युद्धकाण्डम्Yuddha Kāṇḍa

tasya rākṣasarājasya niśamya paridevitam ।
kumbhakarṇo babhāṣedaṁ vacanaṁ prajahāsa ca ।
6.63.1 ॥

dṛṣṭo doṣo hi yo 'smābhiḥ purā mantravinirṇaye ।
hiteṣvanabhiraktena so 'yamāsāditastvayā ।
6.63.2 ॥

śīghraṁ khalvabhyupetaṁ tvāṁ phalaṁ pāpasya karmaṇaḥ ।
nirayeṣveva patanaṁ yathā duṣkṛtakarmaṇaḥ ।
6.63.3 ॥

prathamaṁ vai mahārāja kṛtyametadacintitam ।
kevalaṁ vīryadarpeṇa nānubandho vicāritaḥ ।
6.63.4 ॥

yaḥ paścāt pūrvakāryāṇi kuryādaiśvaryamāsthitaḥ ।
pūrvaṁ cāparakāryāṇi na sa veda nayānayau ।
6.63.5 ॥

deśakālavihīnāni karmāṇi viparītavat ।
kriyamāṇāni duṣyanti havīṁṣyaprayateṣviva ।
6.63.6 ॥

trayāṇāṁ pañcadhā yogaṁ karmaṇāṁ yaḥ prapaśyati ।
sacivaiḥ samayaṁ kṛtvā sa sabhye vartate pathi ।
6.63.7 ॥

yathāgamaṁ ca yo rājā samayaṁ vicikīrṣati ।
budhyate sacivān buddhyā suhṛdaścānupaśyati ।
6.63.8 ॥

dharmamarthaṁ ca kāmaṁ ca sarvān vā rakṣasāṁ pate ।
bhajeta puruṣaḥ kāle trīṇi dvandvāni vā punaḥ ।
6.63.9 ॥

triṣu caiteṣu yacchreṣṭhaṁ śrutvā tannāvabudhyate ।
rājā vā rājamātro vā vyarthaṁ tasya bahuśrutam ।
6.63.10 ॥

upapradānaṁ sāntvaṁ vā bhedaṁ kāle ca vikramam ।
yogaṁ ca rakṣasāṁ śreṣṭha tāvubhau ca nayānayau ।
6.63.11 ॥

kāle dharmārthakāmān yaḥ sammantrya sacivaiḥ saha ।
niṣevetātmavān loke na sa vyasanamāpnuyāt ।
6.63.12 ॥

hitānubandhamālocya kāryākāryamihātmanaḥ ।
rājā sahārthatattvajñaiḥ sacivaiḥ sa hi jīvati ।
6.63.13 ॥

anabhijñāya śāstrārthān puruṣāḥ paśubuddhayaḥ ।
prāgalbhyādvaktumicchanti mantreṣvabhyantarīkṛtāḥ ।
6.63.14 ॥

aśāstraviduṣāṁ teṣāṁ na kāryamahitaṁ vacaḥ ।
arthaśāstrānabhijñānāṁ vipulāṁ śriyamicchatām ।
6.63.15 ॥

ahitaṁ ca hitākāraṁ dhārṣṭyājjalpanti ye narāḥ ।
avekṣya mantrabāhyāste kartavyāḥ kṛtyadūṣaṇāḥ ।
6.63.16 ॥

vināśayanto bhartāraṁ sahitāḥ śatrubhirbudhaiḥ ।
viparītāni kṛtyāni kārayantīha mantriṇaḥ ।
6.63.17 ॥

tān bhartā mitrasaṅkāśānamitrān mantranirṇaye ।
vyavahāreṇa jānīyāt sacivānupasaṁhitān ।
6.63.18 ॥

capalasyeha kṛtyāni sahasānupradhāvataḥ ।
chidramanye prapadyante krauñcasya svamiva dvijāḥ ।
6.63.19 ॥

yo hi śatrumavijñāya nātmānamabhirakṣati ।
avāpnoti hi so 'narthān sthānācca vyavaropyate ।
6.63.20 ॥

yaduktamiha te pūrvaṁ kriyatāmanujena ca ।
tadeva no hitaṁ kāryaṁ yadicchasi ca tat kuru ।
6.63.21 ॥

tattu śrutvā daśagrīvaḥ kumbhakarṇasya bhāṣitam ।
bhrukuṭiṁ caiva sañcakre kruddhaścainamabhāṣata ।
6.63.22 ॥

mānyo gururivācāryaḥ kiṁ māṁ tvamanuśāsasi ।
kimevaṁ vākchramaṁ kṛtvā yuktaṁ vidhīyatām ।
6.63.23 ॥

vibhramāccittamohādvā balavīryāśrayeṇa vā ।
nābhipannamidānīṁ yadvyarthāstasya punaḥ kathāḥ ।
6.63.24 ॥

asmin kāle tu yadyuktaṁ tadidānīṁ vidhīyatām ।
gataṁ tu nānuśocanti gataṁ tu gatameva hi ।
6.63.25 ॥

mamāpanayajaṁ doṣaṁ vikrameṇa samīkuru ।
yadi khalvasti me sneho vikramaṁ vā 'vagacchasi ।
yadi vā kāryametatte hṛdi kāryatamaṁ matam ।
6.63.26 ॥

sa suhṛd yo vipannārthaṁ dīnamabhyavapadyate ।
sa bandhuryo 'panīteṣu sāhāyyāyopakalpate ।
6.63.27 ॥

tamathaivaṁ bruvāṇaṁ tu vacanaṁ dhīradāruṇam ।
ruṣṭo 'yamiti vijñāya śanaiḥ ślakṣṇamuvāca ha ।
6.63.28 ॥

