युद्धकाण्डम्Yuddha Kāṇḍa

taddṛṣṭvā sumahat karma kṛtaṁ vānarasattamaiḥ ।
krodhamāhārayāmāsa yudhi tīvramakampanaḥ ।
6.56.1 ॥

krodhamūrcchitarūpastu dhūnvan paramakārmukam ।
dṛṣṭvā tu karma śatrūṇāṁ sārathiṁ vākyamabravīt ।
6.56.2 ॥

tatraiva tāvattvaritaṁ rathaṁ prāpaya sārathe ।
yatraite bahavo ghnanti subahūn rākṣasān raṇe ।
6.56.3 ॥

ete 'tra balavanto hi bhīmakāyāśca vānarāḥ ।
drumaśailapraharaṇāstiṣṭhanti pramukhe mama ।
6.56.4 ॥

etānnihantumicchāmi samaraślāghino hyaham ।
etaiḥ pramathitaṁ sarvaṁ dṛśyate rākṣasaṁ balam ।
6.56.5 ॥

tataḥ prajavanāśvena rathena rathināṁ varaḥ ।
harīnabhyahanat krodhāccharajālairakampanaḥ ।
6.56.6 ॥

na sthātuṁ vānarāḥ śekuḥ kiṁ punaryoddhumāhave ।
akampanaśarairbhagnāḥ sarva eva vidudruvuḥ ।
6.56.7 ॥

tān mṛtyuvaśamāpannānakampanavaśaṁ gatān ।
samīkṣya hanumān jñātīnupatasthe mahābalaḥ ।
6.56.8 ॥

taṁ mahāplavagaṁ dṛṣṭvā sarve plavagayūthapāḥ ।
sametya samare vīrāḥ saṁhṛṣṭāḥ paryavārayan ।
6.56.9 ॥

avasthitaṁ hanūmantaṁ te dṛṣṭvā hariyūthapāḥ ।
babhūvurbalavanto hi balavantaṁ samāśritāḥ ।
6.56.10 ॥

akampanastu śailābhaṁ hanūmantamavasthitam ।
mahendra iva dhārābhiḥ śarairabhivavarṣa ha ।
6.56.11 ॥

acintayitvā bāṇaughān śarīre patitān śitān ।
akampanavadhārthāya mano dadhre mahābalaḥ ।
6.56.12 ॥

sa prasahya mahātejā hanūmān mārutātmajaḥ ।
abhidudrāva tadrakṣaḥ kampayanniva medinīm ।
6.56.13 ॥

tasyābhinardamānasya dīpyamānasya tejasā ।
babhūva rūpaṁ durdharṣaṁ dīptasyeva vibhāvasoḥ ।
6.56.14 ॥

ātmānamapraharaṇaṁ jñātvā krodhasamanvitaḥ ।
śailamutpāṭayāmāsa vegena haripuṅgavaḥ ।
6.56.15 ॥

taṁ gṛhītvā mahāśailaṁ pāṇinaikena mārutiḥ ।
sa vinadya mahānādaṁ bhrāmayāmāsa vīryavān ।
6.56.16 ॥

tatastamabhidudrāva rākṣasendramakampanam ।
purā hi namuciṁ saṅkhye vajreṇeva purandaraḥ ।
6.56.17 ॥

akampanastu taddṛṣṭvā giriśṛṅgaṁ samudyatam ।
dūrādeva mahābāṇairardhacandrairvyadārayat ।
6.56.18 ॥

tatparvatāgramākāśe rakṣobāṇavidāritam ।
viśīrṇaṁ patitaṁ dṛṣṭvā hanumān krodhamūrcchitaḥ ।
6.56.19 ॥

so 'śvakarṇaṁ samāsādya roṣadarpānvito hariḥ ।
tūrṇamutpāṭayāmāsa mahāgirimivocchritam ।
6.56.20 ॥

taṁ gṛhītvā mahāskandhaṁ so 'śvakarṇaṁ mahādyutiḥ ।
prahasya parayā prītyā bhrāmayāmāsa saṁyuge ।
6.56.21 ॥

pradhāvannūruvegena prabhañjaṁstarasā drumān ।
hanumān paramakruddhaścaraṇairdārayat kṣitim ।
6.56.22 ॥

gajāṁśca sagajārohān sarathān rathinastathā ।
jaghāna hanumān dhīmān rākṣasāṁśca padātigān ।
6.56.23 ॥

tamantakamiva kruddhaṁ samare prāṇahāriṇam ।
hanumantamabhiprekṣya rākṣasā vipradudruvuḥ ।
6.56.24 ॥

tamāpatantaṁ saṅkruddhaṁ rākṣasānāṁ bhayāvaham ।
dadarśākampano vīraścukrodha ca nanāda ca ।
6.56.25 ॥

sa caturdaśabhirbāṇaiḥ śitairdehavidāraṇaiḥ ।
nirbibheda hanūmantaṁ mahāvīryamakampanaḥ ।
6.56.26 ॥

sa tadā pratividdhastu bahvībhiḥ śaravṛṣṭibhiḥ ।
hanumān dadṛśe vīraḥ prarūḍha iva sānumān ।
6.56.27 ॥

virarāja mahākāyo mahāvīryo mahāmanāḥ ।
puṣpitāśokasaṅkāśo vidhūma iva pāvakaḥ ।
6.56.28 ॥

tato 'nyaṁ vṛkṣamutpāṭya katvā vegamanuttamam ।
śirasyabhijaghānāśu rākṣasendramakampanam ।
6.56.29 ॥

sa vṛkṣeṇa hatastena sakrodhena mahātmanā ।
rākṣaśo vānarendreṇa papāta ca mamāra ca ।
6.56.30 ॥

taṁ dṛṣṭvā nihataṁ bhūmau rākṣasendramakampanam ।
vyathitā rākṣasāḥ sarve kṣitikampa iva drumāḥ ।
6.56.31 ॥

tyaktapraharaṇāḥ sarve rākṣasāste parājitāḥ ।
laṅkāmabhiyayustrastā vānaraistairabhidrutāḥ ।
6.56.32 ॥

te muktakeśāḥ sambhrāntā bhagnamānāḥ parājitāḥ ।
sravacchramajalairaṅgaiḥ śvasanto vipradudruvuḥ ।
6.56.33 ॥

anyonyaṁ pramamanthuste viviśurnagaraṁ bhayāt ।
pṛṣṭhataste susammūḍhāḥ prekṣamāṇā muhurmuhuḥ ।
6.56.34 ॥

teṣu laṅkāṁ praviṣṭeṣu rākṣaseṣu mahābalāḥ ।
sametya harayaḥ sarve hanumantamapūjayan ।
6.56.35 ॥

so 'pi prahṛṣṭastān sarvān harīn pratyabhyapūjayat ।
hanumān sattvasampanno yathārhamanukūlataḥ ।
6.56.36 ॥

vineduśca yathāprāṇaṁ harayo jitakāśinaḥ ।
cakarṣuśca punastatra saprāṇānapi rākṣasān ।
6.56.37 ॥

sa vīraśobhāmabhajanmahākapiḥ sametya rakṣāṁsi nihatya mārutiḥ ।
mahāsuraṁ bhīmamamitranāśanaṁ yathaiva viṣṇurbalinaṁ camūmukhe ।
6.56.38 ॥

apūjayan devagaṇāstadā kapiṁ svayaṁ ca rāmo 'tibalaśca lakṣmaṇaḥ ।
tathaiva sugrīvamukhāḥ plavaṅgamā vibhīṣaṇaścaiva mahābalastathā ।
6.56.39 ॥