युद्धकाण्डम्Yuddha Kāṇḍa

dhūmrākṣaṁ nihataṁ śrutvā rāvaṇo rākṣaseśvaraḥ ।
krodhena mahatā ' 'viṣṭo niśvasannurago yathā ।
6.53.1 ॥

dīrghamuṣṇaṁ viniśvasya krodhena kaluṣīkṛtaḥ ।
abravīdrākṣasaṁ śūraṁ vajradaṁṣṭraṁ mahābalam ।
6.53.2 ॥

gaccha tvaṁ vīra niryāhi rākṣasaiḥ parivāritaḥ ।
jahi dāśarathiṁ rāmaṁ sugrīvaṁ vānaraiḥ saha ।
6.53.3 ॥

tathetyuktvā drutataraṁ māyāvī rākṣaseśvaraḥ ।
nirjagāma balai sārdhaṁ bahubhiḥ parivāritaḥ ।
6.53.4 ॥

nāgairaśvaiḥ kharairuṣṭraiḥ saṁyuktaḥ susāmāhitaḥ ।
patākādhvajacitraiśca rathaiśca samalaṅkṛtaḥ ।
6.53.5 ॥

tato vicitrakeyūramukuṭaiśca vibhūṣitaḥ ।
tanutrāṇi ca saṁruddhya sadhanurniryayau drutam ।
6.53.6 ॥

patākālaṅkṛtaṁ dīptaṁ taptakāñcanabhūṣaṇam ।
rathaṁ pradakṣiṇaṁ kṛtvā samārohaccamūpatiḥ ।
6.53.7 ॥

yaṣṭibhistomaraiścitraiḥ śūlaiśca musalairapi ।
bhindipālaiśca pāśaiśca śaktibhiḥ paṭṭiśairapi ।
6.53.8 ॥

khaḍgaiścakrairgadābhiśca niśitaiśca paraśvadhaiḥ ।
padātayaśca niryānti vividhāḥ śastrapāṇayaḥ ।
vicitravāsasaḥ sarve dīptā rākṣasapuṅgavāḥ ।
6.53.9 ॥

gajā madotkaṭāḥ śūrāścalanta iva parvatāḥ ।
te yuddhakuśalai rūḍhāstomarāṅkuśapāṇibhiḥ ।
6.53.10 ॥

anye lakṣaṇasaṁyuktāḥ śūrārūḍhā mahābalāḥ ।
6.53.11 ॥

tadrākṣasabalaṁ ghoraṁ viprasthitamaśobhata ।
prāvṛṭkāle yathā meghā nardamānāḥ savidyutaḥ ।
6.53.12 ॥

nissṛtā dakṣiṇadvārādaṅgado yatra yūthapaḥ ।
teṣāṁ niṣkramamāṇānāmaśubhaṁ samajāyata ।
6.53.13 ॥

ākāśādvighanāttīvrā ulkāścābhyapataṁstadā ।
vamantyaḥ pāvakajvālāḥ śivā ghoraṁ vavāśire ।
6.53.14 ॥

vyāharanti mṛgā ghorā rakṣasāṁ nidhanaṁ tadā ।
samāpatanto yodhāstu prāskhalan bhayamohitāḥ ।
6.53.15 ॥

etānautpātikān dṛṣṭvā vajradaṁṣṭro mahābalaḥ ।
dhairyamālambya tejasvī nirjagāma raṇotsukaḥ ।
6.53.16 ॥

tāṁstu niṣkramato dṛṣṭvā vānarā jitakāśinaḥ ।
praṇeduḥ sumahānādān pūrayaṁśca diśo daśa ।
6.53.17 ॥

tataḥ pravṛttaṁ tumulaṁ harīṇāṁ rākṣasaiḥ saha ।
ghorāṇāṁ bhīmarūpāṇāmanyonyavadhakāṅkṣiṇām ।
6.53.18 ॥

niṣpatanto mahotsāhā bhinnadehaśirodharāḥ ।
rudhirokṣitasarvāṅgā nyapatan jagatītale ।
6.53.19 ॥

kecidanyonyamāsādya śūrāḥ parighapāṇayaḥ ।
cikṣipurvividhaṁ śastraṁ samareṣvanivartinaḥ ।
6.53.20 ॥

drumāṇāṁ ca śilānāṁ ca śastrāṇāṁ cāpi nisvanaḥ ।
śrūyate sumahāṁstatra ghoro hṛdayabhedanaḥ ।
6.53.21 ॥

rathanemisvanastatra dhanuṣaścāpi nisvanaḥ ।
śaṅkhabherīmṛdaṅgānāṁ babhūva tumulaḥ svanaḥ ।
6.53.22 ॥

kecidastrāṇi saṁsṛjya bāhuyuddhamakurvata ।
6.53.23 ॥

talaiśca caraṇaiścāpi muṣṭibhiśca drumairapi ।
jānubhiśca hatāḥ kecidbhinnadehāśca rākṣasāḥ ।
śilābhiścūrṇitāḥ kecidvānarairyuddhadurmadaiḥ ।
6.53.24 ॥

vajradaṁṣṭro bhṛśaṁ bāṇai raṇe vitrāsayan harīn ।
cacāra lokasaṁhāre pāśahasta ivāntakaḥ ।
6.53.25 ॥

balavanto 'straviduṣo nānāpraharaṇā raṇe ।
jaghnurvānarasainyāni rākṣasāḥ krodhamūrcchitāḥ ।
6.53.26 ॥

nighnuto rākṣasān dṛṣṭvā sarvān vālisuto raṇe ।
krodhena dviguṇāviṣṭaḥ saṁvartaka ivānalaḥ ।
6.53.27 ॥

tān rākṣasagaṇān sarvān vṛkṣamudyamya vīryavān ।
aṅgadaḥ krodhatāmrākṣaḥ siṁhaḥ kṣudramṛgāniva ।
cakāra kadanaṁ ghoraṁ śakratulyaparākramaḥ ।
6.53.28 ॥

aṅgadābhihatāstatra rākṣasā bhīmavikramāḥ ।
vibhinnaśirasaḥ peturvikṛttā iva pādapāḥ ।
6.53.29 ।
iva ॥

rathairaśvairdhvajaiścitraiḥ śarīrairharirakṣasām ।
rudhireṇa ca sañchannā bhūmirbhayakarī tadā ।
6.53.30 ॥

hārakeyūravastraiśca śastraiśca samalaṅkṛtā ।
bhūmirbhāti raṇe tatra śāradīva yathā niśā ।
6.53.31 ॥

aṅgadasya ca vegena tadrākṣasabalaṁ mahat ।
prākampata tadā tatra pavanenāmbudo yathā ।
6.53.32 ॥