युद्धकाण्डम्Yuddha Kāṇḍa

athovāca mahātejā harirājo mahābalaḥ ।
kimiyaṁ vyathitā senā mūḍhavāteva naurjale ।
6.50.1 ॥

sugrīvasya vacaḥ śrutvā vāliputro 'ṅgado 'bravīt ।
6.50.2 ॥

na tvaṁ paśyasi rāmaṁ ca lakṣmaṇaṁ ca mahābalam ।
śarajālācitau vīrāvubhau daśarathātmajau ।
śaratalpe mahātmānau śayānau rudhirokṣitau ।
6.50.3 ॥

athābravīdvānarendraḥ sugrīvaḥ putramaṅgadam ।
nānimittamidaṁ manye bhavitavyaṁ bhayena tu ।
6.50.4 ॥

viṣaṇṇavadanā hyete tyaktapraharaṇā diśaḥ ।
prapalāyanti harayastrāsādutphullalocanāḥ ।
6.50.5 ॥

anyonyasya na lajjante na nirīkṣanti pṛṣṭhataḥ ।
viprakarṣanti cānyonyaṁ patitaṁ laṅghayanti ca ।
6.50.6 ॥

etasminnantare vīro gadāpāṇirvibhīṣaṇaḥ ।
sugrīvaṁ vardhayāmāsa rāghavaṁ ca niraikṣata ।
6.50.7 ॥

vibhīṣaṇaṁ taṁ sugrīvo dṛṣṭvā vānarabhīṣaṇam ।
ṛkṣarājaṁ samīpasthaṁ jāmbavantamuvāca ha ।
6.50.8 ॥

vibhīṣaṇo 'yaṁ samprapto yaṁ dṛṣṭvā vānararṣabhāḥ ।
vidravanti paritrastā rāvaṇātmajaśaṅkayā ।
6.50.9 ॥

śīghrametān susantrastān bahudhā vipradhāvitān ।
praryavasthāpayākhyāhi vibhīṣaṇamupasthitam ।
6.50.10 ॥

sugrīveṇaivamuktastu jāmbavānṛkṣapārthivaḥ ।
vānarān sāntvayāmāsa sannirudhya pradhāvataḥ ।
6.50.11 ॥

te nivṛttāḥ punaḥ sarve vānarāstyaktasambhramāḥ ।
ṛkṣarājavacaḥ śrutvā taṁ ca dṛṣṭvā vibhīṣaṇam ।
6.50.12 ॥

vibhīṣaṇastu rāmasya dṛṣṭvā gātraṁ śaraiścitam ।
lakṣmaṇasya ca dharmātmā babhūva vyathitendriyaḥ ।
6.50.13 ॥

jalaklinnena hastena tayornetre pramṛjya ca ।
śokasampīḍitamanā ruroda vilalāpa ca ।
6.50.14 ॥

imau tau sattvasampannau vikrāntau priyasaṁyugau ।
imāmavasthāṁ gamitau rākṣasaiḥ kūṭayodhibhiḥ ।
6.50.15 ॥

bhrātuḥ putreṇa me tena duṣputreṇa durātmanā ।
rākṣasyā jihmayā buddhyā cālitāvṛjuvikramau ।
6.50.16 ॥

śarairimāvalaṁ viddhau rudhireṇa samukṣitau ।
vasudhāyāmimau suptau dṛśyete śalyakāviva ।
6.50.17 ॥

yayorvīryamupāśritya pratiṣṭhā kāṅkṣitā mayā ।
tāvubhau dehanāśāya prasuptau puruṣarṣabhau ।
6.50.18 ॥

jīvannadya vipanno 'smi naṣṭarājyamanorathaḥ ।
prāptapratijñaśca ripuḥ sakāmo rāvaṇaḥ kṛtaḥ ।
6.50.19 ॥

evaṁ vilapamānaṁ taṁ pariṣvajya vibhīṣaṇam ।
sugrīvaḥ sattvasampanno harirājo 'bravīdidam ।
6.50.20 ॥

rājyaṁ prāpsyasi dharmajña laṅkāyāṁ nātra saṁśayaḥ ।
rāvaṇaḥ saha putreṇa sakāmaṁ neha lapsyate ।
6.50.21 ॥

na rujā pīḍitāvetāvubhau rāghavalakṣmaṇau ।
tyaktvā mohaṁ vadhiṣyete sagaṇaṁ rāvaṇaṁ raṇe ।
6.50.22 ॥

