युद्धकाण्डम्Yuddha Kāṇḍa

sa tathoktastu nirbhartsya kumbhakarṇo mahodaram ।
abravīdrākṣasaśreṣṭhaṁ bhrātaraṁ rāvaṇaṁ tataḥ ।
6.65.1 ॥

so 'haṁ tava bhayaṁ ghoraṁ vadhāttasya durātmanaḥ ।
rāmasyādya pramārjāmi nirvairo hi sukhī bhava ।
6.65.2 ॥

garjanti na vṛthā śūrā nirjalā iva toyadāḥ ।
paśya sampādyamānaṁ tu garjitaṁ yudhi karmaṇā ।
6.65.3 ॥

na marṣayati cātmānaṁ sambhāvayati nātmanā ।
adarśayitvā śūrāstu karma kurvanti duṣkaram ।
6.65.4 ॥

viklavānāmabuddhīnāṁ rājñā paṇḍitamāninām ।
śṛṇvatā sāditamidaṁ tvadvidhānāṁ mahodara ।
6.65.5 ॥

yuddhe kāpuruṣairnityaṁ bhavadbhiḥ priyavādibhiḥ ।
rājānamanugacchadbhiḥ kṛtyametaddhi sāditam ।
6.65.6 ॥

rājaśeṣā kṛtā laṅkā kṣīṇaḥ kośo balaṁ hatam ।
rājānamimamāsādya suhṛccihnamamitrakam ।
6.65.7 ॥

eṣa niryāmyahaṁ yuddhamudyataḥ śatrunirjaye ।
durnayaṁ bhavatāmadya samīkartumihāhave ।
6.65.8 ॥

evamuktavato vākyaṁ kumbhakarṇasya dhīmataḥ ।
pratyuvāca tato vākyaṁ prahasan rākṣasādhipaḥ ।
6.65.9 ॥

mahodaro 'yaṁ rāmāttu paritrasto na saṁśayaḥ ।
na hi rocayate tāta yuddhaṁ yuddhaviśārada ।
6.65.10 ॥

kaścinme tvatsamo nāsti sauhṛdena balena ca ।
gaccha śatruvadhāya tvaṁ kumbhakarṇa jayāya ca ।
6.65.11 ॥

tasmāttu bhayanāśārthaṁ bhavān sambodhito mayā ।
ayaṁ hi kālaḥ suhṛdāṁ rākṣasānāmarindama ।
6.65.12 ॥

tadgaccha śūlamādāya pāśahasta ivāntakaḥ ।
vānarān rājaputrau ca bhakṣayādityatejasau ।
6.65.13 ॥

samālokya tu te rūpaṁ vidraviṣyanti vānarāḥ ।
rāmalakṣmaṇoścāpi hṛdaye prasphuṭiṣyataḥ ।
6.65.14 ॥

evamuktvā mahārājaḥ kumbhakarṇaṁ mahābalam ।
punarjātamivātmānaṁ mene rākṣasapuṅgavaḥ ।
6.65.15 ॥

kumbhakarṇabalābhijño jānaṁstasya parākramam ।
babhūva mudito rājā śaśāṅka iva nirmalaḥ ।
6.65.16 ॥

ityevamuktaḥ saṁhṛṣṭo nirjagāma mahābalaḥ ।
6.65.17 ॥

rājñastu vacanaṁ śrutvā kumbhakarṇaḥ samudyataḥ ।
ādade niśitaṁ śūlaṁ vegācchatrunibarhaṇam ।
6.65.18 ॥

sarvakālāyasaṁ dīptaṁ taptakāñcanabhūṣaṇam ।
indrāśanisamaṁ bhīmaṁ vajrapratimagauravam ।
6.65.19 ॥

devadānavagandharvayakṣakinnarasūdanam ।
raktamālyaṁ mahādhāmasvataścodgatapāvakam ।
6.65.20 ॥

