युद्धकाण्डम्Yuddha Kāṇḍa

akampanavadhaṁ śrutvā kruddho vai rākṣaseśvaraḥ ।
kiñciddīnamukhaścāpi sacivāṁstānudaikṣata ।
6.57.1 ॥

sa tu dhyātvā muhūrtaṁ tu mantribhiḥ saṁvicārya ca ।
tatastu rāvaṇaḥ pūrvadivase rākṣasādhipaḥ ।
purīṁ pariyayau laṅkāṁ sarvān gulmānavekṣitum ।
6.57.2 ॥

tāṁ rākṣasagaṇairguptāṁ gulmairbahubhirāvṛtām ।
dadarśa nagarīṁ laṅkāṁ patākādhvajamālinīm ।
6.57.3 ॥

ruddhāṁ tu nagarīṁ dṛṣṭvā rāvaṇo rākṣaseśvaraḥ ।
uvācāmarṣataḥ kāle prahastaṁ yuddhakovidam ।
6.57.4 ॥

purasyopaniviṣṭasya sahasā pīḍitasya vā ।
nānyaṁ yuddhāt prapaśyāmi mokṣaṁ yuddhaviśārada ।
6.57.5 ॥

ahaṁ vā kumbhakarṇo vā tvaṁ vā senāpatirmama ।
indrajidvā nikumbho vā vaheyurbhāramīdṛśam ।
6.57.6 ॥

sa tvaṁ balamataḥ śīghramādāya parigṛhya ca ।
vijayāyābhiniryāhi yatra sarve vanaukasaḥ ।
6.57.7 ॥

niryāṇādeva te nūnaṁ capalā harivāhinī ।
nardatāṁ rākṣasendrāṇāṁ śrutvā nādaṁ draviṣyati ।
6.57.8 ॥

capalā hyavinītāśca calacittāśca vānarāḥ ।
na sahiṣyanti te nādaṁ siṁhanādamiva dvipāḥ ।
6.57.9 ॥

vidrute ca bale tasmin rāmaḥ saumitriṇā saha ।
avaśaste nirālambaḥ prahasta vaśameṣyati ।
6.57.10 ॥

āpat saṁśayitā śreyo na tu nissaṁśayīkṛtā ।
pratilomānulomaṁ vā yadvā no manyase hitam ।
6.57.11 ॥

rāvaṇenaivamuktastu prahasto vāhinīpatiḥ ।
rākṣasendramuvācedamasurendramivośanā ।
6.57.12 ॥

rājan mantritapūrvaṁ naḥ kuśalaiḥ saha mantribhiḥ ।
vivādaścāpi no vṛttaḥ samavekṣya parasparam ।
6.57.13 ॥

pradānena tu sītāyāḥ śreyo vyavasitaṁ mayā ।
apradāne punaryuddhaṁ dṛṣṭametattathaiva naḥ ।
6.57.14 ॥

so 'haṁ dānaiśca mānaiśca satataṁ pūjitastvayā ।
sāntvaiśca vividhaiḥ kāle kiṁ na kuryāṁ priyaṁ tava ।
6.57.15 ॥

na hi me jīvitaṁ rakṣyaṁ putradāradhanāni vā ।
tvaṁ paśya māṁ juhūṣantaṁ tvadarthaṁ jīvitaṁ yudhi ।
6.57.16 ॥

evamuktvā tu bhartāraṁ rāvaṇaṁ vāhinīpatiḥ ।
uvācedaṁ balādhyakṣān prahastaḥ purataḥ sthitān ।
6.57.17 ॥

samānayata me śīghraṁ rākṣasānāṁ mahadbalam ।
6.57.18 ॥

madbāṇaśatavegena hatānāṁ ca raṇājire ।
adya tṛpyantu māṁsādāḥ pakṣiṇaḥ kānanaukasām ।
6.57.19 ॥

ityuktāste prahastena balādhyakṣāḥ kṛtatvarāḥ ।
balamudyojayāmāsustasmin rākṣasamandire ।
6.57.20 ॥

sā babhūva muhūrtena tigmanānāvidhāyudhaiḥ ।
laṅkā rākṣasavīraistairgajairiva samākulā ।
6.57.21 ॥

hutāśanaṁ tarpayatāṁ brāhmaṇāṁśca namasyatām ।
ājyagandhaprativahaḥ surabhirmāruto vavau ।
6.57.22 ॥

srajaśca vividhākārā jagṛhustvabhimantritāḥ ।
saṅgrāmasajjāḥ saṁhṛṣṭā dhārayan rākṣasāstadā ।
6.57.23 ॥

