युद्धकाण्डम्Yuddha Kāṇḍa

sa tu rākṣasaśārdūlo nidrāmadasamākulaḥ ।
rājamārgaṁ śriyā juṣṭaṁ yayau vipulavikramaḥ ।
6.62.1 ॥

rākṣasānāṁ sahasraiśca vṛtaḥ paramadurjayaḥ ।
gṛhebhyaḥ puṣpavarṣeṇa kīryamāṇastadā yayau ।
6.62.2 ॥

sa hemajālivitataṁ bhānubhāsvaradarśanam ।
dadarśa vipulaṁ ramyaṁ rākṣasendraniveśanam ।
6.62.3 ॥

sa tattadā sūrya ivābhrajālaṁ praviśya rakṣodhipaterniveśam ।
dadarśa dūre 'grajamāsanasthaṁ svayambhuvaṁ śakra ivāsanastham ।
6.62.4 ॥

bhrātuḥ sa bhavanaṁ gacchan rakṣogaṇasamanvitam ।
kumbhakarṇaḥ padanyāsairakampayata medinīm ।
6.62.5 ॥

so 'bhigamya gṛhaṁ bhrātuḥ kakṣyāmabhivigāhya ca ।
dadarśodvignamāsīnaṁ vimāne puṣpake gurum ।
6.62.6 ॥

atha dṛṣṭvā daśagrīvaḥ kumbhakarṇamupasthitam ।
tūrṇamutthāya saṁhṛṣṭaḥ sannikarṣamupānayat ।
6.62.7 ॥

athāsīnasya paryaṅke kumbhakarṇo mahābalaḥ ।
bhrāturvavande caraṇau kiṁ kṛtyamiti cābravīt ।
6.62.8 ॥

utpatya cainaṁ mudito rāvaṇaḥ pariṣasvaje ।
sa bhrātrā sampariṣvakto yathāvacchābhinanditaḥ ।
6.62.9 ॥

kumbhakarṇaḥ śubhaṁ divyaṁ pratipede varāsanam ।
sa tadāsanamāśritya kumbhakarṇo mahābalaḥ ।
saṁraktanayanaḥ kopādrāvaṇaṁ vākyamabravīt ।
6.62.10 ॥

kimarthamahamādṛtya tvayā rājan vibodhitaḥ ।
śaṁsa kasmādbhayaṁ te 'sti ko 'dya preto bhaviṣyati ।
6.62.11 ॥

bhrātaraṁ rāvaṇaḥ kuddhaṁ kumbhakarṇamavasthitam ।
īṣattu parivṛttābhyāṁ netrābhyāṁ vākyamabravīt ।
6.62.12 ॥

adya te sumahān kālaḥ śayānasya mahābala ।
sukhitastvaṁ na jānīṣe mama rāmakṛtaṁ bhayam ।
6.62.13 ॥

eṣa dāśarathī rāmaḥ sugrīvasahito balī ।
samudraṁ sabalastīrtvā mūlaṁ naḥ parikṛntati ।
6.62.14 ॥

hanta paśyasva laṅkāyāṁ vanānyupavanāni ca ।
setunā sukhamāgamya vānaraikārṇavīkṛtam ।
6.62.15 ॥

ye rakṣasāṁ mukhyatamā hatāste vānarairyudhi ।
vānarāṇāṁ kṣayaṁ yuddhe na paśyāmi kadācana ।
6.62.16 ॥

na cāpi vānarā yuddhe jitapūrvāḥ kadācana ।
6.62.17 ॥

tadetadbhayamutpannaṁ trāyasvemāṁ mahābala ।
nāśaya tvamimānadya tadarthaṁ bodhito bhavān ।
6.62.18 ॥

sarvakṣapitakośaṁ ca sa tvamabhyavapadya mām ।
trāyasvemāṁ purīṁ laṅkāṁ bālavṛddhāvaśeṣitām ।
6.62.19 ॥

bhrāturarthe mahābāho kuru karma suduṣkaram ।
mayaivaṁ noktapūrvo hi kaccid bhrātaḥ parantapa ।
6.62.20 ॥

tvayyasti tu mama snehaḥ parā sambhāvanā ca me ।
daivāsureṣu yuddheṣu bahuśo rākṣasarṣabha ।
tvayā devāḥ prativyūhya nirjitāścāsurā yudhi ।
6.62.21 ॥

tadetat sarvamātiṣṭha vīryaṁ bhīmaparākrama ।
na hi te sarvabhūteṣu dṛśyate sadṛśo balī ।
6.62.22 ॥

kuruṣva me priyahitametaduttamaṁ yathāpriyaṁ priyaraṇabāndhavapriya ।
svatejasā vidhama sapatnavāhinīṁ śaradghanaṁ pavana ivodyato mahān ।
6.62.23 ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe dviṣaṣṭitamaḥ sargaḥ ।
62 ॥