युद्धकाण्डम्Yuddha Kāṇḍa

tato rāmo bhahātejā dhanurādāya vīryavān ।
kirīṭinaṁ mahākāyaṁ kumbhakarṇaṁ dadarśa ha ।
6.61.1 ॥ ॥

taṁ dṛṣṭvā rākṣasaśreṣṭhaṁ parvatākāradarśanam ।
kramamāṇamivākāśaṁ purā nārāyaṇaṁ prabhum ।
satoyāmbudasaṅkāśaṁ kāñcanāṅgadabhūṣaṇam ।
6.61.2 ॥ ॥

dṛṣṭvā punaḥ pradudrāva vānarāṇāṁ mahācamūḥ ।
6.61.3 ॥ ॥

vidrutāṁ vāhinīṁ dṛṣṭvā vardhamānaṁ ca rākṣasam ।
savismayamidaṁ rāmo vibhīṣaṇamuvāca ha ।
6.61.4 ॥ ॥

ko 'sau parvatasaṅkāśaḥ kirīṭī harilocanaḥ ।
laṅkāyāṁ dṛśyate vīra savidyudiva toyadaḥ ।
6.61.5 ॥ ॥

pṛthivyāḥ ketubhūto 'sau mahāneko 'tra dṛśyate ।
yaṁ dṛṣṭvā vānarāḥ sarve vidravanti tatastataḥ ।
6.61.6 ॥ ॥

ācakṣva me mahān ko 'sau rakṣo vā yadi vā 'suraḥ ।
na mayaivaṁvidhaṁ bhūtaṁ dṛṣṭapūrvaṁ kadācana ।
6.61.7 ॥ ॥

sa pṛṣṭo rājaputreṇa rāmeṇākliṣṭakarmaṇā ।
vibhīṣaṇo mahāprājñaḥ kākutsthamidamabravīt ।
6.61.8 ॥ ॥

yena vaivasvato yuddhe vāsavaśca parājitaḥ ।
saiṣa viśravasaḥ putraḥ kumbhakarṇaḥ pratāpavān ।
asya pramāṇāt sadṛśo rākṣaso 'nyo na vidyate ।
6.61.9 ॥ ॥

etena devā yudhi dānavāśca yakṣā bhujaṅgāḥ piśitāśanāśca ।
gandharvavidyādharakinnarāśca sahasraśo rāghava samprabhagrāḥ ।
6.61.10 ॥ ॥

śūlapāṇiṁ virūpākṣaṁ kumbhakarṇaṁ mahābalam ।
hantuṁ na śekustridaśāḥ kālo 'yamiti mohitāḥ ।
6.61.11 ॥ ॥

prakṛtyā hyeṣa tejasvī kumbhakarṇo mahābalaḥ ।
anyeṣāṁ rākṣasendrāṇāṁ varadānakṛtaṁ balam ।
6.61.12 ॥ ॥

etena jātamātreṇa kṣudhārtena mahātmanā ।
bhakṣitāni sahasrāṇi sattvānāṁ subahūnyapi ।
6.61.13 ॥ ॥

teṣu sambhakṣyamāṇeṣu prajā bhayanipīḍitāḥ ।
yānti sma śaraṇaṁ śakraṁ tamapyarthaṁ nyavedayan ।
6.61.14 ॥ ॥

sa kumbhakarṇaṁ kupito mahendro jaghāna vajreṇa śitena vajrī ।
sa śakravajrābhihato mahātmā cacāla kopācca bhṛśaṁ nanāda ।
6.61.15 ॥ ॥

tasya nānadyamānasya kumbhakarṇasya dhīmataḥ ।
śrutvā 'tinādaṁ vitrastā bhūyo bhūmirvitatrase ।
6.61.16 ॥ ॥

tatra kopānmahendrasya kumbhakarṇo mahābalaḥ ।
vikṛṣyairāvatāddantaṁ jaghānorasi vāsavam ।
6.61.17 ॥ ॥

kumbhakarṇaprahārārto vijajvāla sa vāsavaḥ ।
tato viṣeduḥ sahasā devabrahmarṣidānavāḥ ।
6.61.18 ॥ ॥

prajābhiḥ saha śakraśca yayau sthānaṁ svayambhuvaḥ ।
kumbhakarṇasya daurātmyaṁ śaśaṁsuste prajāpateḥ ।
6.61.19 ॥ ॥

prajānāṁ bhakṣaṇaṁ cāpi devānāṁ cāpi dharṣaṇam ।
āśramadhvaṁsanaṁ cāpi parastrīharaṇaṁ bhṛśam ।
6.61.20 ॥ ॥

