युद्धकाण्डम्Yuddha Kāṇḍa

taduktamatikāyasya balino bāhuśālinaḥ ।
kumbhakarṇasya vacanaṁ śrutvovāca mahodaraḥ ।
6.64.1 ॥

kumbhakarṇa kule jāto dhṛṣṭaḥ prākṛtadarśanaḥ ।
avalipto na śaknoṣi kṛtyaṁ sarvatra veditum ।
6.64.2 ॥

na hi rājā na jānīte kumbhakarṇa nayānayau ।
tvaṁ tu kaiśorakāddhṛṣṭaḥ kevalaṁ vaktumicchasi ।
6.64.3 ॥

sthānaṁ vṛddhiṁ ca hāniṁ ca deśakālavibhāgavit ।
ātmanaśca pareṣāṁ ca budhyate rākṣasarṣabhaḥ ।
6.64.4 ॥

yattu śakyaṁ balavatā kartuṁ prākṛtabuddhinā ।
anupāsitavṛddhena kaḥ kuryāttādṛśaṁ budhaḥ ।
6.64.5 ॥

yāṁstu dharmārthakāmāṁstvaṁ bravīṣi pṛthagāśrayān ।
anuboddhuṁ svabhāve tānnahi lakṣaṇamasti te ।
6.64.6 ॥

karma caiva hi sarveṣāṁ kāraṇānāṁ prayojakam ।
śreyaḥ pāpīyasāṁ cātra phalaṁ bhavati karmaṇām ।
6.64.7 ॥

niśśreyasaphalāveva dharmārthāvitarāvapi ।
adharmānarthayoḥ prāptiḥ phalaṁ ca pratyavāyikam ।
6.64.8 ॥

ehalaukikapāratraṁ karma pumbhirniṣevyate ।
karmāṇyapi tu kalyāṇi labhate kāmamāsthitaḥ ।
6.64.9 ॥

tatra klṛptamidaṁ rājñā hṛdi kāryaṁ mataṁ ca naḥ ।
śatrau hi sāhasaṁ yat syāt kimivātrāpanīyatām ।
6.64.10 ॥

ekasyaivābhiyāne tu heturyaḥ prakṛtastvayā ।
tatrāpyanupapannaṁ te vakṣyāmi yadasādhu ca ।
6.64.11 ॥

yena pūrvaṁ janasthāne bahavo 'tibalā hatāḥ ।
rākṣasā rāghavaṁ taṁ tvaṁ kathameko jayiṣyasi ।
6.64.12 ॥

ye purā nirjitāstena janasthāne mahaujasaḥ ।
rākṣasāṁstān pure sarvān bhītānadyāpi paśyasi ।
6.64.13 ॥

taṁ siṁhamiva saṅkruddhaṁ rāmaṁ daśarathātmajam ।
sarpaṁ suptamivābudhya prabodhayitumicchasi ।
6.64.14 ॥

jvalantaṁ tejasā nityaṁ krodhena ca durāsadam ।
kastaṁ mṛtyumivāsahyamāsādayitumarhati ।
6.64.15 ॥

saṁśayasthamidaṁ sarvaṁ śatroḥ pratisamāsane ।
ekasya gamanaṁ tatra nahi me rocate bhṛśam ।
6.64.16 ॥

hīnārthaḥ susamṛddhārthaṁ ko ripuṁ prākṛtaṁ yathā ।
niścitya jīvitatyāge vaśamānetumicchati ।
6.64.17 ॥

yasya nāsti manuṣyeṣu sadṛśo rākṣasottama ।
kathamāśaṁsase yoddhuṁ tulyenendravivasvatoḥ ।
6.64.18 ॥

evamuktvā tu saṁrabdhaḥ kumbhakarṇaṁ mahodaraḥ ।
uvāca rakṣasāṁ madhye rāvaṇaṁ lokarāvaṇam ।
6.64.19 ॥

