युद्धकाण्डम्Yuddha Kāṇḍa

dhūmrākṣaṁ prekṣya niryāntaṁ rākṣasaṁ bhīmavikramam ।
vinedurvānarāḥ sarve prahṛṣṭā yuddhakāṅkṣiṇaḥ ।
6.52.1 ॥

teṣāṁ sutumulaṁ yuddhaṁ sañjajñe harirakṣasām ।
anyonyaṁ pādapairghoraṁ nighnatāṁ śūlamudgaraiḥ ।
6.52.2 ॥

ghoraiśca parighaiścitraistriśūlaiścāpi saṁhataiḥ ।
rākṣasairvānarā ghorairvinikṛttāḥ samantataḥ ।
6.52.3 ॥

vānarai rākṣasāścāpi drumairbhūmau samīkṛtāḥ ।
rākṣasāścāpi saṅkruddhā vānarānniśitaiḥ śaraiḥ ।
vivyadhurghorasaṅkāśaiḥ kaṅkapatrairajihmagaiḥ ।
6.52.4 ॥

te gadābhiśca bhīmābhiḥ paṭṭiśaiḥ kūṭamudgaraiḥ ।
6.52.5 ।
ścāpi saṅkruddhā vānarānniśitaiḥ śaraiḥ ॥

vidāryamāṇā rakṣobhirvānarāste mahābalāḥ ।
amarṣājjanitoddharṣāścakruḥ karmāṇyabhītavat ।
6.52.6 ॥

śaranirbhinnagātrāste śūlanirbhinnadehinaḥ ।
jagṛhuste drumāṁstatra śilāśca hariyūthapāḥ ।
6.52.7 ॥

te bhīmavegā harayo nardamānāstatastataḥ ।
mamanthū rākṣasān bhīmānnāmāni ca babhāṣire ।
6.52.8 ॥

tadvabhūvādbhutaṁ ghoraṁ yuddhaṁ vānararakṣasām ।
śilābhirvividhābhiśca bahubhiścaiva pādapaiḥ ।
6.52.9 ॥

rākṣasā mathitāḥ kecidvānarairjitakāśibhiḥ ।
vavamū rudhiraṁ kecinmukhai rudhirabhojanāḥ ।
6.52.10 ॥

pārśveṣu dāritāḥ kecit kecidrāśīkṛtā drumaiḥ ।
śilābhiścūrṇitāḥ kecit keciddantairvidāritāḥ ।
6.52.11 ॥

dhvajairvimathitairbhagnaiḥ kharaiśca vinipātitaiḥ ।
rathairvidhvaṁsitaiścāpi patitai rajanīcaraiḥ ।
6.52.12 ॥

gajendraiḥ parvatākāraiḥ parvatāgrairvanaukasām ।
mathitairvājibhiḥ kīrṇaṁ sārohairvasudhātalam ।
6.52.13 ॥

vānarairbhīmavikrāntairāplutyāplutya vegitaiḥ ।
rākṣasāḥ karajaistīkṣṇairmukheṣu vinikartitāḥ ।
6.52.14 ॥

vivarṇavadanā bhūyo viprakīrṇaśiroruhāḥ ।
mūḍhāḥ śoṇitagandhena nipeturdharaṇītale ।
6.52.15 ॥

anye paramasaṅkruddhā rākṣasā bhīmanisvanāḥ ।
talairevābhidhāvanti vajrasparśasamairharīn ।
6.52.16 ॥

vānarairāpatantaste vegitā vegavattaraiḥ ।
muṣṭibhiścaraṇairdantaiḥ pādapaiścāvapothitāḥ ।
vānarairhanyamānāste rākṣasā vipradudruvuḥ ।
6.52.17 ॥

sainyaṁ tu vidrutaṁ dṛṣṭvā dhūmrākṣo rākṣasarṣabhaḥ ।
krodhena kadanaṁ cakre vānarāṇāṁ yuyutsatām ।
6.52.18 ॥

prāsaiḥ pramathitāḥ kecidvānarāḥ śoṇitasravāḥ ।
mudgarairāhatāḥ kecit patitā dharaṇītale ।
6.52.19 ॥