evaṁ prajā yadi tveṣa bhakṣayiṣyati nityaśaḥ ।
acireṇaiva kālena śūnyo loko bhaviṣyati ।
6.61.21 ॥ ॥

vāsavasya vacaḥ śrutvā sarvalokapitāmahaḥ ।
rakṣāṁsyāvāhayāmāsa kumbhakarṇaṁ dadarśa ha ।
6.61.22 ॥ ॥

kumbhakarṇaṁ samīkṣyaiva vitatrāsa prajāpatiḥ ।
dṛṣṭvā viśvāsya caivedaṁ svayambhūridamabravīt ।
6.61.23 ॥ ॥

dhruvaṁ lokavināśāya paulastyenāsi nirmitaḥ ।
tasmāttvamadyaprabhṛti mṛtakalpaḥ śayiṣyase ।
6.61.24 ॥ ॥

brahmaśāpābhibhūto 'tha nipapātāgrataḥ prabhoḥ ।
tataḥ paramasambhrānto rāvaṇo vākyamabravīt ।
6.61.25 ॥ ॥

vivṛddhaḥ kāñcano vṛkṣaḥ phalakāle nikṛtyate ।
na naptāraṁ svakaṁ nyāyyaṁ śaptumevaṁ prajāpate ।
6.61.26 ॥ ॥

na mithyāvacanaśca tvaṁ svapsyatyeṣa na saṁśayaḥ ।
kālastu kriyatāmasya śayane jāgare tathā ।
6.61.27 ॥ ॥

rāvaṇasya vacaḥ śrutvā svayambhūridamabravīt ।
6.61.28 ॥ ॥

śayati hyeṣa ṣaṇmāsānekāhaṁ jāgariṣyati ।
ekenāhnā tvasau vīraścaran bhūmiṁ bubhukṣitaḥ ।
vyāttāsyo bhakṣayellokān sakruddha iva pāvakaḥ ।
6.61.29 ॥ ॥

so 'sau vyasanamāpannaḥ kumbhakarṇamabodhayat ।
tvatparākramabhītaśca rājā samprati rāvaṇaḥ ।
6.61.30 ॥ ॥

sa eṣa nirgato vīraḥ śibirādbhīmavikramaḥ ।
vānarān bhṛśasaṅkruddho bhakṣayan paridhāvati ।
6.61.31 ॥ ॥

kumbhakarṇaṁ samīkṣyaiva harayo 'dya pravidrutāḥ ।
kathamenaṁ raṇe kruddhaṁ vārayiṣyanti vānarāḥ ।
6.61.32 ॥ ॥

ucyantāṁ vānarāḥ sarve yantrametat samucchritam ।
iti vijñāya harayo bhaviṣyantīha nirbhayāḥ ।
6.61.33 ॥ ॥

vibhīṣaṇavacaḥ śrutvā hetumat sumukheritam ।
uvāca rāghavo vākyaṁ nīlaṁ senāpatiṁ tadā ।
6.61.34 ॥ ॥

gaccha sainyāni sarvāṇi vyūhya tiṣṭhasva pāvake ।
dvārāṇyādāya laṅkāyāścaryāścāpyatha saṅkramān ।
6.61.35 ॥ ॥

śailaśṛṅgāṇi vṛkṣāṁśca śilāścāpyupasaṁhara ।
tiṣṭhantu vānarāḥ sarve sāyudhāḥ śailapāṇayaḥ ।
6.61.36 ॥ ॥

rāghaveṇa samādiṣṭo nīlo haricamūpatiḥ ।
śaśāsa vānarānīkaṁ yathāvat kapikuñjaraḥ ।
6.61.37 ॥ ॥

tato gavākṣaḥ śarabho hanumānaṅgadastathā ।
śailaśṛṅgāṇi śailābhā gṛhītvā dvāramabhyayuḥ ।
6.61.38 ॥ ॥

rāmavākyamupaśrutya harayo jitakāśinaḥ ।
pādapairardayan vīrā vānarāḥ paravāhinīm ।
6.61.39 ॥ ॥

tato harīṇāṁ tadanīkamugraṁ rarāja śailodyatadīptahastam ।
gireḥ samīpānugataṁ yathaiva mahanmahāmbhodharajālamugram ।
6.61.40 ॥ ॥

ityārṣe śrīmadrāmāyaṇe vālmīkīye ādikāvye śrīmadyuddhakāṇḍe ekaṣaṣṭitamaḥ sargaḥ ।
61 ॥