युद्धकाण्डम्Yuddha Kāṇḍa

tasmin hate rākṣasasainyapāle plavaṅgamānāmṛṣabheṇa yuddhe ।
bhīmāyudhaṁ sāgaratulyavegaṁ vidudruve rākṣasarājasainyam ।
6.59.1 ॥

gatvā 'tha rakṣodhipateḥ śaśaṁsuḥ senāpatiṁ pāvakasūnuśastam ।
taccāpi teṣāṁ vacanaṁ niśamya rakṣodhipaḥ krodhavaśaṁ jagāma ।
6.59.2 ॥

saṅkhye prahastaṁ nihataṁ niśamya śokārditaḥ krodhaparītacetāḥ ।
uvāca tānnairṛtayodhamukhyānindro yathā cāmarayodhamukhyān ।
6.59.3 ॥

nāvajñā ripave kāryā yairindrabalasūdanaḥ ।
sūditaḥ sainyapālo me sānuyātraḥ sakuñjaraḥ ।
6.59.4 ॥

so 'haṁ ripuvināśāya vijayāyāvicārayan ।
svayameva gamiṣyāmi raṇaśīrṣaṁ tadadbhutam ।
6.59.5 ॥

adya tadvānarānīkaṁ rāmaṁ ca sahalakṣmaṇam ।
nirdahiṣyāmi vāṇaughairvanaṁ dīptairivāgnibhiḥ ।
6.59.6 ॥

sa evamuktvā jvalanaprakāśaṁ rathaṁ turaṅgottamarājayuktam ।
prakāśamānaṁ vapuṣā jvalantaṁ samārurohāmararājaśatruḥ ।
6.59.7 ॥

sa śaṅkhabhairīpaṇavapraṇādairāsphoṭitakṣvelitasiṁhanādaiḥ ।
puṇyaiḥ stavaiścāpyabhipūjyamānastadā yayau rākṣasarājamukhyaḥ ।
6.59.8 ॥

sa śailajīmūtanikāśarūpairmāṁsādanaiḥ pāvakadīptanetreḥ ।
babhau vṛto rākṣasarājamukhyo bhūtairvṛto rudra ivāsureśaḥ ।
6.59.9 ॥

tato nagaryāḥ sahasā mahaujā niṣkramya tadvānarasainyamugram ।
mahārṇavābhrastanitaṁ dadarśaṁ samudyataṁ pādapaśailahastam ।
6.59.10 ॥

tadrākṣasānīkamatipracaṇḍamālokya rāmo bhujagendrabāhuḥ ।
vibhīṣaṇaṁ śastrabhṛtāṁ variṣṭhamuvāca senānugataḥ pṛthuśrīḥ ।
6.59.11 ॥

nānāpatākādhvajaśastrajuṣṭaṁ prāsāsiśūlāyudhaśastrajuṣṭam ।
sainyaṁ gajendropamanāgajuṣṭaṁ kasyedamakṣobhyamabhīrujuṣṭam ।
6.59.12 ॥

tatastu rāmasya niśamya vākyaṁ vibhīṣaṇaḥ śakrasamānavīryaḥ ।
śaśaṁsa rāmasya balapravekaṁ mahātmanāṁ rākṣasapuṅgavānām ।
6.59.13 ॥

yo 'sau gajaskandhagato mahātmā navoditārkopamatāmravaktraḥ ।
prakampayannāgaśiro 'bhyupaiti hyakampanaṁ tvenamavehi rājan ।
6.59.14 ॥

yo 'sau rathastho mṛgarājaketurdhūnvan dhanuḥ śakradhanuḥprakāśam ।
karīva bhātyugravivṛttadaṁṣṭraḥ sa indrajinnāma varapradhānaḥ ।
6.59.15 ॥

yaścaiṣa vindhyāstamahendrakalpo dhanvī rathastho 'tiratho 'tivīraḥ ।
visphārayaṁścāpamatulyamānaṁ nāmnā 'tikāyo 'tivivṛddhakāyaḥ ।
6.59.16 ॥

yo 'sau navārkoditatāmracakṣurāruhya ghaṇṭāninadapraṇādam ।
gajaṁ kharaṁ garjati vai mahātmā mahodaro nāma sa eṣa vīraḥ ।
6.59.17 ॥

