युद्धकाण्डम्Yuddha Kāṇḍa

balasya ca nighātena aṅgadasya jayena ca ।
rākṣasaḥ krodhamāviṣṭo vajradaṁṣṭro mahābalaḥ ।
6.54.1 ॥

sa visphārya dhanurghoraṁ śakrāśanisamasvanam ।
vānarāṇāmanīkāni prākiraccharavṛṣṭibhiḥ ।
6.54.2 ॥

rākṣasāścāpi mukhyāste ratheṣu samavasthitāḥ ।
nānāpraharaṇāḥ śūrāḥ prāyuddhyanta tadā raṇe ।
6.54.3 ॥

vānarāṇāṁ tu śūrā ye sarve te plavagarṣabhāḥ ।
āyuddhyanta śilāhastāḥ samavetāḥ samantataḥ ।
6.54.4 ॥

tatrāyudhasahasrāṇi tasminnāyodhane bhṛśam ।
rākṣasāḥ kapimukhyeṣu pātayāñcakrire tadā ।
6.54.5 ॥

vānarāścāpi rakṣassu girīn vṛkṣān mahāśilāḥ ।
pravīrāḥ pātayāmāsurmattavāraṇasannibhāḥ ।
6.54.6 ॥

śūrāṇāṁ yuddhyamānānāṁ samareṣvanivartinām ।
tadrākṣasagaṇānāṁ ca suyuddhaṁ samavartata ।
6.54.7 ॥

prabhinnaśirasaḥ kecidbhinnaiḥ pādaiśca bāhubhiḥ ।
śastrairarpitadehāstu rudhireṇa samukṣitāḥ ।
6.54.8 ॥

harayo rākṣasāścaiva śerate gāṁ samāśritāḥ ।
kaṅkagṛdhravalairāḍhyā gomāyugaṇasaṅkulāḥ ।
6.54.9 ॥

kabandhāni samutpeturbhīruṇāṁ bhīṣaṇāni vai ।
6.54.10 ॥

bhujapāṇiśiraśchinnāśchinnakāyāśca bhūtale ।
vānarā rākṣasāścāpi nipetustatra vai raṇe ।
6.54.11 ॥

tato vānarasainyena hanyamānaṁ niśācaram ।
prābhajyata balaṁ sarvaṁ vajradaṁṣṭrasya paśyataḥ ।
6.54.12 ॥

rākṣasān bhayavitrastān hanyamānān plavaṅgamaiḥ ।
dṛṣṭvā sa roṣatāmrākṣo vajradaṁṣṭraḥ pratāpavān ।
6.54.13 ॥

praviveśa dhanuṣpāṇistrāsayan harivāhinīm ।
śarairvidārayāmāsa kaṅkapatrairajihmagaiḥ ।
6.54.14 ॥

bibheda vānarāṁstatra saptāṣṭau nava pañca ca ।
vivyādha paramakruddho vajradaṁṣṭraḥ pratāpavān ।
6.54.15 ॥

trastāḥ sarve harigaṇāḥ śaraiḥ saṅkṛttakandharāḥ ।
aṅgadaṁ sampradhāvanti prajāpatimiva prajāḥ ।
6.54.16 ॥

tato harigaṇān bhagnān dṛṣṭvā vālisutastadā ।
krodhena vajradaṁṣṭraṁ tamudīkṣantamudaikṣata ।
6.54.17 ॥

vajradaṁṣṭro 'ṅgadaścobhau saṅgatau harirākṣasau ।
ceratuḥ paramakruddhau harimattagajāviva ।
6.54.18 ॥

tataḥ śarasahasreṇa vāliputraṁ mahābalaḥ ।
jaghāna marmadeśeṣu mātaṅgamiva tomaraiḥ ।
6.54.19 ॥

rudhirokṣitasarvāṅgo vālisūnurmahābalaḥ ।
cikṣepa vajradaṁṣṭrāya vṛkṣaṁ bhīmaparākramaḥ ।
6.54.20 ॥