tamenaṁ sāntvayitvā tu samāśvāsya ca rākṣasam ।
suṣeṇaṁ śvaśuraṁ pārśve sugrīvastamuvāca ha ।
6.50.23 ॥

saha śūrairharigaṇairlabdhasañjñāvarindamau ।
gaccha tvaṁ bhrātarau gṛhya kiṣkindhāṁ rāmalakṣmaṇau ।
6.50.24 ॥

ahaṁ tu rāvaṇaṁ hatvā saputraṁ sahabāndhavam ।
maithilīmānayiṣyāmi śakro naṣṭāmiva śriyam ।
śrutvaitadvānarendrasya suṣeṇo vākyamabravīt ।
6.50.25 ॥

daivāsuraṁ mahadyuddhamanubhūtaṁ sudāruṇam ।
tadā sma dānavā devān śarasaṁsparśakovidāḥ ।
6.50.26 ॥

nijaghnuḥ śastraviduṣaśchādayanto muhurmuhuḥ ।
6.50.27 ॥

tānārtānnaṣṭasañjñāṁśca parāsūṁśca bṛhaspatiḥ ।
vidyābhirmantrayuktābhiroṣadhībhiścikitsati ।
6.50.28 ॥

tānyauṣadhānyānayituṁ kṣīrodaṁ yāntu sāgaram ।
javena vānarāḥ śīghraṁ sampātipanasādayaḥ ।
harayastu vijānanti pārvatīstā mahauṣadhīḥ ।
6.50.29 ॥

sañjīvakaraṇīṁ divyāṁ viśalyāṁ devanirmitām ।
6.50.30 ।
.50.2 ।
sampātipanasādayaḥ ।
candraśca nāma droṇaśca kṣīrode sāgarottame ।
amṛtaṁ yatra mathitaṁ tatra te paramauṣadhī ।
6.50.31 ॥

ayaṁ vāyusuto rājan hanumāṁstatra gacchatu ।
6.50.32 ॥

etasminnantare vāyurmeghāṁścāpi savidyutaḥ ।
paryasyan sāgare toyaṁ kampayanniva medinīm ।
6.50.33 ॥

mahatā pakṣavātena sarvadvīpamahādrumāḥ ।
nipeturbhinnaviṭapāḥ samūlā lavaṇāmbhasi ।
6.50.34 ॥

abhavan pannagāstrastā bhoginastatravāsinaḥ ।
śīghraṁ sarvāṇi yādāṁsi jagmuśca lavaṇārṇavam ।
6.50.35 ॥

tato muhūrtādgaruḍaṁ vainateyaṁ mahābalam ॥

vānarā dadṛśuḥ sarvejvalantamiva pāvakam ।
6.50.36 ॥

tamāgatamabhiprekṣya nāgāste vipradudruvuḥ ।
yaistau satpuruṣau baddhau śarabhūtairmahābalau ।
6.50.37 ॥

tataḥ suparṇaḥ kākutsthau dṛṣṭvā pratyabhinanditaḥ ।
vimamarśa ca pāṇibhyāṁ mukhe candrasamaprabhe ।
6.50.38 ॥

vainateyena saṁspṛṣṭāstayoḥ saṁruruhurvraṇāḥ ।
suvarṇe ca tanū snigdhe tayorāśu babhūvatuḥ ।
6.50.39 ॥

tejo vīryaṁ balaṁ cauja utsāhaśca mahāguṇaḥ ।
pradarśanaṁ ca buddhiśca smṛtiśca dviguṇaṁ tayoḥ ।
6.50.40 ॥

tāvutthāpya mahāvīryau garuḍo vāsavopamau ।
ubhau tau sasvaje hṛṣṭau rāmaścainamuvāca ha ।
6.50.41 ॥

bhavatprasādādvyasanaṁ rāvaṇiprabhavaṁ mahat ।
āvāmiha vyatikrāntau pūrvavadbalinau kṛtau ।
6.50.42 ॥

yathā tātaṁ daśarathaṁ yathā 'jaṁ ca pitāmaham ।
tathā bhavantamāsādya hṛdayaṁ me prasīdati ।
6.50.43 ॥

ko bhavān rūpasampanno divyasraganulepanaḥ ।
vasāno viraje vastre divyābharaṇabhūṣitaḥ ।
6.50.44 ॥