labdhvā punastvaṁ vaidehīṁ kimarthaṁ samprajalpasi ।
yadīcchasi tadā sītā vaśagā te bhaviṣyati ।
6.64.20 ॥

dṛṣṭaḥ kaścidupāyo me sītopasthānakārakaḥ ।
ruciraścet svayā buddhyā rākṣaseśvara taṁ śṛṇu ।
6.64.21 ॥

ahaṁ dvijihvaḥ saṁhrādī kumbhakarṇo vitardanaḥ ।
pañca rāmavadhāyaite niryāntītyavaghoṣaya ।
6.64.22 ॥

tato gatvā vayaṁ yuddhaṁ dāsyāmastasya yatnataḥ ।
jeṣyāmo yadi te śatrūnnopāyaiḥ kṛtyamasti naḥ ।
6.64.23 ॥

atha jīvati naḥ śatrurvayaṁ ca kṛtasaṁyugāḥ ।
tatastadabhipatsyāmo manasā yat samīkṣitam ।
6.64.24 ॥

vayaṁ yuddhādihaiṣyāmo rudhireṇa samukṣitāḥ ।
vidāryaṁ svatanuṁ bāṇai rāmanāmāṅkitaiḥ śitaiḥ ।
6.64.25 ॥

bhakṣito rāghavo 'smābhirlakṣmaṇaśceti vādinaḥ ।
tava pādau grahīṣyāmastvaṁ naḥ kāmaṁ prapūraya ।
6.64.26 ॥

tato 'vaghoṣaya pure gajaskandhena pārthiva ।
hato rāmaḥ saha bhrātrā sasainya iti sarvataḥ ।
6.64.27 ॥

prīto nāma tato bhūtvā bhṛtyānāṁ tvamarindama ।
bhogāṁśca parivārāṁśca kāmāṁśca vasu dāpaya ।
6.64.28 ॥

tato mālyāni vāsāṁsi vīrāṇāmanulepanam ।
peyaṁ ca bahu yodhebhyaḥ svayaṁ ca muditaḥ piba ।
6.64.29 ॥

tato 'smin bahulībhūte kaulīne sarvato gate ।
bhakṣitaḥ sasuhṛdrāmo rākṣasairiti viśrute ।
6.64.30 ॥

praviśyāśvāsya cāpi tvaṁ sītāṁ rahasi sāntvaya ।
dhanadhānyaiśca kāmaiśca ratnaiścaināṁ pralobhaya ।
6.64.31 ॥

anayopadhayā rājan bhayaśokānubandhayā ।
akāmā tvadvaśaṁ sītā naṣṭanāthā gamiṣyati ।
6.64.32 ॥

rañjanīyaṁ hi bhartāraṁ vinaṣṭamavagamya sā ।
nairāśyāt strīlaghutvācca tvadvaśaṁ pratipatsyate ।
6.64.33 ॥

sā purā sukhasaṁvṛddhā sukhārhā duḥkhakarśitā ।
tvayyadhīnaṁ sukhaṁ jñātvā sarvathopagamiṣyati ।
6.64.34 ॥

etat sunītaṁ mama darśanena rāmaṁ hi dṛṣṭvaiva bhavedanarthaḥ ।
ihaiva te setsyati motsuko bhūrmahānayuddhena sukhasya lābhaḥ ।
6.64.35 ॥

adṛṣṭasainyo hyanavāptasaṁśayo ripūnayuddhena jayan narādhipaḥ ।
yaśaśca puṇyaṁ ca mahanmahīpate śriyaṁ ca kīrtiṁ ca ciraṁ samaśnute ।
6.64.36 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe catuṣṣaṣṭhitamaḥ sargaḥ ।
64 ॥

adya parvatasaṅkāśaṁ sasūryamiva toyadam ।
vikīrṇaṁ paśya samare sugrīvaṁ plavagottamam ।
6.63.38 ॥

