaravarṣaṁ durāsadam ।
muktaṁ varṣamivākāśe vārayiṣyatha saṁyuge ।
6.88.6 ॥

adya vo māmakā bāṇā mahākārmukanissṛtāḥ ।
vidhamiṣyanti gātrāṇi tūlarāśimivānalaḥ ।
6.88.7 ॥

tīkṣṇasāyakanirbhinnān śūlaśaktyaṣṭitomaraiḥ ।
adya vo gamayiṣyāmi sarvāneva yamakṣayam ।
6.88.8 ॥

kṣipataḥ śaravarṣāṇi kṣiprahastasya me yudhi ।
jīmūtasyeva nadataḥ kaḥ sthāsyati mamāgrataḥ ।
6.88.9 ॥

rātriyuddhe mayā pūrvaṁ vajrāśanisamaiḥ śaraiḥ ।
śāyitau stho mayā bhūmau visañjñau sapurassarau ।
6.88.10 ॥

smṛtirna te 'sti vā manye vyaktaṁ vā yamasādanam ।
āśīviṣamiva kruddhaṁ yanmāṁ yoddhuṁ vyavasthitaḥ ।
6.88.11 ॥

tacchutvā rākṣasendrasya garjitaṁ lakṣṇastadā ।
abhītavadanaḥ kruddho rāvaṇiṁ vākyamabravīt ।
6.88.12 ॥

uktaśca durgamaḥ pāraḥ kāryāṇāṁ rākṣasa tvayā ।
kāryāṇāṁ karmaṇā pāraṁ yo gacchati sa buddhimān ।
6.88.13 ॥

sa tvamarthasya hīnārtho duravāpasya kenacit ।
vaco vyāhṛtya jānīṣe kṛtārtho 'smīti durmate ।
6.88.14 ॥

antardhānagatenājau yastvayā ' 'caritastadā ।
taskarācarito mārgo naiṣa vīraniṣevitaḥ ।
6.88.15 ॥

yathā bāṇapathaṁ prāpya sthito 'haṁ tava rākṣasa ।
darśayasvādya tattejo vācā tvaṁ kiṁ vikatthase ।
6.88.16 ॥

evamukto dhanurbhīmaṁ parāmṛśya mahābalaḥ ।
sasarja niśitān bāṇānindrajit samitiñjayaḥ ।
6.88.17 ॥

te nisṛṣṭā mahāvegāḥ śarāḥ sarpaviṣopamāḥ ।
samprāpya lakṣmaṇaṁ petuḥ śvasanta iva pannagāḥ ।
6.88.18 ॥

śarairatimahāvegairvegavān rāvaṇātmajaḥ ।
saumitrimindrajidyuddhe vivyādha śubhalakṣaṇam ।
6.88.19 ॥

sa śarairatividdhāṅgo rudhireṇa samukṣitaḥ ।
śuśubhe lakṣmaṇaḥ śrīmān vidhūma iva pāvakaḥ ।
6.88.20 ॥

indrajittvātmanaḥ karma prasamīkṣyādhigamya ca ।
vinadya sumahānādamidaṁ vacanamabravīt ।
6.88.21 ॥

patriṇaḥ śitadhārāste śarā matkārmukacyutāḥ ।
ādāsyante 'dya saumitre jivitaṁ jivitāntagāḥ ।
6.88.22 ॥

adya gomāyusaṅghāśca śyenasaṅghāśca lakṣmaṇa ।
gṛdhrāśca nipatantu tvāṁ gatāsuṁ nihataṁ mayā ।
6.88.23 ॥

kṣatrabandhuṁ sadānāryaṁ rāmaḥ paramādurmatiḥ ।
bhaktaṁ bhrātaramadyaiva tvāṁ drakṣyati mayā hatam ।
6.88.24 ॥

viśastakavacaṁ bhūmau vyapaviddhaśarāsanam ।
hṛtottamāṅgaṁ saumitre tvāmadya nihataṁ mayā ।
6.88.25 ॥

iti bruvāṇaṁ saṁrabdhaṁ paruṣaṁ rāvaṇātmajam ।
hetumadvākyamatyarthaṁ lakṣmaṇaḥ pratyuvāca ha ।
6.88.26 ॥

vāgbalaṁ tyaja durbuddhe krūrakarmā 'si rākṣasa ।
atha kasmādvadasyetat sampādaya sukarmaṇā ।
6.88.27 ॥

akṛtvā katthase karma kimarthamiha rākṣasa ।
kuru tatkarma yenāhaṁ śraddadhyāṁ tava katthanam ।
6.88.28 ॥

anuktvā paruṣaṁ vākyaṁ kiñcidapyanavākṣipan ।
avikatthan vadhiṣyāmi tvāṁ paśya puruṣādhama ।
6.88.29 ॥

ityuktvā pañca nārācānākarṇāpūritān śitān ।
nijaghāna mahāvegān lakṣmaṇo rākṣasorasi ।
6.88.30 ॥

supatravājitā bāṇā jvalitā iva pannagāḥ ।
nairṛtorasyabhāsanta savitū raśmayo yathā ।
6.88.31 ॥

sa śarairāhatastena saroṣo rāvaṇātmajaḥ ।
suprayuktaistribhirbāṇaiḥ prativivyādha lakṣmaṇam ।
6.88.32 ॥

sa babhūva tadā bhīmo nararākṣasasiṁhayoḥ ।
vimardastumulo yuddhe parasparajayaiṣiṇoḥ ।
6.88.33 ॥

ubhau hi balasampannāvubhau vikramaśālinau ।
6.88.34 ॥

ubhāvapi suvikrāntau sarvaśastrāstrakovidau ।
ubhau paramadurjeyāvatulyabalatejasau ।
6.88.35 ॥

yuyudhāte tadā vīrau grahāviva nabhogatau ।
6.88.36 ॥

balavṛtrāvivābhītau yudhi tau duṣpradharṣaṇau ।
yuyudhāte mahātmānau tadā kesariṇāviva ।
6.88.37 ॥

bahūnavasṛjantau hi mārgaṇaughānavasthitau ।
nararākṣasasiṁhau tau prahṛṣṭāvabhyayudhyatām ।
6.88.38 ॥

susamprahṛṣṭau nararākṣasottamau jayaiṣiṇau mārgaṇacāpadhāriṇau ।
parasparaṁ tau pravavarṣaturbhṛśaṁ śaraughavarṣeṇa balāhakāviva ।
6.88.39 ॥

abhipravṛddhau yudhi yuddhakovidau śarāsicaṇḍau śitaśastradhāriṇau ।
abhīkṣṇamāvivyadhaturmahābalau mahāhave śambaravāsavāviva ।
6.88.40 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe aṣṭāśītitamaḥ sargaḥ ।
88 ॥