युद्धकाण्डम्Yuddha Kāṇḍa

sa praviśya purīṁ laṅkāṁ rāmabāṇabhayārditaḥ ।
bhagnadarpastadā rājā babhūva vyathitendriyaḥ ।
6.60.1 ॥

mātaṅga iva siṁhena garuḍeneva pannagaḥ ।
abhibhūto 'bhavadrājā rāghaveṇa mahātmanā ।
6.60.2 ॥

brahmadaṇḍaprakāśānāṁ vidyutsadṛśavarcasām ।
smaran rāghavabāṇānāṁ vivyathe rākṣaseśvaraḥ ।
6.60.3 ॥

sa kāñcanamayaṁ divyamāśritya paramāsanam ।
viprekṣamāṇo rakṣāṁsi rāvaṇo vākyamabravīt ।
6.60.4 ॥

sarvaṁ tat khalu me moghaṁ yattaptaṁ paramaṁ tapaḥ ।
yat samāno mahendreṇa mānuṣeṇāsmi nirjitaḥ ।
6.60.5 ॥

idaṁ tadbrahmaṇo ghoraṁ vākyaṁ māmabhyupasthitam ।
mānuṣebhyo vijānīhi bhayaṁ tvamiti tattathā ।
6.60.6 ॥

devadānavagandharvairyakṣarākṣasapannagaiḥ ।
avadhyatvaṁ mayā prāptaṁ mānuṣebhyo na yācitam ।
6.60.7 ॥

viditaṁ mānuṣaṁ manye rāmaṁ daśarathātmajam ।
ikṣvākukulanāthena anaraṇyena yatpurā ।
6.60.8 ॥

utpatsyate hi madvaṁśe puruṣo rākṣasādhama ।
yastvāṁ saputraṁ sāmātyaṁ sabalaṁ sāśvasārathim ।
nihaniṣyati saṅgrāme tvāṁ kulādhama durmate ।
6.60.9 ॥

śapto 'haṁ vedavatyā ca yadā sā dharṣitā purā ।
seyaṁ sītā mahābhāgā jātā janakanandinī ।
6.60.10 ॥

umā nandīśvaraścāpi rambhā varuṇakanyakā ।
yathoktāstapasā prāptaṁ na mithyā ṛṣibhāṣitam ।
6.60.11 ॥

etadevābhyupāgamya yatnaṁ kartumihārhatha ।
rākṣasāścāpi tiṣṭhantu caryāgopuramūrddhasu ।
6.60.12 ॥

sa cāpratimagāmbhīro devadānavadarpahā ।
brahmaśāpābhibhūtastu kumbhakarṇo vibodhyatām ।
6.60.13 ॥

sa parājitamātmānaṁ prahastaṁ ca niṣūditam ।
jñātvā rakṣobalaṁ bhīmamādideśa mahābalaḥ ।
6.60.14 ॥

dvāreṣu yatnaḥ kriyatāṁ prākāraścādhiruhyatām ।
nidrāvaśasamāviṣṭaḥ kumbhakarṇo vibodhyatām ।
6.60.15 ॥

sukhaṁ svapiti niścintaḥ kālopahatacetanaḥ ।
nava ṣaṭ sapta cāṣṭau ca māsān svapiti rākṣasaḥ ।
6.60.16 ॥

mantrayitvā prasupto 'yamitastu navame 'hani ।
taṁ tu bodhayata kṣipraṁ kumbhakarṇaṁ mahābalam ।
6.60.17 ॥

sa tu saṅkhye mahābāhuḥ kakudaḥ sarvarakṣasām ।
vānarān rājaputrau ca kṣiprameva vadhiṣyati ।
6.60.18 ॥

eṣa ketuḥ paraḥ saṅkhye mukhyo vai sarvarakṣasām ।
kumbhakarṇaḥ sadā śete mūḍho grāmyasukhe rataḥ ।
6.60.19 ॥

rāmeṇa hi nirastasya saṅgrāme 'smin sudāruṇe ।
bhaviṣyati na me śokaḥ kumbhakarṇe vibodhite ।
6.60.20 ॥