tamuvāca mahātejā vainateyo mahābalaḥ ।
patatrirājaḥ prītātmā harṣaparyākulekṣaṇaḥ ।
6.50.45 ॥

ahaṁ sakhā te kākutstha priyaḥ prāṇo bahiścaraḥ ।
garutmāniha samprāpto yuvābhyāṁ sāhyakāraṇāt ।
6.50.46 ॥

asurā vā mahāvīryā dānavā vā mahābalāḥ ।
surāścāpi sagandharvāḥ puraskṛtya śatakratum ।
6.50.47 ॥

nemaṁ mokṣayituṁ śaktāḥ śarabandhaṁ sudāruṇam ।
māyābalādindrajitā nirmitaṁ krūrakarmaṇā ।
6.50.48 ॥

ete nāgāḥ kādraveyā stīkṣṇadaṁṣṭrā viṣolbaṇāḥ ।
rakṣomāyāprabhāvena śarā bhūtvā tvadāśritāḥ ।
6.50.49 ॥

sabhāgyaścāsi dharmajña rāma satyaparākrama ।
lakṣmaṇena saha bhrātrā samare ripughātinā ।
6.50.50 ॥

imaṁ śrutvā tu vṛttāntaṁ tvaramāṇo 'hamāgataḥ ।
sahasā yuvayoḥ snehāt sakhitvamanupālayan ।
6.50.51 ॥

mokṣitau ca mahāghorādasmāt sāyakabandhanāt ।
apramādaśca kartavyo yuvābhyāṁ nityameva hi ।
6.50.52 ॥

prakṛtyā rākṣasāḥ sarve saṅgrāme kūṭayodhinaḥ ।
śūrāṇāṁ śuddhabhāvānāṁ bhavatāmārjavaṁ balam ।
6.50.53 ॥

tanna viśvasitavyaṁ vo rākṣasānāṁ raṇājire ।
etenaivopamānena nityaṁ jihmā hi rākṣasāḥ ।
6.50.54 ॥

evamuktvā tato rāmaṁ suparṇaḥ sumahābalaḥ ।
pariṣvajya suhṛt snigdhamāpraṣṭumupacakrame ।
6.50.55 ॥

sakhe rāghava dharmajña ripūṇāmapi vatsala ।
abhyanujñātumicchāmi gamiṣyāmi yathāgatam ।
6.50.56 ॥

na ca kautūhalaṁ kāryaṁ sakhitvaṁ prati rāghava ।
kṛtakarmā raṇe vīraḥ sakhitvamanuvetsyasi ।
6.50.57 ॥

bālavṛddhāvaśeṣāṁ tu laṅkāṁ kṛtvā śarormibhiḥ ।
rāvaṇaṁ ca ripuṁ hatvā sītāṁ samupalapsyase ।
6.50.58 ॥

ityevamuktvā vacanaṁ suparṇaḥ śīghravikramaḥ ।
rāmaṁ ca virujaṁ kṛtvā madhye teṣāṁ vanaukasām ।
6.50.59 ॥

pradakṣiṇaṁ tataḥ kṛtvā pariṣvajya ca vīryavān ।
jagāmākāśamāviśya suparṇaḥ pavano yathā ।
6.50.60 ॥

virujau rāghavau dṛṣṭvā tato vānarayūthapāḥ ।
siṁhanādāṁstadā nedurlāṅgūlān dudhuvustadā ।
6.50.61 ॥

tato bherīḥ samājaghnurmṛdaṅgāṁścāpyanādayan ।
dadhmuḥ śaṅkhān samprahṛṣṭāḥ kṣvelantyapi yathāpuram ।
6.50.62 ॥

āsphoṭyāsphoṭya vikrāntā vānarā nagayodhinaḥ ।
drumānutpāṭya vividhāṁstasthuḥ śatasahasraśaḥ ।
6.50.63 ॥

visṛjanto mahānādāṁstrāsayanto niśācarān ।
laṅkādvāraṇyupājagmuryoddhukāmāḥ plavaṅgamāḥ ।
6.50.64 ॥

tatastu bhīmastumulo ninādo babhūva śākhāmṛgayūthapānām ।
kṣaye nidāghasya yathā ghanānāṁ nādaḥ subhīmo nadatāṁ niśīthe ।
6.50.65 ॥