atīva hi samālakṣya bhrātaraṁ kṣubhitendriyam ।
kumbhakarṇaḥ śanairvākyaṁ babhāṣe parisāntvayan ।
6.63.29 ॥

alaṁ rākṣasarājendra santāpamupapadya te ।
roṣaṁ ca samparityajya svastho bhavitumarhasi ।
6.63.30 ॥

naitanmanasi kartavyaṁ mayi jīvati pārthiva ।
tamahaṁ nāśayiṣyāmi yatkṛte paritapyase ।
6.63.31 ॥

avaśyaṁ tu hitaṁ vācyaṁ sarvāvasthaṁ mayā tava ।
bandhubhāvādabhihitaṁ bhrātṛsnehācca pārthiva ।
6.63.32 ॥

sadṛśaṁ yattu kāle 'smin kartuṁ snigdhena bandhunā ।
śatrūṇāṁ kadanaṁ paśya kriyamāṇaṁ mayā raṇe ।
6.63.33 ॥

adya paśya mahābāho mayā samaramūrdhani ।
hate rāme saha bhrātrā dravantīṁ paravāhinīm ।
6.63.34 ॥

adya rāmasya tad dṛṣṭvā mayā ' 'nītaṁ raṇācchiraḥ ।
sukhī bhava mahābāho sītā bhavatu duḥkhitā ।
6.63.35 ॥

adya rāmasya paśyantu nidhanaṁ sumahat priyam ।
laṅkāyāṁ rākṣasāḥ sarve ye te nihatabāndhavāḥ ।
6.63.36 ॥

adya śokaparītānāṁ svabandhuvadhakāraṇāt ।
śatroryudhi vināśena karomyāsrapramārjanam ।
6.63.37 ॥

adya parvatasaṅkāśaṁ sasūryamiva toyadam ।
vikīrṇaṁ paśya samare sugrīvaṁ plavagottamam ।
6.63.38 ॥

kathaṁ tvaṁ rākṣasairebhirmayā ca parirakṣitaḥ ।
jighāṁsubhirdāśarathiṁ vadhyase tvamihānagha ।
6.63.39 ॥

atha pūrvaṁ hate tena mayi tvāṁ hanti rāghavaḥ ।
nāhamātmani santāpaṁ gaccheyaṁ rākṣasādhipa ।
6.63.40 ॥

kāmaṁ tvidānīmapi māṁ vyādiśa tvaṁ parantapa ।
na paraḥ preṣaṇīyaste yuddhāyātulavikrama ।
6.63.41 ॥

ahamutsādayiṣyāmi śatrūṁstava mahābala ।
6.63.42 ॥

yadi śakro yadi yamo yadi pāvakamārutau ।
tānahaṁ yodhayiṣyāmi kuberavaruṇāvapi ।
6.63.43 ॥

girimātraśarīrasya śitaśūladharasya me ।
nardatastīkṣṇadaṁṣṭrasya bibhīyācca purandaraḥ ।
6.63.44 ॥

athavā tyaktaśastrasya mṛdnatastarasā ripūn ।
na me pratimukhe sthātuṁ kaścicchakto jijīviṣuḥ ।
6.63.45 ॥

naiva śaktyā na gadayā nāsinā niśitaiḥ śaraiḥ ।
hastābhyāmeva saṁrabdho haniṣyāmyapi vajriṇam ।
6.63.46 ॥

yadi me muṣṭivegaṁ sa rāghavo 'dya sahiṣyate ।
tataḥ pāsyanti bāṇaughā rudhiraṁ rāghavasya tu ।
6.63.47 ॥

cintayā bādhyase rājan kimarthaṁ mayi tiṣṭhati ।
so 'haṁ śatruvināśāya tava niryātumudyataḥ ।
6.63.48 ॥

muñca rāmādbhayaṁ rājan haniṣyāmīha saṁyuge ।
rāghavaṁ lakṣmaṇaṁ caiva sugrīvaṁ ca mahābalam ।
hanumantaṁ ca rakṣoghnaṁ laṅkā yena pradīpitā ।
6.63.49 ॥

harīṁścāpi haniṣyāmi saṁyuge samavasthitān ।
asādhāraṇamicchāmi tava dātuṁ mahadyaśaḥ ।
6.63.50 ॥

yadi cendrādbhayaṁ rājan yadi vāpi svayambhuvaḥ ।
6.63.51 ॥

api devāḥ śayiṣyante kruddhe mayi mahītale ।
yamaṁ ca śamayiṣyāmi bhakṣayiṣyāmi pāvakam ।
ādityaṁ pātayiṣyāmi sanakṣatraṁ mahītale ।
6.63.52 ॥

śatakratuṁ vadhiṣyāmi pāsyāmi varuṇālayam ।
parvatāṁścūrṇayiṣyāmi dārayiṣyāmi medinīm ।
6.63.53 ॥

dīrghakālaṁ prasuptasya kumbhakarṇasya vikramam ।
adya paśyantu bhūtāni bhakṣyamāṇāni sarvaśaḥ ।
6.63.54 ॥

nanvidaṁ tridivaṁ sarvamāhārasya na pūryate ।
6.63.55 ॥

vadhena te dāśaratheḥ sukhārhaṁ sukhaṁ samāhartumahaṁ vrajāmi ।
nihatya rāmaṁ saha lakṣmaṇena khādāmi sarvān hariyūthamukhyān ।
6.63.56 ॥

ramasva kāmaṁ piba cāgryavāruṇīṁ kuruṣva kṛtyāni vinīyatāṁ jvaraḥ ।
mayā 'dya rāme gamite yamakṣayaṁ cirāya sītā vaśagā bhaviṣyati ।
6.63.57 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe triṣaṣṭitamaḥ sargaḥ ।
63 ॥