kathaṁ tvaṁ rākṣasairebhirmayā ca parirakṣitaḥ ।
jighāṁsubhirdāśarathiṁ vadhyase tvamihānagha ।
6.63.39 ॥

atha pūrvaṁ hate tena mayi tvāṁ hanti rāghavaḥ ।
nāhamātmani santāpaṁ gaccheyaṁ rākṣasādhipa ।
6.63.40 ॥

kāmaṁ tvidānīmapi māṁ vyādiśa tvaṁ parantapa ।
na paraḥ preṣaṇīyaste yuddhāyātulavikrama ।
6.63.41 ॥

ahamutsādayiṣyāmi śatrūṁstava mahābala ।
6.63.42 ॥

yadi śakro yadi yamo yadi pāvakamārutau ।
tānahaṁ yodhayiṣyāmi kuberavaruṇāvapi ।
6.63.43 ॥

girimātraśarīrasya śitaśūladharasya me ।
nardatastīkṣṇadaṁṣṭrasya bibhīyācca purandaraḥ ।
6.63.44 ॥

athavā tyaktaśastrasya mṛdnatastarasā ripūn ।
na me pratimukhe sthātuṁ kaścicchakto jijīviṣuḥ ।
6.63.45 ॥

naiva śaktyā na gadayā nāsinā niśitaiḥ śaraiḥ ।
hastābhyāmeva saṁrabdho haniṣyāmyapi vajriṇam ।
6.63.46 ॥

yadi me muṣṭivegaṁ sa rāghavo 'dya sahiṣyate ।
tataḥ pāsyanti bāṇaughā rudhiraṁ rāghavasya tu ।
6.63.47 ॥

cintayā bādhyase rājan kimarthaṁ mayi tiṣṭhati ।
so 'haṁ śatruvināśāya tava niryātumudyataḥ ।
6.63.48 ॥

muñca rāmādbhayaṁ rājan haniṣyāmīha saṁyuge ।
rāghavaṁ lakṣmaṇaṁ caiva sugrīvaṁ ca mahābalam ।
hanumantaṁ ca rakṣoghnaṁ laṅkā yena pradīpitā ।
6.63.49 ॥

harīṁścāpi haniṣyāmi saṁyuge samavasthitān ।
asādhāraṇamicchāmi tava dātuṁ mahadyaśaḥ ।
6.63.50 ॥

yadi cendrādbhayaṁ rājan yadi vāpi svayambhuvaḥ ।
6.63.51 ॥

api devāḥ śayiṣyante kruddhe mayi mahītale ।
yamaṁ ca śamayiṣyāmi bhakṣayiṣyāmi pāvakam ।
ādityaṁ pātayiṣyāmi sanakṣatraṁ mahītale ।
6.63.52 ॥

śatakratuṁ vadhiṣyāmi pāsyāmi varuṇālayam ।
parvatāṁścūrṇayiṣyāmi dārayiṣyāmi medinīm ।
6.63.53 ॥

dīrghakālaṁ prasuptasya kumbhakarṇasya vikramam ।
adya paśyantu bhūtāni bhakṣyamāṇāni sarvaśaḥ ।
6.63.54 ॥

nanvidaṁ tridivaṁ sarvamāhārasya na pūryate ।
6.63.55 ॥

vadhena te dāśaratheḥ sukhārhaṁ sukhaṁ samāhartumahaṁ vrajāmi ।
nihatya rāmaṁ saha lakṣmaṇena khādāmi sarvān hariyūthamukhyān ।
6.63.56 ॥

ramasva kāmaṁ piba cāgryavāruṇīṁ kuruṣva kṛtyāni vinīyatāṁ jvaraḥ ।
mayā 'dya rāme gamite yamakṣayaṁ cirāya sītā vaśagā bhaviṣyati ।
6.63.57 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe triṣaṣṭitamaḥ sargaḥ ।
63 ॥