yo 'sau hayaṁ kāñcanacitrabhāṇḍamāruhya sandhyābhragiriprakāśam ।
prāsaṁ samudyamya marīcinaddhaṁ piśāca eṣo 'śanitulyavegaḥ ।
6.59.18 ॥

yaścaiṣa śūlaṁ niśitaṁ pragṛhya vidyutprabhaṁ kiṅkaravajravegam ।
vṛṣendramāsthāya giriprakāśamāyāti yo 'sau triśirā yaśasvī ।
6.59.19 ॥

asau ca jīmūtanikāśarūpaḥ kumbhaḥ pṛthuvyūḍhasujātavakṣāḥ ।
samāhitaḥ pannagarājaketurvisphārayan bhāti dhanurvidhūnvan ।
6.59.20 ॥

yaścaiṣa jāmbūnadavajrajuṣṭaṁ dīptaṁ sadhūmaṁ parighaṁ pragṛhya ।
āyāti rakṣobalaketubhūtastvasau nikumbho 'dbhutaghorakarmā ।
6.59.21 ॥

yaścaiṣa cāpāsiśaraughajuṣṭaṁ patākinaṁ pāvakadīptarūpam ।
rathaṁ samāsthāya vibhātyudagro narāntako 'sau nagaśṛṅgayodhī ।
6.59.22 ॥

yaścaiṣa nānāvidhaghorarūpairvyāghroṣṭranāgendramṛgāśvavaktraiḥ ।
bhūtairvṛto bhāti vivṛttanetraiḥ so 'sau surāṇāmapi darpahantā ।
6.59.23 ॥

yatraitadindupratimaṁ vibhāti cchatraṁ sitaṁ sūkṣmaśalākamagryam ।
atraiṣa rakṣodhipatirmahātmā bhūtairvṛto rudra ivāvabhāti ।
6.59.24 ॥

asau kirīṭī calukuṇḍalāsyo nagendravindhyopamabhīmakāyaḥ ।
mahendravaivasvatadarpahantā rakṣodhipaḥ sūrya ivāvabhāti ।
6.59.25 ॥

pratyuvāca tato rāmo vibhīṣaṇamarindamam ।
aho dīpto mahātejā rāvaṇo rākṣaseśvaraḥ ।
6.59.26 ॥

āditya iva duṣprekṣo raśmibhirbhāti rāvaṇaḥ ।
suvyaktaṁ lakṣaye hyasya rūpaṁ tejassamāvṛtam ।
6.59.27 ॥

devadānavavīrāṇāṁ vapurnaivaṁvidhaṁ bhavet ।
yādṛśaṁ rākṣasendrasya vapuretat prakāśate ।
6.59.28 ॥

sarve parvatasaṅkāśāḥ sarve parvatayodhinaḥ ।
sarve dīptāyudhadharā yodhāścāsya mahaujasaḥ ।
6.59.29 ॥

bhāti rākṣasarājo 'sau pradīptairbhīmavikramaiḥ ।
bhūtaiḥ parivṛtastīkṣṇairdehavadbhirivāntakaḥ ।
6.59.30 ॥

diṣṭyā 'yamadya pāpātmā mama dṛṣṭipathaṁ gataḥ ।
adya krodhaṁ vimokṣyāmi sītāharaṇasambhavam ।
6.59.31 ॥

evamuktvā tato rāmo dhanurādāya vīryavān ।
lakṣmaṇānucarastasthau samuddhṛtya śarottamam ।
6.59.32 ॥

tataḥ sa rakṣodhipatirmahātmā rakṣāṁsi tānyāha mahābalāni ।
dvāreṣu caryāgṛhagopureṣu sunirvṛtāstiṣṭhata nirviśaṅkāḥ ।
6.59.33 ॥

ihāgataṁ māṁ sahitaṁ bhavadbhirvanaukasaśchidramidaṁ viditvā ।
śūnyāṁ purīṁ duṣprasahāṁ pramathya pradharṣayeyuḥ sahasā sametāḥ ।
6.59.34 ॥