kiṁ kariṣyāmyahaṁ tena śakratulyabalena hi ।
īddaśe vyasane prāpte yo na sāhyāya kalpate ।
6.60.21 ॥

te tu tadvacanaṁ śrutvā rākṣasendrasya rākṣasāḥ ।
jagmuḥ paramasambhrāntāḥ kumbhakarṇaniveśanam ।
6.60.22 ॥

te rāvaṇasamādiṣṭā māṁsaśoṇitabhojanāḥ ।
gandhamālyāṁstathā bhakṣyānādāya sahasā yayuḥ ।
6.60.23 ॥

tāṁ praviśya mahādvārāṁ sarvato yojanāyatām ।
kumbhakarṇaguhāṁ ramyāṁ sarvagandhapravāhinīm ।
6.60.24 ॥

kumbhakarṇasya niśvāsādavadhūtā mahābalāḥ ।
pratiṣṭhamānāḥ kṛcchreṇa yatnāt praviviśurguhām ।
6.60.25 ॥

tāṁ praviśya guhāṁ ramyāṁ śubhāṁ kāñcanakuṭṭimām ।
dadṛśurnairṛtavyāghraṁ śayānaṁ bhīmadarśanam ।
6.60.26 ॥

te tu taṁ vikṛtaṁ suptaṁ vikīrṇamiva parvatam ।
kumbhakarṇaṁ mahānidraṁ sahitāḥ pratyabodhayan ।
6.60.27 ॥

ūrdhvaromāñcitatanuṁ śvasantamiva pannagam ।
trāsayantaṁ mahāśvāsaiḥ śayānaṁ bhīmadarśanam ।
6.60.28 ॥

bhīmanāsāpuṭaṁ taṁ tu pātālavipulānanam ।
śayyāyāṁ nyastasarvāṅgaṁ medorudhiragandhinam ।
6.60.29 ॥

kāñcanāṅgadanaddhāṅgaṁ kirīṭinamarindamam ।
dadṛśurnairṛtavyāghraṁ kumbhakarṇaṁ mahābalam ।
6.60.30 ॥

tataścakrurmahātmānaḥ kumbhakarṇāgratastadā ।
māṁsānāṁ merusaṅkāśaṁ rāśiṁ paramatarpaṇam ।
6.60.31 ॥

mṛgāṇāṁ mahiṣāṇāṁ ca varāhāṇāṁ ca sañcayān ।
cakurnairṛtaśārdūlā rāśimannasya cādbhutam ।
6.60.32 ॥

tataḥ śoṇitakumbhāṁśca madyāni vividhāni ca ।
6.60.33 ॥

purastāt kumbhakarṇasya cakustridaśaśatravaḥ ।
lilipuśca parārdhyena candanena parantapam ।
6.60.34 ॥

divyairācchādayāmāsurmālyairgandhaiḥ sugandhibhiḥ ।
dhūpaṁ sugandhaṁ sasṛjustuṣṭuvuśca parantapam ।
6.60.35 ॥

jaladā iva conneduryātudhānāstatastataḥ ।
śaṅkhānāpūrayāmāsuḥ śaśāṅkasadṛśaprabhān ।
tumulaṁ yugapaccāpi vineduścāpyamarṣitāḥ ।
6.60.36 ॥

nedurāsphoṭayāmāsuścikṣipuste niśācarāḥ ।
kumbhakarṇavibodhārthaṁ cakruste vipulaṁ svanam ।
6.60.37 ॥

saśaṅkhabherīpaṇavapraṇādamāsphoṭitakṣvelitasiṁhanādam ।
diśo dravantastridivaṁ kirantaḥ śrutvā vihaṅgāḥ sahasā nipetuḥ ।
6.60.38 ॥

yadā bhṛśārtairninadairmahātmā na kumbhakarṇo bubudhe prasuptaḥ ।
tato musuṇṭhīrmusalāni sarve rakṣogaṇāste jagṛhurgadāśca ।
6.60.39 ॥

taṁ śailaśṛṅgairmusalairgadābhirvṛkṣaistalairmudgaramuṣṭibhiśca ।
sukhaprasuptaṁ bhuvi kumbhakarṇaṁ rakṣāṁsyudagrāṇi tadā nijaghnuḥ ।
6.60.40 ॥

