युद्धकाण्डम्Yuddha Kāṇḍa

vajradaṁṣṭraṁ hataṁ śrutvā vāliputreṇa rāvaṇaḥ ।
balādhyakṣamuvācedaṁ kṛtāñjalimavasthitam ।
6.55.1 ॥

śīghraṁ niryāntu durdharṣā rākṣasā bhīmavikramāḥ ।
akampanaṁ puraskṛtya sarvaśastraprakovidam ।
6.55.2 ॥

eṣa śāstā ca goptā ca netā ca yudhi sammataḥ ।
bhūtikāmaśca me nityaṁ nityaṁ ca samarapriyaḥ ।
6.55.3 ॥

eṣa jeṣyati kākutsthau sugrīvaṁ ca mahābalam ।
vānarāṁścāparān ghorān haniṣyati parantapaḥ ।
6.55.4 ॥

parigṛhya sa tāmājñāṁ rāvaṇasya mahābalaḥ ।
balaṁ santvarayāmāsa tadā laghuparākramaḥ ।
6.55.5 ॥

tato nānāpraharaṇā bhīmākṣā bhīmadarśanāḥ ।
niṣpetū rakṣasāṁ mukhyā balādhyakṣapracoditāḥ ।
6.55.6 ॥

rathamāsthāya vipulaṁ taptakāñcanakuṇḍalaḥ ।
meghābho meghavarṇaśca meghasvanamahāsvanaḥ ।
rākṣasaiḥ saṁvṛto bhīmaistadā niryātyakampanaḥ ।
6.55.7 ॥

na hi kampayituṁ śakyaḥ surairapi mahāmṛdhe ।
akampanastatasteṣāmāditya iva tejasā ।
6.55.8 ॥

tasya nirdhāvamānasya saṁrabdhasya yuyatsayā ।
akasmāddainyamāgacchaddhayānāṁ rathavāhinām ।
6.55.9 ॥

vyasphurannayanaṁ cāsya savyaṁ yuddhābhinandinaḥ ।
vivarṇo mukhavarṇaśca gadgadaścābhavat svanaḥ ।
6.55.10 ॥

abhavat sudine cāpi durdinaṁ rūkṣamārutam ।
ūcuḥ khagā mṛgāḥ sarve vācaḥ krūrā bhayāvahāḥ ।
6.55.11 ॥

sa siṁhopacitaskandhaḥ śārdūlasamavikramaḥ ।
tānutpātānacintyaiva nirjagāma raṇājiram ।
6.55.12 ॥

tadā nirgacchatastasya rakṣasaḥ saha rākṣasaiḥ ।
babhūva sumahānnādaḥ kṣobhayanniva sāgaram ।
6.55.13 ॥

tena śabdena vitrastā vānarāṇāṁ mahācamūḥ ।
drumaśailapraharaṇā yoddhuṁ samavatiṣṭhata ।
6.55.14 ॥

teṣāṁ yuddhaṁ mahāraudraṁ sañjajñe harirakṣasām ।
rāmarāvaṇayorarthe samabhityaktajīvinām ।
6.55.15 ॥

sarve hyati balāḥ śūrāḥ sarve parvatasannibhāḥ ।
harayo rākṣasāścaiva parasparajighāṁsavaḥ ।
6.55.16 ॥

teṣāṁ vinardatāṁ śabdaḥ saṁyuge 'titarasvinām ।
suśruve sumahān krodhādanyonyamabhigarjatām ।
6.55.17 ॥

rajaścāruṇavarṇābhaṁ subhīmamabhavadbhṛśam ।
udbhūtaṁ harirakṣobhiḥ saṁrurodha diśo daśa ।
6.55.18 ॥

anyonyaṁ rajasā tena kauśeyoddhūtapāṇḍunā ।
saṁvṛtāni ca bhūtāni dadṛśurna raṇājire ।
6.55.19 ॥

na dhvajā na patākā vā carma vā turago 'pi vā ।
āyudhaṁ syandanaṁ vā 'pi dadṛśe tena reṇunā ।
6.55.20 ॥

śabdaśca sumahāṁsteṣāṁ nardatāmabhidhāvatām ।
śrūyate tumule yuddhe na rūpāṇi cakāśire ।
6.55.21 ॥

harīneva susaṅkruddhā harayo jaghnurāhave ।
rākṣasāścāpi rakṣāṁsi nijaghnustimire tadā ।
6.55.22 ॥

parāṁścaiva vinighnantaḥ svāṁśca vānararākṣasāḥ ।
rudhirārdrāṁ tadā cakrurmahīṁ paṅkānulepanām ।
6.55.23 ॥

tatastu rudhiraugheṇa siktaṁ vyapagataṁ rajaḥ ।
śarīraśavasaṅkīrṇā babhūva ca vasundharā ।
6.55.24 ॥

drumaśaktiśilāprāsairgadāparighatomaraiḥ ।
harayo rākṣasāścaiva jaghnuranyonyamojasā ।
6.55.25 ॥

bāhubhiḥ parighākārairyuddhyantaḥ parvatopamāḥ ।
harayo bhīmakarmāṇo rākṣasān jaghnurāhave ।
6.55.26 ॥

rākṣasāstvapi saṅkruddhāḥ prāsatomarapāṇayaḥ ।
kapīnnijaghnire tatra śastraiḥ paramadāruṇaiḥ ।
6.55.27 ॥

akampanaḥ susaṅkruddho rākṣasānāṁ camūpatiḥ ।
saṁharṣayati tān sarvān rākṣasān bhīmavikramān ।
6.55.28 ॥

harayastvapi sakṣāṁsi mahādrumamahāśmabhiḥ ।
vidārayantyabhikramya śastrāṇyācchidya vīryataḥ ।
6.55.29 ॥

etasminnantare vīrā harayaḥ kumudo nalaḥ ।
maindaśca dvividaḥ kruddhāścakrurvegamanuttamam ।
6.55.30 ॥

te tu vṛkṣairmahāvegā rākṣasānāṁ camūmukhe ।
kadanaṁ sumahaccakrurlīlayā hariyūthapāḥ ।
mamanthū rākṣasān sarve vānarā gaṇaśo bhṛśam ।
6.55.31 ॥