visarjayitvā sahitāṁstatastān gateṣu rakṣassu yathāniyogam ।
vyadārayadvānarasāgaraughaṁ mahājhaṣaḥ pūrṇamivārṇavaugham ।
6.59.35 ॥

tamāpatantaṁ sahasā samīkṣya dīpteṣucāpaṁ yudhi rākṣasendram ।
mahat samutpāṭya mahīdharāgraṁ dudrāva rakṣodhipatiṁ harīśaḥ ।
6.59.36 ॥

tacchailaśṛṅgaṁ bahuvṛkṣasānuṁ pragṛhya cikṣepa niśācarāya ।
tamāpatantaṁ sahasā samīkṣya bibheda bāṇaistapanīyapuṅkhaiḥ ।
6.59.37 ॥

tasmin pravṛddhottamasānuvṛkṣe śṛṅge vikīrṇe patite pṛthivyām ।
mahāhikalpaṁ śaramantakābhaṁ samādade rākṣasalokanāthaḥ ।
6.59.38 ॥

sa taṁ gṛhītvā 'nilatulyavegaṁ savisphuliṅgajvalanaprakāśam ।
bāṇaṁ mahendrāśanitulyavegaṁ cikṣepa sugrīvavadhāya ruṣṭaḥ ।
6.59.39 ॥

sa sāyako rāvaṇabāhumuktaḥ śakrāśaniprakhyavapuḥ śitāgraḥ ।
sugrīvamāsādya bibheda vegād guheritā krauñcamivograśaktiḥ ।
6.59.40 ॥

sa sāyakārto viparītacetāḥ kūjan pṛthivyāṁ nipapāta vīraḥ ।
taṁ prekṣya bhūmau patitaṁ visañjñaṁ neduḥ prahṛṣṭā yudhi yātudhānāḥ ।
6.59.41 ॥

tato gavākṣo gavayaḥ sudaṁṣṭrastatharṣabho jyotimukho nabhaśca ।
śailān samudyamya vivṛddhakāyāḥ pradudruvustaṁ prati rākṣasendram ।
6.59.42 ॥

teṣāṁ prahārān sa cakāra moghān rakṣodhipo bāṇagaṇaiḥ śitāgraiḥ ।
tān vānarendrānapi bāṇajālairbibheda jāmbūnadacitrapuṅkhaiḥ ।
6.59.43 ॥

te vānarendrāstridaśāribāṇairbhinnā vipeturbhuvi bhīmakāyāḥ ।
tatastu tadvānarasainyamugraṁ pracchādayāmāsa sa bāṇajālaiḥ ।
6.59.44 ॥

te vadhyamānāḥ patitāḥ pravīrā nānadyamānā bhayaśalyaviddhāḥ ।
śākhāmṛgā rāvaṇasāyakārtā jagmuḥ śaraṇyaṁ śaraṇaṁ sma rāmam ।
6.59.45 ॥

tato mahātmā sa dhanurdhanuṣmānādāya rāmaḥ sahasā jagāma ।
taṁ lakṣmaṇaḥ prāñjalirabhyupetya uvāca vākyaṁ paramārthayuktam ।
6.59.46 ॥

kāmamāryaḥ suparyāpto vadhāyāsya durātmanaḥ ।
vidhamiṣyāmyahaṁ nīcamanujānīhi māṁ prabho ।
6.59.47 ॥

tamabravīnmahatejā rāmaḥ satyaparākramaḥ ।
6.59.48 ॥

gaccha yatnaparaścāpi bhava lakṣmaṇa saṁyuge ।
rāvaṇo hi mahāvīryo raṇe 'dbhutaparākramaḥ ।
trailokyenāpi saṅkruddho duṣprasahyo na saṁśayaḥ ।
6.59.49 ॥

tasya cchidrāṇi mārgasva svacchidrāṇi ca lakṣaya ।
cakṣuṣā dhanuṣā yatnādrakṣātmānaṁ samāhitaḥ ।
6.59.50 ॥

rāghavasya vacaḥ śrutvā pariṣvajyābhipūjya ca ।
abhivādya tato rāmaṁ yayau saumitrirāhavam ।
6.59.51 ॥