parighairmathitāḥ kecidbhindipālairvidāritāḥ ।
paṭṭiśairāhatāḥ kecidvihvalanto gatāsavaḥ ।
6.52.20 ॥

kecidvinihatāḥ śūlai rudhirārdrā vanaukasaḥ ।
kecidvidrāvitā naṣṭāḥ sabalai rākṣasairyudhi ।
6.52.21 ॥

vibhinnahṛdayāḥ kecidekapārśvena dāritāḥ ।
vidāritā striśūlaiśca kecidāntrairviniḥsṛtāḥ ।
6.52.22 ॥

tatsubhīmaṁ mahāyuddhaṁ harirākṣasasaṅkulam ।
prababhau śabdabahulaṁ śilāpādapasaṅkulam ।
6.52.23 ॥

dhanurjyātantrimadhuraṁ hikkātālasamanvitam ।
mandastanitasaṅgītaṁ yuddhagāndharvamābabhau ।
6.52.24 ॥

dhūmrākṣastu dhanuṣpāṇirvānarān raṇamūrdhani ।
hasan vidrāvayāmāsa diśastu śaravṛṣṭibhiḥ ।
6.52.25 ॥

dhūmrākṣeṇārditaṁ sainyaṁ vyathitaṁ dṛśya mārutiḥ ।
abhyavartata saṅkruddhaḥ pragṛhya vipulāṁ śilām ।
6.52.26 ॥

krodhāddviguṇatāmrākṣaḥ pitṛtulyaparākramaḥ ।
śilāṁ tāṁ pātayāmāsa dhūmrākṣasya rathaṁ prati ।
6.52.27 ॥

āpatantīṁ śilāṁ dṛṣṭvā gadāmudyamya sambhramāt ।
rathādāplutya vegena vasudhāyāṁ vyatiṣṭhata ।
6.52.28 ॥

sā pramathya rathaṁ tasya nipapāta śilā bhuvi ।
sacakrakūbaraṁ sāśvaṁ sadhvajaṁ saśarāsanam ।
6.52.29 ॥

sa bhaṅktvā tu rathaṁ tasya hanumān mārutātmajaḥ ।
rakṣasāṁ kadanaṁ cakre saskandhaviṭapairdrumaiḥ ।
6.52.30 ॥

vibhinnaśiraso bhūtvā rākṣasāḥ śoṇitokṣitāḥ ।
drumaiḥ pravyathitāścānye nipeturdharaṇītale ।
6.52.31 ॥

vidrāvya rāsakṣaṁ sainyaṁ hanumān mārutātmajaḥ ।
gireḥ śikharamādāya dhūmrākṣamabhidudruve ।
6.52.32 ॥

tamāpatantaṁ dhūmrākṣo gadāmudyamya vīryavān ।
vinardamānaḥ sahasā hanumantamabhidravat ।
6.52.33 ॥

tataḥ kruddhastu vegena gadāṁ tāṁ bahukaṇṭakām ।
pātayāmāsa dhūmrākṣo mastake tu hanūmataḥ ।
6.52.34 ॥

tāḍitaḥ sa tayā tatra gadayā bhīmarūpayā ।
6.52.35 ॥

sa kapirmārutabalastaṁ prahāramacintayan ।
dhūmrākṣasya śiromadhye giriśṛṅgamapātayat ।
6.52.36 ॥

sa vihvalitasarvāṅgo giriśṛṅgeṇa tāḍitaḥ ।
papāta sahasā bhūmau vikīrṇa iva parvataḥ ।
6.52.37 ॥

dhūmrākṣaṁ nihataṁ dṛṣṭavā hataśeṣā niśācarāḥ ।
trastāḥ praviviśurlaṅkāṁ vadhyamānāḥ plavaṅgamaiḥ ।
6.52.38 ॥

sa tu pavanasuto nihatya śatruṁ kṣatajavahāḥ saritaśca sannikīrya ।
ripuvadhajanitaśramo mahātmā mudamagamat kapibhiśca pūjyamānaḥ ।
6.52.39 ॥