युद्धकाण्डम्Yuddha Kāṇḍa

yuddhyātāṁ tu tatasteṣāṁ vānarāṇāṁ mahātmanām ।
rakṣasāṁ sambabhūvātha balakopaḥ sudāruṇaḥ ।
6.43.1 ॥

te hayaiḥ kāñcanāpīḍairdhvajaiścāgniśikhopamaiḥ ।
rathaiścādityasaṅkāśaiḥ kavacaiśca manoramaiḥ ।
6.43.2 ॥

niryayū rākṣasavyāghrā nādayanto diśo daśa ।
rākṣasā bhīmakarmāṇo rāvaṇasya jayaiṣiṇaḥ ।
6.43.3 ॥

vānarāṇāmapi camūrbṛhatī jayamicchatām ।
abhyadhāvata tāṁ senāṁ rakṣasāṁ kāmarūpiṇām ।
6.43.4 ॥

etasminnantare teṣāmanyonyamabhidhāvatām ।
rakṣasāṁ vānarāṇāṁ ca dvandvayuddhamavartata ।
6.43.5 ॥

aṅgadenendrajit sārdhaṁ vāliputreṇa rākṣasaḥ ।
ayudhyata mahātejāstryambakeṇa yathā 'ntakaḥ ।
6.43.6 ॥

prajaṅghena ca sampātirnityaṁ durmarṣaṇo raṇe ।
jambumālinamārabdho hanumānapi vānaraḥ ।
6.43.7 ॥

saṅgataḥ sumahākrodho rākṣaso rāvaṇānujaḥ ।
samare tīkṣṇavegena mitraghnena vibhīṣaṇaḥ ।
6.43.8 ॥

tapanena gajaḥ sārdhaṁ rākṣasena mahābalaḥ ।
nikumbhena mahātejā nīlo 'pi samayuddhyata ।
6.43.9 ॥

vānarendrastu sugrīvaḥ praghasena samāgataḥ ।
saṅgataḥ samare śrīmān virūpākṣeṇa lakṣmaṇaḥ ।
6.43.10 ॥

āgniketuśca durdharṣo raśmiketuśca rākṣasaḥ ।
suptaghno yajñakopaśca rāmeṇa saha saṅgatāḥ ।
6.43.11 ॥

vajramuṣṭistu maindena dvividānaśaniprabhaḥ ।
rākṣasābhyāṁ sughorābhyāṁ kapimukhyau samāgatau ।
6.43.12 ॥

vīraḥ pratapano ghoro rākṣaso raṇadurdharaḥ ।
samare tīkṣṇavegena nalena samayuddhyata ।
6.43.13 ॥

dharmasya putro balavān suṣeṇa iti viśrutaḥ ।
sa vidyunmālinā sārdhamayudhyata mahākapiḥ ।
6.43.14 ॥

vānarāścāpare bhīmā rākṣasairaparaiḥ saha ।
dvandvaṁ samīyurbahudhā yuddhāya bahubhiḥ saha ।
6.43.15 ॥

tatrāsīt sumahadyuddhaṁ tumulaṁ romaharṣaṇam ।
rakṣasāṁ vānarāṇāṁ ca vīrāṇāṁ jayamicchatām ।
6.43.16 ॥

harirākṣasadehebhyaḥ prabhṛtāḥ keśaśādvalāḥ ।
śarīrasaṅghāṭavahāḥ prasasruḥ śoṇitāpagāḥ ।
6.43.17 ॥

ājaghānendrajit kruddho vajreṇeva śatakratuḥ ।
aṅgadaṁ gadayā vīraṁ śatrusainyavidāraṇam ।
6.43.18 ॥

tasya kāñcanacitrāṅgaṁ rathaṁ sāśvaṁ sasārathim ।
jaghāna samare śrīmānaṅgado vegavān kapiḥ ।
6.43.19 ॥

sampātistu tribhirbāṇaiḥ prajaṅghena samāhataḥ ।
nijaghānāśvakarṇena prajaṅghaṁ raṇamūrdhani ।
6.43.20 ॥

jambumālī rathasthastu rathaśaktyā mahābalaḥ ।
bibheda samare kruddho hanūmantaṁ stanāntare ।
6.43.21 ॥

tasya taṁ rathamāsthāya hanūmān mārutatmajaḥ ।
pramamātha talenāśu saha tenaiva rakṣasā ।
6.43.22 ॥