sa rāvaṇaṁ vāraṇahastabāhurdadarśa dīptodyatabhīmacāpam ।
pracchādayantaṁ śaravṛṣṭijālaistān vānarān bhinnavikīrṇadehān ।
6.59.52 ॥

tamālokya mahātejā hanumān mārutātmajaḥ ।
nivārya śarajālāni pradurdrāva sa rāvaṇam ।
6.59.53 ॥

rathaṁ tasya samāsādya bhujamudyamya dakṣiṇam ।
trāsayan rāvaṇaṁ dhīmān hanumān vākyamabravīt ।
6.59.54 ॥

devadānavagandharvairyakṣaiśca saha rākṣasaiḥ ।
avadhyatvaṁ tvayā prāptaṁ vānarebhyastu te bhayam ।
6.59.55 ॥

eṣa me dakṣiṇo bāhuḥ pañcaśākhaḥ samudyataḥ ।
vidhamiṣyati te dehādbhūtātmānaṁ ciroṣitam ।
6.59.56 ॥

śrutvā hanumato vākyaṁ rāvaṇo bhīmavikramaḥ ।
saṁraktanayanaḥ krodhādidaṁ vacanamabravīt ।
6.59.57 ॥

kṣipraṁ prahara niśśaṅkaṁ sthirāṁ kīrtimavāpnuhi ।
tatastvāṁ jñātavikrāntaṁ nāśayiṣyāmi vānara ।
6.59.58 ॥

rāvaṇasya vacaḥ śrutvā vāyusūnurvaco 'bravīt ।
prahṛtaṁ hi mayā pūrvamakṣaṁ smara sutaṁ tava ।
6.59.59 ॥

evamukto mahātejā rāvaṇo rākṣaseśvaraḥ ।
ājaghānānilasutaṁ talenorasi vīryavān ।
6.59.60 ॥

sa talābhihatastena cacāla ca muhurmuhuḥ ।
sthitvā muhūrtaṁ tejasvī sthairyaṁ kṛtvā mahāmatiḥ ।
ājaghānābhisaṁkruddhastalenaivāmaradviṣam ।
6.59.61 ॥

tatastalenābhihato vānareṇa mahātmanā ।
daśagrīvaḥ samādhūto yathā bhūmicale 'calaḥ ।
6.59.62 ।
tiḥ ॥

saṅgrāme taṁ tathā dṛṣṭvā rāvaṇaṁ talatāḍitam ।
ṛṣayo vānarāḥ siddhā nedurdevāḥ sahāsuraiḥ ।
6.59.63 ॥

athāśvāsya mahātejā rāvaṇo vākyamabravīt ।
6.59.64 ॥

sādhu vānara vīryeṇa ślāghanīyo 'si me ripuḥ ।
rāvaṇenaivamuktastu mārutirvākyamabravīt ।
6.59.65 ॥

dhigastu mama vīryeṇa yastvaṁ jīvasi rāvaṇa ।
sakṛttu praharedānīṁ durbuddhe kiṁ vikatthase ।
tatastvāṁ māmikā muṣṭirnayiṣyati yamakṣayam ।
6.59.66 ॥

tato mārutivākyena krodastasya tadā 'jvalat ।
6.59.67 ।
dānīṁ durbuddhe kiṁ vikatthase ।
saṁraktanayano yatnānmuṣṭimudyamya dakṣiṇam ।
pātayāmāsa vegena vānarorasi vīryavān ।
6.59.68 ॥

hanumān vakṣasi vyūḍhe sañcacāla punaḥpunaḥ ।
6.59.69 ॥

vihvalaṁ tu tadā dṛṣṭvā hanumantaṁ mahābalam ।
rathenātirathaḥ śīghraṁ nīlaṁ prati samabhyagāt ।
6.59.70 ॥

rākṣasānāmadhipatirdaśagrīvaḥ pratāpavān ।
pannagapratimairbhīmaiḥ paramarmātibhedibhiḥ ।
śarairādīpayāmāsa nīlaṁ haricamūpatim ।
6.59.71 ॥

sa śaraughasamāyasto nīlaḥ kapicamūpatiḥ ।
kareṇaikena śelāgraṁ rakṣodhipataye 'sṛjat ।
6.59.72 ॥