tasya niḥśvāsavātena kumbhakarṇasya rakṣasaḥ ।
rākṣasā balavanto 'pi sthātuṁ nāśaknuvan puraḥ ।
6.60.41 ॥

tataḥ parihitā gāḍhaṁ rākṣasā bhīmavikramāḥ ।
6.60.42 ॥

mṛdaṅgapaṇavān bherīḥ śaṅkhakumbhagaṇāṁstadā ।
daśarākṣasasāhasrā yugapat paryavādayan ।
6.60.43 ॥

nīlāñjanacayākārāste tu taṁ pratyabodhayan ।
abhighnanto nadantaśca naiva saṁvivide tu saḥ ।
6.60.44 ॥

yadā cainaṁ na śekuste pratibodhayituṁ tadā ।
tato gurutaraṁ yatnaṁ dāruṇaṁ samupākraman ।
6.60.45 ॥

aśvānuṣṭrān kharānnāgān jaghnurdaṇḍakaśāṅkuśaiḥ ।
bherīśaṅkhamṛdaṅgāṁśca sarvaprāṇairavādayan ।
6.60.46 ॥

nijaghnuścāsya gātrāṇi mahākāṣṭhakaṭaṅkaraiḥ ।
mudgarairmusalaiścaiva sarvaprāṇasamudyataiḥ ।
6.60.47 ॥

tena śabdena mahatā laṅkā samabhipūritā ।
saparvatavanā sarvā so 'pi naiva prabudhyate ।
6.60.48 ॥

tataḥ sahasraṁ bherīṇāṁ yugapat samahanyata ।
mṛṣṭakāñcanakoṇānāmāsaktānāṁ samantataḥ ।
6.60.49 ॥

evamapyatinidrastu yadā naiva prabudhyate ।
śāpasya vaśamāpannastataḥ kruddhā niśācarāḥ ।
mahākrodhasamāviṣṭāḥ sarve bhīmaparākramāḥ ।
6.60.50 ॥

tadrakṣo bodhayiṣyantaścakruranye parākramam ।
6.60.51 ॥

stataḥ kruddhā niśācarāḥ ।
anye bherīḥ samājaghnuranye cakrurmahāsvanam ।
keśānanye pralulupuḥ karṇāvanye daśanti ca ।
6.60.52 ॥

udakumbhaśatānyanye samasiñcanta karṇayoḥ ।
na kumbhakarṇaḥ paspande mahānidrāvaśaṁ gataḥ ।
6.60.53 ॥

anye ca balinastasya kūṭamudgarapāṇayaḥ ।
mūrdhni vakṣasi gātreṣu pātayan kūṭamudgarān ।
6.60.54 ॥

rajjubandhanabaddhābhiḥ śataghnībhiśca sarvataḥ ।
vadhyamāno mahākāyo na prābudhyata rākṣasaḥ ।
6.60.55 ॥

vāraṇānāṁ sahasraṁ tu śarīre 'sya pradhāvitam ।
kumbhakarṇastato buddhaḥ sparśaṁ paramabudhyata ।
6.60.56 ॥

sa pātyamānairgiriśṛṅgavṛkṣairacintayaṁstān vipulān prahārān ।
nidrākṣayāt kṣudbhayapīḍitaśca vijṛmbhamāṇaḥ sahasotpapāta ।
6.60.57 ॥

sa nāgabhogācalaśṛṅgakalpau vikṣipya bāhū giriśṛṅgasārau ।
vivṛtya vaktraṁ vaḍavāmukhābhaṁ niśācaro 'sau vikṛtaṁ jajṛmbhe ।
6.60.58 ॥

tasya jājṛmbhamāṇasya vaktraṁ pātālasannibham ।
dadṛśe meruśṛṅgāgre divākara ivoditaḥ ।
6.60.59 ॥

sa jṛmbhamāṇo 'tibalaḥ pratibuddho niśācaraḥ ।
niḥśvāsaścāsya sañjajñe parvatādiva mārutaḥ ।
6.60.60 ॥