ādāya niśitaṁ śūlaṁ śatruśoṇitarañjitam ।
kumbhakarṇo mahātejā rāvaṇaṁ vākyamabravīt ।
6.65.21 ॥

gamiṣyāmyahamekākī tiṣṭhatviha balaṁ mama ।
adya tān kṣubhitān kruddho bhakṣayiṣyāmi vānarān ।
kumbhakarṇavacaḥ śrutvā rāvaṇo vākyamabravīt ।
6.65.22 ॥

sainyaiḥ parivṛto gaccha śūlamudgarapāṇibhiḥ ।
vānarā hi mahātmānaḥ śīghrāḥ suvyavasāyinaḥ ।
6.65.23 ॥

ekākinaṁ pramattaṁ vā nayeyurdaśanaiḥ kṣayam ।
tasmāt paramadurdharṣaiḥ sainyaiḥ parivṛto vraja ।
rakṣasāmahitaṁ sarvaṁ śatrupakṣaṁ niṣūdaya ।
6.65.24 ॥

athāsanāt samutpatya srajaṁ maṇikṛtāntarām ।
ābabandha mahātejāḥ kumbhakarṇasya rāvaṇaḥ ।
6.65.25 ॥

aṅgadānyaṅgulīveṣṭān varāṇyābharaṇāni ca ।
hāraṁ ca śaśisaṅkāśamābabandha mahātmanaḥ ।
6.65.26 ॥

divyāni ca sugandhīni mālyadāmāni rāvaṇaḥ ।
śrotre cāsañjayāmāsa śrīmatī cāsya kuṇḍale ।
6.65.27 ॥

kāñcanāṅgadakeyūraniṣkābharaṇabhūṣitaḥ ।
kumbhakarṇo bṛhatkarṇaḥ suhuto 'gnirivābabhau ।
6.65.28 ॥

śroṇīsūtreṇa mahatā mecakena vyarājata ।
amṛtotpādane naddho bhujaṅgeneva mandaraḥ ।
6.65.29 ॥

sa kāñcanaṁ bhārasahaṁ nivātaṁ vidyutprabhaṁ dīptamivātmabhāsā ।
ābhadhyamānaḥ kavacaṁ rarāja sandhyābhrasaṁvīta ivādrirājaḥ ।
6.65.30 ॥

sarvābharaṇasarvāṅgaḥ śūlapāṇiḥ sa rākṣasaḥ ।
trivikramakṛtotsāho nārāyaṇa ivābabhau ।
6.65.31 ॥

bhrātaraṁ sampariṣvajya kṛtvā cābhipradakṣiṇam ।
praṇamya śirasā tasmai sampratasthe mahābalaḥ ।
6.65.32 ॥

niṣpatantaṁ mahākāyaṁ mahānādaṁ mahābalam ।
tamāśīrbhiḥ praśastābhiḥ preṣayāmāsa rāvaṇaḥ ।
6.65.33 ॥

śaṅkhadundubhinirghoṣaiḥ sainyaiścāpi varāyudhaiḥ ।
taṁ gajaiśca turaṅgaiśca syandanaiścāmbudasvanaiḥ ।
6.65.34 ॥

anujagmurmahātmānaṁ rathino rathināṁ varam ।
6.65.35 ॥

sarpairuṣṭraiḥ kharairaśvaiḥ siṁhadvipamṛgadvijaiḥ ।
anujagmuśca taṁ ghoraṁ kumbhakarṇaṁ mahābalam ।
6.65.36 ॥

sa puṣpavarṣairavakīryamāṇo dhṛtātapatraḥ śitaśūlapāṇiḥ ।
madotkaṭaḥ śoṇitagandhamatto viniryayau dānavadevaśatruḥ ।
6.65.37 ॥

padātayaśca bahavo mahānādā mahābalāḥ ।
anvayū rākṣasā bhīmā bhīmākṣāḥ śastrapāṇayaḥ ।
6.65.38 ॥

raktākṣāḥ sumahākāyā nīlāñjanacayopamāḥ ।
śūlānudyamya khaḍgāṁśca niśitāṁśca paraśvadhān ।
6.65.39 ॥