hanumānapi tejasvī samāśvasto mahāmanāḥ ।
viprekṣamāṇo yuddhepsuḥ saroṣamidamabravīt ।
6.59.73 ॥

nīlena saha saṁyuktaṁ rāvaṇaṁ rākṣaseśvaram ।
anyena yuddhyamānasya na yuktamabhidhāvanam ।
6.59.74 ॥

rāvaṇo 'pi mahātejāstacchṛṅgaṁ saptabhiḥ śaraiḥ ।
ājaghāna sutīkṣṇāgraistadvikīrṇaṁ papāta ha ।
6.59.75 ॥

tadvikīrṇaṁ gireḥ śṛṅgaṁ dṛṣṭvā haricamūpatiḥ ।
kālāgniriva jajvāla krodhona paravīrahā ।
6.59.76 ॥

so 'śvakarṇān dhavān sālāṁścūtāṁścāpi supuṣpitān ।
anyāṁśca vividhān vṛkṣānnīlaścikṣepa saṁyuge ।
6.59.77 ॥

sa tān vṛkṣān samāsādya praticiccheda rāvaṇaḥ ।
abhyavarṣat sughoreṇa śaravarṣeṇa pāvakim ।
6.59.78 ॥

abhivṛṣṭaḥ śaraugheṇa megheneva mahācalaḥ ।
hrasvaṁ kṛtvā tadā rūpaṁ dhvajāgre nipapāta ha ।
6.59.79 ॥

pāvakātmajamālokya dhvajāgre samupasthitam ।
jajvāla rāvaṇaḥ krodhāttato nīlo nanāda ca ।
6.59.80 ॥

dhvajāgre dhanuṣaścāgre kirīṭāgre ca taṁ harim ।
lakṣmaṇo 'tha hanūmāṁśca dṛṣṭvā rāmaśca vismitāḥ ।
6.59.81 ॥

rāvaṇo 'pi mahātejāḥ kapilāghavavismitaḥ ।
astramāhārayāmāsa dīptamāgneyamadbhutam ।
6.59.82 ॥

tataste cukruśurhṛṣṭā labdhalakṣāḥ plavaṅgamāḥ ।
nīlalāghavasambhrāntaṁ dṛṣṭvā rāvaṇamāhave ।
6.59.83 ॥

vānarāṇāṁ ca nādena saṁrabdho rāvaṇastadā ।
sambhramāviṣṭahṛdayo na kiñcit pratyapadyata ।
6.59.84 ॥

āgneyenātha saṁyuktaṁ gṛhītvā rāvaṇaḥ śaram ।
dhvajaśīrṣasthitaṁ nīlamudaikṣata niśācaraḥ ।
tato 'bravīnmahātejā rāvaṇo rākṣaseśvaraḥ ।
6.59.85 ॥

kape lāghavayukto 'si māyayā parayā 'nayā ।
jīvitaṁ khalu rakṣasva yadi śakto 'si vānara ।
6.59.86 ॥

tāni tānyātmarūpāṇi sṛjasi tvamanekaśaḥ ।
6.59.87 ॥

tathāpi tvāṁ mayā yuktaḥ sāyako 'straprayojitaḥ ।
jīvataṁ parirakṣantaṁ jīvitād bhraṁśayiṣyati ।
6.59.88 ॥

evamuktvā mahābāhū rāvaṇo rākṣaseśvaraḥ ।
sandhāya bāṇamastreṇa camūpatimatāḍayat ।
6.59.89 ॥

so 'strayuktena bāṇena nīlo vakṣasi tāḍitaḥ ।
nirdahyamānaḥ sahasā nipapāta mahītale ।
6.59.90 ॥

pitṛmāhātmyasaṁyogādātmanaścāpi tejasā ।
jānubhyāmapatadbhūmau na ca prāṇairvyayujyata ।
6.59.91 ॥

visañjñaṁ vānaraṁ dṛṣṭvā daśagrīvo raṇotsukaḥ ।
rathenāmbudanādena saumitrimabhidudruve ।
6.59.92 ॥

