युद्धकाण्डम्Yuddha Kāṇḍa

tataḥ prahastaṁ niryāntaṁ dṛṣṭvā bhīmaparākramam ।
uvāca sasmitaṁ rāmo vibhīṣaṇamarindamaḥ ।
6.58.1 ॥

ka eṣa sumahākāyo balena mahatā vṛtaḥ ।
ācakṣva me mahābāho vīryavantaṁ niśācaram ।
6.58.2 ॥

rāghavasya vacaḥ śrutvā pratyuvāca vibhīṣaṇaḥ ।
6.58.3 ॥

eṣa senāpatistasya prahasto nāma rākṣasaḥ ।
laṅkāyāṁ rākṣasendrasya tribhāgabalasaṁvṛtaḥ ।
vīryavānastravicchūraḥ prakhyātaśca parākrame ।
6.58.4 ॥

tataḥ prahastaṁ niryāntaṁ bhīmaṁ bhīmaparākramam ।
garjantaṁ sumahākāyaṁ rākṣasairabhisaṁvṛtam ।
6.58.5 ॥

dadarśa mahatī senā vānarāṇāṁ balīyasām ।
atisañjātaroṣāṇāṁ prahastamabhigarjatām ।
6.58.6 ॥

khaḍgaśaktyṛṣṭibāṇāśca śūlāni musalāni ca ।
gadāśca parighāḥ prāsā vividhāśca paraśvadhāḥ ।
6.58.7 ॥

dhanūṁṣi ca vicitrāṇi rākṣasānāṁ jayaiṣiṇām ।
pragṛhītānyaśobhanta vānarānabhidhāvatām ।
6.58.8 ॥

jagṛhuḥ pādapāṁścāpi puṣpitān vānararṣabhāḥ ।
śilāśca vipulā dīrghā yoddhukāmāḥ plavaṅgamāḥ ।
6.58.9 ॥

teṣāmanyonyamāsādya saṅgrāmaḥ sumahānabhūt ।
bahūnāmaśmavṛṣṭiṁ ca śaravṛṣṭiṁ ca varṣatām ।
6.58.10 ॥

bahavo rākṣasā yuddhe bahūn vānarayūthapān ।
vānarā rākṣasāṁścāpi nijaghnurbahavo bahūn ।
6.58.11 ॥

śūlaiḥ pramathitāḥ kecit kecicca paramāyudhaiḥ ।
parighairāhatāḥ kecit kecicchinnāḥ paraśvadhaiḥ ।
6.58.12 ॥

nirucchvāsāḥ kṛtāḥ kecit patitā dharaṇītale ।
vibhinnahṛdayāḥ kecidiṣusandhānasanditāḥ ।
6.58.13 ॥

keciddvidhā kṛtāḥ khaḍgaiḥ sphurantaḥ patitā bhuvi ।
vānarā rākṣasaiḥ śūlaiḥ pārśvataścāvadāritāḥ ।
6.58.14 ॥

vānaraiścāpi saṅkruddhai rākṣasaughāḥ samantataḥ ।
pādapairgiriśṛṅgaiśca sampiṣṭā vasudhātale ।
6.58.15 ॥

vajrasparśatalairhastairmuṣṭibhiśca hatā bhṛśam ।
vaimuḥ śoṇitamāsyebhyo viśīrṇadaśanekṣaṇāḥ ।
6.58.16 ॥

ārtasvanaṁ ca svanatāṁ siṁhanādaṁ ca nardatām ।
babhūva tumulaḥ śabdo harīṇāṁ rakṣasāṁ yudhi ।
6.58.17 ॥

vānarā rākṣasāḥ kruddhā vīramārgamanuvratāḥ ।
vivṛttanayanāḥ krūrāścakruḥ karmāṇyabhītavat ।
6.58.18 ॥

narāntakaḥ kumbhahanurmahānādaḥ samunnataḥ ।
ete prahastasacivāḥ sarve jaghnurvanaukasaḥ ।
6.58.19 ॥

