युद्धकाण्डम्Yuddha Kāṇḍa

ghoreṇa śarabandhena baddhau daśarathātmajau ।
niśvasantau yathā nāgau śayānau rudhirokṣitau ।
6.49.1 ॥

sarve te vānaraśreṣṭhāḥ sasugrīvā mahābalāḥ ।
parivārya mahātmānau tasthuḥ śokapariplutāḥ ।
6.49.2 ॥

etasminnantare rāmaḥ pratyabudhyata vīryavān ।
sthiratvāt sattvayogācca śaraiḥ sandānito 'pi san ।
6.49.3 ॥

tato dṛṣṭvā sarudhiraṁ viṣaṇṇaṁ gāḍhamarpitam ।
bhrātaraṁ dīnavadanaṁ paryadevayadāturaḥ ।
6.49.4 ॥

kiṁ nu me sītayā kāryaṁ kiṁ kāryaṁ jīvitena vā ।
śayānaṁ yo 'dya paśyāmi bhrātaraṁ yudhi nirjitam ।
6.49.5 ॥

śakyā sītāsamā nārī martyaloke vicinvatā ।
na lakṣmaṇasamo bhrātā sacivaḥ sāmparāyikaḥ ।
6.49.6 ॥

parityakṣyāmyahaṁ prāṇaṁ vānarāṇāṁ tu paśyatām ।
yadi pañcatvamāpannaḥ sumitrānandavardhanaḥ ।
6.49.7 ॥

kiṁ nu vakṣyāmi kausalyāṁ mātaraṁ kiṁ nu kaikayīm ।
kathamambhāṁ sumitrāṁ ca putradarśanalālasām ।
6.49.8 ॥

vivatsāṁ vepamānāṁ ca krośantīṁ kurarīmiva ।
kathamāśvāsayiṣyāmi yadā yāsyāmi taṁ vinā ।
6.49.9 ॥

kathaṁ vakṣyāmi śatrughnaṁ bharataṁ ca yaśasvinam ।
6.49.10 ॥

mayā saha vanaṁ yāto vinā tena gataḥ punaḥ ।
upālambhaṁ na śakṣyāmi soḍhuṁ bata sumitrayā ।
6.49.11 ॥

ihaiva dehaṁ tyakṣyāmi na hi jīvitumutsahe ।
6.49.12 ॥

dhiṅmāṁ duṣkṛtakarmāṇamanāryaṁ yatkṛte hyasau ।
lakṣmaṇaḥ patitaḥ śete śaratalpe gatāsuvat ।
6.49.13 ॥

tvaṁ nityaṁ sa viṣaṇṇaṁ māmāśvāsayasi lakṣmaṇa ।
gatāsurnādya śaknoṣi māmārtamabhibhāṣitum ।
6.49.14 ॥

yenādya nihatā yuddhe rākṣasā vinipātitāḥ ।
tasyameva kṣitau vīraḥ sa śete nihataḥ paraiḥ ।
6.49.15 ॥

śayānaḥ śaratalpe 'smin svaśoṇitapariplutaḥ ।
śarajālaiścito bhāti bhāskaro 'stamiva vrajan ।
6.49.16 ॥

bāṇābhihatamarmatvānna śaknotyabhibhāṣitum ।
rujā cābruvato 'pyasya dṛṣṭirāgeṇa sūcyate ।
6.49.17 ॥

yathaiva māṁ vanaṁ yāntamanuyāto mahādyutiḥ ।
ahamapyanuyāsyāmi tathaivainaṁ yamakṣayam ।
6.49.18 ॥

iṣṭabandhujano nityaṁ māṁ ca nityamanuvrataḥ ।
imāmadya gato 'vasthāṁ mamānāryasya durnayaiḥ ।
6.49.19 ॥

suruṣṭenāpi vīreṇa lakṣmaṇena na saṁsmare ।
paruṣaṁ vipriyaṁ vāpi śrāvitaṁ tu kadācana ।
6.49.20 ॥

visasarjaikavegena pañcabāṇaśatāni yaḥ ।
iṣvastreṣvadhikastasmāt kārtavīryācca lakṣmaṇaḥ ।
6.49.21 ॥

astrairastrāṇi yo hanyācchakrasyāpi mahātmanaḥ ।
so 'yamurvyāṁ hataḥ śete mahārhaśayanocitaḥ ।
6.49.22 ॥

yanmayā na kṛto rājā rākṣasānāṁ vibhīṣaṇaḥ ।
tacca mithyāpralaptaṁ māṁ pradhakṣyati na saṁśayaḥ ।
6.49.23 ॥

asminmuhūrte sugrīva pratiyātumito 'rhasi ।
matvā hīnaṁ mayā rājan rāvaṇo 'bhidravedbalī ।
6.49.24 ॥

aṅgadaṁ tu puraskṛtya sasainyaḥ sasuhṛjjanaḥ ।
sāgaraṁ tara sugrīva nīlena ca nalena ca ।
6.49.25 ॥

kṛtaṁ hanumatā kāryaṁ yadanyairduṣkaraṁ raṇe ।
ṛkṣarājena tuṣyāmi golāṅgūlādhipena ca ।
6.49.26 ॥

aṅgadena kṛtaṁ karma maindena dvividena ca ।
yuddhaṁ kesariṇā saṅkhye ghoraṁ sampātinā kṛtam ।
6.49.27 ॥

gavayena gavākṣeṇa śarabheṇa gajena ca ।
anyaiśca haribhiryuddhaṁ madarthe tyaktajīvitaiḥ ।
na cātikramituṁ śakyaṁ daivaṁ sugrīvamānuṣaiḥ ।
6.49.28 ॥

yattu śakyaṁ vayasyena suhṛdā ca parantapa ।
kṛtaṁ sugrīva tatsarvaṁ bhavatā dharmabhīruṇā ।
6.49.29 ॥

mitrakāryaṁ kṛtamidaṁ bhavadbhirvānararṣabhāḥ ।
anujñātā mayā sarve yatheṣṭaṁ gantumarhatha ।
6.49.30 ॥

śuśruvastasya te sarve vānarāḥ paridevanam ।
vartayāñcakuraśrūṇi netraiḥ kṛṣṇetarekṣaṇāḥ ।
6.49.31 ॥

tataḥ sarvāṇyanīkāni sthāpayitvā vibhīṣaṇaḥ ।
ājagāma gadāpāṇistvarito yatra rāghavaḥ ।
6.49.32 ॥

taṁ dṛṣṭvā tvaritaṁ yāntaṁ nīlāñjanacayopamam ।
vānarā dudruvuḥ sarve manyamānāstu rāvaṇim * ।
6.49.33 ॥