āsādya raṇamadhye tu vārayitvā sthito jvalan ।
dhanurvisphārayāmāsa kampayanniva medinīm ।
6.59.93 ॥

tamāha saumitriradīnasattvo visphārayantaṁ dhanuraprameyam ।
abhyehi māmeva niśācarendra na vānarāṁstvaṁ pratiyoddhumarhaḥ ।
6.59.94 ॥

sa tasya vākyaṁ pratipūrṇaghoṣaṁ jyāśabdamugraṁ ca niśamya rājā ।
āsādya saumitrimavasthitaṁ taṁ kopānvito vākyamuvāca rakṣaḥ ।
6.59.95 ॥

diṣṭyā 'si me rāghava dṛṣṭimārgaṁ prāpto 'ntagāmī viparītabuddhiḥ ।
asmin kṣaṇe yāsyasi mṛtyudeśaṁ saṁsādyamāno mama bāṇajālaiḥ ।
6.59.96 ॥

tamāha saumitriravismayāno garjantamudvṛttasitāgradaṁṣṭram ।
rājanna garjanti mahāprabhāvā vikatthase pāpakṛtāṁ variṣṭha ।
6.59.97 ॥

jānāmi vīryaṁ tava rākṣasendra balaṁ pratāpaṁ ca parākramaṁ ca ।
avasthito 'haṁ śaracāpapāṇirāgaccha kiṁ moghavikatthanena ।
6.59.98 ॥

sa evamuktaḥ kupitaḥ sasarja rakṣodhipaḥ sapta śarān supuṅkhān ।
tān lakṣmaṇaḥ kāñcanacitrapuṅkhaiściccheda bāṇairniśitāgradhāraiḥ ।
6.59.99 ॥

tān prekṣamāṇaḥ sahasā nikṛttānnikṛttabhogāniva pannagendrān ।
laṅkeśvaraḥ krodhavaśaṁ jagāma sasarja cānyānniśitān pṛṣatkān ।
6.59.100 ॥

sa bāṇavarṣaṁ tu vavarṣa tīvraṁ rāmānujaḥ kārmukasamprayuktam ।
kṣurārdhacandrottamakarṇibhallaiḥ śarāṁśca ciccheda na cukṣubhe ca ।
6.59.101 ॥

sa bāṇajālānyatha tāni tāni moghāni paśyaṁ stridaśārirājaḥ ।
visiṣmiye lakṣmaṇalāghavena punaśca bāṇānniśitān mumoca ।
6.59.102 ॥

sa lakṣmaṇaścāśu śarān śitāgrān mahendravajrāśanitulyavegān ।
sandhāya cāpe jvalanaprakāśān sasarja rakṣodhipatervadhāya ।
6.59.103 ॥

sa tān praciccheda hi rākṣasendraśchittvā ca tām̐llakṣmaṇamājaghāna ।
śareṇa kālāgnisamaprabheṇa svayambhudattena lalāṭadeśe ।
6.59.104 ॥

sa lakṣmaṇo rāvaṇasāyakārtaścacāla cāpaṁ śithilaṁ pragṛhya ।
punaśca sañjñāṁ pratilabhya kṛcchrācciccheda cāpaṁ tridaśendraśatroḥ ।
6.59.105 ॥

nikṛttacāpaṁ tribhirājaghāna bāṇaistadā dāśarathiḥ śitāgraḥ ।
sa sāyakārto vicacāla rājā kṛcchrācca sañjñāṁ punarāsasāda ।
6.59.106 ॥

sa kṛttacāpaḥ śaratāḍitaśca medārdragātro rudhirāvasiktaḥ ।
jagrāha śaktiṁ samudagraśaktiḥ svayambhudattāṁ yudhi devaśatruḥ ।
6.59.107 ॥

sa tāṁ vidhūmānalasannikāśāṁ vitrāsinīṁ vānaravāhinīnām ।
cikṣepa śaktiṁ tarasājvalantīṁ saumitraye rākṣasarāṣṭranāthaḥ ।
6.59.108 ॥

tāmāpatantīṁ bharatānujograirjaghāna bāṇaiśca hutāgnikalpaiḥ ।
tathāpi sā tasya viveśa śaktirbāhvantaraṁ dāśaratherviśālam ।
6.59.109 ॥

sa śaktimān śaktisamāhataḥ san muhuḥ prajajvāla raghupravīraḥ ।
taṁ vihvalantaṁ sahasā 'bhyupetya jagrāha rājā tarasā bhujābhyām ।
6.59.110 ॥

himavān mandaro merustrailokyaṁ vā sahāmaraiḥ ।
śakyaṁ bhujābhyāmuddhartu na saṅkhye bharatānujaḥ ।
6.59.111 ॥