bahuvyāmāṁśca parighān gadāśca musalāni ca ।
tālaskandhāṁśca vipulān kṣepaṇīyān durāsadān ।
6.65.40 ॥

athānyadvapurādāya dāruṇaṁ romaharṣaṇam ।
niṣpapāta mahātejāḥ kumbhakarṇo mahābalaḥ ।
6.65.41 ॥

dhanuśśataparīṇāhaḥ sa ṣaṭchatasamucchritaḥ ।
raudraḥ śakaṭacakrākṣo mahāparvatasannibhaḥ ।
6.65.42 ॥

sannipatya ca rakṣāṁsi dagdhaśailopamo mahān ।
kumbhakarṇo mahāvaktraḥ prahasannidamabravīt ।
6.65.43 ॥

adya vānaramukhyānāṁ tāni yūthāni bhāgaśaḥ ।
nirdahiṣyāmi saṅkruddhaḥ śalabhāniva pāvakaḥ ।
6.65.44 ॥

nāparādhyanti me kāmaṁ vānarā vanacāriṇaḥ ।
jātirasmādvidhānāṁ sā purodyānavibhūṣaṇam ।
6.65.45 ॥

purarodhasya mūlaṁ tu rāghavaḥ sahalakṣmaṇaḥ ।
hate tasmin hataṁ sarvaṁ taṁ vadhiṣyāmi saṁyuge ।
6.65.46 ॥

evaṁ tasya bruvāṇasya kumbhakarṇasya rākṣasāḥ ।
nādaṁ cakrurmahāghoraṁ kampayanta ivārṇavam ।
6.65.47 ॥

tasya niṣpatatastūrṇaṁ kumbhakarṇasya dhīmataḥ ।
babhūvurghorarūpāṇi nimittāni samantataḥ ।
6.65.48 ॥

ulkāśaniyutā meghā babhūvurgardabhāruṇāḥ ।
sasāgaravanā caiva vasudhā samakampata ।
6.65.49 ॥

ghorarūpāḥ śivā neduḥ sajvālakavalairmukhaiḥ ।
maṇḍalānyapasavyāni babandhuśca vihaṅgamāḥ ।
6.65.50 ॥

niṣpapāta ca māleva gṛdhro 'sya pathi gacchataḥ ।
prāsphurannayanaṁ cāsya savyo bāhuśca kampate ।
6.65.51 ॥

nipapāta tadā colkā jvalantī bhīmanisvanā ।
ādityo niṣprabhaścāsīnna pravāti sukho 'nilaḥ ।
6.65.52 ॥

acintayan mahotpātānutthitān romaharṣaṇān ।
niryayau kumbhakarṇastu kṛtāntabalacoditaḥ ।
6.65.53 ॥

sa laṅghayitvā prākāraṁ padbhyāṁ parvatasannibhaḥ ।
dadarśābhraghanaprakhyaṁ vānarānīkamadbhutam ।
6.65.54 ॥

te dṛṣṭvā rākṣasaśreṣṭhaṁ vānarāḥ parvatopamam ।
vāyununnā iva ghanā yayuḥ sarvā diśastadā ।
6.65.55 ॥

tadvānarānīkamatipracaṇḍaṁ diśo dravadbhinnamivābhrajālam ।
sa kumbhakarṇaḥ samavekṣya harṣānnanāda bhūyo ghanavad ghanābhaḥ ।
6.65.56 ॥

te tasya ghoraṁ ninadaṁ niśamya yathā ninādaṁ divi vāridasya ।
peturdharaṇyāṁ bahavaḥ plavaṅgā nikṛttamūlā iva sālavṛkṣāḥ ।
6.65.57 ॥

vipulaparighavān sa kumbhakarṇo ripunidhanāya vinissṛto mahātmā ।
kapigaṇabhayamādadat subhīmaṁ prabhuriva kiṅkaradaṇḍavān yugānte ।
6.65.58 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe pañcaṣaṣṭitamaḥ sargaḥ ।
65 ॥