युद्धकाण्डम्Yuddha Kāṇḍa

atha tasyāmavasthāyāṁ lakṣmaṇaṁ rāvaṇānujaḥ ।
pareṣāmahitaṁ vākyamarthasādhakamabravīt ।
6.86.1 ॥

yadetadrākṣasānīkaṁ meghaśyāmaṁ vilokyate ।
etadāyodhyatāṁ śīghraṁ kapibhiḥ pādapāyudhaiḥ ।
6.86.2 ॥

asyānīkasya mahato bhedane yata lakṣmaṇa ।
rākṣasendrasuto 'pyatra bhinne dṛśyo bhaviṣyati ।
6.86.3 ॥

sa tvamindrāśaniprakhyaiḥ śarairavakiran parān ।
abhidravāśu yāvadvai naitat karma samāpyate ।
6.86.4 ॥

jahi vīra durātmānaṁ māyāparamadhārmikam ।
rāvaṇiṁ krūrakarmāṇaṁ sarvalokabhayāvaham ।
6.86.5 ॥

vibhīṣaṇavacaḥ śrutvā lakṣmaṇaḥ śubhalakṣaṇaḥ ।
vavarṣa śaravarṣāṇi rākṣasendrasutaṁ prati ।
6.86.6 ॥

ṛkṣāḥ śākhāmṛgāścāpi drumādrinakhayodhinaḥ ।
abhyadhāvanta sahitāstadanīkamavasthitam ।
6.86.7 ॥

rākṣasāśca śitairbāṇairasibhiḥ śaktitomaraiḥ ।
udyataiḥ samavartanta kapisainyajighāṁsavaḥ ।
6.86.8 ॥

sa samprahārastumulaḥ sañjajñe kapirākṣasām ।
śabdena mahatā laṅkāṁ nādayan vai samantataḥ ।
6.86.9 ॥

śastraiśca bahudhākāraiḥ śitairbāṇaiśca pādapaiḥ ।
udyatairgiriśṛṅgaiśca ghorairākāśamāvṛtam ।
6.86.10 ॥

te rākṣasā vānareṣu vikṛtānanabāhavaḥ ।
niveśayantaḥ śastrāṇi cakruste sumahadbhayam ।
6.86.11 ॥

tathaiva sakalairvṛkṣairgiriśṛṅgaiśca vānarāḥ ।
abhijaghnurnijaghnuśca samare rākṣasarṣabhān ।
6.86.12 ॥

ṛkṣavānaramukhyaiśca mahākāyairmahābalaiḥ ।
rakṣasāṁ vadhyamānānāṁ mahadbhayamajāyata ।
6.86.13 ॥

svamanīkaṁ viṣaṇṇaṁ tu śrutvā śatrubhirārditam ।
udatiṣṭhata durdharṣastatkarmaṇyananuṣṭhite ।
6.86.14 ॥

vṛkṣāndhakārānnirgatya jātakrodhaḥ sa rāvaṇiḥ ।
āruroha rathaṁ sajjaṁ pūrvayuktaṁ sarākṣasaḥ ।
6.86.15 ॥

sa bhīmakārmukadharaḥ kālameghasamaprabhaḥ ।
raktāsyanayanaḥ kruddho babhau mṛtyurivāntakaḥ ।
6.86.16 ॥

dṛṣṭvaiva tu rathasthaṁ taṁ paryavartata tadbalam ।
rakṣasāṁ bhīmavegānāṁ lakṣmaṇena yuyutsatām ।
6.86.17 ॥

tasmin kāle tu hanumānudyamya sudurāsadam ।
dharaṇīdharasaṅkāśo mahāvṛkṣamarindamaḥ ।
6.86.18 ॥

sa rākṣasānāṁ tatsainyaṁ kālāgniriva nirdahan ।
cakāra bahubhirvṛkṣairnissañjñaṁ yudhi vānaraḥ ।
6.86.19 ॥

vidhvaṁsayantaṁ tarasā dṛṣṭvaiva pavanātmajam ।
rākṣasānāṁ sahasrāṇi hanumantamavākiran ।
6.86.20 ॥

śitaśūladharāḥ śūlairasibhiścāsipāṇayaḥ ।
śaktibhiḥ śaktihastāśca paṭṭiśaiḥ paṭṭiśāyudhāḥ ।
6.86.21 ॥

paridhaiśca gadābhiśca cakraiśca śubhadarśanaiḥ ।
śataśaśca śataghnībhirāyasairapi mudgaraiḥ ।
6.86.22 ॥

ghauraiḥ paraśvadhaiścaiva bhindipālaiśca rākṣasāḥ ।
muṣṭibhirvajrakalpaiśca talairaśanisannibhaiḥ ।
abhijaghnuḥ samāsādya samantāt parvatopamam ।
6.86.23 ॥

teṣāmapi ca saṅkruddhaścakāra kadanaṁ mahat ।
6.86.24 ।
ṭibhirvajrakalpaiśca talairaśanisannibhaiḥ ।
sa dadarśa kapiśreṣṭhamacalopamamindrajit ।
sūdayantamabhitraghnamamitrān pavanātmajam ।
6.86.25 ॥

sa sārathimuvācedaṁ yāhi yatraiṣa vānaraḥ ।
kṣayameṣa hi naḥ kuryādrākṣasānāmupekṣitaḥ ।
6.86.26 ॥

ityuktaḥ sārathistena yayau yatra sa mārutiḥ ।
vahan paramadurdharṣaṁ sthitamindrajitaṁ rathe ।
6.86.27 ॥

so 'bhyupetya śarān khaḍgān paṭṭiśāṁśca paraśvadhān ।
abhyavarṣata durddharṣaḥ kapimūrdhni sa rākṣasaḥ ।
6.86.28 ॥

tāni śastrāṇi ghorāṇi pratigṛhya sa mārutiḥ ।
roṣeṇa mahatā ' 'viṣṭo vākyaṁ cedamuvāca ha ।
6.86.29 ॥

yuddhyasva yadi śūro 'si rāvaṇātmaja durmate ।
vāyuputraṁ samāsādya jīvanna pratiyāsyasi ।
6.86.30 ॥

bāhubhyāṁ pratiyudhyasva yadi me dvandvamāhave ।
vegaṁ sahasva durbuddhe tatastvaṁ rakṣasāṁ varaḥ ।
6.86.31 ॥

hanumantaṁ jighāṁsantaṁ samudyataśarāsanam ।
rāvaṇātmajamācaṣṭe lakṣmaṇāya vibhīṣaṇaḥ ।
6.86.32 ॥

yaḥ sa vāsavanirjetā rāvaṇasyātmasambhavaḥ ।
sa eṣa rathamāsthāya hanumantaṁ jighāṁsati ।
6.86.33 ॥

tamapratimasaṁsthānaiḥ śaraiḥ śatruvidāraṇaiḥ ।
jīvitāntakarairghoraiḥ saumitre rāvaṇiṁ jahi ।
6.86.34 ॥

ityevamuktastu tadā mahātmā vibhīṣaṇenārivibhīṣaṇena ।
dadarśa taṁ parvatasannikāśaṁ raṇe sthitaṁ bhīmabalaṁ nadantam ।
6.86.35 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe ṣaḍaśītitamaḥ sargaḥ ।
86 ॥