sadhanuṣkāḥ kavacino vegādāplutya rākṣasāḥ ।
rāvaṇaṁ prekṣya rājānaṁ prahastaṁ paryavārayan ।
6.57.24 ॥

athāmantrya ca rājānaṁ bherīmāhatya bhairavām ।
āruroha rathaṁ divyaṁ prahastaḥ sajjakalpitam ।
6.57.25 ॥

hayairmahājavairyuktaṁ samyak sūtasusaṁyatam ।
mahājaladanirghoṣaṁ sākṣāccandrārkabhāsvaram ।
6.57.26 ॥

uragadhvajadurddharṣaṁ suvarūthaṁ svapaskaram ।
suvarṇajālasaṁyuktaṁ prahasantamiva śriyā ।
6.57.27 ॥

tatastaṁ rathamāsthāya rāvaṇārpitaśāsanaḥ ।
laṅkāyā niryayau tūrṇaṁ balena mahatā vṛtaḥ ।
6.57.28 ॥

tato dundubhinirghoṣaḥ parjanyaninadopamaḥ ।
vāditrāṇāṁ ca ninadaḥ pūrayanniva sāgaram ।
śuśruve śaṅkhaśabdaśca prayāte vāhinīpatau ।
6.57.29 ॥

ninadantaḥ svarān ghorān rākṣasā jagmuragrataḥ ।
bhīmarūpā mahākāyāḥ prahastasya purassarāḥ ।
6.57.30 ॥

narāntakaḥ kumbhahanurmahānādaḥ samunnataḥ ।
prahastasacivā hyete niryayuḥ parivārya tam ।
6.57.31 ॥

vyūḍhenaiva sughoreṇa pūrvadvārāt sa niryayau ।
gajayūthanikāśena balena mahatā vṛtaḥ ।
6.57.32 ॥

sāgarapratimaughena vṛtastena balena saḥ ।
prahasto niryayau tūrṇaṁ kālāntakayamopamaḥ ।
6.57.33 ॥

tasya niryāṇaghoṣeṇa rākṣasānāṁ ca nardatām ।
laṅkāyāṁ sarvabhūtāni vinedurvikṛtaiḥ svaraiḥ ।
6.57.34 ॥

vyabhramākāśamāviśya māṁsaśoṇitabhojanāḥ ।
maṇḍalānyapasavyāni khagāścakrū rathaṁ prati ।
6.57.35 ॥

vamantyaḥ pāvakajvālāḥ śivā ghoraṁ vavāśire ।
antarikṣāt papātolkā vāyuśca paruṣo vavau ।
6.57.36 ॥

anyonyamabhisaṁrabdhā grahāśca na cakāśire ।
6.57.37 ॥

meghāśca kharanirghoṣā rathasyopari rakṣasaḥ ।
vavṛṣū rudhiraṁ cāsya siṣicuśca purassarān ।
6.57.38 ॥

ketumūrdhani gṛdhro 'sya nilīno dakṣiṇāmukhaḥ ।
tudannubhayataḥ pārśvaṁ samagrāmaharat prabhām ।
6.57.39 ॥

sāratherbahuśaścāsya saṅgrāmamavagāhataḥ ।
pratodo nyapataddhastāt sūtasya hayasādinaḥ ।
6.57.40 ॥

niryāṇaśrīśca yā 'syāsīdbhāsvarā vasudurlabhā ।
sā nanāśa muhūrtena same ca skhalitā hayāḥ ।
6.57.41 ॥

prahastaṁ tvabhiniryāntaṁ prakhyātabalapauruṣam ।
yudhi nānāpraharaṇā kapisenā 'bhyavartata ।
6.57.42 ॥

atha ghoṣaḥ sutumulo harīṇāṁ samajāyata ।
vṛkṣānārujatāṁ caiva gurvīrāgṛhṇatāṁ śilāḥ ।
6.57.43 ॥

nadatāṁ rākṣasānāṁ ca vānarāṇāṁ ca garjatām ।
ubhe pramudite sainye rakṣogaṇavanaukasām ।
6.57.44 ॥

vegitānāṁ samarthānāmanyonyavadhakāṅkṣiṇām ।
parasparaṁ cāhvayatāṁ ninādaḥ śrūyate mahān ।
6.57.45 ॥

tataḥ prahastaḥ kapirājavāhinīmabhipratasthe vijayāya durmatiḥ ।
vivṛddhavegāṁ ca viveśa tāṁ camūṁ yathā mumūrṣuḥ śalabho vibhāvasum ।
6.57.46 ॥