nadan pratapano ghoro nalaṁ so 'pyanvadhāvata ।
6.43.23 ॥

nalaḥ pratapanasyāśu pātayāmāsa cakṣuṣī ।
bhinnagātraḥ śaraistīkṣṇaiḥ kṣiprahastena rakṣasā ।
6.43.24 ॥

grasantamiva sainyāni praghasaṁ vānarādhipaḥ ।
sugrīvaḥ saptaparṇena nirbibheda jaghāna ca ।
6.43.25 ॥

agniketuśca durdharṣo raśmiketuśca rākṣasaḥ ।
suptaghno yajñakopaśca rāmaṁ nirbibhiduḥ śaraiḥ ।
6.43.26 ॥

teṣāṁ caturṇāṁ rāmastu śirāṁsi niśitaiḥ śarai ।
kruddhaścaturbhiściccheda ghorairagniśikhopamaiḥ ।
6.43.27 ॥

vajramuṣṭistu maindena muṣṭinā nihato raṇe ।
papāta sarathaḥ sāśvaḥ purāṭṭa iva bhūtale ।
6.43.28 ॥

nikumbhastu raṇe nīlaṁ nīlāñjanacayaprabham ।
nirbibheda śaraistīkṣṇaiḥ karairmeghamivāṁśumān ।
6.43.29 ॥

punaḥ śaraśatenātha kṣiprahasto niśācaraḥ ।
bibheda samare nīlaṁ nikumbhaḥ prajahāsa ca ।
6.43.30 ॥

tasyaiva rathacakreṇa nīlo viṣṇurivāhave ।
śiraściccheda samare nikumbhasya ca sāratheḥ ।
6.43.31 ॥

vajrāśanisamasparśo dvivido 'pyaśaniprabham ।
jaghāna giriśṛṅgeṇa miṣatāṁ sarvarakṣasām ।
6.43.32 ॥

dvividaṁ vānarendraṁ tu nagayodhinamāhave ।
śarairaśani saṅkāśaiḥ sa vivyādhāśaniprabhaḥ ।
6.43.33 ॥

sa śarairatividdhāṅgo dvividaḥ krodhamūrcchitaḥ ।
sālena sarathaṁ sāśvaṁ nijaghānāśaniprabham ।
6.43.34 ॥

vidyunmālī rathasthastu śaraiḥ kāñcanabhūṣaṇaiḥ ।
suṣeṇaṁ tāḍayāmāsa nanāda ca muhurmuhuḥ ।
6.43.35 ॥

taṁ rathasthamatho dṛṣṭvā suṣeṇo vānarottamaḥ ।
giriśṛṅgeṇa mahatā rathamāśu nyapātayat ।
6.43.36 ॥

lāghavena tu saṁyukto vidyunmālī niśācaraḥ ।
apakramya rathāttūrṇaṁ gadāpāṇiḥ kṣitau sthitaḥ ।
6.43.37 ॥

tataḥ krodhasamāviṣṭaḥ suṣeṇo haripuṅgavaḥ ।
śilāṁ sumahatīṁ gṛhya niśācaramabhidravat ।
6.43.38 ॥

tamāpatantaṁ gadayā vidyunmālī niśācaraḥ ।
vakṣasyabhijaghānāśu suṣeṇaṁ harisattamam ।
6.43.39 ॥

gadāprahāraṁ taṁ ghoramacintya plavagottamaḥ ।
tāṁ śilāṁ pātayāmāsa tasyorasi mahāmṛdhe ।
6.43.40 ॥

śilāprahārābhihato vidyunmālī niśācaraḥ ।
niṣpiṣṭahṛdayo bhūmau gatāsurnipapāta ha ।
6.43.41 ॥

evaṁ tairvānaraiḥ śūraiḥ śūrāste rajanīcarāḥ ।
dvandve vimṛditāstatra daityā iva divaukasaiḥ ।
6.43.42 ॥

nihataiḥ kuñjarairmattaistathā vānararākṣasaiḥ ।
cakrākṣayugadaṇḍaiśca bhagnairdharaṇisaṁśritaiḥ ।
babhūvāyodhanaṁ ghoraṁ gomāyugaṇasaṅkulam ।
6.43.43 ॥

kabandhāni samutpeturdikṣu vānararakṣasām ।
vimarde tumule tasmin devāsuraraṇopame ।
6.43.44 ॥

vidāryamāṇā haripuṅgavaistadā niśācarāḥ śoṇitadigdhagātrāḥ ।
punaḥ suyuddhaṁ tarasā samāsthitā divākarasyāstamayābhikāṅkṣiṇaḥ ।
6.43.45 ॥