युद्धकाण्डम्Yuddha Kāṇḍa

tataste rākṣasāstatra gatvā rāvaṇamandiram ।
nyavedayan purīṁ ruddhāṁ rāmeṇa saha vānaraiḥ ।
6.42.1 ॥

ruddhāṁ tu nagarīṁ śrutvā jātakrodho niśācaraḥ ।
vidhānaṁ dviguṇaṁ kṛtvā prāsādaṁ so 'dhyarohata ।
6.42.2 ॥

sa dadarśāvṛtāṁ laṅkāṁ saśailavanakānanām ।
asaṅkhyeyairharigaṇaiḥ sarvato yuddhakāṅkṣibhiḥ ।
6.42.3 ॥

sa dṛṣṭvā vānaraiḥ sarvāṁ vasudhāṁ kavalīkṛtām ।
kathaṁ kṣapayitavyāḥ syuriti cintāparo 'bhavat ।
6.42.4 ॥

sa cintayitvā suciraṁ dhairyamālambya rāvaṇaḥ ।
rāghavaṁ hariyūthāṁśca dadarśāyatalocanaḥ ।
6.42.5 ॥

rāghavaḥ saha sainyena mudito nāma pupluve ।
laṅkāṁ dadarśa guptāṁ vai sarvato rākṣasairvṛtām ।
6.42.6 ॥

dṛṣṭvā dāśarathirlaṅkāṁ citradhvajapatākinīm ।
jagāma sahasā sītāṁ dūyamānena cetasā ।
6.42.7 ॥

atra sā mṛgaśāvākṣī matkṛte janakātmajā ।
pīḍyate śokasantaptā kṛśā sthaṇḍilaśāyinī ।
6.42.8 ॥

pīḍyamānāṁ sa dharmātmā vaidehīmanucintayan ।
kṣipramājñāpayāmāsa vānarān dviṣatāṁ vadhe ।
6.42.9 ॥

evamukte tu vacane rāmeṇākliṣṭakarmaṇā ।
saṅgharṣamāṇāḥ plavagāḥ siṁhanādairanādayan ।
6.42.10 ॥

śikharairvikirāmaināṁ laṅkāṁ muṣṭibhireva vā ।
iti sma dadhire sarve manāṁsi hariyūthapāḥ ।
6.42.11 ॥

udyamya giriśṛṅgāṇi śikharāṇi mahānti ca ।
tarūṁścotpāṭya vividhāṁstiṣṭhanti hariyūthapāḥ ।
6.42.12 ॥

prekṣato rākṣasendrasya tānyanīkāni bhāgaśaḥ ।
rāghavapriyakāmārthaṁ laṅkāmāruruhustadā ।
6.42.13 ॥

te tāmravaktrā hemābhā rāmārthe tyaktajīvitāḥ ।
laṅkāmevābhyavartanta sālatālaśilāyudhāḥ ।
6.42.14 ॥

te drumaiḥ parvatāgraiśca muṣṭibhiśca plavaṅgamāḥ ।
prākārāgrāṇyaraṇyāni mamanthustoraṇāni ca ।
6.42.15 ॥

parikhāḥ pūrayanti sma prasannasalilāyutāḥ ।
pāṁsubhiḥ parvatāgraiśca tṛṇaiḥ kāṣṭhaiśca vānarāḥ ।
6.42.16 ॥

tataḥ sahasrayūthāśca koṭīyūthāśca vānarāḥ ।
koṭīśatayutāścānye laṅkāmāruruhustadā ।
6.42.17 ॥

kāñcanāni pramṛdnantastoraṇāni plavaṅgamāḥ ।
kailāsaśikharābhāṇi gopurāṇi pramathya ca ।
6.42.18 ॥

āplavantaḥ plavantaśca garjantaśca plavaṅgamāḥ ।
laṅkāṁ tāmabhidhāvanti mahāvāraṇasannibhāḥ ।
6.42.19 ॥

jayatyatibalo rāmo lakṣmaṇaśca mahābalaḥ ।
rājā jayati sugrīvo rāghaveṇābhipālitaḥ ।
6.42.20 ॥

ityevaṁ ghoṣayantaśca garjantaśca plavaṅgamāḥ ।
abhyadhāvanta laṅkāyāḥ prākāraṁ kāmarūpiṇaḥ ।
6.42.21 ॥

vīrabāhuḥ subāhuśca nalaśca vanagocaraḥ ।
nipīḍyopaniviṣṭāste prākāraṁ hariyūthapāḥ ।
etasminnantare cakruḥ skandhāvāraniveśanam ।
6.42.22 ॥

pūrvadvāraṁ tu kumudaḥ koṭībhirdaśabhirvṛtaḥ ।
āvṛtya balavāṁstasthau haribhirjitakāśibhiḥ ।
6.42.23 ॥