dṛṣṭvā ' 'patantaṁ taṁ vṛkṣamasambhrāntaśca rākṣasaḥ ।
ciccheda bahudhā so 'pi nikṛttaḥ patito bhuvi ।
6.54.21 ॥

taṁ dṛṣṭvā vajradaṁṣṭrasya vikramaṁ plavagarṣabhaḥ ।
pragṛhya vipulaṁ śailaṁ cikṣepa ca nanāda ca ।
6.54.22 ॥

samāpatantaṁ taṁ dṛṣṭvā rathādāplutya vīryavān ।
gadāpāṇirasambhrāntaḥ pṛthivyāṁ samatiṣṭhata ।
6.54.23 ॥

sā 'ṅgadena gadā ' 'kṣiptā gatvā tu raṇamūrdhani ।
6.54.24 ॥

sacakrakūbaraṁ sāśvaṁ pramamātha rathaṁ tadā ।
6.54.25 ॥

tato 'nyaṁ girimākṣipya vipulaṁ drumabhūṣitam ।
vajradaṁṣṭrasya śirasi pātayāmāsa so 'ṅgadaḥ ।
6.54.26 ॥

abhavacchoṇitodgārī vajradaṁṣṭraḥ sa mūrcchitaḥ ।
muhūrtamabhavanmūḍho gadāmāliṅgya niḥśvasan ।
6.54.27 ॥

sa labdhasañjño gadayā vāliputramavasthitam ।
jaghāna paramakruddho vakṣodeśe niśācaraḥ ।
gadāṁ tyaktvā tatastatra muṣṭiyuddhamavartata ।
6.54.28 ॥

anyonyaṁ jaghnatustatra tāvubhau harirākṣasau ।
rudhirodgāriṇo tau tu praharairjanitaśramau ।
babhūvatuḥ suvikrāntāvaṅgārakabudhāviva ।
6.54.29 ॥

tataḥ paramatejasvī aṅgadaḥ kapikuñjaraḥ ।
utpāṭya vṛkṣaṁ sthitavān bahupuṣpaphalāñcitam ।
6.54.30 ॥

jagrāha cārṣabhaṁ carma khaḍgaṁ ca vipulaṁ śubham ।
kiṅkiṇījālasañchannaṁ carmaṇā ca pariṣkṛtam ।
6.54.31 ॥

vicitrāṁśceraturmārgān ruṣitau kapirākṣasau ।
jaghnatuśca tadā 'nyonyaṁ nirdayaṁ jayakāṅkṣiṇau ।
6.54.32 ॥

vraṇaiḥ sāstrairaśobhetāṁ puṣpitāviva kiṁśukau ।
yuddhyamānau pariśrāntau jānubhyāmavanīṁ gatau ।
6.54.33 ॥

nimeṣāntaramātreṇa aṅgadaḥ kapikuñjaraḥ ।
udatiṣṭhata dīptākṣo daṇḍāhata ivoragaḥ ।
6.54.34 ॥

nirmalena sudhautena khaḍgenāsya mahacchiraḥ ।
jaghāna vajradaṁṣṭrasya vālisūnurmahābalaḥ ।
6.54.35 ॥

rudhirokṣitagātrasya babhūva patitaṁ dvidhā ।
saroṣaparivṛttākṣaṁ śubhaṁ khaḍgahataṁ śiraḥ ।
6.54.36 ॥

vajradaṁṣṭraṁ hataṁ dṛṣṭvā rākṣasā bhayamohitāḥ ।
trastāḥ pratyapatan laṅkāṁ vadhyamānāḥ plavaṅgamai ।
viṣaṇṇavadanā dīnā hriyā kiñcidavāṅmukhāḥ ।
6.54.37 ॥

nihatya taṁ vajradharaprabhāvaḥ sa vālisūnuḥ kapisainyamadhye ।
jagāma harṣaṁ mahito mahābalaḥ sahasranetrastridaśairivāvṛtaḥ ।
6.54.38 ॥