teṣāmāpatatāṁ śīghraṁ nighnatāṁ cāpi vānarān ।
dvivido giriśṛṅgeṇa jaghānaikaṁ narāntakam ।
6.58.20 ॥

durmukhaḥ punarutthāya kapiḥ sa vipuladrumam ।
rākṣasaṁ kṣiprahastastu samunnatamapothayat ।
6.58.21 ॥

jāmbavāṁstu susaṅkruddhaḥ pragṛhya mahatīṁ śilām ।
pātayāmāsa tejasvī mahānādasya vakṣasi ।
6.58.22 ॥

atha kumbhahanustatra tāreṇāsādya vīryavān ।
vṛkṣeṇābhihato mūrdhni prāṇān santyājayadraṇe ।
6.58.23 ॥

amṛṣyamāṇastatkarma prahasto rathamāsthitaḥ ।
cakāra kadanaṁ ghoraṁ dhanuṣpāṇirvanaukasām ।
6.58.24 ॥

āvarta iva sañjajñe ubhayoḥ senayostadā ।
kṣubhitasyāprameyasya sāgarasyeva nisvanaḥ ।
6.58.25 ॥

mahatā hi śaraugheṇa prahasto yuddhakovidaḥ ।
ardayāmāsa saṅkruddho vānarān paramāhave ।
6.58.26 ॥

vānarāṇāṁ śarīraiśca rākṣasānāṁ ca medinī ।
babhūva nicitā ghorā patitairiva parvataiḥ ।
6.58.27 ॥

sā mahī rudhiraugheṇa pracchannā samprakāśate ।
sañchannā mādhave māsi palāśairiva puṣpitaiḥ ।
6.58.28 ॥

hatavīraughavaprāṁ tu bhagnāyudhamahādrumām ।
śoṇitaughamahātoyāṁ yamasāgaragaminīm ।
6.58.29 ॥

yakṛtplīhamahāpaṅkāṁ vinikīrṇāntraśaivalām ।
bhinnakāyaśiromīnāmaṅgāvayavaśādvalām ।
6.58.30 ॥

gṛdhrahaṁsagaṇākīrṇāṁ kaṅkasārasasevitām ।
medaḥphenasamākīrṇāmārtastanitanisvanām ।
tāṁ kāpuruṣadustārāṁ yuddhabhūmimayīṁ nadīm ।
6.58.31 ॥

nadīmiva ghanāpāye haṁsasārasasevitām ।
rākṣasāḥ kapimukhyāśca terustāṁ dustarāṁ nadīm ।
6.58.32 ॥

yathā padmarajodhvastāṁ nalinīṁ gajayūthapāḥ ।
6.58.33 ॥

tataḥ sṛjantaṁ bāṇaughān prahastaṁ syandane sthitam ।
dadarśa tarasā nīlo vinighnantaṁ plavaṅgamān ।
6.58.34 ॥

uddhūta iva vāyuḥ khe mahadabhrabalaṁ balāt ।
samīkṣyābhidrutaṁ yuddhe prahasto vāhinīpatiḥ ।
rathenādityavarṇena nīlamevābhidudruve ।
6.58.35 ॥

sa dhanurdhanvināṁ śreṣṭho vikṛṣya paramāhave ।
nīlāya vyasṛjadbāṇān prahasto vāhinīpatiḥ ।
6.58.36 ॥

te prāpya viśikhā nīlaṁ vinirbhidya samāhitāḥ ।
mahīṁ jagmurmahāvegā ruṣitā iva pannagāḥ ।
6.58.37 ॥

nīlaḥ śarairabhihato niśitairjvalanopamaiḥ ।
sa taṁ paramadurdharṣamāpatantaṁ mahākapiḥ ।
6.58.38 ॥

prahastaṁ tāḍayāmāsa vṛkṣamutpāṭya vīryavān ।
6.58.39 ॥

sa tenābhihataḥ kruddho nadan rākṣasapuṅgavaḥ ।
vavarṣa śaravarṣāṇi plavaṅgānāṁ camūpatau ।
6.58.40 ॥