śaktyā brāhmyā 'pi saumitristāḍitastu stanāntare ।
viṣṇoracintyaṁ svaṁ bhāgamātmānaṁ pratyanusmarat ।
6.59.112 ॥

tato dānavadarpaghnaṁ saumitriṁ devakaṇṭakaḥ ।
taṁ pīḍayitvā bāhubhyāmaprabhurlaṅghane 'bhavat ।
athaivaṁ vaiṣṇavaṁ bhāgaṁ mānuṣaṁ dehamāsthitam ।
6.59.113 ॥

atha vāyusutaḥ kruddho rāvaṇaṁ samabhidravat ।
ājaghānorasi kruddho vajrakalpena muṣṭinā ।
6.59.114 ॥

tena muṣṭiprahāreṇa rāvaṇo rākṣaseśvaraḥ ।
jānubhyāmapatadbhūmau cacāla ca papāta ca ।
6.59.115 ॥

āsyaiḥ sanetraśravaṇairvavāma rudhiraṁ bahu ।
6.59.116 ॥

vighūrṇamāno niśceṣṭo rathopastha upāviśat ।
visañjño mūrcchitaścāsīnna ca sthānaṁ samālabhat ।
6.59.117 ॥

visañjñaṁ rāvaṇaṁ dṛṣṭvā samare bhīmavikramam ।
ṛṣayo vānarāḥ sarve nedurdevāḥ savāsavāḥ ।
6.59.118 ॥

hanumānapi tejasvī lakṣmaṇaṁ rāvaṇārditam ।
anayadrāghavābhyāśaṁ bāhubhyāṁ parigṛhya tam ।
6.59.119 ॥

vāyusūnoḥ suhṛttvena bhaktyā paramayā ca saḥ ।
śatrūṇāmaprakampyo 'pi laghutvamagamat kapeḥ ।
6.59.120 ॥

taṁ samutsṛjya sā śaktiḥ saumitriṁ yudhi durjayam ।
rāvaṇasya rathe tasmin sthānaṁ punarupāgatā ।
6.59.121 ॥

āśvastaśca viśalyaśca lakṣmaṇaḥ śatrusūdanaḥ ।
viṣṇorbhāgamamīmāṁsyamātmānaṁ pratyanusmaran ।
6.59.122 ॥

rāvaṇo 'pi mahātejāḥ prāpya sañjñāṁ mahāhave ।
ādade niśitān bāṇān jagrāha ca mahaddhanuḥ ।
6.59.123 ॥

nipātitamahāvīrāṁ dravantīṁ vānarīṁ camūm ।
rāghavastu raṇe dṛṣṭvā rāvaṇaṁ samabhidravat ।
6.59.124 ॥

athainamupasaṅgamya hanumān vākyamabravīt ।
mama pṛṣṭaṁ samāruhya rākṣasaṁ śāstumarhasi ।
6.59.125 ॥

viṣṇuryathā garutmantaṁ balavantaṁ samāhitaḥ ।
tacchutvā rāghavo vākyaṁ vāyuputreṇa bhāṣitam ।
āruroha mahāśūro balavantaṁ mahākapim ।
6.59.126 ॥

rathasthaṁ rāvaṇaṁ saṅkhye dadarśa manujādhipaḥ ।
6.59.127 ॥

ā rāghavo vākyaṁ vāyuputreṇa bhāṣitam ।
tamālokya māhatejāḥ pradudrāva sa rāghavaḥ ।
vairocanamiva kruddho viṣṇurabhyudyatāyudhaḥ ।
6.59.128 ॥