rūpamuttiṣṭhatastasya kumbhakarṇasya tadbabhau ।
tapānte sabalākasya meghasyeva vivarṣataḥ ।
6.60.61 ॥

tasya dīptāgnisadṛśe vidyutsadṛśavarcasī ।
dadṛśāte mahānetre dīptāviva mahāgrahau ।
6.60.62 ॥

tatastvadarśayan sarvān bhakṣyāṁśca vividhān bahūn ।
varāhān mahiṣāṁścaiva sa babhakṣa mahābalaḥ ।
6.60.63 ॥

adan bubhukṣito māṁsaṁ śoṇitaṁ tṛṣitaḥ piban ।
medaḥkumbhāṁśca madyaṁ ca papau śakraripustadā ।
6.60.64 ॥

tatastṛpta iti jñātvā samutpeturniśācarāḥ ।
śirobhiśca praṇamyainaṁ sarvataḥ paryavārayan ।
6.60.65 ॥

nidrāviśa 'danetrastu kaluṣīkṛtalocanaḥ ।
cārayan sarvato dṛṣṭiṁ tān dadarśa niśācarān ।
6.60.66 ॥

sa sarvān sāntvayāmāsa nairṛtānnairṛtarṣabhaḥ ।
bodhanād vismitaścāpi rākṣasānidamabravīt ।
6.60.67 ॥

kimarthamahamādṛtya bhavadbhiḥ pratibodhitaḥ ।
kaccit sukuśalaṁ rājño bhayavāneṣa vā na kim ।
6.60.68 ॥

athavā dhruvamanyebhyo bhayaṁ paramupasthitam ।
yadarthamevaṁ tvaritairbhavadbhiḥ pratibodhitaḥ ।
6.60.69 ॥

adya rākṣasarājasya bhayamutpāṭayāmyaham ।
pātayiṣye mahendraṁ vā śātayiṣye tathā 'nalam ।
6.60.70 ॥

na hyalpakāraṇe suptaṁ bodhayiṣyati māṁ guruḥ ।
tadākhyātārthatattvena matprabodhanakāraṇam ।
6.60.71 ॥

evaṁ bruvāṇaṁ saṁrabdhaṁ kumbhakarṇaṁ mahābalam ।
yūpākṣaḥ sacivo rājñaḥ kṛtāñjaliruvāca ha ।
6.60.72 ॥

na no daivakṛtaṁ kiñcidbhayamasti kadācana ।
mānuṣānno bhayaṁ rājaṁstumulaṁ samprabādhate ।
6.60.73 ॥

na daityadānavebhyo vā bhayamasti hi tādṛśam ।
yādṛśaṁ mānuṣaṁ rājan bhayamasmānupasthitam ।
6.60.74 ॥

vānaraiḥ parvatākārairlaṅkeyaṁ parivāritā ।
sītāharaṇasantaptādrāmānnastumulaṁ bhayam ।
6.60.75 ॥

ekena vānareṇeyaṁ pūrvaṁ dagdhā mahāpurī ।
kumāro nihataścākṣaḥ sānuyātraḥ sakuñjaraḥ ।
6.60.76 ॥

svayaṁ rakṣodhipaścāpi paulastyo devakaṇṭakaḥ ।
mṛteti saṁyuge mukto rāmeṇādityatejasā ।
6.60.77 ॥

yanna daivaiḥ kṛto rājā nāpi daityairna dānavaiḥ ।
kṛtaḥ sa iha rāmeṇa vimuktaḥ prāṇasaṁśayāt ।
6.60.78 ॥

sa yūpākṣavacaḥ śrutvā bhrāturyudhi parājayam ।
kumbhakarṇo vivṛttākṣo yūpākṣamidamabravīt ।
6.60.79 ॥

sarvamadyaiva yūpākṣa harisainyaṁ salakṣmaṇam ।
rāghavaṁ ca raṇe hatvā paścāddrakṣyāmi rāvaṇam ।
6.60.80 ॥

rākṣasāṁstarpayiṣyāmi harīṇāṁ māṁsaśoṇitaiḥ ।
rāmalakṣmaṇayoścāpi svayaṁ pāsyāmi śoṇitam ।
6.60.81 ॥