sāhāyyārthaṁ tu tasyaiva niviṣṭaḥ praghaso hariḥ ।
panasaśca mahābāhurvānarairbahubhirvṛtaḥ ।
6.42.24 ॥

dakṣiṇaṁ dvāramāgamya vīraḥ śatavaliḥ kapiḥ ।
āvṛtya balavāṁstasthau viṁśatyā koṭibhirvṛtaḥ ।
6.42.25 ॥

suṣeṇaḥ paścimadvāraṁ gatastārāpitā hariḥ ।
āvṛtya balavāṁstasthau ṣaṣṭikoṭibhirāvṛtaḥ ।
6.42.26 ॥

uttaraṁ dvāramāsādya rāmaḥ saumitriṇā saha ।
āvṛtya balavāṁstasthau sugrīvaśca harīśvaraḥ ।
6.42.27 ॥

golāṅgūlo mahākāyo gavākṣo bhīmadarśanaḥ ।
vṛtaḥ koṭyā mahāvīryastasthau rāmasya pārśvataḥ ।
6.42.28 ॥

ṛkṣāṇāṁ bhīmavegānāṁ dhūmraḥ śatrunibarhaṇaḥ ।
vṛtaḥ koṭyā mahāvīryastastho rāmasya pārśvataḥ ।
6.42.29 ॥

sannaddhastu mahāvīryo gadāpāṇirvibhīṣaṇaḥ ।
vṛto yattaistu sacivaistasthau tatra mahābalaḥ ।
6.42.30 ॥

gajo gavākṣo gavayaḥ śarabho gandhamādanaḥ ।
samantāt paridhāvanto rarakṣurharivāhinīm ।
6.42.31 ॥

tataḥ kopaparītātmā rāvaṇo rākṣaseśvaraḥ ।
niryāṇaṁ sarvasainyānāṁ drutamājñāpayattadā ।
6.42.32 ॥

etacchutvā tato vākyaṁ rāvaṇasya mukhodgatam ।
sahasā bhīmanirghoṣamudghuṣṭaṁ rajanīcaraiḥ ।
6.42.33 ॥

tataḥ pracoditā bheryaścandrapāṇḍarapuṣkarāḥ ।
hemakoṇāhatā bhīmā rākṣasānāṁ samantataḥ ।
6.42.34 ॥

vineduśca mahāghoṣāḥ śaṅkhāḥ śatasahasraśaḥ ।
rākṣasānāṁ sughorāṇāṁ mukhamārutapūritāḥ ।
6.42.35 ॥

te babhuḥ śubhanīlāṅgāḥ saśaṅkā rajanīcarāḥ ।
vidyunmaṇḍalasannaddhāḥ sabalākā ivāmbudāḥ ।
6.42.36 ॥

niṣpatanti tataḥ sainyā hṛṣṭā rāvaṇacoditāḥ ।
samaye pūryamāṇasya vegā iva mahodadheḥ ।
6.42.37 ॥

tato vānarasainyena mukto nādaḥ samantataḥ ।
malayaḥ pūrito yena sa sānuprasthakandaraḥ ।
6.42.38 ॥

śaṅkhadundubhisaṅghuṣṭaḥ siṁhanādastarasvinām ।
pṛthivīṁ cāntarikṣaṁ ca sāgaraṁ caiva nādayan ।
6.42.39 ॥

gajānāṁ bṛṁhitaiḥ sārdhaṁ hayānāṁ heṣitairapi ।
rathānāṁ nemighoṣaiśca rakṣasāṁ vadanasvanaḥ ।
6.42.40 ॥

etasminnantare ghoraḥ saṅgrāmaḥ samavartata ।
rakṣasāṁ vānarāṇāṁ ca yathā devāsure purā ।
6.42.41 ॥

te gadābhiḥ pradīptābhiḥ śaktiśūlaparaśvadhaiḥ ।
nijaghnurvānarān ghorāḥ kathayantaḥ svavikramān ।
6.42.42 ॥

rājā jayati sugrīva iti śabdo mahānabhūt ।
6.42.43 ॥

rājan jaya jayetyuktvā svasvanāmakathāntataḥ ।
tathā vṛkṣairmahākāyāḥ parvatāgraiśca vānarāḥ ।
nijaghnustāni rakṣāṁsi nakhairdantaiśca vegitāḥ ।
6.42.44 ॥

rākṣasāstvapare bhīmāḥ prākārasthā mahīgatān ।
bhindipālaiśca khaḍgaiśca śūlaiścaiva vyadārayan ।
6.42.45 ॥

vānarāścāpi saṅkruddhāḥ prākārasthān mahīgatāḥ ।
rākṣasān pātayāmāsuḥ samāplutya plavaṅgamāḥ ।
6.42.46 ॥

sa samprahārastumulo māṁsaśoṇitakardamaḥ ।
rakṣasāṁ vānarāṇāṁ ca sambabhūvādbhutopamaḥ ।
6.42.47 ॥