jyāśabdamakarottīvaṁ vajraniṣpeṣanisvanam ।
6.59.129 ॥

girā gambhīrayā rāmo rākṣasendramuvāca ha ।
6.59.130 ॥

tiṣṭha tiṣṭha mama tvaṁ hi kṛtvā vipriyamīddaśam ।
kva nu rākṣasaśārdūla gato mokṣamavāpsyasi ।
6.59.131 ॥

yadīndravaivasvatabhāskarān vā svayambhuvaiśvānaraśaṅkarān vā ।
gamiṣyasi tvaṁ daśa vā diśo 'thavā tathāpi me nādya gato vimokṣyase ।
6.59.132 ॥

yaścaiva śaktyā 'bhihatastvayā 'dya icchan viṣādaṁ sahasā 'bhyupetaḥ ।
sa eva rakṣogaṇarāja mṛtyuḥ saputradārasya tavādyayuddhe ।
6.59.133 ॥

etena cātyadbhutadarśanāni śarairjanasthānakṛtālayāni ।
caturdaśānyāttavarāyudhāni rakṣassahasrāṇi niṣūditāni ।
6.59.134 ॥

rāghavasya vacaḥ śrutvā rākṣasendro mahākapim ।
vāyuputraṁ mahāvīryaṁ vahantaṁ rāghavaṁ raṇe ।
ājaghāna śaraistīkṣṇaiḥ kālānalaśikhopamaiḥ ।
6.59.135 ॥

rākṣasenāhave tasya tāḍitasyāpi sāyakaiḥ ।
svabhāvatejoyuktasya bhūyastejo 'bhyavardhata ।
6.59.136 ॥

tato rāmo mahātejā rāvaṇena kṛtavraṇam ।
dṛṣṭvā plavagaśārdūlaṁ kopasya vaśameyivān ।
6.59.137 ॥

tasyābhicaṅkramya rathaṁ sacakraṁ sāśvadhvajacchatramahāpatākam ।
sasārathiṁ sāśaniśūlakhaḍgaṁ rāmaḥ praciccheda śaraiḥ supuṅkhaiḥ ।
6.59.138 ॥

athendraśatruṁ tarasā jaghāna bāṇena vajrāśanisannibhena ।
bhujāntare vyūḍhasujātarūpe vajreṇa meruṁ bhagavānivendraḥ ।
6.59.139 ॥

yo vajrapātāśanisannipātānna cukṣubhe nāpi cacāla rājā ।
sa rāmabāṇābhihato bhṛśārtaścacāla cāpaṁ ca mumoca vīraḥ ।
6.59.140 ॥

taṁ vihvalantaṁ prasamīkṣya rāmaḥ samādade dīptamathārdhacandram ।
tenārkavarṇaṁ sahasā kirīṭaṁ ciccheda rakṣodhipatermahātmā ।
6.59.141 ॥

taṁ nirviṣāśīviṣasannikāśaṁ śāntārciṣaṁ sūryamivāprakāśam ।
gataśriyaṁ kṛttakirīṭakūṭamuvāca rāmo yudhi rākṣasendram ।
6.59.142 ॥

kṛtaṁ tvayā karma mahat subhīmaṁ hatapravīraśca kṛtastvayā 'ham ।
tasmāt pariśrānta iva vyavasya na tvāṁ śarairmṛtyuvaśaṁ nayāmi ।
6.59.143 ॥

gacchānujānāmi raṇārditastvaṁ praviśya rātriṁcararāja laṅkām ।
āśvāsya niryāhi rathī ca dhanvī tadā balaṁ drakṣyasi me rathasthaḥ ।
6.59.144 ॥

sa evamukto hatadarpaharṣo nikṛttacāpaḥ sa hatāśvasūtaḥ ।
śarārditaḥ kṛttamahākirīṭo viveśa laṅkāṁ sahasā sa rājā ।
6.59.145 ॥

tasmin praviṣṭe rajanīcarendre mahābale dānavadevaśatrau ।
harīn viśalyān saha lakṣmaṇena cakāra rāmaḥ paramāhavāgre ।
6.59.146 ॥

tasmin prabhinne tridaśendraśatrau surāsurā bhūtagaṇā diśaśca ।
sasāgarāḥ sarṣimahorāgāśca tathaiva bhūmyambucarāśca hṛṣṭāḥ ।
6.59.147 ॥