tattasya vākyaṁ bruvato niśamya sagarvitaṁ roṣavivṛddhadoṣam ।
mahodaro nairṛtayodhamukhyaḥ kṛtāñjalirvākyamidaṁ babhāṣe ।
6.60.82 ॥

rāvaṇasya vacaḥ śrutvā guṇadoṣau vimṛśya ca ।
paścādapi mahābāho śatrūn yudhi vijeṣyasi ।
6.60.83 ॥

mahodaravacaḥ śrutvā rākṣasaiḥ parivāritaḥ ।
kumbhakarṇo mahātejāḥ sampratasthe mahābalaḥ ।
6.60.84 ॥

taṁ samutthāpya bhīmākṣaṁ bhīmarūpaparākramam ।
rākṣasāstvaritā jagmurdaśagrīvaniveśanam ।
6.60.85 ॥

tato gatvā daśagrīvamāsīnaṁ paramāsane ।
ūcurbaddhāñjalipuṭāḥ sarve eva niśācarāḥ ।
6.60.86 ॥

prabuddhaḥ kumbhakarṇo 'yaṁ bhrātā te rākṣasarṣabha ।
kathaṁ tatraiva niryātu drakṣyasyenamihāgatam ।
6.60.87 ॥

rāvaṇastvabravīddhṛṣṭo rākṣasāṁstānupasthitān ।
draṣṭumenamihecchāmi yathānyāyaṁ ca pūjyatām ।
6.60.88 ॥

tathetyuktvā tu te sarve punarāgamya rākṣasāḥ ।
kumbhakarṇamidaṁ vākyamūcū rāvaṇacoditāḥ ।
6.60.89 ॥

draṣṭuṁ tvāṁ kāṅkṣate rājā sarvarākṣasapuṅgavaḥ ।
gamane kriyatāṁ buddhirbhrātaraṁ sampraharṣaya ।
6.60.90 ॥

kumbhakarṇastu durdharṣo bhrāturājñāya śāsanam ।
tathetyuktvā mahābāhuḥ śayanādutpapāta ha ।
6.60.91 ॥

prakṣālya vadanaṁ hṛṣṭaḥ snātaḥ paramabhūṣitaḥ ।
pipāsustvarayāmāsa pānaṁ balasamīraṇam ।
6.60.92 ॥

tataste tvaritāstasya rākṣasā rāvaṇājñayā ।
madyakumbhāṁśca vividhān kṣipramevopahārayan ।
6.60.93 ॥

pītvā ghaṭasahasre dve gamanāyopacakrame ।
īṣatsamutkaṭo mattastejobalasamanvitaḥ ।
kumbhakarṇo babhau hṛṣṭaḥ kālāntakayamopamaḥ ।
6.60.94 ॥

bhrātuḥ sa bhavanaṁ gacchan rakṣogaṇasamanvitaḥ ।
kumbhakarṇaḥ padanyāsairakampayata medinīm ।
6.60.95 ॥

sa rājamārgaṁ vapuṣā prakāśayan sahasraraśmirdharaṇīmivāṁśubhiḥ ।
jagāma tatrāñjalimālayā vṛtaḥ śatakraturgehamiva svayambhuvaḥ ।
6.60.96 ॥

taṁ rājamārgasthamamitraghātinaṁ vanaukasaste sahasā bahiḥ sthitāḥ ।
dṛṣṭvā 'prameyaṁ giriśṛṅgakalpaṁ vitatrasuste hariyūthapālāḥ ।
6.60.97 ॥

keciccharaṇyaṁ śaraṇaṁ sma rāmaṁ vrajanti kecidvyathitāḥ patanti ।
keciddiśaḥ sma vyathitāḥ prayānti kecidbhayārtā bhuvi śerate sma ।
6.60.98 ॥

tamadriśṛṅgapratimaṁ kirīṭinaṁ spṛśantamādityamivātmatejasā ।
vanaukasaḥ prekṣya vivṛddhamadbhutaṁ bhayārditā dudruvire tatastataḥ ।
6.60.99 ॥