युद्धकाण्डम्Yuddha Kāṇḍa

tasya tadvacanaṁ śrutvā rāghavaḥ śokakarśitaḥ ।
nopadhārayate vyaktaṁ yaduktaṁ tena rakṣasā ।
6.85.1 ॥

tato dhairyamavaṣṭabhya rāmaḥ parapurañjayaḥ ।
vibhīṣaṇamupāsīnamuvāca kapisannidhau ।
6.85.2 ॥

nairṛtādhipate vākyaṁ yaduktaṁ te vibhīṣaṇa ।
bhūyastacchrotumicchāmi brūhi yatte vivakṣitam ।
6.85.3 ॥

rāghavasya vacaḥ śrutvā vākyaṁ vākyaviśāradaḥ ।
yattatpunaridaṁ vākyaṁ babhāṣe sa vibhīṣaṇaḥ ।
6.85.4 ॥

yathājñaptaṁ mahābāho tvayā gulmaniveśanam ।
tattathā 'nuṣṭhitaṁ vīra tvadvākyasamanantaram ।
6.85.5 ॥

tānyanīkāni sarvāṇi vibhaktāni samantataḥ ।
vinyastā yūthapāścaiva yathānyāyaṁ vibhāgaśaḥ ।
6.85.6 ॥

bhūyastu mama vijñāpyaṁ tacchṛṇuṣva mahāyaśaḥ ।
6.85.7 ॥

tvayyakāraṇasantapte santaptahṛdayā vayam ।
tyaja rājannimaṁ śokaṁ mithyā santāpamāgatam ।
6.85.8 ॥

tadiyaṁ tyajyatāṁ cintā śatruharṣavivardhanī ।
udyamaḥ kriyatāṁ vīra harṣaḥ samupasevyatām ।
6.85.9 ॥

prāptavyā vadi te sītā hantavyāśca niśācarāḥ ।
raghunandana vakṣyāmi śrūyatāṁ me hitaṁ vacaḥ ।
6.85.10 ॥

sādhvayaṁ yātu saumitrirbalena mahatā vṛtaḥ ।
nikumbhilāyāṁ samprāpya hantuṁ rāvaṇimāhave ।
6.85.11 ॥

dhanurmaṇḍalanirmuktairāśīviṣaviṣopamaiḥ ।
śarairhantuṁ maheṣvāso rāvaṇiṁ samitiñjayaḥ ।
6.85.12 ॥

tena vīryeṇa tapasā varadānāt svayambhuvaḥ ।
astraṁ brahmaśiraḥ prāptaṁ kāmagāśca turaṅgamāḥ ।
6.85.13 ॥

sa eṣa saha sainyena prāptaḥ kila nikumbhilām ।
yadyuttiṣṭhet kṛtaṁ karma hatān sarvāṁśca viddhi naḥ ।
6.85.14 ॥

nikumbhilāmasamprāptamahutāgniṁ ca yo ripuḥ ।
tvāmātatāyinaṁ hanyādindraśatroḥ sa te vadhaḥ ।
varo datto mahābāho sarvalokeśvareṇa vai ।
6.85.15 ॥

ityevaṁ vihito rājan vadhastasyaiṣa dhīmataḥ ।
vadhāyendrajito rāma sandiśasva mahābala ।
hate tasmin hataṁ viddhi rāvaṇaṁ sasuhṛjjanam ।
6.85.16 ॥

vibhīṣaṇavacaḥ śrutvā rāghavo vākyamabravīt ।
6.85.17 ॥

jānāmi tasya raudrasya māyāṁ satyaparākrama ।
sa hi brahmāstravit prājño mahāmāyo mahābalaḥ ।
karotyasañjñān saṅgrāme devān savaruṇānapi ।
6.85.18 ॥

tasyāntarikṣe carato rathasthasya mahāyaśaḥ ।
na gatirjñāyate tasya sūryasyevābhrasamplave ।
6.85.19 ॥

rāghavastu riporjñātvāmāyāvīryaṁ durātmanaḥ ।
lakṣmaṇaṁ kīrtisampannamidaṁ vacanamabravīt ।
6.85.20 ॥

yadvānarendrasya balaṁ tena sarveṇa saṁvṛtaḥ ।
hanumatpramukhaiścaiva yūthapaiḥ saha lakṣmaṇa ।
6.85.21 ॥

jāmbavenarkṣapatinā sahasainyena saṁvṛtaḥ ।
jahi taṁ rākṣasasutaṁ māyābalaviśāradam ।
6.85.22 ॥

ayaṁ tvāṁ sacivaiḥ sārddhaṁ mahātmā rajanīcaraḥ ।
abhijñastasya deśasya pṛṣṭhato 'nugamiṣyati ।
6.85.23 ॥

rāghavasya vacaḥ śrutvā lakṣmaṇaḥ savibhīṣaṇaḥ ।
jāgrāha kārmukaśreṣṭhamatyadbhutaparākramaḥ ।
6.85.24 ॥

sannaddhaḥ kavacī khaḍgī saśaro hemacāpadhṛt ।
rāmapādāvupaspṛśya hṛṣṭaḥ saumitrirabravīt ।
6.85.25 ॥

adya matkārmukonmuktāḥ śarā nirbhidya rāvaṇim ।
laṅkāmabhipatiṣyanti haṁsāḥ puṣkariṇīmiva ।
6.85.26 ॥

adyaiva tasya raudrasya śarīraṁ māmakāḥ śarāḥ ।
vidhamiṣyanti bhittvā taṁ mahācāpaguṇacyutāḥ ।
6.85.27 ॥

sa evamuktvā dyutimān vacanaṁ bhrāturagrataḥ ।
sa rāvaṇivadhākāṅkṣī lakṣmaṇastvarito yayau ।
6.85.28 ॥

so 'bhivādya guroḥ pādau kṛtvā cāpi pradakṣiṇam ।
nikumbhilāmabhiyayau caityaṁ rāvaṇipālitam ।
6.85.29 ॥

vibhīṣaṇena sahito rājaputraḥ pratāpavān ।
kṛtasvastyayano bhrātrā lakṣmaṇastvarito yayau ।
6.85.30 ॥

vānarāṇāṁ sahasraistu hanumān bahubhirvṛtaḥ ।
vibhīṣaṇaśca sāmātyastadā lakṣmaṇamanvagāt ।
6.85.31 ॥

mahatā harisainyena savegamabhisaṁvṛtaḥ ।
ṛkṣarājabalaṁ caiva dadarśa pathi viṣṭhitam ।
6.85.32 ॥

sa gatvā dūramadhvānaṁ saumitrirmitranandanaḥ ।
rākṣasendrabalaṁ dūrādapaśyad vyūhamāsthitam ।
6.85.33 ॥

sa taṁ prāpya dhanuṣpāṇirmāyāyogamarindamaḥ ।
tasthau brahmavidhānena vijetuṁ raghunandanaḥ ।
6.85.34 ॥

vibhīṣaṇena sahito rājaputraḥ pratāpavān ।
aṅgadena ca vīreṇa tathā 'nilasutena ca ।
6.85.35 ॥

vividhamamalaśastrabhāsvaraṁ tad dhvajagahanaṁ vipulaṁ mahārathaiśca ।
pratibhayatamamaprameyavegaṁ timiramiva dviṣatāṁ balaṁ viveśa ।
6.85.36 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe pañcāśītitamaḥ sargaḥ ।
85 ॥