tasya bāṇagaṇān ghorān rākṣasasya mahābalaḥ ।
apārayan vārayituṁ pratyagṛhṇānnimīlitaḥ ।
6.58.41 ॥

yathaiva govṛṣo varṣaṁ śāradaṁ śīghramāgatam ।
evameva prahastasya śaravarṣaṁ durāsadam ।
nimīlitākṣaḥ sahasā nīlaḥ sehe sudāruṇam ।
6.58.42 ॥

roṣitaḥ śaravarṣeṇa sālena mahatā mahān ।
prajaghāna hayānnīlaḥ prahastasya manojavān ।
6.58.43 ॥

tataḥ sa cāpamudgṛhya prahastasya mahābalaḥ ।
babhañja tarasā nīlo nanāda ca punaḥpunaḥ ।
6.58.44 ॥

vidhanustu kṛtastena prahasto vāhinīpatiḥ ।
pragṛhya musalaṁ ghoraṁ syandanādavapupluve ।
6.58.45 ॥

tāvubhau vāhinīmukhyau jātavairau tarasvinau ।
sthitau kṣatajadigdhāṅgau prabhinnāviva kuñjarau ।
6.58.46 ॥

ullikhantau sutīkṣṇābhirdaṁṣṭrābhiritaretaram ।
siṁhaśārdūlasadṛśau siṁhaśārdūlaceṣṭitau ।
6.58.47 ॥

vikrāntavijayau vīrau samareṣvanivartinau ।
kāṅkṣamāṇau yaśaḥ prāptuṁ vṛtravāsavayoḥ samau ।
6.58.48 ॥

ājaghāna tadā nīlaṁ lalāṭe musalena saḥ ।
prahastaḥ paramāyattastasya susrāva śoṇitam ।
6.58.49 ॥

tataḥ śoṇitadigdhāṅgaḥ pragṛhya sumahātarum ।
prahastasyorasi kruddho visasarja mahākapiḥ ।
6.58.50 ॥

tamacintya prahāraṁ sa pragṛhya musalaṁ mahat ।
abhidudrāva balinaṁ balānnīlaṁ plavaṅgamam ।
6.58.51 ॥

tamugravegaṁ saṁrabdhamāpatantaṁ mahākapiḥ ।
tataḥ samprekṣya jagrāha mahāvego mahāśilām ।
6.58.52 ॥

tasya yuddhābhikāmasya mṛdhe musalayodhinaḥ ।
prahastasya śilāṁ nīlo mūrdhni tūrṇamapātayat ।
6.58.53 ॥

sā tena kapimukhyena vimuktā mahatī śilā ।
bibheda bahudhā ghorā prahastasya śirastadā ।
6.58.54 ॥

sa gatāsurgataśrīko gatasattvo gatendriyaḥ ।
papāta sahasā bhūmau chinnamūla iva drumaḥ ।
6.58.55 ॥

prabhinnaśirasastasya bahu susrāva śoṇitam ।
śarīrādapi susrāva gireḥ prasravaṇaṁ yathā ।
6.58.56 ॥

hate prahaste nīlena tadakampyaṁ mahadbalam ।
rakṣasāmaprahṛṣṭānāṁ laṅkāmabhijagāma ha ।
6.58.57 ॥

na śekuḥ samare sthātuṁ nihate vāhinīpatau ।
setubandhaṁ samāsādya vikīrṇaṁ salilaṁ yathā ।
6.58.58 ॥

hate tasmiṁścamūmukhye rākṣasāste nirudyamāḥ ।
rakṣaḥpatigṛhaṁ gatvā dhyānamūkatvamāsthitāḥ ।
prāptāḥ śokārṇavaṁ tīvraṁ nissañjñā iva te 'bhavan ।
6.58.59 ॥

tatastu nīlo vijayī mahābalaḥ praśasyamānaḥ svakṛtena karmaṇā ।
sametya rāmeṇa salakṣmaṇena ca prahṛṣṭarūpastu babhūva yūthapaḥ ।
6.58.60 ॥